Eda Buli Meda Bula Tawamudu

Na cava eda via bula tawamudu kina? E kaya na iVolatabu ni biuta sara ga e lomada na rai qori na Kalou. (Dauvunau 3:11) E kaya tale ga ni “Kalou ga na loloma.” (1 Joni 4:8) E lomani keda na Kalou, ena ka vakalialia gona me biuta e lomada na bula tawamudu, qai vakadredretaka tale meda rawata na bula qori.

E sega ni dua e via mate. E vakamacalataka na iVolatabu ni o mate e vaka na “meca” e sega ni taleitaki. (1 Korinica 15:26) Eso gona era mate nira se gone, eso tale era mate nira sa dua toka na itaba. Ia eda na mate kece. E levu era dau rere nira vakasamataka na mate. Vakacava e rawa ni muduki na meca qo? Ena gauna cava?

INUINUI NI BULA TAWAMUDU

O na rairai kurabuitaka ni o kila ni sega ni inaki ni Kalou meda mate. E vakadinadinataki ena ivola vakaivolatabu na Vakatekivu, ni inaki ni Kalou meda bula tawamudu e vuravura na kawatamata. E vakarautaka na Kalou o Jiova na vuravura, qai biuta kece kina na veika ena vakamarautaki keda. Oti sa qai bulia na imatai ni tagane o Atama qai vakatikori koya ena were o Iteni. Ni “raica lesu na Kalou na ka kece e cakava, raica! sa bau totoka dina.”—Vakatekivu 1:26, 31.

A buli me uasivi o Atama, e ucuya tale ga na Kalou. (Vakarua 32:4) Na watina o Ivi e buli tale ga me uasivi nona vakasama kei na yagona. E kaya o Jiova vei rau: “Drau vakawa, mera le levu mai, drau vakasinaiti vuravura, drau vakamalumalumutaka, drau lewa tale ga na ika ni waitui kei na manumanuvuka ni lomalagi kei na kabula kece ga era veitosoyaki voli e vuravura.”—Vakatekivu 1:28.

Ena taura na gauna mera vakatawai vuravura na nodrau kawa. Ena vinakati me vakaluveni o Ivi, mera qai vakawa na luvena me qai vakayacori na inaki qori me vaka ga e nakita taumada na Kalou. (Aisea 45:18) Ia vakacava ena yaga ke vakarautaka na inuinui qori o Jiova vei Atama kei Ivi, qai vakalekalekataka nodrau bula me rau raici ira ga na luvedrau kei na makubudrau, rau qai sega ni kila na ka ena yacovi ira?

Vakasamataka mada na ivakaro me baleta nodra lewai na manumanu. E tukuni vei Atama me vakayacani ira na manumanu, qori ena taura toka na gauna. (Vakatekivu 2:19) Me rawa ni lewai ira na manumanu ena vinakati me vulica na veika me baleti ira na duidui manumanu, kei na sala mera susugi kina. Ena taura toka e levu na gauna.

Kena ibalebale na ivakaro ni Kalou me baleta na tawani ni vuravura kei na nodra lewai na manumanu, e dusia ni rau buli na imatai ni veiwatini me rau bula balavu. Io, a qai bula balavu dina o Atama.

ERA BULA BALAVU

E tukuni ena iVolatabu eso e dede sara nodra bula ena gauna makawa ni vakatauvatani kei keda nikua. E kaya: “O koya gona, na yabaki kece ni bula i Atama e 930.” Oti ya sa qai vakamacalataki ratou e le ono tale na tagane ratou sivia na yabaki 900! Na yacadratou o Seci, Inosi, Keinana, Jereti, Mecusela, kei Noa. Eratou bula kece ni bera na Waluvu ena siga i Noa, e yabaki 600 o Noa ni bera na Waluvu. (Vakatekivu 5:5-27; 7:6; 9:29) E rawa vakacava ni ratou bula balavu va qori?

Ni ratou bula volekata toka yani na gauna rau se uasivi kina o Atama kei Ivi. Qori e rairai dua na vuna ratou bula balavu kina. Ia e veisemati vakacava na bula uasivi kei na bula balavu? Ena muduki vakacava o mate? Me saumi na taro qori, ena vinakati meda kila mada na vuna eda qase kina da qai mate.