Taro na Dauwiliwili

Ena gauna ni tatamusuki era na lako kece na tagane ni Isireli ena Solevu ni Madrai Sega ni Vakaleveni, o cei gona ena tamusuka na isevu ni parile (barley) e kau yani ena valenisoro?

Era vakaroti na Isireli ena Lawa i Mosese: “Era na rairai vakatolu e na dua na yabaki e na mata i Jiova na nomuni Kalou ko ira kecega na nomuni tagane, e na yasana sa na digitaka ko koya; e na so levu ni kana madrai sa sega ni vakalevenitaki, kei na so levu ni veiwiki, kei na so levu ni vale taba ni kau.” (Vakarua 16:16) Tekivu mai na gauna i Tui Solomoni, e dau veidigitaki o Jiova ena valenisoro e Jerusalemi.

Na imatai ni tolu na solevu e vakayacori ena itekitekivu ni vulaitubutubu. E vakatokai me Solevu ni Madrai Sega ni Vakaleveni, tekivutaki ni oti e dua na siga mai nai ivakananumi ni Lakosivia ena 14 Naisani. E vakayacori tiko oqo me vitu na siga me qai yacova yani na 21 Naisani. Na ikarua ni siga ni solevu, ena 16 Naisani, e dusia na itekitekivu ni imatai ni solevu ni yabaki e yavutaki mai na ivolanivula vakaivolatabu. Ena siga oya, ena taura mai na bete levu ‘na ivau sila, na isevu ni nodra vuata’ ena parile e tamusuki mai, me yalovaka “e na mata i Jiova” ena valenisoro. (Vunau ni Soro 23:​5-​12) Nira na tiko kece na tagane ena Solevu ni Madrai Sega ni Vakaleveni, o cei gona ena tamusuka na isoro oqo?

A soli ena matanitu taucoko na ivakaro me cabori na isevu ni parile vei Jiova ena Solevu ni Madrai Sega ni Vakaleveni. Sega ni gadrevi vei ira yadua mera tatamusuki ra qai kauta na nodra isevu ina valenisoro. Era vakaroti ga mera digitaka e so me matataka na matanitu. Ia, na kena musuki na ivau sila ena Solevu ni Madrai Sega ni Vakaleveni e rawa nira cakava o ira na mata oqo nira lako ena dua na loga ni parile e tiko voleka. Ni vakamacalataki na tikina oqo e kaya na Encyclopaedia Judaica: “Ni sa matua na parile me na kau ga mai ena yasayasa o Jerusalemi; kevaka e sega me na kau mai ena dua ga na vanua e Isireli. Ratou na lai tamusuka mai e tolu na tagane, ratou na kauta na nodratou dui sele taloki ni tatamusuki kei na nodratou basikete.” Ena qai kau vua na bete levu e dua na ivau ni parile me qai cabora vei Jiova.

Na cabori ni isevu ni tatamusuki e gauna vinaka vei ira na Isireli mera vakavinavinakataka kina na nona vakalougatataka o Jiova na nodra qele kei na nodra tatamusuki. (Vakarua 8:​6-​10) Ia, o koya e bibi sara, ni vakacaboisoro oqo e “vakatakarakara ni veika vinaka me na muri mai.” (Iperiu 10:1) A vakaturi o Jisu Karisito ena 16 Naisani 33 S.K., ena gauna sara ga e dau cabori kina vei Jiova na isevu ni vuata e tamusuki. E vola kina na yapositolo o Paula me baleti Jisu: “Sa qai tu cake tale mai na mate na Karisito, a sa yaco me kedrai sevu era sa moce tu. . . . Ia na tamata yadua me vaka sa lesi vua: na Karisito nai sevu; ka qai muri ko ira era sa nei Karisito, ni sa lako tale mai ko koya.” (1 Korinica 15:​20-​23) Na ivau ni isevu ni parile e yalovaka na bete ena mata i Jiova e vakatayaloyalotaki Jisu Karisito ni sa vakaturi oti​—na imatai ni vakaturi mai na mate ina bula tawamudu. E vagalalataki ira kina na kawatamata o Jisu mai na ivalavala ca kei na mate.

[iTaba ni Credit Line ena tabana e 26]

© 2003 BiblePlaces.com