Lako Tiko ga kei na Yalo Tabu, Mo Dina ena Nomu Yalayala

“Lako tiko ga ena yalo tabu, oni na sega sara ni vakayacora na gagadre vakayago.”​—KALA. 5:16.

1. Na papitaiso cava a yaco ena siga ni Penitiko?

ERATOU duivosavosa na imuri Jisu ena gauna ratou papitaiso kina ena yalo tabu ena Penitiko 33 S.K. Ratou vakaraitaka tale ga kina e dua na isolisoli cakamana ni yalo tabu. (1 Kor. 12:​4-10) E yaga vakacava na isolisoli qo, a yaga tale ga vakacava na nona ivunau na yapositolo o Pita? E levu e “mosi sara ga na lomadra.” Era veivutuni ra qai papitaiso ena veiuqeti i Pita. E kaya na iVolatabu: “Era papitaiso ena siga ya e rauta ni tolunaudolu ni tarai ira vakabibi na nona vosa.” (Caka. 2:​22, 36-41) Me vaka ga na veidusimaki i Jisu, de dua era a papitaiso ena yaca i Tamada, Luvena kei na yalo tabu.​—Maciu 28:19.

2, 3. (a) Vakamacalataka na duidui ni papitaiso ena yalo tabu kei na papitaiso ena yaca ni yalo tabu. (b) Cava na vuna mera papitaiso kece kina na lotu vaKarisito dina nikua?

² E duidui beka na papitaiso ena yalo tabu kei na papitaiso ena yaca ni yalo tabu? Io. O ira na papitaiso ena yalo tabu era sucu tale mera luve vakayalo ni Kalou. (Joni 3:3) Era lumuti mera tui ra bete ena Matanitu vakalomalagi ni Kalou, ra qai lewe ni yago vakayalo i Karisito. (1 Kor. 12:13; Kala. 3:27; Vkta. 20:6) Koya gona, a veipapitaisotaki ena yalo tabu o Jiova ena siga ni Penitiko, kei na veisiga tarava, a digi ira kina eso mera itaukei vata kei Karisito. (Roma 8:​15-17) Ia vakacava na papitaiso ena yaca ni yalo tabu, e dau vakayacori wasoma ena soqo ni tabacakacaka kei na noda soqo ni tikina na tamata i Jiova nikua?

³ Era dau papitaiso na lotu vaKarisito dina me ivakaraitaki ni nodra yalayala vakatabakidua vua na Kalou o Jiova. E vinakati tale ga qo vei ira na lai bula i lomalagi kei na milioni nikua e nodra inuinui na bula tawamudu e vuravura. Se mani cava nona inuinui e dua, na papitaiso ena yaca i Tamada, Luvena kei na yalo tabu e bibi vua e dua me vakadonui koya kina na Kalou. E vinakati vei ira kece na lotu vaKarisito papitaiso mera “lako tiko ga ena yalo tabu.” (Wilika Kalatia 5:16.) O sa lako tiko kei na yalo tabu, o dina tale tiko ga ena nomu yalayala?

Na iBalebale ni “Lako Tiko ga ena Yalo Tabu”

4. Na cava na ibalebale ni noda “lako tiko ga ena yalo tabu”?

⁴ E okati ena noda “lako tiko ga ena yalo tabu,” noda muria na veidusimaki ni yalo tabu kei na noda vakalaiva me vakamuai keda. E kena ibalebale ga ya me lewai keda na yalo tabu ena noda bula e veisiga. Na Kalatia wase 5 e vakaduiduitaka na veivakamuai ni yalo tabu kei na cakacaka vakayago.​—Wilika Kalatia 5:​17, 18.

5. Ni veidusimaki na yalo tabu, na cakacaka cava eda na sega ni cakava?

⁵ Ni o dusimaki ena yalo tabu, o na sega ni cakava na cakacaka ni itovo vakayago. Qo e okati kina “na veidauci, ivalavala tawasavasava, ivalavala vakasisila, qaravi matakau, qaravi tevoro, veicati, veivala, vuvu, cudru, duiyaloyalo, veisei, muritamata, veisisivotaki, gunu ni vaqara mateni, marau vakalialia.” (Kala. 5:​19-21) E rawa ni tukuni ni sa ‘vakamatea na nomu ivakarau ni bula vakayago na veivuke ni yalo tabu.’ (Roma 8:​5, 13) Ena uqeti iko me dei nomu rai ena veika vakayalo, o na tokona na kena veidusimaki, o na sega tale ga ni vakalaiva na gagadre vakayago me lewai iko.

