iTovo Vinaka—Era Kilai Tani Kina na Tamata ni Kalou
1 Sa yali sara vakalevu nikua na itovo vinaka. Baleta? Dua na ka na nodra dau vakusakusa na tamata, e sega kina nodra gauna mera tukuna e so na vosa tau rawarawa ga vaka na “Yalovinaka,” “Vinaka,” se “Vosoti au.” E parofisaitaka na Vosa ni Kalou ni na qai torosobu ga na itovo ena iotioti ni veisiga, nira na ‘lomani ira vakai ira na tamata, dau vosaveivakacacataki, era sega ni dau via vakavinavinaka, era na sega ni itovo vakatamata, ka itovo ca, era na cata na ka kece ga e vinaka ra qai sega ni ririko nira cakava e dua na ka.’ (2 Tim. 3:1-4, VV) Era itovo ca kece oya. Nida tamata ni Kalou, meda qarauna na lotu Vakarisito meda kua ni vakatotomuria na itovo tawaveidokai ni vuravura.
2 Na Cava na iTovo Vinaka? Na ibalebale ni itovo vinaka na noda kauaitaka na nodra nanuma tale na so, kei na noda rawa ni veivinakati tiko ga kei ira. Na ivakaraitaki ni itovo vinaka na veinanumi, vakarokoroko, loloma, vakaitovo, yalomatuataka na ka e tukuna se cakava, kei na veikauaitaki. E kunei ga na itovo kece oqo vua e dua e lomana na Kalou kei ira na wekana. (Luke 10:27) Eda sega ni volia na itovo oqo, ia era yaga vakalevu ena noda veitaratara kei ira tale na so.
3 E ivakaraitaki uasivi kina o Jisu Karisito. E bulataka e veisiga na iVunau Koula: “Me vaka dou sa vinakata me ra kitaka vei kemudou na tamata, dou kitaka vaka talega kina vei ira.” (Luke 6:31) Eda qoroya na veinanumi kei na yalololoma i Jisu ena nona veimaliwai kei iratou na nona tisaipeli, se vakaevei? (Maciu 11:28-30) Na nona itovo vinaka e sega ni vulica mai ena so na ivola. E vu dina sara ga mai lomana. Meda saga meda vakatotomuria na nona ivakaraitaki vinaka.
4 Gauna cava mera vakaraitaka kina na itovo vinaka na lotu Vakarisito? O na vakaitovo beka ga ena gauna ni soqo, mo na dokai kina? Se o vakaitovo ga ke lomamu tiko mo vakamua na nodra rai e so? Sega! E dodonu meda vakaitovo e veigauna kece. Na sala cava soti meda kauaitaka kina na noda itovo nida veimaliwai kei ira na tacida ena ivavakoso?
5 Ena Kingdom Hall: Na Kingdom Hall e noda vanua ni sokalou. Eda tiko kina ni sureti keda na Kalou o Jiova. Eda nona vulagi. (Same 15:1) Eda vulagi vakaitovo beka ena Kingdom Hall? Eda dau kauaitaka beka na noda isulusulu kei na keda irairai? Eda na sega ni dara e dua ga na isulu sa rawa, se me sivia tale na kena iukuuku. Nida tiko ena soqo ni tikina, se noda soqoni vakaivavakoso e veimacawa, eda kilai tani na tamata i Jiova ena rakorako ni keda irairai, na kena e kilikili kei ira era kaya voli nira rerevaka na Kalou. (1 Tim. 2:9, 10) Eda vakaraitaka gona na noda veinanumi kei na noda doka na noda itaukeinisoqo vakalomalagi, vaka kina o ira tale na vo ni vulagi era sureti mai.
6 Dua tale na sala eda vakaraitaka kina na noda itovo vinaka, na noda dau yaco totolo mai ena soqoni. E sega ni dau rawarawa oqo. So beka era tu sara vakayawa, se taura na gauna na nodra vakavakarau nira vuvale levu. Ia, e laurai ena so na ivavakoso, ni 25 na pasede ni dautukutuku e sa matau vei ira na nodra yaco mai ena Kingdom Hall ni sa oti na imatai ni sere kei na masu. Meda vakasamataka vakabibi na tikina oqo. Meda nanuma tiko nida vakaraitaka na noda vakaitovo ena noda kauaitaka na ka era nanuma tale na so. Na noda itaukeinisoqo yalovakaturaga o Jiova, e vakarautaka na magiti vakayalo oqo me yaga vei keda. Eda na vakaraitaka gona na noda vakavinavinaka kei na noda kauaitaki koya ena noda sega ni bera ina soqoni. Kena ikuri, e veivakacaraki nida bera ina soqoni, da qai sega ni dokai ira era sa tiko rawa.
