“O Jiova sa Duabau” E Kumuna Nona Vuvale

‘Au vakamasuti kemuni moni maroroya na duavata e vakavuna na yalo tabu.’​—EFESO 4:1, 3.

O NA VAKAMACALATAKA VAKACAVA?

Na cava na inaki ni nona ituvatuva na Kalou?

Eda na rawa vakacava ni “maroroya na duavata e vakavuna na yalo tabu”?

Na cava ena vukei keda meda dau “veilomani”?

1, 2. Na cava na inaki i Jiova me baleta na vuravura kei na kawatamata?

NA CAVA o vakasamataka ni o rogoca na vosa na vuvale? O vakasamataka na veilomani, marau, cakacaka vata ena dua ga na inaki? Se o vakasamataka e dua na itikotiko totoka meda susugi kina, meda vulica kina e levu na ka da qai veivukei? Qori na ka o na vakila ke o lewena e dua na vuvale era dau veikauaitaki. O Jiova ga a tauyavutaka na vuvale. (Efeso 3:14, 15) E nona inaki mera marau, veinuitaki, ra qai duavata na nona ibulibuli kece e lomalagi kei vuravura.

² Ni valavala ca na kawatamata, sa sega tale ni lewe ni vuvale ni Kalou. Ia e se dei tiko ga na nona inaki taumada na Kalou. Ena raica mera tawana na vuravura Parataisi na nodrau kawa o Atama kei Ivi. (Vkte. 1:28; Aisea 45:18) Sa tuvanaka na ka kece me vakayacori kina na nona inaki. E levu na ka e cakava qori e vakamacalataki ena ivola vei ira e Efeso, na kena usutu na duavata. Meda dikeva mada e vica na tikina ena ivola qori, da qai raica na sala eda rawa ni tokona kina na inaki i Jiova me vakaduavatataki ira na nona ibulibuli.

VEILIUTAKI KEI NA KENA INAKI

3. Na veiliutaki se na ituvatuva cava ni Kalou e vakamacalataki ena Efeso 1:10? A tekivu vakayacori ena gauna cava na imatai ni kena inaki?

³ A tukuna o Mosese vei ira na Isireli: “O Jiova na noda Kalou ko Jiova sa dua bau.” (Vkru. 6:4) Na ka kece e cakava o Jiova e tokoni kina nona inaki. “Ena kena gauna lokuci,” a vakayagataka o Jiova “e dua na veiliutaki” se ituvatuva me vakaduavatataki ira kece na nona ibulibuli. (Wilika Efeso 1:8-10.) E rua na inaki ni ituvatuva qori. Kena imatai, e vakarautaki ira na ivavakoso vaKarisito lumuti mera lai bula i lomalagi ra qai talairawarawa tiko ga ena veiliutaki i Jisu Karisito. A tekivu qori ena Penitiko 33 S.K., a kumuni ira kina na lai veiliutaki vata kei Jisu e lomalagi o Jiova. (Caka. 2:1-4) Ni okati ira na lumuti o Jiova mera yalododonu qai vakadonuya mera bula ena vuku ni isoro ni veivoli i Karisito, era vakadeitaka kina nira sa “luve ni Kalou.”​—Roma 3:23, 24; 5:1; 8:15-17.

4, 5. Na cava na ikarua ni inaki ni nona ituvatuva na Kalou?

⁴ Na ikarua ni kena inaki, mera vakarautaki kina o ira era na bula ena Parataisi e vuravura ena veiliutaki ni Matanitu vakaMesaia i Karisito. Era na marautaka e liu na “isoqosoqo levu” na bula ena Parataisi. (Vkta. 7:9, 13-17; 21:1-5) Ena loma ni 1,000 na yabaki ni veiliutaki i Jisu, era na vakaturi tale ga e vica vata na bilioni mera bula vata kei ira na isoqosoqo levu e vuravura. (Vkta. 20:12, 13) Vakasamataka mada, na veivakaturi e dua tale na ivakadinadina ni noda duavata! Ni oti na duanaudolu na yabaki, era na qai vakatovolei ena iotioti ni gauna na “veika e vuravura.” O ira era yalodina tiko ga era na okati mera “luve ni Kalou” e vuravura.​—Roma 8:21; Vkta. 20:7, 8.

⁵ Sa vakayacori ruarua tiko nikua na ituvatuva ni Kalou me baleti ira na lai bula e lomalagi kei ira na bula ena Parataisi e vuravura. Ia eda rawa vakacava ni tokona yadudua na ituvatuva ni Kalou?

