Era “Yalo Dauveiqaravi” na Agilosi

“Era sa sega li ni yalo dauveiqaravi ko ira kecega, sa talai yani me qaravi ira era na yaco emuri mei taukei ni bula?”​—IPER. 1:14.

1. E veivakacegui vakacava na Maciu 18:10 kei na Iperiu 1:14?

O JISU Karisito a vakasalataki ira na rairai vakatarabetaki ira nona imuri, ena nona kaya: “Lewai kemudou vinaka mo dou kakua ni beca e dua vei ira na lalai oqo; ni’u sa kaya vei kemudou, A nodra agilose mai lomalagi era sa raica tikoga na mata i Tamaqu sa tiko mai lomalagi.” (Maciu 18:10) Ni tukuni ira tiko na agilosi yalododonu, e vola na yapositolo o Paula: “Era sa sega li ni yalo dauveiqaravi ko ira kecega, sa talai yani me qaravi ira era na yaco emuri mei taukei ni bula?” (Iper. 1:14) E veivakacegui dina na veivosa qori ni vakadeitaka vei keda ni Kalou e vakayagataki ira na nona ibulibuli vakayalo mera dusimaki keda. Na cava e tukuna vei keda na iVolatabu baleti ira na agilosi? Era dusimaki keda vakacava? Na cava eda rawa ni vulica ena nodra ivakaraitaki?

2, 3. Na cava eso na nodra itavi na agilosi?

² Era tu mai lomalagi e milioni vakacaca na agilosi yalodina. Era “uasivi e na kaukauwa, ka sa cakava na nonai vakaro.” (Same 103:20; wilika Vakatakila 5:11.) O ira na luve ni Kalou vakayalo qo e duidui na nodra ivakarau kei na ka ra taleitaka, era vakaraitaka na itovo vakalou, e tiko tale ga vei ira na galala ni vakatulewa. E uasivi sara nodra tuvai qai cecere na nodra itutu ena ituvatuva ni Kalou, o Maikeli (na yaca i Jisu e lomalagi) e agilosi turaga. (Tani. 10:13; Juta 9) E “ulumatua ni kabuli kece,” e Matanivanua ni Kalou se “na Vosa” qai vakayagataki koya o Jiova me bulia na ka kece ga.​—Kolo. 1:15-17, NW; Joni 1:1-3.

³ E taravi koya na agilosi turaga o ira na serafimi, era dau kacivaka na dodonu i Jiova ra qai dau dusimaki ira na dauveiqaravi i Jiova mera muria na nona ivakatagedegede. Era tiko tale ga na jerupi, era tutaka na lagilagi ni Kalou. (Vkte. 3:24; Aisea 6:1-3, 6, 7) Na vo ni agilosi se italai, era lesi mera cakava na loma ni Kalou ena levu na sala.​—Iper. 12:22, 23.

4. Na cava era cakava na agilosi ni tauyavutaki o vuravura? Ke a vakayagataki vinaka na galala ni vakatulewa, ena vakacava tu na bula ni kawatamata?

⁴ Era marau na agilosi kece ena gauna a ‘tauyavutaki kina o vuravura’ ra qai veivuketaka ena marau na itavi e lesi vei ira ni yaco na vatutalei qo e maliwalala me nodra itikotiko na kawatamata. (Jope 38:4, 7) A buli keda o Jiova “me lailai toka mada vei ira na agilosi” ia meda “ucui” koya, e rawa kina vei keda na kawatamata meda vakamurimuria na itovo ni Kalou. (Iper. 2:7, NW; Vkte. 1:26) Ke rau a vakayagataka vinaka o Atama kei Ivi na galala ni vakatulewa, eda na marautaka tiko ena gauna qo na nodrau kawa na bula ena parataisi nida lewe ni matavuvale i Jiova.

5, 6. Na vakaduduile cava a yaco mai lomalagi, na cava e cakava kina na Kalou?

