Watchtower LAIBRI ENA INTERNET
Watchtower
LAIBRI ENA INTERNET
vakaViti
  • IVOLATABU
  • IVOLA
  • SOQONI
  • km 3/03 t. 3-6
  • Gumatua ena Caka Vinaka!

Sega na kena vidio.

Vosota, sega ni laurai rawa na vidio.

  • Gumatua ena Caka Vinaka!
  • Noda Cakacaka Vakaitalatala—2003
  • iKuri ni Ulutaga
  • “Vunautaka Sara me Macala na Vosa ni Kalou”
    Noda Cakacaka Vakaitalatala—2002
  • “Vunautaka [“Vakavinaka Sara,” NW] na i Tukutuku Vinaka”
    Noda Cakacaka Vakaitalatala—2008
  • Tukuna Tiko ga na Cakacaka Veivakurabuitaki i Jiova
    Noda Cakacaka Vakaitalatala—2004
  • E Rawa Beka Nida Vakayagataka na Epereli 2000 me Noda Vula Vinaka Duadua?
    Noda Cakacaka Vakaitalatala—2000
Raica Tale Eso
Noda Cakacaka Vakaitalatala—2003
km 3/03 t. 3-6

Gumatua ena Caka Vinaka!

1 E levu sara na vuna meda ‘gumatua kina ena caka vinaka’ nida vavaca yani na iVakananumi ni yabaki 2003. (1 Pita 3:13) Dua na vuna levu oya na isoro i Jisu Karisito. (Maciu 20:28; Joni 3:16) E vola ena vuku ni tikina oqo na yapositolo o Pita: “Dou sa kila dou a sega ni voli e na veika e caca wale, e na siliva se na koula, mai na nomudoui valavala sesewa. . . . E na dra talei ga i Karisito, me vaka na lami sa sega ni ca e dua na tikina.” (1 Pita 1:18, 19) Noda vakavinavinakataka na loloma totoka oqo ena uqeti keda meda gumatua ena caka vinaka, baleta nida kila ni o Jisu a “soli koya e na vukuda, me voli keda mai nai valavala ca kecega, me vakasavasavataki keda vua me da nona tamata talei, ka lomakatakata e na cakacaka vinaka.”​—Taito 2:14; 2 Kor. 5:14, 15.

2 Nida cakava na ka ena marau kina na Kalou, ena vinaka na noda veimaliwai kei koya, ena maroroi keda tale ga. E tomana o Pita: “Ko koya sa vinakata na bula, ka sa via raica na gauna vinaka, . . . me lesu tani mai na ca ko koya, ka kitaka na ka vinaka; me vakasaqara na vakacegu, ka muria sara. Ni sa wanonovi ira na tamata yalododonu na mata ni Turaga, ka sa qara tu na daligana ki na nodra masu.” (1 Pita 3:10-12) Ena gauna dredre oqo, e ka ni veivakalougatataki dina meda kila ni vakaraici keda tiko o Jiova, e tu vakarau tale ga me “maroroi [keda] me vaka na loa ni matana.”​—Vkru. 32:10; 2 Vei. 16:9.

3 Era sotava na veika dredre na lotu Vakarisito e volavola vei ira o Pita, ia era gumatua tiko ga ena nodra kacivaka na itukutuku vinaka. (1 Pita 1:6; 4:12) E dina tale ga oqo vei ira na tamata ni Kalou nikua. Eda sa bula tiko ena “veigauna dredre,” ia ena gu tiko ga na lomada meda cakava na loma ni Kalou. (2 Tim. 3:1, VV; Same 145:7) Meda dikeva mada e so na ka vinaka e rawa nida vakaitavi voli kina ena iVakananumi oqo.

4 Veisureti ena iVakananumi: Dua na sala eda vakaraitaka kina noda vakavinavinakataka na ivoli meda tiko ena ivakananumi ni mate i Jisu e veiyabaki, ena vakayacori tiko ena yabaki oqo ni dromu na siga ena Vukelulu, 16 Epereli. (Luke 22:19, 20) Ena yabaki sa oti, e volatukutukutaki mai ena 94,600 na ivavakoso ena veiyasa i vuravura na nodra a tiko ena iVakananumi e 15,597,746! Oqo e tubu ina 220,000 vakacaca mai na iwiliwili ena yabaki sa oti.

