Sala Mera Vakavulici Kina na Gone me Baleta na Kalou​—Na iWalewale Cava e Vinaka Duadua?

“Na vosa oqo, ka’u sa vakarota vei kemuni e na siga oqo, me tiko ga e na lomamuni: ia mo ni gumatua ni vakavulica vei ira na luvemuni, ka dauvosataka ni kemuni sa tiko e na nomuni vale, ni kemuni sa lako voli talega e na sala, ka ni kemuni sa koto sobu, ni kemuni sa duri cake talega.”—VAKARUA 6:6, 7.

ENA so na gauna era na rairai vakila na itubutubu ni dredre na nodra itavi mera vakavulici luvedra. Ia nira qara ivakasala, de dua era na veilecayaki tale ena levu ni ivakasala era rogoca se wilika. E dau totolo mera tukuna na nodra nanuma na wekadra se o ira na nodra itokani. E levu na ivakasala me baleti ira na itubutubu e tabaki ena ivola, mekesini kei na Internet, ia e vakavu veilecayaki tale ena so na gauna.

Ena yasana adua, e tu ena iVolatabu na ivakasala nuitaki vei ira na itubutubu ena ka mera vakavulica vei luvedra kei na idusidusi yaga ena sala mera vakavulici kina. E laurai ena Vakarua 6:6, 7 ni bibi mera qara na itubutubu eso na sala mera veivosakitaka kina kei luvedra e veisiga na veika me baleta na Kalou. E va ga na vakatutu vakaivolatabu e toka e ra qo sa vukei ira e vica na udolu na itubutubu mera vakavulica vei luvedra na veika me baleta na Kalou.

1. Veika e rawa ni vulici ena veika buli. A vola na yapositolo o Paula: “Tekivu mai na gauna a buli kina na vuravura e kilai na veika tawarairai me baleti koya [Kalou], ya na nona kaukaua e sega ni vakaiyalayala, vaka kina ni o koya dina ga na Kalou, e kilai qori ena veika e buli.” (Roma 1:20) E levu na ka era rawa ni cakava na itubutubu mera kila kina na luvedra ni bula dina tiko na Kalou. Qori na nodra vukei luvedra mera kila ra qai vakamareqeta na veika e bulia na Kalou, mera vukei tale ga mera vakasamataka na itovo cava ni Kalou e vakatakilai ena veika e bulia.

A vakayagataka tale ga na iwalewale qori o Jisu ni vakavulici iratou na nona tisaipeli. Me kena ivakaraitaki, e kaya: “Raici ira mada na manumanuvuka, era sega ni teitei, tatamusuki, se kumuna na kedra ena lololo; ia e vakani ira na Tamamuni vakalomalagi. Oni sega beka ni uasiviti ira?” (Maciu 6:26) A vakabibitaka e keri o Jisu na itovo i Jiova na loloma kei na yalololoma. Sega ni koya ga qori. A vukei ira tale ga na nona tisaipeli mera vakasamataka na sala e vakaraitaka kina na Kalou na itovo qori vei ira na luvena.

E vakamacalataka na Tui vuku o Solomoni na vuku vakasakiti e solia na Kalou vei ira na qasikalolo, qai vakayagataka na manumanu lalai qori me vakabibitaka kina e dua na lesoni yaga. E tukuna: “Mo lako vua na qasikalolo, ko iko na dauvucesa; mo nanuma mada na nonai valavala, mo vuku: Sa sega e dua me tuberi koya, se vakaraica, se lewa vua, ia sa vakarautaka na kena e na vula i katakata, ka kumuna na kena kakana e na vula i matua.” (Vosa Vakaibalebale 6:6-8) Qori e dua na sala vakasakiti meda vulica kina na bibi ni noda tekia na isausau yaga da qai vakayagataka na kaukaua e solia na Kalou meda sauva kina!