⁵ Kena irairai nira a kidacalataka na agilosi na kena sa tekivu na vakaduduile ena vuvale vakayalo ni Kalou. E dua vei ira a sega ni via vakacaucautaki Jiova ni gadreva tale ga me sokaloutaki. E yaco kina o koya me o Setani (kena ibalebale “Dauveivorati”) ni bolea na dodonu ni nona veiliutaki o Jiova qai vinakata me tauyavutaka ga na nona veiliutaki. A qaseqasetaka o Setani na imatai ni nona lasu, ni a uqeti rau na imatai ni veiwatini me rau tomani koya ena nona vorati na Dauveibuli dauloloma.​—Vkte. 3:4, 5; Joni 8:44.

⁶ A sega tale ni wawa o Jiova ena nona vakatauca na itotogi i Setani ena nona kaya ena imatai ni parofisai ena iVolatabu: “Ka’u na vakaveimecakitaki kemudrau kei na yalewa, kei na nomu kawa kei na nona kawa; ena butuqaqia na ulumu ko koya, ia ko na qaqia na bukubukuni-yavana.” (Vkte. 3:15) Erau na veimecaki o Setani kei na “yalewa” ni Kalou. Io, e raica o Jiova na isoqosoqo vakalomalagi ni ka bula vakayalo yalodina me vaka na watina. Na parofisai qo e vakadeitaka na inuinui, dina ni “ka vuni tabu” na kena itukutuku ia ena vakatakilai vakamalua. Na inaki ni Kalou oya ni na dua mai na nona isoqosoqo vakalomalagi ena vurumemeataki ira kece na talaidredre, ena vukuna tale ga mera duavata “na veika mai lomalagi kei na veika e vuravura.”​—Efeso 1:8-10, NW.

7. Na cava era cakava eso na agilosi ena gauna i Noa? Na cava a qai cakava vei ira o Jiova?

⁷ Ena siga i Noa, e vica na agilosi era biuta nodra “[i]tikotiko dodonu” ra qai vukici ira mera tamata me rawa nira caka nodra kina e vuravura. (Juta 6; Vkte. 6:1-4, VV) E biuti ira o Jiova ena butobuto, era qai tomani Setani mera “yalo ca tawarairai” ra qai nodra meca rerevaki na dauveiqaravi ni Kalou.​—Efeso 6:11-13, NW; 2 Pita 2:4.

Era Dusimaki Keda Vakacava na Agilosi?

8, 9. E vakayagataki ira vakacava na agilosi o Jiova mera dusimaki keda?

⁸ Eratou vakadinata na nodra veiqaravi na agilosi o Eparama, Jekope, Mosese, Josua, Aisea, Taniela, Jisu, Pita, Joni, kei Paula. O ira na agilosi yalododonu era vakayacora na lewa ni Kalou, era vakadewataka mai na parofisai kei na idusidusi, okati kina na lawa a soli vei Mosese. (2 Tui 19:35; Tani. 10:5, 11, 14; Caka. 7:53; Vkta. 1:1) E sega ni gadrevi ena gauna qo mera vakadewataka mai na agilosi na itukutuku vaKalou, ni sa tu ga ena Vosa ni Kalou. (2 Tim. 3:16, 17) Ia era ogaoga tiko ena vakayacori ni loma ni Kalou, era qai tokona ira tale ga na nona dauveiqaravi.

⁹ E vakadeitaka vei keda na iVolatabu: “Na agilose i Jiova, sa tiko vakavolivoliti ira era sa rerevaki koya, ka sa vakabulai ira.” (Same 34:7; 91:11) E vakatara o Jiova meda vakatovolei ena vuku ni ka a kaya o Setani, nida na sega ni yalodina vei Jiova ke da vakatovolei. (Luke 21:16-19) Ia, e kila o Jiova ni vakaiyalayala na noda kaukaua. E kila na gauna me tinia kina na veivakatovolei ni raica noda sa vakadinadinataka noda yalodina. (Wilika 1 Korinica 10:13.) Era tu vakarau na agilosi mera veidusimaki me salavata kei na loma ni Kalou. Era vakabulai Setareki, Mesaki, Apetiniko, Taniela, kei Pita ia a sega ga ni tarova nodrau mate o Sitiveni kei Jemesa ena ligadra na meca. (Tani. 3:17, 18, 28; 6:22; Caka. 7:59, 60; 12:1-3, 7, 11) A duidui na ituvaki kei na inaki ni nodratou vakabulai. E tautauvata sara ga qori kei na ituvaki era sotava na tacida nira a vakamatei ena nodra keba ni veivakararawataki na Nazi, ia o Jiova a vakabulai ira e levu.

