Watchtower LAIBRI ENA INTERNET
Watchtower
LAIBRI ENA INTERNET
vakaViti
  • IVOLATABU
  • IVOLA
  • SOQONI
  • w10 5/15 t. 8-12
  • Oni Dau Vakamalumalumu na Tagane ina Veiliutaki i Karisito?

Sega na kena vidio.

Vosota, sega ni laurai rawa na vidio.

  • Oni Dau Vakamalumalumu na Tagane ina Veiliutaki i Karisito?
  • Na Vale ni Vakatawa Kacivaka na Matanitu i Jiova—2010
  • Ulutaga Lailai
  • iKuri ni Ulutaga
  • Yaga Vei Jisu Nona Vakamalumalumu Vei Tamana
  • Vakatotomuria na iTovo i Karisito
  • ‘Dokai Ira na Watimuni’
  • Tagane Vakawati—Vakatotomuria na Veiliutaki i Karisito
    Na Vale ni Vakatawa Kacivaka na Matanitu i Jiova—2007
  • iVakasala Yaga Vei Ira na Veiwatini
    Na Vale ni Vakatawa Kacivaka na Matanitu i Jiova—2005
  • Ka Mo Cakava me Marau Kina Nomu Vuvale
    Na Cava Mada e Kaya na iVolatabu?
  • Na Vuvale Lotu Vakarisito—ni Muria na iVakaraitaki I Jisu!
    Na Vale ni Vakatawa Kacivaka na Matanitu i Jiova—2009
Raica Tale Eso
Na Vale ni Vakatawa Kacivaka na Matanitu i Jiova—2010
w10 5/15 t. 8-12

Oni Dau Vakamalumalumu na Tagane ina Veiliutaki i Karisito?

“[E] ulu ni tagane yadua o Karisito.”—1 KOR. 11:3.

1. E kilai vakacava ni dau maqosa na nona ituvatuva na Kalou o Jiova?

E TUKUNA na Vakatakila 4:11: “E ganiti kemuni Jiova, na neimami Kalou, me nomuni na lagilagi, na vakarokoroko, kei na kaukaua, ni oni bulia na ka kece, ena nomuni lewa era bula, era buli kina.” Ni bulia na ka kece o Jiova, e Cecere Duadua kina ena lomalagi kei na vuravura qai lewai ira kece nona ibulibuli. O Jiova e “Kalou ni vakacegu . . . e dau maqosa na nona ituvatuva,” e laurai qori ena nona tuvani ira vakamatau na agilosi.—1 Kor. 14:33; Aisea 6:1-3; Iper. 12:22, 23.

2, 3. (a) O cei na imatai ni ibulibuli i Jiova? (b) Na cava nona itutu na Luve ni Kalou ulumatua vei Tamana?

2 Ni bera ni bulibuli na Kalou a se bula sara tu mai vakadede. Na imatai ni nona ibulibuli e ka bula vakayalo qai kilai me “Vosa” baleta ni Matanivanua i Jiova. Ena vukuna na Vosa, a rawa ni buli kina eso tale na ka. Emuri, a qai bula e vuravura me dua na tamata uasivi a kilai me o Jisu Karisito.—Wilika Joni 1:1-3, 14.

3 Na cava e tukuna na iVolatabu me baleta nodrau itutu na Kalou kei na Luvena ulumatua? A uqeti vakalou na yapositolo o Paula ena nona tukuna vei keda: “Au vinakata moni kila ni ulu ni tagane yadua o Karisito, e ulu ni yalewa na tagane, e ului Karisito na Kalou.” (1 Kor. 11:3) E vakarurugi na Karisito ena veiliutaki i Tamana. E bibi dina na veiliutaki kei na talairawarawa mera vakacegu ra qai veiyaloni tiko ga kina na ibulibuli vakasakiti. O koya mada ga a ‘vakaitavi ena buli ni ka kece tale eso,’ a vinakati me talairawarawa ina veiliutaki vakalou.—Kolo. 1:16.