6. Vakamacalataka na ka e vinakati meda vuataka kina na itovo e umani ena vua ni yalo tabu.

⁶ Ni dusimaki iko na yalo tabu, o na vakaraitaka na itovo e umani ena “vua ni yalo tabu.” (Kala. 5:​22, 23) Qo ena vinakati kina na sasaga. Kena ivakatautauvata: E teivaka na qele e dua na dauteitei. Sega ni vakabekataki ni na gadrevi na siga kei na wai, ke sega ena sega ni tamusuki nona itei. Na yalo tabu e vaka tiko na siga, e vinakati na veidusimaki ni yalo tabu me qai laurai kina vei keda na kena itovo. Ia na cava ena rawati ke sega ni cakacaka vakaukaua na dauteitei? (Vkai. 10:4) Io, na lomamu e vaka na qele e teivaka na dauteitei ya, ke vinaka na ka o bucina e lomamu, o na vakila na kena vinaka, o na vuataka tale ga vakalevu na itovo e umani ena vua ni yalo tabu. Tarogi iko, ‘Au dau vakalaiva meu vuataka na itovo e umani ena vua ni yalo tabu?’

7. Na cava e bibi kina mo vulica qai vakananuma vakatitobu na Vosa ni Kalou ke o via bucina na itovo e umani ena vua ni yalo tabu?

⁷ Me rawa ni tamusuki vinaka na itei, ena vinakati vua na dauteitei me vakasuasuataka nona itei me rawa ni tamusuki vinaka kina. Me bucini na itovo e umani ena vua ni yalo tabu, o na vinakata na wai ni ka dina ena iVolatabu kei na kena e vakarautaki ena ivavakoso vaKarisito nikua. (Aisea 55:1) O sa rairai vakaraitaka vei ira e levu ni iVolatabu a volai ena veiuqeti ni yalo tabu. (2 Tim. 3:16) Kena ikuri, na dauveiqaravi e yalodina e vuku, e vakarautaka tiko mai na wai savasava ni ka dina ni iVolatabu. (Maciu 24:​45-47) E matata sara tu ga na tikina qo. Me dusimaki keda na yalo tabu, e dodonu meda wilika qai vakananuma vakatitobu na Vosa ni Kalou. Ke o sa cakava tiko qo, o sa vakatotomuri ira sara tiko ga na parofita ivakaraitaki vinaka era dau “vakadikeva ra qai vakasaqara matua” na itukutuku e vakarautaki. E bibi gona meda nanuma tiko ni o ira na agilosi era doka sara vakalevu na ka dina vakayalo me baleta na Kawa yalataki kei na ivavakoso vaKarisito lumuti.​—Wilika 1 Pita 1:​10-12.

E Rawa Vakacava Meda Dusimaki ena Yalo Tabu?

8. Na cava e bibi kina mo kerea na yalo tabu i Jiova?

⁸ E sega ni okati ga e ke na vulici ni iVolatabu kei na kena vakananumi vakatitobu. E vinakati mo kerea tiko ga na veivuke kei na veidusimaki i Jiova. E rawa ni “cakava vei keda na ka e uasivia sara na ka eda kerea se bau vakasamataka.” (Efeso 3:20; Luke 11:13) O na sauma vakacava ke dua e taroga, “Na cava meu taro tiko ga kina ke sa kila tu na Kalou ‘na ka au vinakata ni bera mada ga niu kerea’?” (Maciu 6:8) Dua oya, keda masuta na yalo tabu, eda sa vakaraitaka tiko nida nuitaki Jiova dina. Me kena ivakaraitaki, ke dua e kerea mo veivuke, o na saga ena nomu igu kece mo vukei koya. E kerea tale ga nomu veivuke baleta ni nuitaki iko. (Vakatauvatana Vosa Vakaibalebale 3:27.) Ena sala vata qori, e marautaka o Jiova ni o kerea na yalona tabu, ena qai solia dina vei iko.​—Vkai. 15:8.

9. Ena yaga vakacava vei iko nomu tiko ena soqoni vaKarisito mo dusimaki kina ena yalo tabu ni Kalou?

⁹ E dua tale na sala o na marautaka kina nona veidusimaki na yalo tabu ni Kalou, ya na soqoni, soqo ni tikina, kei na soqo cokovata. E bibi dina nomu sasagataka mo tiko ena soqoni va qori, o qai vakarorogo matua ena kena porokaramu. Nomu cakava qo ena uqeti iko mo kila kina na “ka vuni . . . ni Kalou.” (1 Kor. 2:10) E yaga tale ga nomu dau saumitaro wasoma. Vakasamataka tale mada na nomu soqoni tiko ena va na macawa sa oti. O laveliga vakavica ena nomu via saumitaro mo vakaraitaka kina nomu vakabauta? O raica ni se vinakati mo vakavinakataka na tikina qo? Ke vaka kina, vakadeitaka rawa na ka mo cakava ena vica na macawa mai qo. Ena raica o Jiova ni o vinakata dina mo vakaitavi, ena qai uqeti iko na yalona tabu me yaga vakalevu vei iko na soqoni.

