iTukutuku Vinaka Vei Ira na Dravudravua

E VAKADEITAKA na iVolatabu: “Ni na sega ni guilecavi tikoga na tamata dravudravua.” (Same 9:18) E tukuna tale ga me baleta na Dauveibuli: “O ni sa dedeka na ligamuni, ka vakamamautaka na ka bula kecega e na ka era gadreva.” (Same 145:16) E sega ni tadra wale ga na inuinui e volai ena iVolatabu. Na Kalou Cecere Duadua e rawa ni vakarautaka na ka e gadrevi me oti kina na dravudravua. Na cava era vinakata na dravudravua?

E kaya e dua e dau dikeva na veika vakailavo mai Aferika, ni vinakati ena vanua dravudravua e dua na “iliuliu dauloloma.” Kena ibalebale qori ni na vinakati e dua e tu vua na kaukaua me cakava na veiveisau ena vakaotia na dravudravua, me yalololoma tale ga me rawa ni cakava qori. Eda rawa ni kaya ni vinakati tale ga e dua na iliuliu me lewai vuravura, ni veivakaduiduitaki e veivanua e vakavuna tiko vakalevu na dravudravua. Kena ikuri, na iliuliu tale ga ena vakaotia na dravudravua me na walia na ka e vakavuna tiko na dravudravua—na noda dau nanumi keda ga. Eda na kunea e vei na iliuliu qori?

A talai Jisu mai na Kalou me tukuna na itukutuku vinaka vei ira na dravudravua. Ni tucake o Jisu me tukuna na nona ilesilesi vakalou, a kaya: “Sa tu vei au na yalo i Jiova, e lumuti au meu vunautaka na itukutuku vinaka vei ira na dravudravua.”—Luke 4:16-18.

iTukutuku Vinaka Cava?

Sa lesi Jisu me Tui na Kalou. E itukutuku vinaka dina qori. E iLiuliu vinaka me vakaotia na dravudravua baleta (1) ena liutaka na kawatamata qai tu vua na kaukaua me cakava kina e dua na ka; (2) e vukei ira vakayalololoma na dravudravua qai vakavulici ira na nona imuri mera kauaitaki ira qori; (3) e rawa tale ga ni vakaotia na ka e vakavuna tiko na dravudravua, noda dau nanumi keda ga. Meda raica mada e tolu na ka e okati ena itukutuku vinaka.

1. Lewa o Jisu na veivanua E tukuna na iVolatabu me baleti Jisu: “A sa soli vua na lewa . . . me ra qaravi koya ko ira na tamata kece, kei na veivanua, kei na dui vosavosa.” (Taniela 7:14) Vakasamataka mada na veika vinaka ena rawati ni liutaka ga na kawatamata e dua na matanitu. Sa na sega tale ni veivalataki na veika e tu e vuravura ni na yaga vakatautauvata vei keda kece. E vakadeitaka sara ga o Jisu ni na liutaka na vuravura taucoko, e tu tale ga vua na kaukaua me cakava na ka e vinakati. A kaya: “Sa soli vei au na lewa kece mai lomalagi kei vuravura.”—Maciu 28:18.

2. E lomani ira na dravudravua o Jisu Ena nona cakacaka vakaitalatala e vuravura o Jisu, e dau vukei ira vakayalololoma na dravudravua. Kena ivakaraitaki, a tara na isulu i Jisu e dua na marama a vakayagataka na nona iyau kece ena veiqaravi vakavuniwai ni vaqara bula. Ni turidrabalavu tu me 12 na yabaki, e macala ni na malumalumu sara ga. E tukuna na Lawa ke tara e dua tale, sa na vakavuna na nona tawasavasava o koya e tara. Ia a lomani koya o Jisu. A kaya: “Luvequ, e sa vakabulai iko na nomu vakabauta. Lako ena vakacegu, mo bula mai na kemu mate ca.”—Marika 5:25-34.

Na ivakavuvuli i Jisu e rawa ni veisautaka na nodra rai eso tale mera rawa ni veivukei tale ga vakayalololoma. Kena ivakaraitaki, raica mada na nona vakamacala o Jisu vua e dua na tagane a via kila na sala me vakamarautaka kina na Kalou. E kila na tagane oya ni vinakata na Kalou meda lomani ira na kainoda, ia e tarogi Jisu: “O cei sara mada na kainoqu?”

