Yalo Tabu ena iMatai ni Senitiuri kei na Gauna Qo
“Na ka kece qo e cakacaka ga kina na yalo tabu.”—1 KOR. 12:11.
1. Na cava eda na veivosakitaka ena ulutaga qo?
NIDA rogoca na vosa qo na Penitiko, eda lai nanuma sara kina eso na ka vakatubuqoroqoro! (Caka. 2:1-4) Na sovaraki ni yalo tabu ena gauna oya, e dusia ni sa veisau na sala e vakayagataka o Jiova me dusimaki ira kina na nona dauveiqaravi. Eda raica ena ulutaga sa oti, eso na sala e veidusimaki kina na yalo tabu ni Kalou vei ira na dauveiqaravi ena gauna makawa mera qarava kina na nodra ilesilesi dredre. Ia e duidui vakacava na sala e veidusimaki kina na yalo ni Kalou ni bera ni tauyavu na ivavakoso vaKarisito kei na imatai ni senitiuri? E yaga tale ga vakacava vei keda nikua na cakacaka ni yalo tabu? Meda dikeva mada.
“Raica! Au yalewa dauveiqaravi i Jiova!”
2. E vakila vakacava o Meri na cakacaka ni yalo tabu?
2 A tiko tale ga o Meri ena gauna a sovaraki kina na yalo tabu ena dua na rumu ni vale e cake e Jerusalemi. (Caka. 1:13, 14) Ia ni vo e tolusagavulu na yabaki me qai yaco qori, e vakadinadinataka o Meri na vakatubuqoroqoro ni kena cakacaka na yalo tabu i Jiova. E tokitaka o Jiova na bula i Luvena mai lomalagi i vuravura, vakavuna kina me bukete o Meri dina ni se bera ni tara tagane. Io, na “yalo tabu” e vakavuna na nona kunekune.—Maciu 1:20.
3, 4. Na itovo cava e vakaraitaka o Meri, eda na vakatotomuri koya vakacava?
3 Na cava a digitaki Meri kina o Jiova? Ni vakamacalataka na agilosi vei Meri na inaki i Jiova, e tukuna sara o Meri: “Raica! Au yalewa dauveiqaravi i Jiova! Me yaco mada ga vei au na nomuni vosa.” (Luke 1:38) Na ka e tukuna qori o Meri e laurai kina se yalewa vakacava, ia e sa kila makawa tu qori na Kalou. Na nona ciqoma totolo na itukutuku qori e vakaraitaka ni tu vakarau me cakava na ka e vinakata o Jiova. E sega mada ga ni taroga vua na agilosi na ka era na tukuna na lewenivanua me baleta na nona bukete se na nona leqataka ni na sega ni vakawatitaki koya o Josefa. Nona tukuna o Meri ni dauveiqaravi ni Kalou, e vakaraitaka ni nuitaki Jiova vakaoti.
4 Vakacava, o vakila ena so na gauna ni sa rui dredre na itavi vakalou o vakacolati kina? E vinaka meda taroga: ‘Au dau nuitaki Jiova vakaoti me walia na ituvaki au sotava me salavata kei na nona inaki? Au dau yalorawarawa ni cakava na loma i Jiova?’ Mo nuidei ni na solia na Kalou na yalona tabu vei ira era nuitaki koya mai vu ni lomadra ra qai talairawarawa ina nona veiliutaki cecere.—Caka. 5:32.
Dusimaki Pita na Yalo Tabu
5. E vakadinadinataka vakacava o Pita na kaukaua ni yalo tabu ni bera na Penitiko 33 S.K.?
5 Me vakataki Meri, e vakadinadinataka tale ga na yapositolo o Pita na veidusimaki ni yalo tabu ni bera na Penitiko 33 S.K. O Jisu e solia vei Pita kei ira na vo tale ni yapositolo na kaukaua mera vakasava kina na timoni. (Mari. 3:14-16) E sega ni vakamatatataki qori ena iVolatabu, ia e kena irairai ni a vakayagataka sara ga o Pita na kaukaua qori. E laurai tale ga na kaukaua ni Kalou ena gauna a tukuna kina o Jisu vei Pita me taubale ena dela ni wai na Kalili, a qai cakava vakakina o Pita. (Wilika Maciu 14:25-29.) E macala ga ni nuitaka o Pita na yalo tabu me dusimaki koya me rawa ni cakava kina na itavi levu e lesi vua. Ena qai dusimaki Pita kei ratou na vo ni tisaipeli na yalo tabu me ratou cakava e levu tale na itavi.