4, 5. E raica vakacava o Jisu nona vakamalumalumu vei Jiova?

4 E raica vakacava o Jisu nona vakamalumalumu ina veiliutaki i Jiova kei na nona mai bula e vuravura? E tukuna na iVolatabu: “[O] Karisito Jisu, e dina ni vaka na Kalou, e sega ga ni via koco itutu, ya me tautauvata kei na Kalou. Sega, e vakadravudravuataki koya qai okati koya me vaka na bobula ena nona mai bula vakatamata. Kena ikuri ni mai bula vakatamata, e vakamalumalumutaki koya qai talairawarawa me yacova sara na mate, io, me mate ena kaunirarawa.”—Fpai. 2:5-8.

5 A yalomalumalumu o Jisu ni talairawarawa vua na Kalou me cakava na lomana. A tukuna: “E sega ni dua na ka au cakava vakataki au ga; . . . na lewa au tauca e dodonu baleta niu sega ni muria na lomaqu, na loma i koya ga e talai au mai.” (Joni 5:30) E tukuna tale ga: “Niu dau cakava na ka e vinakata [o Tamaqu].” (Joni 8:29) Ni vakarau cava nona bula e vuravura, a tukuna o Jisu ni masuti Tamana: “Au sa vakalagilagi kemuni e vuravura ena noqu vakaotia na cakacaka oni lesia meu cakava.” (Joni 17:4) E matata vakasigalevu ni sega ni dredre vei Jisu me ciqoma qai talairawarawa ina veiliutaki vakalou.

Yaga Vei Jisu Nona Vakamalumalumu Vei Tamana

6. Na itovo vakasakiti cava a vakaraitaka o Jisu?

6 E vakaraitaka e levu na itovo vakasakiti o Jisu ena nona bula e vuravura. Dua vei ira qori nona lomani Tamana vakalevu. E tukuna: “Niu lomani Tamaqu.” (Joni 14:31) E lomani ira tale ga vakalevu na tamata. (Wilika Maciu 22:35-40.) E dau yalololoma qai veinanumi, sega ni voravora se veivakatotogani. A tukuna: “Ni lako mai vei au o kemuni kece oni oca, oni bikai voli ena icolacola bibi, au na vakacegui kemuni. Ni mai cola na noqu ivua moni vuli vei au, niu yalomalumalumu, au yalomalua tale ga, oni na kunea kina na vakacegu. E veivakacegui na noqu ivua, e mamada tale ga na noqu icolacola.” (Maciu 11:28-30) O ira kece na vaka na sipi era lomabibi tu, e vakacegui ira na itovo vakasakiti i Jisu kei na veiuqeti ni nona itukutuku.

7, 8. Ena Lawa, a raici vakacava na marama turidrabalavu, ia na cava a cakava vua o Jisu?

7 Vakasamataka mada na nona veimaliwai o Jisu kei ira na yalewa. Ena veigauna sa oti, era dau vakalolomataki ira na yalewa na tagane. E laurai qori vei ira na iliuliu ni lotu e Isireli makawa. Ia e dokai ira na yalewa o Jisu. E vakadinadinataki qori ena ka a cakava vua na marama a turidrabalavu tu me 12 na yabaki. Era sega ni vakabulai koya rawa na vuniwai qai vakayagataka kece nona iyau me qara kina na iwali ni kena mate. Ia sa qai “ca ga” na kena ituvaki. Ena Lawa, na marama ya e sega ni savasava. Ke dua e tarai koya, ena raici tale ga me tawasavasava.—Vunau 15:19, 25.