E sauma na nona taro o Jisu ni vakamacalataka na nona vosa vakatautauvata kilai levu me baleta na turaga a biuti Jerusalemi me gole i Jeriko. A butakoci qai biu tu me “voleka sara ga ni mate.” A gole sobu yani ena gaunisala oya e dua na bete, ia a gole ena batinisala adua. A cakava tale ga qori e dua na Livai. “E muri sara yani e dua na kai Samaria. Ni raici koya, e tubu sara ga nona loloma.” E vakasavasavataka na nona mavoa, e kauti koya sara ena dua na burenivulagi qai sauma na kena itaukei me qaravi koya toka mada. E taroga o Jisu: “O cei . . . o nanuma ni kainona na turaga era mokulaka na daubutako?” E kaya na turaga oya: “O koya ga a yalololoma.” Mani kaya o Jisu: “Mo lako mo lai cakava tale ga qori.”—Luke 10:25-37.

O ira era sa mai iVakadinadina i Jiova era vulica na ivakavuvuli i Jisu ra qai veisautaka na nodra rai me baleti ira era vinakata na veivuke. Kena ivakaraitaki, a vola e dua na dauvolaivola mai Latvia ena nona ivola na Women in Soviet Prisons na gauna e tauvimate tu kina ena nona cakacaka voli ena valeniveivesu mai Potma ena lomaloma ni 1960. “Era gu ni qaravi au [na iVakadinadina] ena gauna taucoko au tauvimate tu kina. Qori na veiqaravi vinaka duadua me bau caka vei au.” E tomana: “Era raica na iVakadinadina i Jiova ni nodra itavi mera veivuke se mani lotu cava e lewena e dua se matatamata e cavutu mai kina.”

Ena vuku ni leqa vakailavo mai Ancón, Ecuador, e sega kina na nodra cakacaka se nodra ivurevure ni ilavo eso na iVakadinadina i Jiova, ra mani vakasamataka eso na nodra itokani iVakadinadina mera veivuke; era dau vakarautaka na kakana me volitaki vei ira na lesu mai na qoli ena bogi (itaba ena yasana imatau). Era dauveitokoni na lewe ni ivavakoso, wili kina o ira na gone. Era dau tekivu ena dua na kaloko e veimataka me rawa ni vakarau tu na kakana nira kele na waqa ena va na kaloko. E dau wasei na ilavo era rawata na iVakadinadina ena ka e gadrevi ena vuvale yadua.

Na italanoa va qo e dusia ni ivakaraitaki i Jisu kei na nona ivakavuvuli e rawa ni veisautaka dina na noda rai me baleti ira era vinakata na veivuke.

3. Kaukaua i Jisu me veisautaka na ivakarau ni tamata E sega ni ka vou na noda dau nanumi keda ga. E vakatoka na iVolatabu me ivalavala ca. A vola mada ga na yapositolo o Paula: “Au qai raica na lawa qo: niu via cakava na ka e dodonu, e tiko ga vei au na ca.” E tomana: “O cei ena vakabulai au mai na yago e vakavuna tiko na noqu mate? Me vakavinavinakataki na Kalou ena vuku i Jisu Karisito.” (Roma 7:21-25) E tukuna tiko eke o Paula ni na vakayagataki Jisu o Jiova me sereki ira na dausokalou dina mai na ivalavala ca eda sucukaya kece mai, dua oya na noda dau nanumi keda ga, na ka sara ga e vakavuna tiko na dravudravua. Ena yaco vakacava qori?

A tukuna o Joni na Dauveipapitaisotaki ni papitaiso oti o Jisu: “Raica na Lami ni Kalou ena kauta tani na nodra ivalavala ca na kai vuravura!” (Joni 1:29) Sa voleka sara na gauna mera na tawani vuravura kina o ira na sereki mai na ivalavala ca eda sucukaya mai, wili kina na noda dau nanumi keda ga. (Aisea 11:9) Ena vakaotia vakadua ena gauna qori o Jisu na ka e vakavuna tiko na dravudravua.

E vakamarautaki keda dina na noda vakasamataka na gauna sa na vakayacori kina na ka kece eda vinakata! E tukuna na Vosa ni Kalou: “A ra na dui tiko ga na tamata yadua e na ruku ni nona vaini, kei na ruku ni nona lolo; ka sega e dua me na vakarerei ira.” (Maika 4:4) Na vosa qori e vakamacalataka vakaserekali na gauna eda na marautaka kina na noda cakacaka, eda na sega ni rerevaka e dua na ka, da qai marautaka sara ga na bula ena vuravura sa na sega kina na dravudravua. Qori ena vakalagilagi ga kina o Jiova.