Sala Eda Rawa ni Tokoni Ira Kina na Vinakata tu na Veivuke

“A YACO na tiko yavavala ni oti ga e dua na veidigidigi, era biuta kina nodra vale e vica vata na udolu na iVakadinadina i Jiova,” e tukuna o François, e qase ni ivavakoso ena dua na vanua e se vakatorocaketaki tiko. “E lailai na kakana kei na wainimate qai saulevu na ka era vo tu. Era sogo na baqe, lala se sa sega ni cakacaka na misini e dau kau mai kina na ilavo.”

E vakauta totolo na valenivolavola ni tabana na ilavo kei na veika e gadrevi ena leqa tubukoso vei ira na mataveitacini era sa vakaicili tu ena Vale ni Soqoni era tu ena veivanua ya. Era tekivu sogosala na ilawalawa era veimecaki tiko, ia nira kila nira dau tawaveitovaki na iVakadinadina, era dolava kina na gaunisala vei ira na motoka ni valenivolavola ni tabana.

“Ni keirau gole tiko ena dua na Vale ni Soqoni, era vanalaka mai na neirau lori eso,” tukuna o François. “Ia e calati keirau ga na sicini ni dakai. Gauna keirau raica kina ni sa cicivi keirau mai e dua na sotia qai taura tu na dakai, e totolo ga neirau vakasukasuka, keirau qai lesu totolo ina valenivolavola ni tabana. Keirau vakavinavinakataki Jiova ni keirau bula. Era yaco bula ena siga tarava na 130 na mataveitacini era a vakaicili tiko ena Vale ni Soqoni ya. Eso era gole mai ena valenivolavola ni tabana, keimami vakarautaka na veika era gadreva vakayago kei na veika vakayalo me yacova ni sa oti na tiko yavavala.”

“E levu na mataveitacini ena vanua ya era vakauta ina valenivolavola ni tabana nodra ivola ni vakavinavinaka,” e tukuna o François. “Era nuitaki Jiova vakalevu nira raica sara ga nodra veivuke na mataveitacini mai na so tale na vanua.”

Ni yaco na leqa tubukoso se na kena e vakavuna na tamata, eda na sega ni tukuna vei ira na tacida vakayalo era vakaleqai mera ‘katakata tiko ga, mera mamau.’ (Jeme. 2:​15, 16) Ia eda na qara na sala meda vakarautaka kina na veika vakayago. Nira vakasalataki oti tale ga na mataveitacini ena imatai ni senitiuri me baleta na dausiga ena vakarau yaco, “era qai lomavata na tisaipeli me vaka na ka era dui rawata, mera dodoliga vei ira na veitacini era tiko mai Jutia.”​—Caka. 11:​28-30.

Nida dauveiqaravi i Jiova, eda na tu vakarau meda vukei ira yadudua era vinakata na veivuke vakayago. Ia e vinakati tale ga na veivuke vakayalo. (Maciu 5:3) Sa rauta me vakaroti ira nona imuri o Jisu mera veivakatisaipelitaki me rawa nira vukei o ira qori mera kila ni bibi na veika vakayalo ra qai cakava kina e dua na ka. (Maciu 28:​19, 20) Eda vakayagataka na noda gauna, igu, kei na noda iyau meda cakava kina na ivakaro ya. Nida lewe ni dua na isoqosoqo, eda vakayagataka kina eso na ilavo era cautaki mai meda veivuke kina, ia na inaki levu ni cau oya me tokona na veika e vauca na Matanitu ni Kalou kei na vakatetei ni itukutuku vinaka. Qori eda vakaraitaka kina nida lomana na Kalou kei ira na wekada.​—Maciu 22:​37-39.

Mera nuidei o ira na tokona na cakacaka raraba ni iVakadinadina i Jiova ni yaga qai vakayagataki vinaka na nodra cau. Vakacava o rawa ni vukei ira na tacimu vakayalo era vinakata na veivuke? O vinakata mo tokona na cakacaka ni veivakatisaipelitaki? Ke vaka kina: “Kakua ni bureitaka na ka vinaka vei ira e dodonu me nodra, ni sa rawa vei iko mo cakava.”​—Vkai. 3:27.

[iYaloyalo ena tabana e 9]

[Kato ena tababa e 9]

SALA ERA CAU KINA ESO ENA CAKACAKA E VURAVURA RARABA

Me vaka ga ena nona gauna na yapositolo o Paula, e levu nikua era “biuta vakatikitiki” se ra maroroya na ilavo me biu ena kato ni cau ena ivavakoso e volai kina na “Cakacaka e Vuravura Raraba.” (1 Kor. 16:2) Era dau vakauta e veivula na ilavo qo na ivavakoso yadua ina valenivolavola ni iVakadinadina i Jiova ena nodra dui vanua. O rawa tale ga ni vakauta vakadodonu na nomu cau ina isoqosoqo e vakadonui vakalawa meda vakayagataka na iVakadinadina i Jiova. Mo kila na yaca ni isoqosoqo vakalawa e vakayagataki ena nomu vanua, veitaratara ina valenivolavola ni tabana. E rawa ni laurai ena www.pr418.com na itikotiko ni valenivolavola ni tabana. Qo na cau o rawa ni vakauta sara ga vakadodonu:

CAU E SOLI VAKAILOLOMA

• Cautaki na ilavo, iukuuku vatutalei kei na so tale na ka vakamareqeti.