“MAROROYA NA DUAVATA E VAKAVUNA NA YALO TABU”

6. E vakaraitaka vakacava na iVolatabu ni dodonu meda dau soqoni vata na lotu vaKarisito?

⁶ E kaya na iVolatabu ni dodonu mera dau soqoni vata na lotu vaKarisito. (1 Kor. 14:23; Iper. 10:24, 25) Qori e sega ni okati ga kina na noda lai sota ena dua na vanua, me vaka era dau cakava o ira na lako ina makete se rara ni qito. Eso tale na ka e gadrevi me rawa nida qai duavata. Ena rawati ga na duavata ke da muria na ivakasala i Jiova da qai vakalaiva me dusimaki keda na yalo tabu ni Kalou.

7. Na cava na ibalebale ni noda “maroroya na duavata e vakavuna na yalo tabu”?

⁷ Ena nodra vakabauta na isoro ni veivoli i Karisito, e okati ira kina na lumuti o Jiova mera yalododonu, mera luvena tale ga. E okati ira tale ga na so tale na sipi mera yalododonu ra qai nona itokani. Ia ena dau basika tiko ga na noda malumalumu nida se bula tiko ena vuravura qo. (Roma 5:9; Jeme. 2:23) Ke sega na noda malumalumu, ena sega ni veiganiti na ivakasala uqeti vakalou meda ‘veivosoti tiko ga.’ Eda na duavata vakacava kei ira eda vakabauta vata? E bibi meda saga meda dau ‘yalomalumalumu qai yalomalua.’ E uqeti keda tale ga o Paula meda saga vagumatua meda ‘maroroya na duavata e vakavuna na yalo tabu, meda veiyaloni tale ga.’ (Wilika Efeso 4:1-3.) Na noda muria na ivakaro qori e okati kina na noda yalorawarawa me dusimaki keda na yalo tabu ni Kalou, meda vakalaiva tale ga me dusimaki keda meda vakaraitaka na kena itovo. Na itovo qori e dau veivakameautaki ni basika na duidui, qai veibasai sara kei na vua ni itovo vakayago e dau vakavu veisei.

8. Ena sala cava e vakavu veisei kina na vua ni itovo vakayago?

⁸ Meda raica mada na sala e dau vakavu veisei kina “na vua ni itovo vakayago.” (Wilika Kalatia 5:19-21.) Na veidauci ena tawasea e dua mai vei Jiova vaka kina na ivavakoso. E veivakalolomataki tale ga na veibutakoci, nira rawa ni veitawasei kina na itubutubu kei na gone, vaka kina na isa ni vakawati e sega ni cala kei na watina. Na ivalavala duakadukali e vakaleqa na nona veiwekani vinaka kei na Kalou kei ira era lomani koya. E kila o koya e via qulutaka e rua na ka ni dodonu me savasava na yasana ruarua me rawa ni qai kabi vata. Na ivalavala vakasisila e vakaraitaka ni beci na lawa savasava ni Kalou. Na vua tale eso ni itovo vakayago ena vakavuna na veisei vakatamata, ena tawasei keda tale ga mai vua na Kalou. Na itovo va qori e veisaqasaqa sara ga kei na itovo i Jiova.

9. Eda na kila vakacava nida ‘saga tiko vagumatua meda maroroya na duavata e vakavuna na yalo tabu’?

⁹ E bibi meda dui taroga: ‘E vakacava sara mada na noqu guta meu “maroroya na duavata e vakavuna na yalo tabu”? Na cava au dau cakava ni basika na leqa? Au dau tukuna vei ira na noqu itokani na ka au rarawataka mera lomani au kina? Au dau saga meu veiyaloni, seu namaka mera cakava qori ena vukuqu na qase ni ivavakoso? Au dau galuvi koya e cala vei au me keirau kua ni veivosakitaka na neirau leqa?’ Vakacava ena vakaraitaka na ivalavala va qori nida tokona na inaki i Jiova me kumuna vata tale na ka kece vei Karisito?

10, 11. (a) Na cava e bibi kina na noda veiyaloni kei ira na tacida? (b) Na cava e bibi meda cakava me rawa nida veiyaloni qai vakalougatataki keda o Jiova?

¹⁰ A kaya o Jisu: “O koya gona, ke o kauta na nomu isoro ina icabocabonisoro o qai nanuma ni beitaki iko na tacimu ena dua na ka, biuta tu na nomu isoro ena yasa ni icabocabonisoro, lako mo drau lai veivakameautaki mada kei tacimu, oti mo qai lesu mo vakacabora nomu isoro. Veiyaloni vakatotolo.” (Maciu 5:23-25) A vola o Jemesa ni o “ira tale ga na dau veiyaloni era na kakaburaki ena gauna ni veiyaloni ra qai tamusuka na vua ni yalododonu.” (Jeme. 3:17, 18) Ke sega na veiyaloni, eda na sega ni rawa ni cakava tiko ga na ka dodonu.

