Mo Kauai Beka ga ena Nomu Bula Nikua?

“AU SEGA ni dau vakasamataka na gauna se bera mai. E totolo ga na kena dau yaco mai.” Na vosa e dau cavuti vakalevu oqori, a rairai cavuta na saenitisi rogo o Albert Einstein. Via vaka tale ga oya na ka era tukuna e levu. “Cava mo leqataka kina na gauna se bera mai?” era na rairai kaya. Se o sa rairai rogoca oti nira kaya: “Cakava ga na ka o cakava tiko.” “Kauaitaka mada ga nomu bula nikua.” “Guilecava na mataka.”

Na ivakarau ni rai vaka oya e sa takalevu, e sega tale ga ni vou. “Kana, gunu, mo marau. Na kena vo e sega ni bibi.” Oya na nodra ibole na Epikuro ena gauna makawa. E vaka tale ga oqori na nodra rai e so ena nona gauna na yapositolo o Paula. “Me da kana ga ka gunu, ni da na mate ni mataka.” (1 Korinica 15:32) Era vakabauta ni oqo ga na bula, e sega ni dua tale, e vure gona kina na vakasama ni dodonu meda vakayagataka vinaka sara na bula oqo.

Vei ira e vica vata na milioni na lewe i vuravura, e sega ni vakaibalebaletaki na vakayagataki vinaka ni bula oqo ena qarai ni marau vakalialia. Na ituvaki dredre era sotava e levu nikua, e vakavuna me sega ni vakaibalebale kina vei ira na bula, qai mosimosi dina nodra cumuwaqara na vaqara na veika mera bula kina. Cava mera leqataka kina na gauna se bera mai, ni dau vakalevu ga me sega ni nuitaki na siga “ni mataka,” qai sega ni dua na ka vinaka e kauta mai?

Me Lalawataki Beka na Veika ni Mataka?

O ira mada ga e lailai na ituvaki dredre era sotava, era nanuma ni tawayaga na lalawataki ni veika ni mataka. “Cava me leqataki kina?” era na rairai taroga. So era kaya ni o ira era dau lalawa, era na sega ni lomavakacegu ra qai rarawa kevaka e sega ni yaco. A yalolailai sara ga na peteriaki o Jope ni sa “muduki tani” na nona lalawa, na veika me ratou na marautaka vakavuvale ena gauna mai muri.​—Jope 17:11; Dauvunau 9:​11.

Na dauniserekali ni Sikoteladi o Robert Burns, e vakatauvatana na ituvaki dredre eda sotava kei na kalavo lailai ni veikau, a vakarusa vakacalaka o Burns na vale ni kalavo ena bati ni siviyara. A dro na kalavo me bula ni sa vakacacani na nona itikotiko. ‘Io,’ e vakasamataka na dauniserekali, ‘eda dau sotava e so na ituvaki e sega sara ga nida cakava rawa kina e dua na ka, se mani vakacava sara na vinaka ni noda lalawa.’

E tawayaga beka me lalawataki na veigauna se bera mai? Ke sega na lalawa vinaka ena veivakaleqai vakalevu ni yaco na cagilaba se na leqa tubukoso tale e so. Me kena ivakaraitaki, e sega ni dua e rawa ni tarova na cagilaba o Katrina. Ia, vakacava ke a vakasamataki qai lalawataki vinaka na veika me caka, ena vakalailaitaka beka na vakacaca ena siti kei nodra vakaleqai na lewenivanua?

Na cava nomu rai? E rai beka vakayalomatua meda bula ga nikua da qai guilecava na veisiga ni mataka? Dikeva mada na cava e kaya na ulutaga e tarava me baleta na tikina oqo.

[iYaloyalo ena tabana e 3]

“Kana, gunu, mo marau. Na kena vo e sega ni bibi”

[iYaloyalo ena tabana e 4]

Ena lailai beka na vakacaca ni cagilaba o Katrina, ke a vakasamataki qai lalawataki vinaka na ka me caka?

[Credit Line]

U.S. Coast Guard Digital