5 Vica beka era na tiko ena yabaki oqo? Oqo e rawa ni vakatau vakalevu ena noda veisureti. Tekivu sara ga ena nomu vola na yacadra o na via sureta. Rawa ni o vola sara ga e liu na yacadratou na tiko e vale. Ke sega ni tiko ena dina na watimu, vakaraitaka vua nomu vinakata sara ga mo drau na tiko kina. E kaya e dua na turaga ni a tiko ena iVakananumi ena yabaki sa oti ni raica ni oqo e vakamarautaki watina sara ga. Oti o rawa ni vola na yacadra na wekamu, ira oni tiko veivolekati, itokani vakacakacaka, se o ira nomu itokani e koronivuli. Kua ni guilecavi ira nomu vuli iVolatabu.

6 Ni sa toka nomu ivolaniyaca, tikica sara na gauna mo na lai sureti ira yadua sara ga kina. Kauta tiko na ivola ni veisureti ni iVakananumi. Taipataka se vola vakamatata na vanua kei na gauna ena caka kina na iVakananumi ena boto ni ivola ni veisureti, de ra guilecava o ira na sureti. Ni sa voleka na 16 Epereli, vakadeitaka tale nomu veisureti vei ira o sa sureta ena nomu sikovi ira sara ga, se nomu qiri vei ira. Meda saga mada ga me levu era mai tiko ena soqo bibi duadua oqo.

7 Vukei Ira na Tiko ena iVakananumi: E dau bogi marautaki na bogi ni iVakananumi. E gauna vinaka meda veivosaki kina kei ira era sega ni dau tiko ena noda soqoni. Saga sara mo yaco totolo yani, ke rawa me balavu tale ga na nomu tiko ni oti na iVakananumi. Tovolea mo veikilai kei ira na ka vou. Kauaitaki ira.​—Roma 12:13.

8 E rawa beka nira vukei e so era mai tiko ena iVakananumi mera toso vakayalo ena nodra vuli iVolatabu? Vola na yacadra kei na nodra itikotiko na vulagi e sega ni dua era se veivosaki, mo rawa ni lai tomana nona tataleitaki. Ke ra vukei vakayalololoma o ira oqo, e so vei ira e rawa nira dautukutuku bera ni papitaiso ni bera na iVakananumi ena yabaki mai oqo. Ni o lesuvi ira na mai tiko ena iVakananumi, sureti ira tale ga ina vunau lavotaki ena rogoci ena 27 Epereli.

9 Rawa Beka Mo Painia Veivuke? Ena veiyabaki, na noda lomakatakata ena vuku i Jiova e dau uqeti keda meda vakaitavi ena kena levu eda rawata ena cakacaka vakaitalatala, donuya na gauna ni ivakananumi. Ena rawa ni vuavuaivinaka sara na vunautaki ni itukutuku vinaka ke ra cakacaka vata na lewe ni ivavakoso.

10 E dua na ivavakoso e 107 na kena dautukutuku qai 9 na kena painia tudei e vakaraitaka mai ni a “vula vakairogorogo” sara vei iratou na Epereli sa oti. E 53 kina na nodratou painia veivuke, ra wili e ke o ira kece na qase kei na dauveiqaravi vakaitalatala. Na cava era cakava na qase me bula kina na yalo ni painia ena vula oya? Se yawa sara na Epereli eratou sa veivakauqeti tiko ena cakacaka vakapainia. Duidui tale ga na gauna ena loma ni dua na siga e caka kina na sota ena cakacaka vakavunau, me rawa kina ni ganiti ira kece na lewe ni ivavakoso. A vakabibitaki tale ga na vunau ena talevoni, vakauasivi vei ira sa dredre nodra veilakoyaki.

11 Bau vakalewena sara mada ga na fomu ni painia veivuke e dua na marama yabaki 86, sa sega tu ni rawa ni lako ena vuku ni kena mate. Tekivu ena mataka nona dau lai dabe toka ena teveli e valenikuro me vunau toka kina ena talevoni me vica na aua, oti e cegu vakalailai ni bera ni tomana tale. Dua na marama erau veivosaki ena talevoni e mate na watina kei na rua na luvena tagane ena loma tiko ga ni rua na yabaki sa sivi, qai vaqaqa tu se cava e vakatara kina na Kalou me yaco na veika mosimosi vaka oya. Tekivu sara e dua na veivosaki vinaka, tauyavu tale ga kina na vuli iVolatabu. Na vunau ena talevoni, ena mataka kei na yakavi, e gauna vinaka mera tarai kina o ira era tu ena veivale lelevu e dredre me lakovi. E gauna vinaka tale ga mera tarai kina o ira era dau yali e vale ena siga.