8 Ena gauna a rogoca kina na marama qo ni vakabulai ira tiko na tauvimate o Jisu, e gole vei ira na lewe vuqa era tiko wavoliti Jisu, qai tukuna: “Keu tara wale ga na nona isulu e sau, au na bula.” A tarai Jisu mani bula vinaka sara. A kila o Jisu ni sega ni dodonu me tara nona isulu na marama qo. Ia a sega ni cudruvi koya. A yalololoma ga. E kila o Jisu na dredre a sotava voli mai na marama qo ena vica na yabaki a tauvimate tu kina, e kila tale ga ni a vinakata dina me vakabulai. A tukuna ena yalololoma: “Luvequ, e sa vakabulai iko na nomu vakabauta. Lako ena vakacegu, mo bula mai na kemu mate ca.”—Mari. 5:25-34.

9. Na cava e cakava o Jisu nira tarovi ira na gonelalai na nona tisaipeli?

9 O ira mada ga na gone e rawarawa nira veimaliwai kei Jisu. Ena dua na gauna, eso era kauti luvedra yani vua, ra qai tarovi ira na tisaipeli, era nanuma ni sega ni vinakata o Jisu mera vakasosataki koya na gonelalai. Ia e sega ni dina qori. E tukuna na iVolatabu: “E sega sara ga ni taleitaka o Jisu na ka e raica, mani kaya vei iratou [na tisaipeli]: ‘Laivi ira na gone lalai mera lako mai vei au, dou kua ni tarovi ira, ni o ira va qo e nodra na matanitu ni Kalou.’” E “mokoti ira na gone o koya qai vosa vakalougatataki ira, e tabaki ira tale ga.” A sega wale ga ni vakadonuya mera gole vua na gone lalai; a yalorawarawa sara ga ni ciqomi ira.—Mari. 10:13-16.

10. A rawa vakacava ni vakasakiti na itovo i Jisu?

10 A rawa vakacava ni vakasakiti na itovo i Jisu ena nona bula e vuravura? A vulica qori ena vica vata na bilioni na yabaki a bula voli kina kei na Tamana vakalomalagi qai vakatotomuria sara. (Wilika Vosa Vakaibalebale 8:22, 23, 30.) Ena nona tiko voli mai lomalagi, a vulica tale ga na ivakarau ni nona liutaki ira vakayalololoma nona ibulibuli o Jiova qai vakatotomuria voleka. Ena sega ni cakava rawa qori ke sega ni vakamalumalumu ina veiliutaki. A marau me vakamalumalumu vei Tamana, qai marautaka tale ga o Jiova nona dau cakava qori na Luvena. Ni mai bula e vuravura, a uasivi nona vakaraitaka o Jisu na itovo vakasakiti i Tamana vakalomalagi. E ka dokai tale ga meda talairawarawa vei Karisito, ni lesi vakalou me iLiuliu ni Matanitu vakalomalagi!

Vakatotomuria na iTovo i Karisito

11. (a) O cei meda saga meda vakatotomuria? (b) Na cava mera saga kina na tagane ena ivavakoso mera vakatotomuri Jisu?

11 E bibi gona vei ira kece ena ivavakoso vaKarisito, vakabibi vei ira na tagane, mera sasaga tiko ga mera vakatotomuria na itovo i Karisito. Me vaka sa tukuni oti, e tukuna na iVolatabu: “Ni ulu ni tagane yadua na Karisito.” O Jisu a vakatotomuria na Uluna, na Kalou dina, o ira tale ga na tagane lotu vaKarisito mera vakatotomuria na Uludra—o Karisito. A cakava qori na yapositolo o Paula ena gauna a veisau kina me dua na lotu vaKarisito. A vakamasuti ira nona itokani ena vakabauta: “Moni vakatotomuri au, me vaka ga na noqu vakatotomuri Karisito.” (1 Kor. 11:1) A tukuna tale ga na yapositolo o Pita: “Qo na vuna oni kacivi kina, ni a vakararawataki o Karisito ena vukumuni, e qai laiva vei kemuni na ivakarau moni muria na weniyavana.” (1 Pita 2:21) Dua tale na vuna mera vakatotomuri Karisito kina na tagane, ni o ira ga era na dauveiqaravi se ra qase ni ivavakoso. A marau o Jisu ni vakatotomuri Jiova, mera marau tale ga ni vakatotomuri Karisito kei na nona itovo na tagane lotu vaKarisito.