10. Me ikuri ni nodra veitokoni na agilosi, eda dau vukei vakacava?

¹⁰ E sega ni vakavuvulitaka na iVolatabu ni tamata yadua e vuravura e tiko na agilosi e dau taqomaki ira. Eda masuta ena nuidei nida “kerea e dua na ka me vaka na lomana [na Kalou], sa rogoci keda ko koya.” (1 Joni 5:14) E dina ni rawa ni tala mai o Jiova e dua nona agilosi me vukei keda, ia ena rairai vukei keda ena dua tale na sala. De dua ena uqeti ira na tacida lotu vaKarisito mera vukei keda se vakacegui keda. Ena rairai solia vei keda na Kalou na vuku kei na kaukaua meda vosota kina na “votonikau” e votoki keda tiko, me vaka sara ga ni robai keda “na agilosi i Setani.”​—2 Kor. 12:7-10, NW; 1 Ces. 5:14.

Vakatotomuri Jisu

11. Era vukei Jisu vakacava na agilosi? Na cava e rawata o Jisu ena nona yalodina vua na Kalou?

¹¹ Vakasamataka mada nona vakayagataki ira na agilosi o Jiova ena vuku i Jisu. Era vakarogoya na nona sucu kei na nona vakaturi, ra qai vukei koya ni bula voli e vuravura. A rawa sara ga mera tarova na nona vesu o Jisu kei na nona mate vakaloloma. Ia, a talai ga e dua na agilosi me vakaukauataki koya. (Maciu 28:5, 6; Luke 2:8-11; 22:43) Me salavata kei na loma i Jiova, a mate vakaisoro o Jisu qai vakadinadinataka qo ni rawa vua na tamata me yalodina tiko ga vua na Kalou, dina ni vakatovolei sara vakaca. A vakaturi Jisu gona o Jiova ena bula tawamate rawa i lomalagi, qai solia vua me ‘lewa na ka kecega’ ra qai vakamalumalumu vua na agilosi. (Maciu 28:18; Caka. 2:32; 1 Pita 3:22) A vakadinadinataka o Jisu ni o koya ga na “kawa” ni “yalewa” ni Kalou.—Vkte. 3:15; Kala. 3:16.

12. Eda na vakamurimuria vakacava na rai dodonu i Jisu?

¹² E kila o Jisu ni cala ke vakatovolei Jiova, me qai namaka mera taqomaki koya na agilosi ni vakayacora eso na ka e rivarivabitaki. (Wilika Maciu 4:5-7.) Meda vakamuria mada ga na ivakaraitaki i Jisu ena noda vakaraitaka na ‘yalomatua’ ena ivakarau ni noda bula, meda kua ni cakava na ka e rivarivabitaki, da qai nuidei nida vakacacani.​—Taito 2:12.

Na Ka Eda Vulica Vei Ira na Agilosi Yalodina

13. Na cava eda rawa ni vulica ena nodra ivakaraitaki na agilosi yalododonu e tukuni tiko ena 2 Pita 2:9-11?

¹³ Ni vakadodonutaki ira tiko na ‘vosavakacacataka’ na dauveiqaravi yalodina i Jiova, e tukuna kina o Paula na nodra ivakaraitaki vinaka na agilosi yalododonu. Dina ni tu vei ira na agilosi qo na kaukaua levu, ia era sega ga ni veibeitaki nira dokai Jiova. (Wilika 2 Pita 2:9-11.) Meda kua tale ga ni dau veibeitaki vakaca, meda dokai ira na ivakatawa ena ivavakoso, da qai biuta ga vei Jiova, Dauveilewai Levu.​—Roma 12:18, 19; Iper. 13:17.