12 Era tinia nodra ripote na qase ena nodra kaya: “Keimami marautaka dina na ka keimami cakava, keimami vakavinavinakataka tale ga na itavi dokai e vakarautaka o Jiova kei na nona veivakalougatataki.” E rawa tale ga ni vakila e levu na veivakalougatataki na nomudou ivavakoso ke vakavakarau vinaka.

13 Noda lomana na Kalou kei ira na wekada ena uqeti keda meda volia na gauna ena veivula meda kacivaka yani kina na itukutuku vinaka. (Maciu 22:37-39) O ira na ivakatawa ni vulivola kei na nodra ivukevuke e dodonu mera vukei ira na lewe ni nodra dui iwasewase mera vakaitavi ena cakacaka vakaitalatala e veivula. Dua na kena icakacaka vinaka oya mo tuvanaka mo cakacaka vata kei ira e so na dautukutuku ena nomu iwasewase. Kua ni qai cakava oqo ni sa vakarau oti na vula, tekivu totolo. Sala oqo o rawa ni veivuke kina vakalevu.

14 Tiko beka ena nomu iwasewase ni vulivola e so na dautukutuku e dredre nodra vakaitavi ena cakacaka vakaitalatala ena vuku ni kedra ituvaki se bula vaqase? Ke so era tu ena vale ni malumalumu, se ra sa tu sara ga e vale, sa macala tu ga ni na lailai sara na gauna era vunau rawa kina. Ia, nodra vakayagataka vinaka na gauna lailai cava ga e tadola vei ira mera vakacila rarama kina, ena rawa ni uqeti ira na raica nodra cakacaka vinaka mera taura vakabibi na ka dina. (Maciu 5:16) Mera vakadeitaka na ivakatawa ni vulivola nira sa kila o ira vaka oqo ni rawa nira volatukutukutaka mai ena nodra cakacaka vakavunau e 15 mada ga na miniti. Ena vakayaloqaqataki ira na dautukutuku yalodina vaka oqo na nodra rawa ni ripotetaka tiko ga nodra cakacaka, ena vakamarautaki ira, ena vakacegui ira tale ga. Ena vakataucokotaka tale ga na ripote ni noda cakacaka na tamata ni Kalou e vuravura raraba.

15 iTabagone Era Gumatua ena Caka Vinaka! Eda dau marau dina nida raica nodra vakayagataka na itabagone lotu Vakarisito nodra kaukaua kei na igu ena cakacaka i Jiova! (Vkai. 20:29) Ke o itabagone, o na vakaraitaka vakacava na nomu gugumatua ena veivula eda veivosakitaka tiko oqo?

16 Ke o se bera ni dautukutuku, vakacava mo tovolea mo dautukutuku bera ni papitaiso? Tarogi iko mada ena vica na taro oqo: ‘Au sa bau kila toka e so na ivakavuvuli lelevu ena iVolatabu? Au vinakata meu vakaitavi ena vunautaki ni Matanitu ni Kalou? Au ivakaraitaki vinaka beka ena noqu itovo? Rawa beka niu vakamacalataka noqu vakabauta ena noqu tukuna yani na itukutuku vinaka? E lomaqu dina beka meu vakayacora oqo?’ Ke o sa vakaiotaki ira na taro oqo, lai vakaraitaka sara vei rau nomu itubutubu ni o sa vinakata mo dautukutuku. Me qai nodrau itavi me rau raica e dua vei iratou na qase eratou lewe ni komiti ni cakacaka.

