Me Vakavulici na Lomada

¹ Ena gauna ni rarawa oqo ni ivakataotioti ni veisiga, sa qai levu ga na ituvaki dredre kei na veivakatovolei taratarasui eda sotava na tamata ni Kalou e vuravura raraba. (2 Tim. 3:1-5, NW) Eda gadreva kece na veivakayaloqaqataki meda tudei tiko ga ena vakabauta. (1 Kor. 16:13) Eda na rawata na veivuke i Jiova ena noda kana wasoma mai na nona Vosa, da vakararavi ina yalona tabu, da qai kabita dei na nona isoqosoqo.​—Same 37:28; Roma 8:38, 39; Vkta. 2:10.

² E veiganiti kina na usutu ni porokaramu ni siga ni soqo lavotaki ena yabaki sa oti, “Meda Tamatabula ena Vuku.” A yavutaki ena 1 Korinica 14:20, eda wilika kina na nona vosa na yapositolo o Paula: “Oi kemudou na veiwekani, dou kakua ni gone lalai e na vuku; e na lomaca ga mo dou gone lalai, ia e na vuku mo dou tamata bula.” Na cava na nomu nanuma me baleta na porokaramu oya?

³ “A veivakayaloqaqataki dina!” “Na ka sara ga e vinakati!” Oqori e rua ga mai vei ira e levu na vosa ni vakavinavinaka a tau. E bau drukataka tale ga na porokaramu e dua e sega ni iVakadinadina a tiko ena siga ni soqo lavotaki me raica na papitaiso i luvena goneyalewa e yabaki 12, qai vakadinata tale ga ni na yaga oya ina nona vuvale. E vaka beka oya na nomu nanuma? Meda railesuva mada e so na tiki bibi ni porokaramu.

⁴ Gadrevi na Kilaka me Vakavulici Kina na Lomada: Ena imatai ni vosa, “Sasagataka Oqo Meda Tamata Vuku,” na cava na ka e vinakati a vakabibitaka o koya a vunau me sotavi rawa kina na veika dredre ni gauna oqo? E sega ni rauta ga na kilaka. Meda bucina, da saga meda tamatabula ena noda kila na iVolatabu, me kua nida rawai kina ena ca e wavoliti keda tu. Ia ena vinakati e ke na veidusimaki ni Kalou. Me vakataka na daunisame, da masuti Jiova me vakavukui keda meda kila na nona vunau se na nona vosa me rawa nida qaravi koya kina ena lomada taucoko.​—Same 119:1, 2, 34.

⁵ Ena vosa a tarava a vakamacalataka na ivakatawa dauveilakoyaki ni o Jiova e vakayagataka na nona Vosa kei na nona isoqosoqo me vakarautaka vei keda na “iVukevuke Meda Tamatabula Kina Ena iVolatabu.” Ni tamatabula e dua ena kilaka e kena ibalebale ni “rawa ni titobu na nona raica e dua na ituvaki, ena vakalewa vinaka na muana kece, me taura na kena ibalebale dodonu.” O cei ena vukei keda meda rawata na rai vaka oqo? Sa vakarautaki ira na isolisoli tamata o Jiova mera vukei keda meda toso vakayalo. (Efeso 4:11, 12, VV) E dau uqeti keda na nona isoqosoqo rairai meda wilika e veisiga na Vosa ni Kalou, da tiko wasoma tale ga ena soqoni kece ni ivavakoso. (Same 1:2) Eda vakavulici ena sala meda vakayagataka kina na iVolatabu kei na noda ivolatabaki vakarisito ena noda vuli vakataki keda, vuli vakavuvale, vaka kina na noda vakavakarau ina soqoni kei na cakacaka vakavunau. O sa vakayagataka tiko na isolisoli kece oqo? O sa muria vinaka tiko na nomu ituvatuva ni wili iVolatabu vakawasoma? E bibi oqo meda taqomaki kina me kua ni rawai keda na ivalavala ni vuravura, na kena ivukivuki vovou, na vuku vakatamata kei na vakasama tawayaga.​—Kolo. 2:6-8, VV.

