E Rawa Beka Nida Vakayagataka na Epereli 2000 me Noda Vula Vinaka Duadua?

¹ Na yakavi ni Vukelulu, 19 Epereli, ena yakavi bibi duadua ena noda yabaki vakacakacaka. Ena siga oya, ni sa na dromu yavoki e veiyasa i vuravura na matanisiga, era na soqoni vata na ivavakoso kei na iwasewase lalai kece ni iVakadinadina i Jiova e veiyasa i vuravura mera vakananuma na mate i Karisito. Se iwasewase ni gauna cava ga e vuravura eda tiko kina, ena tiki bibi duadua ni noda yabaki vakacakacaka na vakananumi ni mate i Jisu Karisito. Na siga ni iVakananumi e sa vakatakilakilataki toka ena vula o Epereli, 2000, ena noda ivolanivula na iVakadinadina i Jiova.

² Na vula taucoko o Epereli e gauna vinaka vei keda meda vakaraitaka kina e yaloda taucoko na noda vakavinavinakataka na loloma levu i Jiova e vakaraitaka ena vuku i Luvena. Ena sala cava? E vola na yapositolo o Paula: “Ni sa rawai keitou sara na loloma i Karisito: ni keitou sa lewa vakaoqo, kevaka sa mate e dua e na vuku ni tamata kecega, era sa mate kecega; ka sa mate ko koya e na vuku ni tamata kecega, me ra kakua ni bula tiko me yaga vei ira ga, ko ira era sa bula, me ra yaga ga vua sa mate e na vukudra ka tu cake tale.” (2 Kor. 5:14, 15) Io, ena Epereli, eda na vakaraitaka nida bula tiko, sega ena vukuda ga, ena vuku i koya ga a mate ena vukuda, oya na vuna me vula vinaka duadua kina na vula oqo meda vakaraitaka nida italatala ni Matanitu ni Kalou!

³ Saga Mo Painia Veivuke Ena Epereli: E ivakaraitaki vakasakiti vei keda na yapositolo o Paula ni a kaya: “Ka’u sa sega sara ni nanuma na noqu bula me ka talei vei au ka me’u vakaotia ga na noqu cakacaka kei nai tavi ka solia mai vei au na Turaga ko Jisu, me’u vakatakila nai tukutuku-vinaka ni loloma ni Kalou.” (Caka. 20:24) Eda kalougata tale ga nida vakacolati meda tukuna yani na itukutuku kei Jiova na Kalou. Ena vuku ni tikina oqo, eda na saga me noda vula vinaka duadua ni painia veivuke na vula o Epereli!

⁴ Ena gauna vinaka dina vei ira e levu mera painia na Epereli 2000 baleta ni lima vakadua na kena muanimacawa. Nida rai lesu ena Maji 1997, mai na 1,725 na iwiliwili ni dautukutuku kece ena yabaki oya, e lewe 343 era a painia veivuke. Me yacova mai oqo, sa rawati na iwiliwili vou ni dautukutuku e 2,021. Kena ibalebale ni sega sara ga ni dredre meda lako sivia na iwiliwili levu duadua ni painia veivuke. Kena ikuri ni sa lutu na levu ni aua e lavaki, sa na rawarawa kina mera painia veivuke e levu ena ivavakoso. E dodonu me vakasamataka na dautukutuku papitaiso yadua se na rawa ni painia ena Epereli se sega.

⁵ Ni o vakayagataka na ivolanivula ni yabaki 2000, tuvanaka rawa na nomu lalawa ni vula mai oqo. Toqa rawa na siga mo na vakaitavi kina ena cakacaka vakavunau, qai soqona na aua o nanuma mo na vakayagataka ena cakacaka vakavunau ena loma ni vula. Oqo ena vunau e lokuci kei na kena e tawalokuci. Vakacava na kena isoqoni, sa bau volekata na gauna e vinakati vei ira na painia veivuke? Ke o raica ni lailai na aua o rawata, rawa ni o veisautaka tale vakalailai nomu ituvatuva mo volia na gauna mo painia veivuke kina? Kena ivakatautauvata, ena vinakati ga vei iko e dua na aua 40 na miniti e veisiga mo yacova kina na 50 na aua ena dua na vula.