10. Na veisureti cava e okati ena noda lako vata tiko kei na yalo tabu?

¹⁰ Noda lako vata kei na yalo tabu e okati kina noda ciqoma na veisureti eda wilika ena Vakatakila 22:17: “Erau kaya tiko ga na yalo tabu kei na yalewavou: ‘Mai!’ Me kaya tale ga o koya yadua e rogoca: ‘Mai!’ Me lako mai o koya yadua e karamaca; me mai gunuva wale na wai ni bula o koya yadua e vinakata.” Na yalo tabu e dusimaka tiko na ilawalawa lumuti era vaka na yalewavou, qai veisureti tiko ena gunuvi ni wai ni bula. Ke o sa ciqoma na veisureti, o na tukuna tale ga “Mai!” E dua dina na ka talei na noda vakataivi ena cakacaka ni veivakabulai qo!

11, 12. E veidusimaki vakacava na yalo tabu ena cakacaka vakavunau?

¹¹ E rawati na cakacaka bibi qo ena veidusimaki ni yalo tabu. Eda wilika ni veidusimaki na yalo tabu ena imatai ni senitiuri ena nodra cakacakataka na yalava vovou na daukaulotu. Na yapositolo o Paula kei ira nona itokani, a ‘sega ni vakatarai ratou na yalo tabu me ratou tukuna na vosa ena yasana o Esia,’ ratou sega tale ga ni vakatarai me ratou lako i Picinia. Eda sega ni kila sara vakamatata se sala cava a tarova kina na yalo tabu me ratou kua ni lako ena veivanua ya, ia e matata ga ni a dusimaki Paula na yalo tabu me vunau ena veivanua vakaUrope. Qori nona raivotutaka nona kere veivuke e dua na turaga ni Masitonia.​—Caka. 16:​6-10.

¹² E veidusimaki tale tiko ga nikua ena cakacaka vakavunau e vuravura raraba na yalo tabu i Jiova. E sega ni raivotutaki na ka me caka, ia e veidusimaki ga o Jiova vei ira na lumuti ena yalo tabu. E qai dusimaki ira na mataveitacini na yalo tabu mera cakava ena nodra igu kece na cakacaka vakavunau kei na veivakavulici. Sega ni vakabekataki ni o vakaitavi tale tiko ga ena cakacaka bibi qo. E rawa ni o marautaka vakalevu cake na cakacaka totoka qo?

13. O na muria vakacava na veidusimaki ni yalo tabu? Tukuna na kena ivakaraitaki.

¹³ E rawa ni o muria na veidusimaki ni yalo tabu ena nomu vakayagataka na idusidusi eso e vakarautaki vei keda. O Mihoko e dua na goneyalewa mai Japani, ni tekivu painia e nanuma ni sega ni ganiti koya na veisikovi lesu, qai sega tale ga ni kila me vosa vakacava ena sala e kauai kina na itaukei ni vale. Ia ena gauna vata qo, a tabaki mai ena Noda Cakacaka Vakaitalatala eso na vakatutu yaga eda rawa ni veisikovi lesu kina. Oti ga vakalailai, a tabaki sara e dua na ivola cebaceba e vakatokai A Satisfying Life​—How to Attain It. A vakadinadinataki ni yaga sara vakalevu na ivola cebaceba qo ena yalava i Japani. Mani vakamuria sara o Mihoko na vakatutu ena kena vakayagataki na ivola cebaceba qo, vakabibi ena veisikovi lesu. Sega ni bera sa vuli sara kei ira era sega ni dau tataleitaki tu e liu. E tukuna, “E levu tale noqu vuli iVolatabu​—e rauta ni le 12 ena dua ga na gauna​—qo e vakavuna meu kerea kina eso me tu vakawawa mada na nodra vakavulici!” Io, o na tatamusuki vakalevu ke o lako tiko ga kei na yalo tabu, o qai muria na veidusimaki i Jiova.

Nuitaka na Yalo Tabu ni Kalou

14, 15. (a) Nida ivalavala ca ena rawa vakacava meda dina ena noda yalayala? (b) Eda na kunea vakacava na itokani vinaka?

¹⁴ Ni o dua na italatala, e nomu itavi na cakacaka vakavunau. (Roma 10:14) O na rairai nanuma ni sega ni ganiti iko mo colata na itavi qo. Ia me vakataki ira ga na lumuti, o Jiova e lesi iko. (Wilika 2 Korinica 3:5.) O rawa ni dina ena nomu yalayala ni o solia nomu vinaka taucoko, o nuitaka tale ga na yalo tabu ni Kalou.