⁶ Me Vakavulici na Lomada: Ena imatai ni nona vosa na mata ni valenitabana, na kena ulutaga, “Taqomaka Nomu Bula Vakayalo Ena Nomu Vakavulica na Lomamu,” e vakamacalataka ni sega ni rawa nira vakaduiduitaka na vinaka mai na ca na tamata ni vuravura. (Aisea 5:20, 21) E baleta nira cata, ra qai sega ni via muria na ivakatagedegede dodonu ni Kalou. Kena veibasai o keda e vakavulici keda na isoqosoqo i Jiova ena veika vakayalo, eda kila na ivakatagedegede ni Kalou, da qai vakayagataka me lewa na ka eda cakava kei na noda itovo. O koya gona, eda kila rawa kina na ka e yaga, e vinaka ena mata i Jiova, kei na veika e salavata kei na lomana.​—Roma 12:2.

⁷ Me kua nida rawai ena vakasama veilecayaki ni vuravura kei na ca e kauta mai, ena vinakati meda vakavulica tiko ga na lomada. Eda na cakava vakacava? Me vaka e volai ena Iperiu 5:12-​14, e vakabibitaka na yapositolo o Paula ni sega ni rauta meda gunuva ga na “wai-ni-sucu” ni Vosa ni Kalou. Ena vinakati meda kania na kakana dina vakayalo me vaka eda vakayacora tiko ena kena vulici na parofisai i Aisea ena Vulivola ni iVavakoso. Meda qai bulataka sara na ka eda vulica. Nida cakava oqo, sa na qai dei ga kina ina lomada ni dodonu na ivakavuvuli i Jiova kei na nona ivakatagedegede. Oqo e vakavulica na lomada me vakaduiduitaka vakamatata na vinaka mai na ca.

⁸ E ka ni rarawa ni so era sa butusevata vakayalo. Na cava e vuna? Era sega ni vakamua vakatabakidua na nodra rai ina ka vinaka e dodonu ena mata i Jiova. Ra lai tini rogoca kina na veitalanoa dukadukali e sega ni salavata kei na iVolatabu e dau caka ena so na gauna ena walesi se ena retioyaloyalo, na ivakatagi torosobu, se ra veitaratara kei ira na dau veivakamuai cala ena kompiuta. Nida ivalavala vakavuku ena sega ni rawa nira vakamuai keda cala o ira era ivalavala dukadukali, ra lialia ra qai tamata ca.​—Vkai. 13:20; Kala. 5:7; 1 Tim. 6:20, 21.

⁹ Ra iTabagone, mo ni ‘Gonelalai ena iTovo Ca’: E rua na vosa a uqeti ira vakatabakidua na itabagone mera vulica mera tamatabula ena vuku. Erau vakamacalataka na tacida erau a vunau ni ibalebale ni matavosa “e na lomaca ga [se, “e na i tovo ca,” VV] mo dou gone lalai,” oya mera vaka na gonelalai, mera kua ni via lai vakilakila na veika e dukadukali ena mata i Jiova. (1 Kor. 14:20) Eda a uqeti kece meda lewa vinaka na noda vakayagataka na noda gauna me kua nida vakamuai se me takavi keda na veika ca e voliti keda tu. (Efeso 5:15-​17) Eda a uqeti tale ga meda cakacakataka mada se vakaevei na levu ni gauna eda vakayagataka tiko ena noda wilika na ka e sega ni na vakatubura na noda kila na veika vakayalo. O sa cakava beka? Na cava e vakaraitaka? Me ikuri ni nomu wili iVolatabu e veisiga, mo vakadeitaka tale ga mo dau wilika na ivolatabaki mai na isoqosoqo ena gauna ga o taura kina. Oqo na ka ena vukei keda, kei ira na itabagone meda ‘rawata na yalomatua.’​—Vkai. 4:7-9.