7 Ena noda soqoni, eda dau kauaitaki ira beka na ka vou era tiko? Na noda kidavaki ira e ivakaraitaki ni noda vakaitovo. (Maciu 5:47; Roma 15:7) Na vakabula, lululu, kei na matadredredre—e itovo lalai beka, ia nida cakava oya, eda kilai tani kina nida lotu Vakarisito dina. (Joni 13:35) E kaya e dua na turaga ena imatai ni gauna e lako mai kina ina Kingdom Hall: “Ena dua ga na siga, au sotava kina e levu au sega sara ga ni bau kilai ira, ra qai veikauaitaki dina, me vakatauvatani kei na lotu au susu kina. Au kila niu sa kunea na ka dina.” E tini veisautaka nona bula na turaga oya, oti ga e vitu na vula, sa papitaiso. Io, na itovo vinaka e rawa sara ga ni lai cakayaco ina nona bula e dua!
8 Ke da dau kauaitaki ira eda sega ni veikilai, e dodonu meda kauaitaki ‘ira sara vakalevu eda veitokani ena vakabauta,’ se vakaevei? (Kala. 6:10) E kaya na ivakavuvuli vakaivolatabu: “Doka na matadra na tamata qase.” (Vunau 19:32) Meda kua vakadua ni vakawaleni ira oqo ena noda soqoni.
9 Vakatudaliga: Ena soqoni ni ivavakoso, era vunau na dauveiqaravi ni Kalou lotu Vakarisito mera vakavulici keda ena isolisoli vakayalo, mera vakayaloqaqataki keda kina. (Roma 1:11) E itovo ca ke da sosovu tiko, rogolevu noda mama drega, wasoma na noda vakasolokakana tiko vua eda dabe veitikivi, vuki lako i valelailai, wilika na ivola e sega ni lako vata kei na ka e veivosakitaki tiko, se cakava tale tiko e so na ka ni vakacagau tiko na soqoni. Mera ivakaraitaki sara ga na qase ena tikina oqo. Na itovo vinaka vakarisito ena uqeti keda meda dokai koya e vunau ena noda vakatudaliga matua ena nona itukutuku e yavutaki vakaivolatabu.
10 Kena ikuri, na noda dokai koya e vunau kei ira na vakarorogo, eda na bokoca na noda vodaphone me kua ni vakacaraka na vakarorogo.
11 Nodra iTova na Gone: Mera qarauna na itubutubu na itovo ni luvedra. Ke tagi e dua na gone se tekivu me yavavala ena gauna ni soqoni, de vinaka me kau vakatotolo i tuba me lai sagai me tiko lo. Ena rairai dredre ena so na gauna, ia ni o cakava oya, e ivakaraitaki ni nomu kauaitaka na nodra nanuma na vo ni mataveitacini. Na itubutubu era vakaluveni lalai ra qai dau yavavala vakalevu na luvedra, era dau vinakata ga mera dabe e muri mera kua ni vakacaraka na nodra vakarorogo e levu, qai rawarawa tale ga na nodra lako i tuba ni caka tiko na soqoni. Era na vakaraitaka na vo ni mataveitacini na nodra nanumi ira na vuvale vaka oya ena nodra vakalala na iyatu dabedabe e muri mera vakayagataka na vakaluveni lalai.
12 Mera qarauni ira na luvedra na itubutubu ni bera kei na suka na soqoni. Mera kua ni veiciciyaki na gone ena Kingdom Hall, ni rawa ni mavoa kina e dua. Na veiciciyaki tale ga e tuba e rerevaki, vakabibi ena bogi ni sega nida raica vinaka kina na ka. Na veitalanoa i cake e tuba e rawa ni vakasosataki ira na vakaitikotiko voleka qai raici kina vakatani na noda sokalou. Oni vakavinavinakataki na itubutubu oni dau qarauni ira vinaka na luvemuni e loma ni Kingdom Hall vaka kina e tuba, ni oqo e totoka kina na noda duavata.—Same 133:1.
13 Ena Vulivola: Eda vakavinavinakataka na nodra lomasoli na mataveitacini era solia nodra vale me caka kina na vulivola. Nida tiko ena vulivola, da qarauna na nodratou iyaya. Ni bera nida curu i loma, meda luvata na noda ivava. Mera raici ira vinaka na luvedra na itubutubu, ra qarauna tale ga mera tiko ga na luvedra ena vanua e caka tiko kina na vulivola. Ni lailai ga na lewe ni vulivola qai duidui toka mai na soqoni tale e so, meda kua sara ni beca na nodra vale na tacida. Me salavata kei luvena na itubutubu i valelailai. Ni tiki ni soqoni vakaivavakoso na vulivola, meda vakaisulu vaka ga nida lai soqoni ina Kingdom Hall.
14 Bibi na iTova Vinaka: Noda vakaitovotaki keda ena itovo vakarisito e sega wale ga ni vakacaucautaki kina na noda cakacaka vakaitalatala, ia e vakavinakataka tale ga na noda veimaliwai kei ira tale na so. (2 Kor. 6:3, 4, 6) Nida qarava tiko na Kalou mamarau, meda dau matadredredre, yalorawarawa da qai cakava ena yalololoma e so sara na ka lalai me vakamarautaki ira tale na so. Na noda itovo vinaka gona oqo eda kilai tani kina nida tamata ni Kalou.