6. Ni sobuti Pita na yalo tabu, na cava a cakava ena Penitiko 33 S.K. kei na veiyabaki tarava?
6 Ena Solevu ni Penitiko 33 S.K., a sobuti Pita kei na so tale na yalo tabu mera vosataka vakacakamana na nodra vosa o ira na gole yani e Jerusalemi. Oti qori sa qai tucake o Pita me vosa vei ira na tu ekea. (Caka. 2:14-36) O Pita e dau rerere ena so na gauna qai totolo calacala, ia ena gauna e sobuti koya kina na yalo tabu e doudou sara ga me vosa, dina ni a vakacacani qai tukuni me kua tale ni vunau. (Caka. 4:18-20, 31) E vakayagataka na Kalou na yalona tabu me kila kina o Pita na ka vuni. (Caka. 5:8, 9) Na yalo tabu tale ga e vakaukauataki Pita me veivakaturi.—Caka. 9:40.
7. Ni sa lumuti o Pita, na ivakavuvuli cava i Jisu e qai matata vua?
7 Ni bera na Penitiko, a matata vei Pita e levu na ka dina a vakavuvulitaka o Jisu. (Maciu 16:16, 17; Joni 6:68) Ia eso tale na ka a sega ni matata vua. Kena ivakaraitaki, a sega ni kila o Pita ni na vakaturi o Karisito me dua na ka bula vakayalo ni oti e tolu na siga. A sega tale ga ni kila ni na tiko mai lomalagi na Matanitu ni Kalou. (Joni 20:6-10; Caka. 1:6) E vou sara ga vei Pita na vakasama ni rawa ni veisau e dua na tamata me ka bula vakayalo me qai veiliutaki ena Matanitu ni Kalou e lomalagi. Qori e qai matata ga vua ni sa lumuti ena yalo tabu me rawata tale ga na inuinui ni bula e lomalagi.
8. Na kilaka cava e rawa nira vulica ra qai kila na ‘so tale na sipi’ kei ira na lumuti?
8 Ni sobuti ratou na tisaipeli i Jisu na yalo tabu, sa qai matata eso na ka eratou sega ni kila e liu. Na yalo tabu e uqeti ira na vola na iVolatabu vaKirisi vaKarisito mera vakamacalataka na ka dina vakatubuqoroqoro me baleta na inaki i Jiova. (Efeso 3:8-11, 18) Nikua, e rawa nira vulica ra qai kila na ka dina qori na ‘so tale na sipi’ kei ira na lumuti. (Joni 10:16) Vakacava, o vakavinavinakataka na veidusimaki ni yalo tabu mo kila kina na Vosa ni Kalou?
‘E Sobuti Paula na Yalo Tabu’
9. Na cava a rawata o Paula ena veidusimaki ni yalo tabu?
9 Ni oti e dua se vica na yabaki mai na Penitiko 33 S.K., e qai sobuti Saula tale ga na yalo tabu, e kilai e muri me o Paula. E yaga dina vei keda na sala e dusimaki koya kina na yalo tabu. A dusimaki na yapositolo o Paula me vola e 14 na ivola ena iVolatabu. Me vakataki Pita ga, ena veidusimaki ni yalo tabu a rawa kina vei Paula me kila qai vola vakamatata na inuinui ni bula tawamate rawa kei na bula savasava e lomalagi. Ena veidusimaki ni yalo tabu e rawa tale ga vei Paula me veivakabulai, vakasava na timoni, qai vakaturi ira mada ga na mate! Ia e tiko e dua tale na vuna levu a sobuti Paula kina na yalo tabu. E tiko tale ga na vuna levu e dusimaki keda kina na yalo tabu nikua, dina nida sega ni rawata qori vakacakamana.
10. E dusimaki Paula vakacava na yalo tabu me vosa ena doudou?
10 Ni ‘sobuti Paula na yalo tabu,’ a doudou kina me vosataka e dua na daucakaisausau. Na ka e tukuna o Paula e uqeti koya sara ga na mata ni yasana o Saipurusi, ni a vakarorogo tiko ena gauna kece a vosa tiko kina o Paula! A ciqoma sara na ka dina na turaga qori ni “kurabuitaka na veika e vulica me baleti Jiova.” (Caka. 13:8-12) Macala ga ni kila o Paula ni bibi na yalo tabu ni Kalou me tukuna kina na ka dina. (Maciu 10:20) E muri, a kerea o Paula mera masulaki koya na ivavakoso e Efeso me rawa ni “vosa doudou.”—Efeso 6:18-20.
