Jisu Karisito​—E Yaga Raraba Nona iTukutuku

“Nona ivakarau ni bula na turaga vuku ni Kapenaumi e se yaga tiko ga vei ira e levu nikua.”a​—DAUVOLAIVOLA O GREGG EASTERBROOK.

E DAU mana na vosa. Ena veiuqeti, veivakayaloqaqataki, qai veisautaka na bula ke digitaki vakavuku na vosa e cavuti. E sega ni dua e bau cakayaco na ka e tukuna me vakataki Jisu Karisito. A vola e dua a rogoca na ivunau i Jisu sa kilai tu nikua na iVunau ena Ulunivanua: “Ni sa tinia nona vosa o Jisu, era vakadrukai na ilawalawa ya ena nona veivakavulici.”​—Maciu 7:28.

Tekivu ena gauna ya me yacova mai nikua, e levu era kila vinaka na vosa i Jisu. Raica mada eso na vosa i Jisu e titobu na kena ibalebale.

“Oni sega ni rawa ni qarava na Kalou kei na iYau.”​—Maciu 6:24.

“Na ka kece oni vinakata mera cakava vei kemuni na tamata, moni cakava tale ga vei ira.”​—Maciu 7:12.

“Ni solia vei Sisa na ka e nei Sisa, vua na Kalou na ka e nona na Kalou.”​—Maciu 22:21.

“E marau vakalevu o koya e solia na ka, vakalailai o koya e taura na ka.”​—Cakacaka 20:35.

A sega ni cavuta wale ga o Jisu na vosa guilecavi dredre. E mana tale ga na itukutuku dina me baleta na Kalou a vunautaka, era kila kina e levu na inaki dina ni bula, qai vakadeitaka ni Matanitu ga ni Kalou ena vakaotia na rarawa ni kawatamata. Nida wilika na itukutuku kei Jisu ena vo ni ulutaga e tarava eda na kila kina na vuna “e se yaga tiko ga kina vei ira e levu nikua nona ivakarau ni bula.”

[iVakamacala e ra]