⁶ Oqo ni sa sudrai sobu tale ga na levu ni aua e vinakati vei ira na painia tudei, o sa vakasamataka tiko beka mo sa vakaitavi ena cakacaka vakaitalatala vakatabakidua? Na cava tale o waraka? Ni sa mai cava na vulaiuca, e gauna vinaka sara ga meda tekivu kina na vula o Epereli! Ke o sega ni vakadeitaka se o na yacova rawa na iwiliwili ni aua e vinakati vei ira na painia tudei se sega, vakacava mo painia veivuke ga ena Epereli, qai tekia me nomu isausau na 70 na aua? Ni o sa rawata rawa ga, sa na ivakadei oya vei iko ni sa rawa mo tomani ira na painia tudei ena kena gauna totolo duadua.​—Raica na Cokonaki, taqana 113-14.

⁷ Mo Dautukutuku Gugumatua ni iTukutuku Vinaka: O keda kece, na dautukutuku se painia, e uqeti keda noda lomana na Kalou kei ira na wekada meda cakava mai vu ni lomada na ka kece eda rawata ena cakacaka i Jiova, me vakatau ena keda ituvaki. (Luke 10:27) Eda vakaraitaka kina nida ‘daucakacaka nida vakararavi vua na Kalou bula, na iVakabula ni tamata kece ga, a sa nodra dina sara era sa vakabauta.’ (1 Tim. 4:10) Oya na vuna meda namaka kina nida na vakaitavi kece sara ena Epereli, nida na solia kece noda vinaka taucoko ena cakacaka ni Matanitu ni Kalou.

⁸ Meda kua ni guilecava mada ga na veivakadreti i Jisu: “Sa vakalewe na yabaki, a ra sa lewe lailai ga nai vakatau-ni-were; o koya mo dou masuti koya nai Taukei ni were, me tala yani eso nai vakatau-ni-were ki na nona were.” Ni tukuna oti ga oqori, sa qai talai iratou yani na 12 nona yapositolo o Jisu me ratou lai vunau. (Maciu 9:37, 38; 10:1, 5, 7) Ni oti e rauta ni dua na yabaki, ni ratou sa vakarautaki vinaka na le 12 ena cakacaka vakavunau, “sa qai lesia na Turaga [o Jisu] e lewe vitusagavulu tani, ka talai ira,” e vakaroti ira tale ga ena ka a veivakaroti taumada kina: “Sa vakalewe na yabaki, . . . o koya mo dou qai masuti koya nai Taukei ni were, me tala yani eso nai vakatau-ni-were ki na nona were.” (Luke 10:1, 2) Na ivola ni iVolatabu na Cakacaka e vakaraitaka na sala e rogoca kina o Jiova na masu oya. Me qai yacova na Penitiko ni 33 S.K., sa tubu na kedra iwiliwili na yapositolo ina 120. Oti sa qai veitarataravi mai na tubu, lai yacova sara na 3,000 kei na 5,000 na levu ni tisaipeli. (Caka. 1:15; 2:41; 4:⁠4) Ia, e “tubu cake vakalevu tiko ga na kedra i wiliwili na tisaipeli.” (Caka. 6:7, VV) Ena gauna tale ga oqo, e dodonu meda masuti koya tiko ga na Turaga me so tale mai na dau kacivaka na itukutuku ni Matanitu ni Kalou! Me lako vata kei na noda masu, na dautukutuku yadua e dodonu me vakarautaka e dua na ituvatuva tudei me vakaitavi kina e veivula kece ena cakacaka vakaitalatala.

