“E Levu tu na Cakacaka”

SA KENA gauna me caka kina e dua na bose bibi e Jerusalemi. E kacivi ira kece na nona turaga o Tui Tevita, ira na vakailesilesi ni tui kei na nona tamata qaqa. Dua na ka nodra nanamaki ena itukutuku ena vakarogoi vei ira. O Jiova e lesi Solomoni na luvei Tevita me tara na vale totoka me sokaloutaki kina na Kalou dina. Sa kena turaga sara o Tui Tevita, ena veiuqeti ni yalo tabu e vakarautaka rawa kina na peleni ni vale qai solia vei Solomoni. E kaya o Tevita: “E levu tu na cakacaka, e sega ni valenisoro ni tamata, e nei Jiova ga na Kalou.”—1 Vei. 28:1, 2, 6, 11, 12; 29:1.

E taroga sara o Tevita: “O cei e via lako mai me soli iloloma e ligana vei Jiova?” (1 Vei. 29:5) Na cava o na cakava ke o tiko e kea? Vakacava ena gu na lomamu mo tokona na cakacaka levu qo? Era vuki totolo na Isireli. Io, era “marautaka na lewenivanua na nodra soli ka nira soli ka mai vu ni lomadra vei Jiova.”—1 Vei. 29:9.

Ni oti e vica na senitiuri, e tuvanaka o Jiova e dua na ka e talei sara mai na valenisoro. Qori na valenisoro vakayalo, na ituvatuva e vakarautaka mera torovi koya kina na tamata mera sokalou vua ena vuku ni isoro i Jisu. (Iper. 9:11, 12) Sala cava e vukei ira kina na tamata o Jiova mera veiyaloni kei koya? Qori na noda veivakatisaipelitaki. (Maciu 28:19, 20) Cava e rawati kina? E veiyabaki, e tauyavutaki e vica na milioni na vuli iVolatabu, vica vata na udolu era papitaiso, kei na vica na drau na ivavakoso vovou.

Kena ibalebale qo ni vinakati me tabaki e levu tale na ivola vakaivolatabu, me tara na Vale ni Soqoni kei na kena vakavinakataki, tara tale ga na vale ni soqoni lelevu kei na vanua me caka kina na soqo ni veiwasewase. Vakacava o duavata ni noda vakatetea na itukutuku vinaka e cakacaka vinaka duadua qai veivakacegui?—Maciu 24:14.

Na noda lomani Jiova kei ira na tamata, salavata kei na kena vakatotolotaki na cakacaka qo, ena uqeti keda na dauveiqaravi ni Kalou meda ‘mai soli iloloma vei Jiova’ nida cau. E ka dokai gona meda “rokovi Jiova ena [noda] iyau” meda qai raica na sala e vakayagataki kina vakavinaka, e vukutaki tale ga na cakacaka bibi duadua ena itukutuku ni veigauna!—Vkai. 3:9.

Nodra Tuvanaka Eso Mera Cau Ena Cakacaka e Vuravura Raraba

Levu nikua era “biuta vakatikitiki,” se ra maroroya na ilavo me biu ena kato ni cau ena ivavakoso e volai kina na “Cakacaka e Vuravura Raraba.” (1 Kor. 16:2) Era dau vakauta e veivula na ilavo qo na ivavakoso yadua ina valenivolavola ni iVakadinadina i Jiova ena nodra dui vanua. O rawa tale ga ni vakauta vakadodonu na nomu cau ina isoqosoqo e vakadonui vakalawa meda vakayagataka na iVakadinadina i Jiova. Ke o via kila na isoqosoqo vakalawa e vakayagataki ena nomu vanua, veitaratara ina valenivolavola ni tabana. E rawa ni laurai ena www.pr418.com. Qo na cau o rawa ni vakauta sara ga vakadodonu:

CAU E SOLI VAKAILOLOMA

E rawa ni vakau na cau ena sala qo: electronic bank transfer, debit card, se credit card. E rawa tale ga ni cakava qori eso na valenivolavola ni tabana ni vakayagataki na jw.org se dua tale na website veiganiti.
Cautaki na ilavo, iukuuku vatutalei kei na so tale na ka vakamareqeti. Me dua na ivola me vakau vata kei na cau qori, me vakamacalataka ni ka e cautaki ya e soli vakailoloma.

CAU E TIKO NA KENA VEIDINADINATI

Cautaki na ilavo qai tiko na veidinadinati ni na rawa ni suka tale vei koya e cau ke mani vinakata.
Me dua na ivola me vakau vata kei na cau qori, me vakamacalataka ni tiko na kena veidinadinati.