17 Ke o sa dautukutuku oti tiko ni itukutuku vinaka, rawa beka ni o vakayagataka na gauna ni vakacagicagi se olodei mo vakaitavi kina vakalevu ena cakacaka vakaitalatala? E levu na itabagone era sa painia veivuke rawa ena nodra vakarautaka e dua na ituvatuva vinaka kei na nodra veivuke na itubutubu kei na so tale. Ia, ke o mani sega ni rawata sara oya, me nomu inaki ga mo vakaitavi vakalevu ena cakacaka vakaitalatala. Me dua na nomu isausau. Me ikuri ni iwiliwili ni aua o nanuma mo sauva, me nomu isausau tale ga mo toroya cake na ivakatagedegede ni nomu cakacaka vakaitalatala. Mo na saga beka mo wasea e dua na tikinivolatabu ena veikatuba kece, mo maqosa cake beka ena nomu veisikovi lesu, nomu tauyavutaka e dua na vuli iVolatabu, se nomu vakarabailevutaka nomu cakacaka me okati kina na vunau ena talevoni, kei na veibasoga ni cakacaka vakaitalatala tale e so. Vakacava me nomu isausau tale ga na nomu saga me tomani iko ena iVakananumi ni yabaki oqo e dua drau tiko veivolekati, drau vuli vata, se dua na wekamu? Eda na vakalougatataki ena noda vakaitavi vakalevu ena cakacaka oqo, ena veivakayaloqaqataki tale ga ena ivavakoso.​—1 Ces. 5:11.

18 Vukei Ira na Ka Vou Mera Toso: Ena yabaki vakacakacaka sa oti, e rauta ni 1,829 na vuli iVolatabu era a vuli tiko ena veivula e Viti. Levu vei ira oqo era na tini sara mera yalayala, ra papitaiso tale ga. Ia, era na qai yacova ga na ikalawa oqo ke da vukei ira mera dautukutuku ni itukutuku vinaka. Oqo e dua na ikalawa bibi ena nodra tuberi na ka vou mera imuri i Jisu Karisito. (Maciu 9:9; Luke 6:40) E dua beka nomu vuli iVolatabu e sa rawa ni tadolova na ikalawa oqo?

19 Ke o lomalomaruataka na toso nei nomu gonevuli, kerea na nona veivuke na ivakatawa ni vulivola se ivakatawa ni cakacaka. De dua o rawa ni sureti koya me dabe ena dua na nomudrau vuli. O ira na tuakada matua oqo e rawa nira kila vinaka na nodra toso vakayalo na noda gonevuli. De dua era na vakatura e so na ka me vukei nomu gonevuli me toso tiko ga kina vakayalo.

20 Ke sa vinakata o nomu gonevuli me dautukutuku bera ni papitaiso, o nanuma tale ga ni sa ganiti koya, lai raici koya na ivakatawa daulewa. Ena qai lesia e rua na qase me rau dikeva ke sa ganiti koya me dautukutuku ena nodrau vakayagataka na itukutuku e volai ena tabana 98-9 ni Cokonaki. (Raica na Watchtower, 15 Noveba, 1988, tabana 17.) Ke sa vakadonui o gonevuli me dautukutuku, e dodonu mo sa tekivu vakarautaki koya. Ni sa biuta mai na nona ripote, ena qai vakaraitaki ina ivavakoso ni sa wili me dua na dautukutuku bera ni papitaiso. Eda nuitaka ni na dua na iwiliwili levu ni dautukutuku vou, gone kei na qase, era na rawata na isausau bibi oqo ena veivula ni cakacaka eda sa lalawataka tiko oqo.

21 Ena Rawa Vinaka Noda Sasaga ke Da Vakavakarau Vinaka: Nida vakavakarau vinaka, ena vuavuaivinaka noda cakacaka vakaitalatala ena gauna ni iVakananumi oqo. (Vkai. 21:5) Vei ira na qase, e levu na ka e bibi mera na kauaitaka.

22 Me rawa vinaka na sasaga ni ivavakoso ena cakacaka vakaitalatala, me ratou raica na qase ni vakarautaki vinaka sara ga na sota ni cakacaka vakavunau ena loma ni macawa, vaka kina ena mua ni macawa. Me liu sara tiko ga na ivakatawa ni cakacaka ena vakarautaki ni ituvatuva oqo. De rawa ni vakarautaki na sota ni cakacaka vakavunau ena matakalailai, oti na vakasigalevu, se na yakavi. Me vakarogoi ena ivavakoso na veika e sa tuvanaki. Ena vinaka me kabi na ituvatuva oqo ena papa ni itukutuku.

23 Mera raica na qase ni sa vakarautaki na veika kece me baleta na iVakananumi ni se yawa sara na 16 Epereli. Okati e ke na tuvai ni gauna mera vakayagataka kina na Kingdom Hall na ivavakoso era vakayagataka vata tiko ga e dua, kena samaki, nodra digitaki na dauveivukei kei ira na veisoliyaka na madrai kei na waini, kei koya me na vakarautaka mai. Me vakarogoi ina ivavakoso na gauna kei na vanua e caka kina na iVakananumi, kei na veiveisau e so ni gauna ni soqoni ena loma ni macawa. Nira qaravi vinaka na veika oqo me baleta na iVakananumi, ena raici votu kina na kena “caka sara vaka vinaka ka tuvalaki vakamatau.”​—1 Kor. 14:40, VV.