⁹ Yalovinaka, raica mada na vula o Epereli ena noda ivolanivula ni yabaki 2000. Ni imatai ni rua na siga ena vula na Vakarauwai kei na Sigatabu, e rawa beka ni o lalawataka mo sa tekivu sara ga ena muanimacawa oya ena cakacaka vakaitalatala? Rawa beka ni o vakaitavi ena “Magazine Day” kece se siga ni soli ivoladraudrau ena vula oqo ena gauna e tuvanaka nomu iwasewase ni Vulivola? Vakacava mo vakayagataka e dua na aua se sivia ena Sigatabu kece ena cakacaka vakaitalatala? E rawa beka ni o vakarautaka mo cakacaka vakavunau ena so na yakavi bogi? Kua ni guilecava mo vakayagataka na gauna veiganiti e vanua ni cakacaka, e koronivuli, kei na vanua o dau vakalakova ena veisiga mo vunau kina. Vakatakilakilataka na gauna o rawa ni vakaitavi kina ena cakacaka vakaitalatala, qai vakayagataka na ivolanivula mo raica tiko kina na levu ni gauna o sa yacova ena loma ni vula.

¹⁰ Na vula o Epereli e gauna vinaka tale ga vei ira na sa yacova na ivakatagedegede, ra sa vakadonui tale ga vei ira na qase mera tekivu dautukutuku bera ni papitaiso kina. Ke o vakavulica tiko e dua ena iVolatabu, sa toso vinaka beka na gonevuli oqori me sa rawa vua me lai raici koya na ivakatawa daulewa me kerea me sa dautukutuku ni itukutuku vinaka? Ke ra tiko na luvemu era se sega ni papitaiso, o sa bau veivosakitaka vata kei ira na qase na nodra toso vakayalo? Sega beka ni gauna vinaka oqo mera tekivu dautukutuku kina?​—Raica na Cokonaki, taqana 97-100.

¹¹ Ena noda saga me noda vula vinaka duadua na vula o Epereli 2000, o keda kece e dodonu meda vakaitavi ena cakacaka vakaitalatala, da qai biuta na noda ripote ni cakacaka ni cava na vula. (Vakatauvatana Marika 6:30.) O ira na dautukutuku bera ni papitaiso vou era se qai vakaitavi vakadua ena cakacaka vakavunau e dodonu mera vakauqeti mera vakalewena mai nodra ripote ena kena totolo e rawa. Ena noda dui vakayacora na noda itavi, sa rawa nida veivuke kece ena vakavinakataki ni ripote ni Epereli, kei na noda kaila ni vakacaucautaki Jiova nida gumatua ena cakacaka vakavunau.

¹² Kauta Tale Mai e So Ena iVakananumi: E sega li ni ka marautaki ke ra mai tiko ena iVakananumi ni mate i Karisito ni yabaki 2000 e dua na iwiliwili levu duadua? Io! Ena kena ibalebale ni na qai iwiliwili levu duadua oqo era na lako mai mera mai vakaraitaka nodra vakavinavinakataka na loloma levu duadua e vakaraitaka vei keda o Jiova na Kalou, kei Jisu Karisito. (Joni 3:16; 15:13) Vakarautaka vinaka sara nomu ituvatuva me kua tale ni dua na ka e tarovi iko kei na nomu vuvale mai na nomudou tiko ena iVakananumi.

¹³ Sa kena gauna tale ga oqo meda tekivu sureti ira mera na tiko ena iVakananumi. Vola toka na yacadra kece o na vinakata mera tiko ena iVakananumi. Vola tale ga na yacadra era a vuli iVolatabu tu e liu, o ira era se vuli tiko ena gauna oqo, kei ira kece nomu veisikovi lesu. Vola tale ga na yacadra na nomu itokani e vanua ni cakacaka, e koronivuli, ira era vakaitikotiko voleka e vale, kei ira nomu itokani vakabisinisi. Kua ni guilecava e so tale nomu itokani kei na wekamu. Ni o sa vola kece na yacadra, tekivu sureti ira yadua sara vakavinaka. Vakamatatataka na vanua kei na gauna ena vakayacori kina na iVakananumi. Ni sa voleka mai na 19 Epereli, tarai ira tale o sa sureti ira oti mo vakadeitaka vei ira nomu veisureti, lako sara ga vei ira se qiri. Tukuna vei ira mo ni salavata ena iVakananumi ena bogi oya.