¹⁰ “Na Yaga ni Noda Muria Vakavuku na iVakavuvuli Vakaivolatabu”: Oqo na usutu ni iotioti ni vosa ena porokaramu ni siga ni soqo lavotaki. A vakamacalataka na mata ni valenitabana ni o Jiova na iVurevure ni kila ena rawa kina na bula, sa macala ga ni na cecere sara vei keda na tamata. Vakasamataka mada na kena sa soli tu vei keda na veivakadonui ni rawa nida takiva na kila mai vei Jiova! E lomasoli o koya ni solia na kila oqori vei ira era qara vakaidina ra qai kerea ena vakabauta. (Vkai. 2:3-5, 9; 28:5) O sa vakayagataka tiko na isolisoli oqo?

¹¹ Nida wilika na iVolatabu, eda a uqeti meda kila na yavu ni kena ivakavuvuli. (2 Tim. 3:16, 17) Vulici ira vakavinaka mo kila vinaka kina na ka e vinakata o Jiova. Tikica na gauna mo vakananuma kina vakatitobu na yavu ni ivakavuvuli oqo qai tugana ina nomu vakasama kei na lomamu. Ni oqo ena vakavulica na lomamu me dodonu kina na vakatulewa o cakava ena nomu bula. (Josua 1:8) Meda raica mada e vica na ituvaki era sotava e levu, kei na sala me vakayagataki kina na yavu ni ivakavuvuli ni iVolatabu me dodonu kina na noda vakatulewa.

¹² ‘Na mataqali isulusulu kei na sasauni vakacava meu muria?’ E laurai na yalo ni talaidredre ena veiveisau ni isulusulu kei na sasauni e dau taka mai e vuravura. Na yalo oqo e uqeti ira na tamata me sakuca, yakusurasura qai veivagarogaroi na nodra isulusulu. Ke sa galeleta tiko na yaloda, na ivakavuvuli cava ena iVolatabu ena vukei keda me valuti kina? Ni vakavulici na lomada, eda na vakasamataka na ivakavuvuli ena 1 Timoci 2:9, 10, (VV) oya meda “[vaka] i sulu matau ka rakorako . . . , me vaka sa kilikili kei ira . . .  era kaya ni ra sa lotu.” E so tale na ivakavuvuli me baleta na tikina oqo e kune ena 2 Korinica 6:3 kei na Kolosa 3:18, 20.

¹³ ‘Meu vaqaqacotaka vakacava na iyau ni noqu vuvale?’ E bibi mera dau veivosaki na lewenivuvale yadua. E kaya na Jemesa 1:19: “Mo dou kusarawa yadua me vakarorogo, mo dou berabera ga ni vosa, mo dou berabera ni cudru.” E dodonu ina lewenivuvale yadua mera vakarorogo, ra veivosaki tale ga, ni vinakati na soli vakasama ena veitaratara vakavuvale. Ke dodonu mada ga na ka eda kaya, ia e rogorogo ca na kena itautau, e viavialevu, qai tawaveinanumi, ena sega ni yaga. O koya gona, se da tagane vakawati, yalewa vakawati, itubutubu se gone, meda “vosa e na yalovinaka, ka vakatuituinataki e na masima.”​—Kolo. 4:6.

¹⁴ ‘E vakaleqai au beka na domona na iyau?’ Na domona na iyau e dua na idre ni vuravura e rawa ni vakadredretaka na noda bula. Ena sega ni rawati kina na bula mamarau. (Dauv. 5:10; Luke 12:15; 1 Tim. 6:9, 10) O Jisu e vakavulica vei keda meda kua ni coriti ena domona na iyau ena ivakavuvuli bibi oqo: Me vinaka se rawarawa na matada. Ke veiraurau na noda bula, qai rawarawa ga, eda na raica dei toka ga na Matanitu ni Kalou kei na veika e vauca, da qai biuta e muri na veika tale e so.​—Maciu 6:22, 23, 33.

¹⁵ Na Cava me Noda iNaki: Na Vosa ni Kalou e ivurevure nuitaki ni ivakavuvuli savasava me dusimaki keda ena noda vakatulewa. E dodonu meda vulica na kena yavu ni ivakavuvuli, da vakananuma vakatitobu, da qai kila na kena ivakavakayagataki ena noda bula. Nida ‘vakavulica gona na lomada sa rawa nida na vakaduiduitaka na vinaka mai na ca,’ me yaga vei keda qai vakalagilagi kina o Jiova.​—Iper. 5:14, VV.