Vakavulica na Luvemu
Erau Kilai me Rau “Luve ni Kurukuru”
DE DUA o rogoca na vakuru ni kurukuru ena draki ca. O bau rere?—a Erau kilai e rua na imuri i Jisu me rau “Luve ni Kurukuru.” Meda raica mada na vuna.
O rau na rua na imuri qo i Jisu o Jemesa kei Joni. Erau veitacini rau qai luvedrau o Sepeti kei Salome. E rairai taci Meri na tinai Jisu o Salome. De dua eratou veitatacini o Jisu, Jemesa kei Joni ratou qai veitokani voleka sara ni ratou tubucake tiko.
E dauqoli o Sepeti, vaka kina o Jemesa kei Joni. O Jemesa kei Joni erau maliwai ira a digia e liu o Jisu mera nona imuri. Ni sureti rau o Jisu, rau biuta na nodrau cakacaka rau qai muri koya. A qai digia o Jisu e le 12 me ratou nona yapositolo. Erau wili kina o Jemesa kei Joni.
Ni vo e vica na vula me vakamatei o Jisu, ratou a lako kei na nona yapositolo ena veidelana mai Samaria. Sa karobo na vanua eratou sa wawale tale ga, ia era sega ni vinakata na kai Samaria me ratou moce ena nodra siti. O kila na vuna?— Meda raica mada.
O Jisu kei ratou na nona yapositolo eratou Jiu, qai levu na Jiu era cati ira na kai Samaria. Ia e sega ni va qori o Jisu ni lomani ira, dodonu me rau cakava tale ga qori o Jemesa kei Joni. Ia dua na ka na nodrau sevaki ira na kai Samaria era sega ni ciqomi iratou rau qai tarogi Jisu: “Oni vinakata me keirau kaciva na bukawaqa mai lomalagi me vakarusai ira?” Na cava o nanuma ni tukuna o Jisu?— A kaya vei rau ni cala na ka erau tukuna! Ena vinakati me rau vulica o Jemesa kei Joni e levu tale na ka me baleta na yalololoma.
E nodrau leqa tale ga na nodrau viavia liu, me rau uasivi ira tale eso. Ni bera ni mate o Jisu rau talai tinadrau o Jemesa kei Joni me tukuna vei Jisu: “Ni vakadonuya mada me rau dabe ena nomuni matanitu na luvequ, e dua ena yasamuni imatau kei na dua ena yasamuni imawi.” Dua na ka nodratou cudru na vo ni tini na yapositolo ni ratou rogoca na ka erau cakava o Jemesa kei Joni. Vakacava o iko, o na cudru tale ga?—
O na rairai cudru tale ga. Eda sega ni taleitaka e dua e dau viavia liu qai saga me uasivi ira tale eso. Erau mani veisau o Jemesa kei Joni ni rau kila ni cala qai tawaloloma na ka erau cakava. Erau sa qai dauloloma, rau yalovinaka tale ga. Na cava eda vulica kina?—
Eda vulica vei Jisu ni dodonu meda yalololoma tale ga. E dau caka vinaka o Jisu vei ira na tagane, yalewa, kei ira na gone. O na saga mo nanuma qai vakatotomuria nona ivakaraitaki?—
Wilika ena nomu iVolatabu
Maciu 27:55, 56; Marika 15:40, 41
Joni 4:4-15, 21-26; Luke 9:51-55
Maciu 20:20-24; Marika 10:35-37, 41
[iVakamacala e ra]
a Ke o wiliwili tiko kei na dua na gone, mo cegu ni o raica na itoqa balavu o qai uqeti gone me tukuna na nona nanuma.