Nanumi Ira na iTabaqase Yalodina
1 Sa yabaki 84 na marama yada o Ana, ia e “sega ni dua na siga me sega ni tiko ena valenisoro.” A vakalougatataki koya o Jiova ena nona yalodina. (Luke 2:36-38, NW) Levu na tacida yalodina nikua era ucui Ana dina ga nira sotava na ituvaki dredre. So na gauna era na yalolailai nira tautauvimate se yalani na ka era cakava nira sa qase. Meda dikeva mada e vica na sala eda na vakayaloqaqataki ira kina se vukei ira mera bulabula tiko ga vakayalo.
2 Soqoni kei na Cakacaka Vakavunau: Ke ra lomasoli e so mera vakavodoki ira na tacida qase sa dede nodra veiqaravi voli ena yalodina, ena vakarawarawataka nodra tiko wasoma ena soqoni. Na ka oqo ena vakaukauataki ira, ena vakila tale ga na ivavakoso na kena yaga. Vakaevei, o sa bau cakava oqori?—Iper. 13:16, VV.
3 Dua na ka era marautaka ra qai lomavakacegu kina na lotu Vakarisito oya nodra dau lakova e veigauna na cakacaka vakavunau. Ia e sega ni ka rawarawa oqori vei ira na sa qase kei ira na malumalumu vakayago. De rawa ni tomani iko me nomu “itokani vakacakacaka” e dua vei ira na tacida lomani oqori ena dua na basoga ni cakacaka vakavunau. (Roma 16:3, 9, 21, VV) Vakacava mo sureti koya mo drau vunau vata ena talevoni se tomani iko ena veisikovi lesu se vuli iVolatabu. E rawa beka nida sureta noda gonevuli meda lai vuli ena vale i koya na tacida qase ke dredre vua me biuta nona vale?
4 Vuli kei na Veimaliwai: So na gauna, e rawa ni ratou veisureti e dua na vuvale me tomani iratou ena nodratou vuli vakavuvale e dua sa qase se malumalumu vakayago, se ratou lai vuli sara ga ena nona vale. E kauti rau na luvena e dua na tina me ratou lai vulica na Noqu i Vola ni Talanoa ena i Vola Tabu ena vale i dua na budratou vakayalo, ratou qai marautaka kece na gauna ni vuli oya. Era marau tale ga o ira na tacida vaka oqo ke ra bau sureti tu ena dua na ivakayakavi se so tale na gauna ni veimaliwai vaka oya. Ke sa rui malumalumu o koya e baca, e dredre kina nida veisiko vakabalavu, vakacava meda kua soti ni dede ena noda wilivola ga vakalekaleka, masu kei koya, se wasea vua e dua na vakasama veivakauqeti.—Roma 1:11, 12.
5 O Jiova e vakamareqeti ira na itabaqase era yalodina tiko ga. (Iper. 6:10, 11) Meda vakatotomuri koya ena noda dau vakacaucautaki ira na sa qase kei na noda vukei ira mera bulabula tiko ga vakayalo.