SOLI KA E LALAWATAKI

Me ikuri ni kena cautaki na ilavo kei na ka vakamareqeti tale eso, e tiko eso tale na cau me yaga ena cakacaka ni Matanitu ni Kalou e vuravura. Qori ena qai vakamacalataki ena vica na parakaravu tarava. Se mani sala cava o via cau kina, yalovinaka veitaratara e liu kei na valenivolavola ni tabana ena nomu vanua mo rawa ni kila na sala e rawa ni cau kina e dua ena nomu vanua. E duidui na ka vakalawa kei na lawa ni saumi ivakacavacava, e bibi gona mo veivosaki kei na dua na daunivakasala ni ivakacavacava kei na ka vakalawa ni bera ni o digia na sala vinaka duadua mo cau kina.

Inisua: E rawa ni volai ina dua na isoqosoqo vakalawa e vakayagataka na iVakadinadina i Jiova na nona inisua e dua se nona ilavo ni vakacegu se peniseni.

Akaude ena Baqe: Na akaude ena baqe, sitivikiti ni ilavo e curu ena baqe, se na akaude ni nona sa vakacegu mai na cakacaka saumi e dua e rawa ni taura tu ga vakawawa se qai soli me taukena e dua na isoqosoqo vakalawa e vakayagataka na iVakadinadina i Jiova ni sa mate e dua, me lakolako vata ga kei na ivakarau ni veiqaravi ni baqe ena noda dui vanua.

Stock kei na Bond: E rawa ni dau soli na stock kei na bond ina dua na isoqosoqo vakalawa e vakayagataka na iVakadinadina i Jiova me dua ga na cau e soli vakailoloma se me dua na veidinadinati vakaivola me qai soli me taukena ni sa mate e dua.

Qele kei na Vale: E rawa ni soli vakadua na qele se na vale ina dua na isoqosoqo vakalawa e vakayagataka na iVakadinadina i Jiova, e rawa tale ga ni caka e dua na veidinadinati se me tawana tiko mada na qele se vale o koya e solia me yacova nona mate.

iLavo me Saumi e Veiyabaki: Na ilavo e cautaki ina dua na isoqosoqo vakalawa e vakayagataka na iVakadinadina i Jiova qai tuvanaki me dau soli e dua na kena iwase vei koya e cautaka mai ena veiyabaki me yacova na nona mate. Ena yabaki e soli kina na ilavo ina ituvatuva qo, ena rawa ni musu na nona ivakacavacava o koya e cautaka mai.

Wili kei na Trust: E rawa ni soli na iyau se na ilavo ina dua na isoqosoqo vakalawa e vakayagataka na iVakadinadina i Jiova, ena tabaki e dua na wili se rawa ni vakayacori e dua na veidinadinati, me maroroya toka na isoqosoqo vakalawa qori na nona ilavo se iyau e dua me yacova na nona mate, sa rawa ni qai taukena na isoqosoqo. Qori ena rawa ni vakalailaitaka na saumi ni ivakacavacava.

Na cau va qori e vakatokai me “soli ka e lalawataki,” kena ibalebale ena vinakati me lalawa sara ga vakavinaka o koya e via soli ka. Sa vakarautaki e dua na brochure vakavalagi kei na kena vakaSipeni e vakatokai na Charitable Planning to Benefit Kingdom Service Worldwide me dusimaki ira na via soli ka ina cakacaka ni iVakadinadina i Jiova e vuravura raraba. A volai na brochure qori me kilai kina na sala ni soli ka vakailoloma e rawa ni caka ena gauna qo se dua na gauna se bera mai, me vaka na gauna sa mate kina e dua. Na ivakamacala ena brochure qori ena rairai sega ni ganita sara na kemu ituvaki ena vuku ni ivakacavacava se so tale na lawa ena nomu vanua. Ni vakayagataki e vica na sala sa cavuti oti mai, e levu era sa tokona na noda cakacaka kei na noda cakacaka ni veivuke e vuravura raraba, qai vakalailaitaki kina na ivakacavacava e dau lavaki. Ke tiko ena nomu vanua na brochure qori, o rawa ni kerea vua na vunivola ni ivavakoso.

Me ikuri ni ivakamacala, gole sara ena ulutaga e toka e ra “Cau ina Cakacaka e Vuravura Raraba” se veitaratara ena valenivolavola ni tabana.