¹¹ Kena ivakatautauvata, ena so na vanua e dau yaco kina na ivalu, e sivia na duanaikatolu ni qele e rawa ni teivaki ke sega na gasaukuro bulu. Ni kacabote e dua na gasaukuro bulu, sa sega ni rawa na teitei, sa sega na nodra ivurevure ni ilavo na lewenikoro, era leqa tale ga na tu ena siti ni sega ni volitaki yani na kakana. Eda na sega tale ga ni toso vakayalo ke da sega ni dau veiyaloni kei ira na tacida ena vuku ni so na noda itovo. Ia ke da dau totolo ni veivosoti da qai veikauaitaki, eda na veiyaloni qai vakalougatataki keda o Jiova.

12. Era vukei keda vakacava na qase ni ivavakoso meda duavata?

¹² Era rawa tale ga ni veivuke ena noda duavata na “isolisoli tamata.” Era lesi mera vukei keda “me rawa nida duavata kece ena vakabauta.” (Efeso 4:8, 13) Nira cakacaka vata kei keda na qase ni ivavakoso ena noda veiqaravi tabu ra qai veivakasalataki mai na Vosa ni Kalou, era sa vukei keda tiko meda vakavinakataka na noda itovo. (Efeso 4:22-24) Nira veivakasalataki na qase ni ivavakoso, nanuma tiko ni vakayagataki ira o Jiova mera vakarautaki iko ina bula ena vuravura vou. Kemuni na qase ni ivavakoso, moni vakaraitaka tale ga ena sala oni veivakadodonutaki kina ni oni via veivuke.​—Kala. 6:1.

“MONI VEILOMANI”

13. Na cava ena yaco ke da beca na ivakasala ena Efeso 4:25-32?

¹³ E cavuti ena Efeso 4:25-29 na ivalavala meda cata. Qori e okati kina na lasu, cudrucudru, vucesa, dau tauca na vosa vakasisila, sega ni vosa e vinaka qai veivakayaloqaqataki. O koya e beca na ivakasala qori e vakararawataka na yalo tabu, ni dau uqeta na duavata na yalo tabu. (Efeso 4:30) Na ka e vola tarava o Paula e bibi tale ga me muri me qai rawa na veiyaloni kei na duavata: “Me kau tani vei kemuni na yaloca, na cudrucudru, na yalokatakata, na karakara, na vosavakacaca kei na ka ca kece va ya. Ia moni veilomani, ni veinanumi, ni yalorawarawa moni veivosoti me vaka na nodrau yalorawarawa na Karisito kei na Kalou me rau vosoti kemuni.”​—Efeso 4:31, 32.

14. (a) Na cava e vakaraitaka na matavosa “moni veilomani”? (b) Na cava ena vukei keda meda veilomani?

¹⁴ Na matavosa “moni veilomani” e vakaraitaka nida sega ni dauloloma ena so na gauna qai gadrevi meda vakavinakataka qori. E veiganiti kina meda saga meda dauveinanumi, meda kua ni nanumi keda ga! (Fpai. 2:4) De dua ena veivakadredrei se nanumi nida vuku ena dua na ka eda nanuma tiko meda kaya, ia vakacava e ka vakayalololoma na ka eda via tukuna qori? Na noda vakasama e liu ni bera nida vosa ena vukei keda meda “veilomani.”

VULICI NA LOLOMA KEI NA VEIDOKAI ENA VUVALE

15. E vukei ira vakacava na tagane vakawati na Efeso 5:28 mera kila na sala mera vakatotomuri Karisito kina?

¹⁵ Na iVolatabu e vakatauvatana na nona veivolekati o Karisito kei na ivavakoso ina nodrau veivolekati na tagane kei na yalewa vakawati. Ena kila na tagane vakawati ena ivakaraitaki i Jisu ni dodonu me dusimaki watina, me qarava qai lomani koya. Ena kila tale ga kina na yalewa vakawati ni dodonu me vakamalumalumu vei tagane. (Efeso 5:22-33) Ni vola o Paula ni “dodonu . . . vei ira na tagane mera lomani watidra me vaka ga nodra lomana na yagodra,” na cava a vakaibalebaletaka tiko? (Efeso 5:28) Na vosa a cavuta ena vica na tikina e liu e vakaraitaka na nona “lomana na ivavakoso na Karisito qai solia kina nona bula, . . . me vakasavasavataka ena nona savata ena wai ni vosa ni Kalou.” Io, me kua ni vakawalena o tagane vakawati na nona vakania vakayalo na nona vuvale me tokona kina na inaki i Jiova me kumuna vata tale na ka kece vei Karisito.