E rawa nira vakatotomuria na itubutubu na laulau ni veivakavulici i Jisu kei Solomoni nira muria qo: (1) Tarogi luvedra na kau kei na manumanu cava era taleitaka. (2) Veivosakitaka eso tale na ka me baleta na kau kei na manumanu qori. (3) Tukuna na veika era rawa ni vulica me baleta na Kalou ena ibulibuli va qori.

2. Vakatotomuria na rai i Jisu me baleti ira e vakavulica. E sega ni dua na tamata e bau bula e bibi duadua na ka e tukuna, o Jisu ga. Ia e taro ena levu na gauna. E kauaitaka na nodra nanuma kei na lomadra e vakavulica. (Maciu 17:24, 25; Marika 8:27-29) Levu tale ga na lesoni bibi era rawa ni vakavulici luvedra kina na itubutubu. Ia me laulau na nodra veivakavulici, ena vinaka mera vakatotomuri Jisu ra qai vakauqeti luvedra mera kua ni rere ni talaucaka na lomadra.

Ia vakacava ke duatani na rai nei gone se berabera ni kila eso na lesoni yaga? Vakasamataka mada na sala a vakavulici ira kina na nona yapositolo o Jisu. Eratou veiba katakata ena so na gauna qai berabera me ratou kila na yaga ni yalomalumalumu. A vosoti iratou tiko ga o Jisu, e vakamacalataka tale ga vakavica ni bibi na yalomalumalumu. (Marika 9:33, 34; Luke 9:46-48; 22:24, 25) Era na vosota tale ga na itubutubu era vakatotomuri Jisu nira vakadodonutaki luvedra, ke gadrevi mera taleva na lesoni vata ga sa veivosakitaki oti, era na cakava oya me yacova ni sa kila na gone na vuna e bibi kina.a

3. Veivakavulici ena ivakaraitaki. Ena yaga ke ra muria na itubutubu na nona ivakasala na yapositolo o Paula vei ira na lotu vaKarisito era tiko mai Roma. E vola vei ira: “O iko o vakavulica tiko e dua tale, o sa bau vakavulici iko mada? O iko, o vunautaka tiko ‘Kua ni butako,’ o butako tiko?”—Roma 2:21.

E yaga na ivakasala qori nira dau kauaitaka vakalevu na gone na ka era cakava na itubutubu, sega ni ka era tukuna. Koya gona nira cakava na itubutubu na ka era tukuna, ena rawarawa vei ira na gone mera muria na veika era vakavulica.

4. Tekivu nira se lalai na gone. E rogo vinaka ena nona itikotiko o Timoci na nona itokani na yapositolo o Paula ena cakacaka vakaulotu. (Cakacaka 16:1, 2) Dua na vuna ni a vakavulici ena “iVolatabu” ni se “gone dramidrami.” Erau sega wale ga ni wilika na iVolatabu vei Timoci o tinana kei buna, ia erau vukei koya tale ga me vakasamataka na dina ni veika e volai kina.—2 Timoci 1:5; 3:14, 15.

iVukevuke e Vakarautaki

E vica na ivola e tabaka na iVakadinadina i Jiova me vukei ira na itubutubu nira vakavulici luvedra ena ka dina me baleta na Kalou. Eso na ivola qori e tabaki me baleti ira na gone lalai. Eso tale ena vukei ira na itubutubu kei na luvedra itabagone ena sala mera veivosaki tiko ga kina.b

Ni bera gona nira vakavulici luvedra na itubutubu ena veika me baleta na Kalou, ena vinaka mera kila na isau ni so na taro dredre era na rairai taroga na gone. Me kena ivakaraitaki, o na sauma vakacava na taro qo: Na cava e vakatara tiko kina na Kalou na rarawa? Na cava na inaki ni Kalou me baleta na vuravura? Era tu e vei na mate? Era na marau na iVakadinadina i Jiova mera vukei iko mo kila na isaunitaro qori kei na so tale me rawa ni dou toro voleka kina vua na Kalou vakavuvale.—Jemesa 4:8.

[iVakamacala e ra]