Na Vuna Mera Dokai Kina na iTabaqase

ENA baravi kei Kalifonia, e Merika, era tiko kina na vunikau era dau tabaki vakalevu duadua e vuravura e kilai me Lone Cypress. E tukuni ni vunikau qo e sivia na yabaki 250. E kilaitani ena dede ni nona bula voli mai, qai levu na ka e caka me kauaitaki kina. Me kena ivakaraitaki, e vakadre ena keveli qai buli ena vatu na kena yavu.

Na kau qo na Lone Cypress e vakavuna meda nanumi ira kina na lotu vaKarisito itabaqase era maliwai keda, ni vakasakiti na nodra dau vosota. Dua na sala vinaka era cakava kina qo ena nodra dau kacivaka na itukutuku vinaka. E parofisaitaka na parofita o Joeli nira na kacivaka na “qase“ na itukutuku ena iVolatabu. (Joeli 2:28-32; Caka. 2:16-21) Vakasamataka mada na levu ni aua era vakayagataka o ira na itabaqase ena nodra gumatua ni vukea eso tale mera kila na “itukutuku vinaka ni matanitu ni Kalou”! (Maciu 24:14) Eso vei ira na itabaqase qo era vosota tu ena vica na yabaki na veivakacacani kei na so tale na ituvaki dredre. Ke sa kauaitaki na vunikau na cypress ena dede ni nona bula, e vakadre ena keveli qai buli na kena yavu vatu, sa qai wacava na kena bibi mera kauaitaki ra dokai tale ga na itabaqase ena keda maliwa!

O Jiova na Kalou e vakaroti ira nona tamata ena gauna eliu: “Mo tu cake e matadra sa sika na uluna, ka doka na matadra na tamata qase.” (Vunau 19:32) Nikua, era maliwai keda na dauveiqaravi i Jiova e levu era ivakaraitaki vinaka ena nodra yalodina ni ‘lako vata kei na Kalou’ me vicasagavulu na yabaki. (Maika 6:8) Ena nodra bulataka tiko ga na ivakavuvuli vakaivolatabu, era ‘vakaisala vakaiukuuku’ kina na ulu sika.—Vkai. 16:31.

E vakasalataka na cauravou o Timoci na yapositolo o Paula: “Kua ni vakalewa vakaca e dua e sa kenaturaga.” Ia ena vinakati vei Timoci me ‘vakamasuti koya ga me vaka e tamana o ira na kenamarama me vaka era tinana.’ (1 Tim. 5:1, 2) E rawa sara ga ni tukuni ni dodonu me “tu cake” o Timoci e matadra na ulu sika. E matata eke ni namaka tale ga o Jiova me veidokai noda itautau ni vosa.

E volai ena Roma 12:10 “ni dau liu ena nomuni veidokadokai.” Era dau dokai ira na lotu vaKarisito itabaqase na ivakatawa ni ivavakoso. Ia meda vakaliuliu kece ena noda dau veidokadokai.

E tiko dina nodra itavi lavotaki na lewe ni vuvale vei ira nodra itubutubu, tubudra kei na tukadra. E levu era qara na sala mera taqomaka kina na Lone Cypress, era se cakava tiko ga qori. Koya gona, meda qara na sala meda dau dokai ira tiko ga kina na noda itubutubu qase, na tubuda kei na tukada. Me kena ivakaraitaki, nida dau vakarorogo vinaka, eda na sega ni cakava na ka ena sala e vinaka ga vei keda da qai sega ni nanumi ira.—Vkai. 23:22; 1 Tim. 5:4.

Era vakamareqeti dina vei Jiova na itabaqase era tiko maliwai keda. E sega ni dau biuti ira. (Same 71:18) E vakaukauataki ira tu ga na Kalou me rawa nira yalodina tiko ga vua. Meda tokoni ira qai dokai ira tiko mada ga na itabaqase.

[iYaloyalo ena tabana e 7]

E gadreva na Lone Cypress me kauaitaki mera rokovi qai dokai tale ga na itabaqase

[Credit Line]

American Spirit Images/age fotostock