12, 13. Mera karoni ira vakacava na sipi na qase ni ivavakoso?

12 E dodonu mera vulica na qase ni ivavakoso mera vakatotomuri Karisito. A vakasalataki ira na tagane matua se o ira na qase ni ivavakoso o Pita: “Moni vakatawa na qelenisipi ni Kalou oni lesi moni qarava, ni kua ni qarava ena voraki, ena yalo ga e vinakata; me kua ena yalokocokoco, ena yalo ga e marautaka; ni kua ni vakacolasau vei ira e taukeni ira na Kalou, moni nodra ivakaraitaki ga na qelenisipi.” (1 Pita 5:1-3) Era na sega ni voravora na qase ni ivavakoso, sega ni vakacolasau, sega ni lewa ga na ka era cakava. Nira vakatotomuri Karisito, era na saga mera yalololoma, yalomalumalumu, ra qai veikauaitaki nira karoni ira na sipi e lesi mera qarava.

13 Era sega ni uasivi na tagane lotu vaKarisito, e bibi mera kila ni vakaiyalayala ga na ka era rawa ni cakava. (Roma 3:23) E bibi gona mera yalorawarawa ni vuli vei Jisu ra qai vakatotomuria nona loloma. Mera nanuma tale ga na ivakarau ni nodrau raici ira na tamata na Kalou kei Karisito, ra qai saga mera vakatotomuria. E vakarota o Pita: “Moni sulumaka kece na yalomalumalumu ena nomuni veimaliwai baleta ni cati ira na viavialevu na Kalou, ia e vakaraitaka nona loloma soli wale vei ira na yalomalumalumu.”—1 Pita 5:5.

14. Me vakacava sara mada na levu ni nodra dau veidokai na qase ni ivavakoso?

14 E bibi me vinaka nodra itovo na tagane digitaki ena ivavakoso nira veimaliwai kei ira na sipi ni Kalou. E kaya na Roma 12:10: “Ni veilomani ena veilomani ni veitacini. Ni dau liu ena nomuni veidokadokai.” Era na dau veidokai na qase kei na dauveiqaravi. Me vakataki ira ga na lotu vaKarisito kece, o ira na tagane qo era na ‘sega ni cakava e dua na ka ena veileti se yalo ni nanumi ira ga, ia era na yalomalumalumu ena nodra okati ira na kena vo mera uasivi vei ira.’ (Fpai. 2:3) E bibi gona vei ira na veiliutaki ena ivavakoso mera okati ira na kena vo mera uasivi vei ira. Nira cakava qori, era na muria na tagane digitaki qo na ivakasala i Paula: “O keda eda kaukaua e dodonu meda vukei ira era sega ni kaukaua, meda kua ni nanumi keda ga. Meda nanumi ira na tamata kece ena ka e yaga vei ira, ena vakauqeti ira tale ga. O Karisito mada ga a sega ni nanumi koya ga.”—Roma 15:1-3.

‘Dokai Ira na Watimuni’

15. Mera raici ira vakacava na watidra na tagane vakawati?

15 Raica mada na ivakasala i Pita vei ira na tagane vakawati. E vola: “Kemuni tale ga na tagane vakawati, moni kilai ira vinaka tiko ga na watimuni ena nomuni bula vata, ni dokai ira nira ka malumalumu sara vei kemuni, nira yalewa.” (1 Pita 3:7) Ni o doka e dua, o na raici koya cake. O na kauaitaka nona nanuma, na ka e gadreva, kei na ka e vinakata, o na dau vakamalumalumu tale ga vua ke veiganiti. Qori na ka me cakava na tagane vua na watina.