• Me dua na ivola me vakau vata kei na cau qori, me vakamacalataka ni ka e cautaki ya e soli vakailoloma.

CAU E TIKO NA KENA VEIDINADINATI

• Cautaki na ilavo qai tiko na veidinadinati ni na rawa ni suka tale vua e cau ke mani gadreva.

• Me dua na ivola me vakau vata kei na cau qori, me vakamacalataka ni tiko na kena veidinadinati.

SOLIKA E LALAWATAKI

Me ikuri ni kena cautaki na ilavo kei na ka vakamareqeti tale eso, e tiko eso tale na cau me yaga ena cakacaka ni Matanitu ni Kalou e vuravura. Qori ena qai vakamacalataki ena vica na parakaravu tarava. Se mani sala cava o via cau kina, yalovinaka veitaratara e liu ina valenivolavola ni tabana ena nomu vanua mo rawa ni kila na sala e rawa ni cau kina e dua ena nomu vanua. E duidui na ka vakalawa kei na lawa ni saumi vakacavacava, e bibi gona mo veivosaki kei na dua na daunivakasala ni vakacavacava kei na ka vakalawa ni bera ni o digia na sala vinaka duadua mo cau kina.

Inisua: E rawa ni volai ina dua na isoqosoqo vakalawa e vakayagataka na iVakadinadina i Jiova na nona inisua e dua se nona ilavo ni vakacegu se peniseni.

Akaude ena Baqe: Na akaude ena baqe, sitivikiti ni ilavo e curu ena baqe, se na akaude ni nona sa vakacegu mai na cakacaka saumi e dua e rawa ni taura tu ga vakawawa se qai soli me taukena e dua na isoqosoqo vakalawa e vakayagataka na iVakadinadina i Jiova ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.

Stock kei na Bond: E rawa ni dau soli na stock kei na bond ina dua na isoqosoqo vakalawa e vakayagataka na iVakadinadina i Jiova me dua ga na cau vakadodonu se qai soli me taukena ni sa mate e dua.

Qele kei na Vale: E rawa me soli vakadua na qele se na vale ina dua na isoqosoqo vakalawa e vakayagataka na iVakadinadina i Jiova, e rawa tale ga ni caka e dua na veiyalayalati se me tawana tiko mada na qele se vale o koya e solia me yacova na nona mate.

iLavo me Saumi e Veiyabaki: Na ilavo e cautaki ina dua na tabana e vakayagataka na iVakadinadina i Jiova qai tuvanaki me dau soli vua e cautaka mai se dua tale e lewa o koya, e dua na kena iwase ena veiyabaki me yacova na nona mate. Ena yabaki e soli kina na ilavo ina ituvatuva qo, ena musu na nona ivakacavacava o koya e cautaka mai.

Wili kei na Trust: E rawa ni soli na iyau se na ilavo ina dua na isoqosoqo vakalawa e vakayagataka na iVakadinadina i Jiova, ena tabaki e dua na wili se rawa ni vakayacori e dua na veidinadinati, me maroroya toka na isoqosoqo vakalawa qori na nona ilavo se iyau e dua me yacova na nona mate, sa rawa ni qai taukena na isoqosoqo. Qori ena rawa ni vakalailaitaka na saumi ni ivakacavacava.

Na cau va qori e vakatokai me “soli ka e lalawataki,” kena ibalebale ena vinakati me lalawa sara ga vakavinaka o koya e via solika. Sa vakarautaki e dua na brochure vakavalagi kei na kena vakaSipeni e vakatokai na Charitable Planning to Benefit Kingdom Service Worldwide me dusimaki ira na via solika ina cakacaka ni iVakadinadina i Jiova e vuravura raraba. E volai ena brochure qori eso na sala ni solika vakailoloma e rawa ni caka ena gauna qo se dua na gauna e muri, me vaka na gauna sa mate kina e dua. Na ivakamacala ena brochure qori ena rairai sega ni ganita sara na kemu ituvaki ena vuku ni ivakacavacava se so tale na lawa ena nomu vanua. Ni o wilika oti gona na brochure, veivosaki kei na nomu daunivakasala ni lawa se ivakacavacava. Nira solika ena vica na sala sa cavuti oti mai, e levu era sa tokona na noda cakacaka kei na noda cakacaka ni veivuke e vuravura raraba, qai vakalailaitaki kina na ivakacavacava e dau lavaki. Ke tiko ena nomu vanua na brochure qori, o rawa ni kerea vua na vunivola ni ivavakoso.

Ena so tale na ivakamacala, o rawa ni veitaratara ina Charitable Planning Office, o rawa ni volavola ina itikotiko se qiri ena talevoni e toka qo e ra, se veitaratara yani ina valenivolavola ni iVakadinadina i Jiova ena nomu vanua.

CHARITABLE PLANNING OFFICE

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telephone: (845) 306-0707