E Dua Beka Nomu Yalava ni Vunau?
1. Na yalava cava e rawa nida kerea?
1 Rawa nida kerea e dua noda mape se yalava meda vunau ga kina o keda. Vakalevu me dau soli na yalava e voleka ga vei keda, e rawa tale ga nida cakacaka taudua kina se kei na dua tale na dautukutuku. Dina ga ni dodonu meda tokona na ituvatuva ni cakacaka vakavunau ni ivavakoso, ia ni tiko tale na yalava meda tara ena noda gauna galala, eda sa tokona tiko na kena tarai vinaka na yalava kece, vakauasivi ke levu na yalava ni noda ivavakoso.—Caka. 10:42.
2. Na cava na yaga ni yalava e dau soli vei keda?
2 Na Kena Yaga: Levu era vakadinadinataka na yaga ni kena soli tale vei ira na yalava e voleka ga ena nodra vanua ni cakacaka, ni rawarawa nodra tara ena vakasigalevu se ni suka na cakacaka. E so tale era marautaka nodra cakacaka vata vakavuvale ena nodra itikotiko ga me dua na aua se sivia, se ni bera na Vulivola ni iVavakoso. Oqo e vakabula gauna kei na ilavo, baleta nira tu ga vakavoleka na veisikovi lesu kei na vuli iVolatabu era kune kina. Ni voleka na yalava qai levu na ka e rawa ni caka ena dua na gauna lekaleka, oqo ena rawa ni uqeti ira e so mera painia veivuke tiko ga, tini sara mera painia tudei. Nida sa veikilai tale ga kei ira na tiko ena noda yalava, eda na kila na ka meda tukuna me ganiti ira, ena laulau tale ga noda cakacaka vakavunau.
3. Na cava e vakila e dua na painia a kerea e dua nona yalava?
3 E kaya e dua na painia a uqeti koya na ivakatawa ni tabacakacaka me kerea e dua nona yalava: “Au rogoca na nona ivakasala, au muria sara, ni toso na gauna au sa veikilai vinaka sara kei ira na tiko ena noqu yalava. Au veisautaka na gauna au dau sikovi ira kina me ganiti ira. Yaco kina me tubu noqu veisikovi lesu mai na 35 ina 80 ena dua na vula, sa vitu tale ga noqu vuli iVolatabu.”
4. E vakacava na ilakolako ni kena kerei kei na kena cakacakataki noda yalava?
4 Kena iCakacaka: Ke da vinakata me dua sara ga noda yalava se mape, meda lai raici koya e qarava tiko na mape ni ivavakoso. Rawa nida sureta e dua na dautukutuku meda tara vata na yalava, ia meda kua ni guilecava meda vola na vale e lala. Saga meda vakaotia na yalava ena loma ni va na vula. Kevaka e sega ni rawa nida vakaotia ena loma ni gauna oqori, meda kerea vua na ivakatawa ni vulivola se so tale na dautukutuku mera vukei keda. Ni sa cava na va na vula, meda solia lesu na mape, se da kerea meda cakacaka tale kina. Ia meda kakua ga ni maroroya, meda vakasuka me rawa ni soli vei ira e so tale na dautukutuku. Kevaka e lailai na mape ni ivavakoso eda lewena qai sega ni rawa ni soli vei keda e dua na noda yalava, meda kerea vua na ivakatawa ni vulivola ke rawa ni solia vei keda e dua na iwase ni yalava ni iwasewase ni vulivola eda lewena.
5. Na cava e gadrevi meda vakayacora kina na itavi e lesi vei keda?
5 E noda itavi meda vunau “ki na vuravura taucoko,” ia oqo e sega ni itavi rawarawa. (Maciu 24:14, VV) E gadrevi kina na veitokoni. Me ikuri ni noda tokona na cakacaka vakavunau vakaivavakoso, noda vunau tale ga ena yalava e soli vei keda e sala vinaka ni noda vunautaka na itukutuku vinaka vei ira e levu.