16. Na cava tale e veivakasalataki kina na iVolatabu vei ira na tagane vakawati me baleta nodra dau dokai watidra?

16 Ena nona vosa tiko o Paula vei ira na tagane vakawati mera dokai watidra, e vakasalataki ira tale ga: “Me kua ni tarovi na nomuni masu.” (1 Pita 3:7) E matata vakasigalevu ni raica vakabibi o Jiova na nona ivalavala o tagane vei watina. Ke sega ni dokai yalewa, ena tarovi na nona masu. Era marau tale ga na yalewa vakawati ni dokai ira na watidra.

17. Me vakacava sara mada na levu ni nona lomani watina o tagane?

17 E veivakasalataki na Vosa ni Kalou me baleta nodra lomani na yalewa vakawati: “E dodonu gona vei ira na tagane mera lomani watidra me vaka ga nodra lomana na yagodra. . . . E sega ni dua na tagane e cata na yagona, ia ena vakania qai karona me vaka ga nona karona na ivavakoso na Karisito . . . Moni lomana tale ga na dui watimuni me vaka ga nomuni lomani kemuni.” (Efeso 5:28, 29, 33) Me vakacava sara mada na levu ni nodra lomani watidra na tagane vakawati? E vola o Paula: “Kemuni na tagane, ni lomani ira tiko ga na watimuni me vaka ga nona lomana na ivavakoso na Karisito qai solia kina nona bula.” (Efeso 5:25) Io, e dodonu me yalorawarawa na tagane vakawati me soli bula ena vukui watina me vaka ga a cakava o Karisito ena vukuda. Ke dau yalololoma, veikauaitaki, qai sega ni dau nanumi koya ga o tagane, ena rawarawa vei yalewa vakawati me vakamalumalumu.

18. Na cava ena dusimaki ira na tagane mera qarava vinaka kina nodra itavi ena bula vakawati?

18 E sa sivia tale beka na ka e namaki vei tagane ena nona dokai watina? Sega. Ena sega ni tukuna o Jiova me cakava o tagane na ka e kila ni na sega ni rawata. Kena ikuri, mera nuitaka na dauveiqaravi ni Kalou na igu kaukaua duadua ena lomalagi kei na vuravura—na yalo ni Kalou. E tukuna o Jisu: “Ke sa rawa vei kemudou na tamata ivalavala ca mo dou solia na ka vinaka vei ira na luvemudou, sa na qai wacava na Tamada mai lomalagi ni na solia na yalo tabu vei ira era kerea vua!” (Luke 11:13) Nira masu, mera kerea na yalo tabu na tagane vakawati, ena vukei ira o Jiova ena nodra ivalavala vei ira tale eso, okati kina na watidra.—Wilika Cakacaka 5:32.

19. Na cava ena veivosakitaki ena ulutaga tarava?

19 Levu na ka e vinakati mera vulica na tagane vakawati mera vulica ena sala mera vakamalumalumu kina vei Karisito ra qai vakatotomuri koya. Ia vakacava o ira na yalewa vakawati? Ena vakamacalataki ena ulutaga tarava na nodra itavi ena ituvatuvanaki i Jiova.

O se Nanuma Tiko?

• Na itovo cava i Jisu meda vakatotomuria?

• Me vakacava nodra ivalavala na qase ni ivavakoso vei ira na sipi?

• Me vakacava nona ivalavala na tagane vakawati vei watina?

[iYaloyalo ena tabana e 10]

Vakatotomuri Jisu ena nomu dokai ira tale eso

    iVola vakaViti (1982-2026)
    Sogota
    Dolava
    • vakaViti
    • Vakauta
    • Digia
    • Copyright © 2025 Watch Tower Bible and Tract Society of Pennsylvania
    • iVakavakayagataki
    • Kemu iTukutuku
    • Privacy Settings
    • JW.ORG
    • Dolava
    Vakauta