Toro Voleka Vua na Kalou

E Raica na Ka Eda Vinaka Kina

1 TUI 14:13

“SA VAKATOVOLEA na yalo kece ko Jiova, ka kila kece na nanuma ni lomada.” (1 Veigauna 28:9) Na vosa uqeti vakalou qori me uqeti keda meda vakavinavinakataka na titobu ni nona kauaitaki keda o Jiova. Eda sega ni uasivi, ia e raica na lomada qai vakasaqara na ka eda vinaka kina. E macala qo ena nona vosa me baleti Apaija ena 1 Tui 14:13.

A bula ena dua vuvale ca o Apaija. O Jeropoami na tamana a liuliu ni vukitani.a A tukuna o Jiova me na vakawabokotaka na vuvale i Jerepoami “me vaka sa taviraka tani na de-ni-manumanu na tamata.” (1 Tui 14:10) Ia o Apaija a tauvimate bibi tu, na lewe ni vuvale duadua ga i Jeropoami a vakarota na Kalou me bulu vinaka.b Na vuna? A tukuna na Kalou: “Ni sa kune vua na ka vinaka vei Jiova, na nodra Kalou na Isireli, e na mataqali [“vuvale,” NW] i Jeropoami.” (1 Tui 14:​1, 12, 13) Na cava eda kila rawa e keri me baleti Apaija?

E sega ni tukuni ena iVolatabu ni dauveiqaravi yalodina ni Kalou o Apaija. Ia a kune ga vua eso na ka vinaka. Na vinaka qo a caka vei “Jiova,” de dua na ka e vauca na nona sokalou. E tukuna na nodra ivola na Rapai ni a lako o Apaija ena valenisoro e Jerusalemi se a vakatalai ira na sotia a vakarota o tamana mera kua ni lako i Jerusalemi.

Eda sega ni kila na ka vinaka a cakava, ia a yaga na nona caka vinaka qori. Kena imatai, na vinaka a “kune vua”​—a vu sara ga mai lomana. Kena ikarua, a vakasakiti na nona itovo vinaka o Apaija, nida vakasamataka ni lewe ni “vuvale i Jeropoami.” A tukuna na italatala ni dua na lotu: “Era vakavinavinakataki na tagane era susugi mai na vuvale ca, ia era saga tiko ga mera caka vinaka.” A tukuna tale e dua ni vinaka a vakaraitaka o Apaija a “laurai levu . . . , me vaka ga na ramase ni kalokalo ena bogi buto, kei na totoka ni sitari ena kedra maliwa na vunikau sa mira na drauna.”

Na kena e bibi duadua, na vosa ena 1 Tui 14:13 e vakavulica e dua na ka totoka me baleti Jiova kei na veika e vakasaqara vei keda. Vakasamataka mada nona “raica” vei Apaija e dua na ka vinaka. A dikeva na lomai Apaija o Jiova me yacova ni sa kunea e dua na ka vinaka. Ni vakatauvatani kei na nona vuvale, e vola e dua na dauvolaivola ni o Apaija e vaka e dua na mataniciva “ena ibinibini vatu lalai.” A vakamareqeta o Jiova na nona vinaka qai vakalougatataka, a yalololoma kina vua e dua e cavutu mai na vuvale ca.

Eda sega ni uasivi, ia e veivakacegui noda kila ni dau vakasaqara o Jiova na ka eda vinaka kina. (Same 130:3) Me uqeti keda mada ga meda toro voleka vei Jiova na Kalou e dikeva vinaka na lomada me raica e dua na ka eda vinaka kina.

[iVakamacala e ra]