¹⁴ Me salavata kei na idusidusi mai na iSoqosoqo sa vakau oti yani, na ilawalawa qase ena saga sara ga me vakauqeti ira kece na dautukutuku mate ena yalava mera tiko ena iVakananumi. (Maciu 18:12-14) Na vunivola ni ivavakoso ena vola na yacadra kece na dautukutuku mate, na ivakatawa ni cakacaka e sa na qai lesi iratou yadua na qase me na lai sureti ira mai na vaka oqo ena iVakananumi. De na daumaka me na dua sara ga na ilakolako ni veivakatawani ena gauna totolo duadua, oqo e rawa ni vakabulai ira tale na dautukutuku mate mera vakaitavi ena cakacaka vakavunau, de dua e rawa ni tekivu sara ga ena Epereli. Ena vakayaloqaqataki ira ke ra sureti mera vakaitavi vata kei na dua na dautukutuku matua ena cakacaka vakavunau.

¹⁵ Veivakauqeti me Tokoni Vakavinaka na Vula o Epereli! Ena vinakati mera cakacaka vata na qase kece, dauveiqaravi vakaitalatala, kei na ulunivale yadua me qai rawa ni vula vinaka duadua ni cakacaka na Epereli 2000. Era na qarauna sara na qase me tuvanaki vinaka kece na ka, mera liu sara tale tiko ga. (Iper. 13:⁠7) E dodonu me vakarautaki na ituvatuva vinaka ni vanua ni sota ena cakacaka vakavunau ena loma ni macawa kei na muanimacawa. E rawa ni tuvanaki e so tale na vanua ni sota ena cakacaka vakavunau ena yakavi siga kei na yakavi bogi. Na ituvatuva taucoko ni cakacaka vakavunau e sa lalawataki me baleta na Epereli e dodonu me vakabiri ena papa ni itukutuku. Ena lesi e dua me liutaka na sota ena cakacaka vakavunau kece. E dodonu me veirauti na yalava kece e vakarautaki me baleta na iwasewase yadua.

¹⁶ Ena Epereli, ena veisoliyaki tiko Na Vale ni Vakatawa kei na Yadra! Ena kena sagai me tauyavutaki e so na vuli iVolatabu, ena soli na brochure na Loma ni Kalou vei ira kece na tataleitaki. O koya gona, me qarauni me kua ni qai oti koso na ivoladraudrau kei na brochure e vakarautaka na ivavakoso.

¹⁷ Ni cava na vula, na qasenivuli ni vulivola kece kei na nodra ivukevuke mera na vakauqeti ira na lewe ni nodra vulivola mera solia totolo nodra ripote. De dua e rawa ni caka sara ga oqo ena Sigatabu, 30 Epereli. Ni sa na soqona kece na ripote na vunivola qai raica ni so na dautukutuku e se yali ga na nodra, sa na qai rawa ni vakaraitaki vei ira mera ripote ni bera na 6 Me, na gauna sa na vakauta kina na ripote ni ivavakoso ina iSoqosoqo. De dua ena kerea na veivuke ni qasenivuli ni vulivola ena nodra raici na dautukutuku yadua.

¹⁸ Na gauna ni iVakananumi e gauna bibi duadua ena loma ni yabaki vei ira na tamata ni Kalou. E dodonu me gauna osooso duadua vei keda na qaravi Jiova. Ia, ena rawa ga oqo ke da vakaitavi ena kena levu eda rawata ena noda kacivaka na itukutuku vinaka, ke ra painia veivuke o ira e rawa nira painia veivuke, ke da gumatua tale ga ena noda kauti ira mai e so ena iVakananumi ni mate i Karisito. Meda masuta yadua mada ga na veivakalougatataki i Jiova me rawa ni vula vinaka duadua na Epereli 2000, me vakacaucautaki duadua ga kina na Kalou!​—Iper. 13:15.

[Kato ena tabana e 3]

Painia Veivuke

iWiliwili Levu Duadua: 343

(Maji 1997)

[Kato ena tabana e 4]

iWiliwili Kece ni Dautukutuku

iWiliwili Levu Duadua: 2,021

(Okosita 1998)

[Kato ena tabana e 5]

Tiko Ena iVakananumi

iWiliwili Levu Duadua: 6,676

(1999)