16. Na cava na yaga ni nodra cakava na itubutubu na nodra itavi vaKarisito ena vuvale?

¹⁶ Mera nanuma vinaka na itubutubu nira cakava tiko e dua na ilesilesi i Jiova. E ka ni rarawa ni levu nikua e sa “yali vei ira na veilomani vakaveiwekani.” (2 Tim. 3:1, 3) E levu na tama era sega ni cakava na nodra itavi, qori e vakararawataki ira na gone qai vakaleqa na nodra bula. Ia e vakasalataki ira na tama lotu vaKarisito o Paula: “Kemuni na tama, ni kua ni vakacudrui ira na luvemuni, ni tuberi ira tiko ga ena ivakavuvuli kei na ivakasala i Jiova.” (Efeso 6:4) Era tekivu vulica sara ga na gone ena vuvale mera dauloloma, mera doka tale ga na veiliutaki. O ira na itubutubu era vakavulica vinaka qori vei ira na luvedra era sa tokona tiko na veiliutaki i Jiova. Ra itubutubu, ke vakilai ena vuvale na veilomani qai sega kina na cudrucudru kei na vosa veibeci, oni sa vakavulici luvemuni tiko ena lesoni yaga me baleta na loloma kei na dokai ni veiliutaki. Qori ena vakarautaki ira ina bula ena vuravura vou ni Kalou.

17. Na cava meda cakava meda vorata kina na Tevoro?

¹⁷ Meda nanuma tiko ni dau vinakata voli ga mai o Setani mera kua ni qarava na Kalou na tamata, ena saga ena nona kaukaua taucoko meda kua tale ga ni qarava na Kalou. E levu nikua era cakava tiko na ka e vinakata o Setani nira veisere, era via tiko vata ga ra qai sega ni vakawati, era vakadonuya tale ga na veiwatini vakatagane se vakayalewa. Eda sega ni muria na itovo kei na rai sa takalevu tu nikua. Eda muria ga na ivakaraitaki i Karisito. (Efeso 4:17-21) Oya na vuna eda vakasalataki kina meda “vakaiyaragi ena iyaragi kece ni Kalou” me rawa nida vorata na Tevoro kei ira na nona timoni.​—Wilika Efeso 6:10-13.

‘VEILOMANI TIKO GA’

18. Na cava meda cakava meda duavata kina na lotu vaKarisito?

¹⁸ E bibi dina meda dauloloma me rawa nida duavata na lotu vaKarisito. E ‘dua na noda Turaga, e dua na noda Kalou,’ nida lomani rau qori ena lomada taucoko da qai veilomani tale ga, eda na vakadeitaka meda “maroroya na duavata e vakavuna na yalo tabu.” (Efeso 4:3-6) A tukuna o Jisu me baleta na loloma va qori ena nona masu: “Au sega ni masulaki iratou ga qo, o ira tale ga era vakabauti au ena nodratou vosa; mera duavata kece kina me vaka ga na nomuni duavata kei au kei na noqu duavata kei kemuni Tamaqu, mera duavata tale ga kei kedaru . . . Au sa vakatakila vei iratou na yacamuni au na vakatakila tiko ga, me rawa ni ratou veilomani ena loloma vata ga oni lomani au kina, meu duavata tale ga kei iratou.”—Joni 17:20, 21, 26.

19. Na cava mo vakadeitaka mo cakava?

¹⁹ Ke dredre meda veisautaka na noda itovo, me uqeti keda na loloma meda masuta me vaka na daunisame: “Mo ni vakaduataka na lomaqu me rerevaka na yacamuni.” (Same 86:11) Meda vakadeitaka mada ga meda vorata na Tevoro kei na nona sasaga me vagolei keda tani mai vua na Tamada dauloloma kei ira na tacida vakayalo. Meda saga vagumatua meda ‘vakatotomuria na Kalou nida luvena lomani, meda veilomani tiko ga’ ena vuvale, cakacaka vakaitalatala, kei na ivavakoso.—Efeso 5:1, 2.

[iYaloyalo ena tabana e 29]

Biuta tu na nona isoro ena yasa ni icabocabonisoro, e lako me rau lai veivakameautaki mada kei tacina

[iYaloyalo ena tabana e 31]

Ra itubutubu, vakavulici ira na luvemuni mera dauveidokai