14. Era ivakaraitaki vakacava na agilosi ena nodra yalomalumalumu ena veiqaravi?

¹⁴ Era ivakaraitaki vinaka vei keda na agilosi i Jiova ena nodra yalomalumalumu ena qaravi itavi. Eso na agilosi era a sega ni tukuna na yacadra vei ira na tamata. (Vkte. 32:29; Dvei. 13:17, 18) Dina ni milioni na ka bula vakayalo era tu e lomalagi, ia e vakaraitaki ga ena iVolatabu e rua na yaca, oya o Maikeli kei Keperieli. E itataqomaki qo meda kua kina ni vakarokoroko se sokalou vei ira na agilosi. (Luke 1:26; Vkta. 12:7) Ni tekicuva na yapositolo o Joni ena yava ni agilosi me qaravi koya, e vakasalataki: “Qarauna! Kua ni cakava qori! O yau na nomu itokani dauveiqaravi ga, au nodra itokani dauveiqaravi tale ga na tacimu.” (Vkta. 22:8, 9, NW) Na noda sokalou, okati kina na noda masu, me vakatabakidua ga vua na Kalou.​—Wilika Maciu 4:8-10.

15. Era ivakaraitaki vinaka vakacava vei keda na agilosi ena nodra dau vosota?

¹⁵ Era ivakaraitaki tale ga na agilosi ena nodra dau vosota. Dina nira vinakata mera kila na ka vuni ni Kalou, ia e sega ga ni tukuni vei ira na ka kece, ‘na veika qo era gadreva tale ga na agilosi mera kila,’ e kaya na iVolatabu. (1 Pita 1:12, VV) Koya gona, na cava era dau qai cakava? Era vosota ga me yacova na gauna lokuci ni Kalou me vakatakila mai na “nona vuku” vei ira “na ivavakoso.”​—Efeso 3:10, 11, NW.

16. E tarai ira vakacava na agilosi na noda itovo?

¹⁶ E ‘ka ni sarasara vei ira na agilosi’ na nodra vakatovolei na lotu vaKarisito. (1 Kor. 4:9) E dau ka ni marau vei ira mera raica na noda yalodina era qai marau tale ga ni veivutunitaka e dua na nona ivalavala ca . (Luke 15:10) Era raica na agilosi na nodra itovo vakalou na lotu vaKarisito yalewa. E vakamacalataka na iVolatabu ni dodonu me ‘ubi na ulu ni yalewa me ivakatakilakila ni nona vakamalumalumu, ena vukudra na agilosi.’ (1 Kor. 11:3, 10) Io, era marau na agilosi nira raici ira na yalewa lotu vaKarisito kei ira kece na dauveiqaravi ni Kalou e vuravura, nira muria tiko na veidusimaki kei na veiliutaki vakalou. Na talairawarawa va qori e vakatakarakarataki ira vinaka na luve vakayalo ni Kalou.

Era Tokona na Cakacaka Vakavunau na Agilosi

17, 18. Na cava eda tukuna kina nira tokona tiko noda cakacaka vakavunau na agilosi?

¹⁷ Era vakaitavi na agilosi ena so na ka vakasakiti ena “siga ni Turaga.” E okati kina na sucu ni Matanitu ena 1914, ra kolotaki Setani kei na nona timoni sobu mai lomalagi o “Maikeli kei ira na nona agilose.” (Vkta. 1:10; 11:15; 12:5-9) A raica na yapositolo o Joni e dua na “agilose sa vuka e na maliwa kei lomalagi kei vuravura, a sa taura nai tukutuku-vinaka e sega ni oti rawa, me vunautaka vei ira era sa tiko e vuravura.” E kaya na agilosi: “Dou rerevaka na Kalou, ka vakarokoroko vei koya; ni sa yaco na nona gauna me lewa: ia dou vakarokoroko vei koya ka buli lomalagi, kei vuravura, kei na wasawasa, kei na veivurevure-ni-wai.” (Vkta. 14:6, 7) E vakadeitaki vei ira na dauveiqaravi i Jiova nira na veitokoni na agilosi ena vunautaki ni itukutuku vinaka ni Matanitu ni Kalou sa tauyavu oti, dina ni na kaukaua na veivorati ni Tevoro.​—Vkta. 12:13, 17.

¹⁸ Nikua, era sega ni vosa vei keda na agilosi meda kunei ira kina na tamata yalomalumalumu, me vaka na nona vosa vei Filipi e dua na agilosi qai dusimaki koya vua na matanivanua ni Iciopea. (Caka. 8:26-29) Ia, e levu na ivakaraitaki ena gauna qo e vakadinadinataka nira tokona tiko na agilosi na kena vunautaki na itukutuku vinaka ni Matanitu ni Kalou, ra qai dusimaki keda vei ira na “vinakata na bula tawa mudu.”a (Caka. 13:48) E bibi dina meda dau vakaitavi ena cakacaka vakaitalatala nida na kunei ira kina era gadreva mera “lotu vakayalo ka vakaidina vei Tamada”!​—Joni 4:23, 24.