11. E dusimaki Paula vakacava na yalo tabu?
11 E sega wale ga ni dusimaki Paula na yalo tabu me vosa, ia eso na gauna e sega ni vakatara me vunau ena so na vanua. A dusimaki Paula na yalo tabu ena itekitekivu ni nona ilakolako vakadaukaulotu. (Caka. 13:2; wilika Cakacaka 16:6-10.) E se veidusimaki tiko ga o Jiova ena cakacaka vakavunau ni vakayagataka na yalona tabu. Me vakataki Paula ga, eda saga kece na dauveiqaravi i Jiova meda tukuna na ka dina ena doudou kei na gugumatua. E duidui na sala e dusimaki keda kina na yalo tabu ni Kalou ni vakatauvatani kei na gauna i Paula, ia eda nuidei ni vakayagataka o Jiova na yalona tabu mera kila kina na yalomalumalumu na ka dina.—Joni 6:44.
‘Levu na Mataqali Cakacaka’
12-14. Vakacava, e tautauvata na cakacaka ni yalo tabu ni Kalou vei ira na nona dauveiqaravi? Vakamacalataka.
12 E veiuqeti dina nida wilika na sala e vakalougatataki ira kina na ivavakoso lumuti ena imatai ni senitiuri o Jiova. Vakasamataka mada na vosa veiuqeti i Paula ena ivavakoso e Korinica me baleta na soli vakacakamana ni yalo tabu ena nona gauna: “E levu na mataqali isolisoli, ia e dua ga na yalo tabu; e levu na mataqali veiqaravi vakaitalatala, ia e dua ga na Turaga; e levu tale ga na mataqali cakacaka, ia e dua ga na Kalou e vakayacora na cakacaka kece qori vei ira kece na tamata.” (1 Kor. 12:4-6, 11) Io, na yalo tabu e rawa ni dusimaki ira na dauveiqaravi ni Kalou ena levu na sala me vakayacori kina e dua na inaki. Macala ga ni rawa nira dusimaki ena yalo tabu na “qelenisipi lailai” kei ira na ‘so tale na sipi.’ (Luke 12:32; Joni 10:16) Ia e sega ni tautauvata na sala e dusimaki keda yadua kina na yalo tabu.
13 Kena ivakaraitaki, era lesi ena yalo tabu na qase ni ivavakoso. (Caka. 20:28) Ia era sega ni qase ni ivavakoso kece na lumuti. Na cava e kena ibalebale qori? E duidui na sala e veidusimaki kina na yalo tabu vei ira na lewe ni ivavakoso.
14 Na yalo tabu e vakadeitaka vei ira na lumuti nira ‘wili mera luve’ ni Kalou, e vakayagataka tale ga na yalo tabu o Jiova me vakaturi Jisu ena bula tawamate e lomalagi. (Wilika Roma 8:11, 15.) Na yalo tabu vata ga qori a vakayagataka o Jiova me bulia kina na lomalagi kei na vuravura. (Vkte. 1:1-3) E solia o Jiova na yalo tabu vata ga oya vei Pisalieli me tara rawa kina na valeniveitavaki, vakaukauataki Samisoni me cakava na ka e sega ni bau cakava e dua, a rawa tale ga kina vei Pita me taubale e dela ni wai. Meda nanuma tiko ni sega ni tautauvata na noda dusimaki ena yalo tabu kei na nona lumuti ena yalo tabu e dua. Na nona lumuti ena yalo tabu e dua, e vakaraitaka ni qo e dua tale na sala vakasakiti e veidusimaki kina na yalo tabu. Na Kalou ga e lewa se o cei me lumuti ena yalona tabu.
15. Ena caka tiko ga na veilumuti ena yalo tabu? Vakamacalataka.
15 E levu na sala e dau veidusimaki kina na yalo tabu vei ira na dauveiqaravi ni Kalou. E dusimaki ira tiko me rauta ni vicavata na udolu na yabaki, qori ena gauna e se bera kina na veilumuti. A tekivu ena Penitiko 33 S.K. na veilumuti ni yalo tabu, ia ena sega ni caka tiko qo me tawamudu. Ena vakarau oti na veilumuti ena yalo tabu, ia ena dusimaki ira tiko ga na dauveiqaravi ni Kalou na yalo tabu mera cakava na inaki Jiova me tawamudu.