¹⁵ Ia e sega ni ka rawarawa vei keda na tamata ivalavala ca meda dina ena noda yalayala vua na noda Kalou uasivi o Jiova. Dua na dredre oya, ni so vei ira noda ilala eliu era na lomatarotarotaka na veisau ni ivakarau ni noda bula, ra qai rawa ni ‘vosavakacacataki keda.’ (1 Pita 4:4) Ia kua ni guilecava ni sa tiko noda itokani vou, qai bibi duadua ni rau noda itokani sara ga o Jiova kei Jisu Karisito. (Wilika Jemesa 2:​21-23.) E bibi tale ga meda kilai ira vinaka na mataveitacini ena ivavakoso, baleta nida “mataveitacini kece” e vuravura raraba. (1 Pita 2:17; Vkai. 17:17) O Jiova ena dusimaki keda meda kunei ira na itokani era dau veiuqeti vinaka.

16. E rawa vakacava meda vakataki Paula, oya nona ‘marau ni malumalumu’?

¹⁶ Era tiko eso noda itokani vinaka era dau veivuke ena ivavakoso, ia ena dredre tiko ga vei keda meda walia eso na ituvaki e dau yaco e veisiga. Na levu ni ka o sotava e rawa ni vakavu veilecayaki tale vei iko, o rawa ni nanuma tale ga ni na sega ni oti na leqa o sotava tiko. Qo e gauna vinaka meda torovi Jiova kina, da qai kerea nona yalo tabu. E vola na yapositolo o Paula: “Niu malumalumu, au sa qai kaukaua.” (Wilika 2 Korinica 4:​7-10; 12:10.) E kila o Paula ni rawa ni dusimaki keda na yalo tabu ni Kalou meda valuta kina noda malumalumu, se mani vakacava na keda ituvaki. Koya gona, na yalo tabu ni Kalou e rawa ni vakaukauataki keda ena gauna eda malumalumu kina kei na gauna eda gadreva kina na veivuke. E vola o Paula ni a rawa me ‘marau ni malumalumu.’ A vakila ni dau uqeti koya na yalo tabu ena gauna e dau malumalumu kina. E rawa ni dina tale ga qo vei keda!​—Roma 15:13.

17. Ena dusimaki iko vakacava na yalo tabu mo yacova na vanua o mua tiko kina?

¹⁷ Eda gadreva dina na yalo tabu ni Kalou me rawa nida dina ena noda yalayala vua na Kalou. Kaya mada ni o dua na kavetani ni waqa. E nomu isausau mo qaravi Jiova tawamudu. E vaka na cagi na yalo tabu nomu via vakamua na waqa mo rawa ni yacova na vanua o mua tiko kina. O sega ni vinakata mo veikauyaki ena yalo ni vuravura i Setani. (1 Kor. 2:12) E vinakati gona mo qara na matanicagi donu qai muria na vanua e goleva. Qo sara ga na yalo tabu. Ena dusimaki iko vakadodonu na yalo tabu ena vuku ni Vosa ni Kalou kei na isoqosoqo e dusimaka tiko nikua.

18. Cava e nomu inakinaki, cava na vuna?

¹⁸ Ke o sa vuli tiko kei ira na iVakadinadina i Jiova, o marautaka tiko na sosoqoni vakayalo kei ira, ia o se bera ga ni yalataki iko mo papitaiso, tarogi iko mada, ‘Na cava e tarovi au tiko?’ Ke o sa kila rawa na itavi ni yalo tabu ena kena vakayacori na inaki i Jiova nikua, o taleitaka na kena veidusimaki, cakava sara na ka dina o sa vulica. Ena vakalougatataki iko dina o Jiova. Ena solia vakayalololoma vei iko na yalona tabu. Ke o papitaiso ena vica na yabaki sa oti se sagavulu na yabaki sa oti, o na vakila dina na veidusimaki ni yalo tabu. O rairai vakadinadinataka qai kila na sala e vakaukauataki iko kina na Kalou ni vakayagataka na yalona tabu. Qori e rawa ni tawamudu sara. Koya gona, mo vakadeitaka mada ga mo lako tiko ga ena yalo tabu.

O se Nanuma?

• Na cava na ibalebale ni “lako tiko ga ena yalo tabu”?

• O na rawa vakacava ni “lako tiko ga ena yalo tabu”?

• O na dina vakacava ena nomu yalayala?

[iYaloyalo ena tabana e 15]

Na lomamu e vaka na qele, e vinakati na sasaga ena kena bucini

[iYaloyalo ena tabana e 17]

O dusimaki tiko ena Yalo Tabu ni Kalou?