19, 20. Na cava nodra itavi na agilosi “e na i vakataotioti kei vuravura”?

¹⁹ Ni dusia tiko na noda gauna “e na i vakataotioti kei vuravura,” e kaya o Jisu nira na “tawasei ira tani na tamata ca mai vei ira na yalododonu” na agilosi. (Maciu 13:37-43, 49, VV) Era vakaitavi na agilosi ena nodra kumuni kei na nodra dregati ena iotioti ni gauna na lumuti. (Wilika Maciu 24:31; Vkta. 7:1-3) Kuria qori, era na tomani Jisu na agilosi ena nodra “tawasei ira na sipi maivei ira na me.”​—Maciu 25:31-33, 46.

²⁰ ‘Ena nona vakaraitaki mai lomalagi na Turaga o Jisu vata kei ira na nona agilosi kaukaua,’ era na vakarusai kina o ira kece ‘era sega ni kila na Kalou kei ira na beca na itukutuku vinaka ni noda Turaga o Jisu.’ (2 Ces. 1:6-10) A raica o Joni na ka vata ga qori ena raivotu, e vakamacalataki Jisu kei ira na nona mataivalu ni lomalagi nira vodo toka ena ose vulavula mera vala ena ivalu ni yalododonu.​—Vkta. 19:11-14.

21. Na cava ena cakava na agilosi “sa taura e na ligana nai dola kei bulubulu” vei Setani kei ira na nona timoni?

²¹ A raica tale ga o Joni “e dua na agilose sa lako sobu mai lomalagi, sa taura e na ligana nai dola kei bulubulu.” Qori na agilosi turaga o Maikeli, ena vesuka na Tevoro qai kolotaki koya sobu —kei ira na timoni—ena qara sega ni vakabotona. Era na sereki vakalekaleka ni oti na duanaudolu na yabaki ni veiliutaki i Karisito, mera vakatovolei ira kina na kawatamata uasivi ena iotioti ni gauna. Ni oti qori, sa na vakarusai o Setani kei ira kece na talaidredre. (Vkta. 20:1-3, 7-10; 1 Joni 3:8) Era na kawaboko vakadua o ira na dau talaidredre vua na Kalou.

22. Na cava na nodra itavi na agilosi ena veika sa voleka ni yaco qo, meda raica vakacava nodra itavi?

²² Sa roro voleka mai na noda vakabulai mai na ituvaki ca i Setani. Era na lesi ena itavi bibi na agilosi mera vakadinadinataka na nona veiliutaki cecere o Jiova, sa na qai vakayacori taucoko kina na nona inaki me baleta na vuravura kei na kawatamata. Io, era “yalo dauveiqaravi ko ira kecega” na agilosi yalododonu, “sa talai yani me qaravi ira era na yaco emuri mei taukei ni bula.” Meda vakavinavinakataka gona na Kalou o Jiova ni vakayagataki ira na agilosi mera dusimaki keda meda cakava na loma ni Kalou, da qai rawata kina na bula tawamudu.

[iVakamacala e ra]

O na Sauma Vakacava?

• Era tuvai tu vakacava na ka bula vakayalo e lomalagi?

• Na cava era cakava eso na agilosi ena siga i Noa?

• E vakayagataki ira vakacava na agilosi na Kalou mera vukei keda?

• Na cava na nodra itavi na agilosi yalododonu ena gauna qo?

[iYaloyalo ena tabana e 21]

Era marau na agilosi nira vakayacora na loma ni Kalou

[iYaloyalo ena tabana e 23]

Me vaka ga a yaco vei Taniela, era tu vakarau na agilosi mera veivuke ni salavata kei na loma ni Kalou

[iYaloyalo ena tabana e 24]

Meda yaloqaqa nira tokona tiko na agilosi na vunautaki ni Matanitu ni Kalou!

[Credit Line]

Globe: NASA photo