24 E rawa nira vakayagataka na ulunivuvale e so na gauna ni nodra vuli vakavuvale mera veivosakitaka kina kei ira na lewenivuvale na sala e rawa nira vakalevutaka kina nodra cakacaka ena gauna ni iVakananumi. Rawa beka ni dou painia veivuke vakavuvale? Se rawa ni veitokonitaka nomu vuvale nona painia veivuke e dua se vica na lewenivuvale? Ke sega ni rawa oya, ia me nomudou isausau mada ga vakavuvale mo dou vakaitavi vakalevu cake ena cakacaka vakaitalatala. E tiko beka e dua na gone e vale sa rawa ni painia veivuke ke uqeti? E vica e rawa ni sureta na nomu vuvale ena yabaki oqo ina iVakananumi? Levu na ka vinaka ena vakila nomu vuvale, dou na mamarau tale ga ke dou vakavakarau vinaka.

25 Vakayagataka Vinaka na Gauna e se Vo: Ena nona ivola na yapositolo o Paula, a vakaraitaka kina vei ira na lotu Vakarisito ena imatai ni senitiuri na gauna bibi era bula voli kina, baleta ni sa vakarau muduki na ivakarau ni veika vakajiu. (1 Pita 4:7) E matata mai na veika e yaco tu nikua ni sa na vakarau muduki tale ga na ivakarau ni veika ni vuravura ena gauna oqo. E veisiga, e dodonu me laurai ena noda bula na kauai. Nida dauveiqaravi gugumatua i Jiova, e dodonu meda kauaitaka ga vakalevu na cakacaka bibi ni kena kacivaki na itukutuku vinaka.​—Taito 2:13, 14.

26 Oqo na gauna ni cakacaka vagumatua! Vakananuma na veika e sa cakava o Jiova vei iko, nomu vuvale, kei na ivavakoso. Eda sega ni rawa ni sauma na Kalou ena veika e vuqa e cakava vei keda, ia, e rawa nida qaravi koya mai vu ni yaloda. (Same 116:12-14) Ena vakalougatataka o Jiova na noda sasaga. (Vkai. 10:22) Meda ‘gumatua mada ga ena ka vinaka’ ena gauna osooso ni cakacaka oqo, me “vakarokorokotaki kina na Kalou e na ka kecega e na vuku i Jisu Karisito.”​—1 Pita 3:13; 4:11.

[Kato ena tabana e 3]

Kedra iWiliwili na Tiko ena iVakananumi e Vuravura Raraba

1999 14,088,751

2000 14,872,086

2001 15,374,986

2002 15,597,746

[Kato ena tabana e 4]

O Cei O na Sureta ena iVakananumi?

□ Ratou e vale kei ira na wekamu

□ Ira na tiko voleka e vale kei ira nomu veikilai

□ Nomu itokani e valenicakacaka, e koronivuli

□ Veisikovi lesu kei na vuli iVolatabu

[Kato ena tabana e 5]

Vukei Ira na Tiko ena iVakananumi

□ Kidavaki ira ena matamamarau

□ Lesuvi ira e nodra vale

□ Sureti ira mera vuli iVolatabu

□ Sureti ira ina vunau lavotaki

[Kato ena tabana e 6]

Cava e Nomu iSausau ena Gauna ni iVakananumi Oqo?

□ Me dua o sureta e lako dina yani ena iVakananumi

□ Mo yacova na ivakatagedegede mo vakadonui kina mo dautukutuku

□ Mo saga mo yacova e dua na ivakatagedegede ni aua ena cakacaka vakaitalatala

□ Mo vakavinakataka e dua na basoga ni nomu cakacaka vakaitalatala

□ Mo painia veivuke

    iVola vakaViti (1982-2026)
    Sogota
    Dolava
    • vakaViti
    • Vakauta
    • Digia
    • Copyright © 2025 Watch Tower Bible and Tract Society of Pennsylvania
    • iVakavakayagataki
    • Kemu iTukutuku
    • Privacy Settings
    • JW.ORG
    • Dolava
    Vakauta