16. Na cava era sa cakava tiko na dauveiqaravi i Jiova nikua ena veidusimaki ni yalo tabu?
16 Na cava era sa cakava tiko na dauveiqaravi i Jiova nikua ena veidusimaki ni yalo tabu? E tukuna na Vakatakila 22:17: “Erau kaya tiko ga na yalo tabu kei na yalewavou: ‘Mai!’ Me kaya tale ga o koya yadua e rogoca: ‘Mai!’ Me lako mai o koya yadua e karamaca; me mai gunuva wale na wai ni bula o koya yadua e vinakata.” Ena veidusimaki ni yalo tabu, eda rawa kina ni veisureti vakalevu vei “koya yadua e vinakata” me gunuva na wai ni bula. Era liutaka sara tiko ga qo na lotu vaKarisito lumuti, ia era veitomani tale ga kina na so tale na sipi. E dusimaki rau na ilawalawa qo na yalo tabu me qaravi kina na cakacaka qori. O ira era lewena e dua vei rau na ilawalawa oya, era sa yalataki ira vei Jiova ena nodra papitaiso “ena yaca i Tamada kei na Luvena kei na yalo tabu.” (Maciu 28:19) Era vakaraitaka tale ga na itovo e umani ena vua ni yalo tabu. (Kala. 5:22, 23) Me vakataki ira ga na lumuti, o ira na so tale na sipi era vakalaiva na yalo ni Kalou me dusimaki ira. Ena veidusimaki ni yalo tabu, era saga ena nodra vinaka kece mera savasava me vakadonui ira kina na Kalou.—2 Kor. 7:1; Vkta. 7:9, 14.
Kerea Tiko ga na Yalo Tabu
17. Eda na vakaraitaka vakacava ni dusimaki keda tiko na yalo tabu?
17 Ke da mani nuitaka na bula tawamudu e lomalagi se e vuravura, e rawa ni solia o Jiova “na kaukaua e uasivia na kaukaua ni tamata” meda rawa ni yalodina tiko ga kina me tawamudu. (2 Kor. 4:7) De dua ni o vunau tiko, era na sega ni kauai eso ra qai vakalialiai iko. Ia meda nanuma tiko ‘ke da vakasewasewani ena yaca i Karisito, meda marau ni tiko vata kei keda na igu savasava ni Kalou kei na kena lagilagi.’—1 Pita 4:14.
18, 19. Ena vukei keda vakacava o Jiova ena nona vakayagataka na yalona tabu, na cava meda cakava tiko ga?
18 Na Kalou e solia na yalona tabu vei ira era kerea. Ena vakavinakataka na noda taledi qai uqeti keda meda gugumatua ena noda sokalou. “Na Kalou sara ga e cakacaka tiko vei kemuni me salavata kei na ka e vinakata, moni kua kina ni vinakata wale ga, moni cakava sara ga.” Na isolisoli talei ni yalo tabu, salavata kei na noda guta meda “taura matua na vosa ni bula,” ena rawa nida ‘sasagataka tiko ga kina na noda vakabulai ena rere kei na sautaninini.’—Fpai. 2:12, 13, 16.
19 Meda nuitaka vakatabakidua na yalo tabu ni Kalou, meda cakava ena noda vinaka kece na ka e vinakata o Jiova, saga meda kenadau kina, da qai kerei Jiova me vukei keda. (Jeme. 1:5) Ena vukei keda meda kila na nona Vosa, meda vosota na leqa eda sotava, da qai vunautaka na itukutuku vinaka. “Dou kerekere tiko ga, ena qai soli vei kemudou; dou vaqaqara tiko ga, dou na qai kunea, dou tukituki tiko ga, ena qai dolavi vei kemudou,” wili tale ga eke na noda kerea na yalo tabu. (Luke 11:9, 13) Koya gona, meda kerei Jiova tiko ga me rawa nida vakataki ira na dauveiqaravi ni Kalou yalodina nira dusimaki ena yalo tabu.
O Rawa ni Vakamacalataka?
• Me vakataki Meri ga, na itovo cava meda vakaraitaka meda vakalougatataki kina?
• E dusimaki Paula vakacava na yalo tabu ni Kalou?
• E dusimaki ira vakacava na dauveiqaravi ni Kalou nikua na yalo tabu?
[iYaloyalo ena tabana e 24]
Ena veidusimaki ni Kalou a vorata kina o Paula na veivakamuai ni yalo velavela
[iYaloyalo ena tabana e 26]
Se da nuitaka na bula e lomalagi se vuravura, e dusimaki keda tiko ga nikua na yalo tabu