“Dou Cakava Oqo Mo Dou Vakananumi Au Kina”
Vakananumi na Mate i Jisu ena 2 Epereli
1. Na cava e tikinisiga bibi kina na 2 Epereli, 2007?
1 Rauta ni vica na milioni na lewe i vuravura era na vakananuma tiko na mate vakaisoro i Jisu ena 2 Epereli, 2007. A mai mate o Jisu ena nona tokona na dodonu ni veiliutaki i Tamana, kei na nona mai vakalasuya na veibeitaki i Setani na Tevoro ena nona tukuna nida qarava tiko na Kalou meda rawaka ga kina. (Jope 2:1-5) Eda na nanuma lesu ena iVakayakavi ni Turaga na mate i Jisu ena yago e uasivi qai sega ni ivalavala ca, ena nona ‘solia na nona bula me keda ivoli na lewe vuqa.’ (Maciu 20:28) A vakasalataki ira gona nona tisaipeli o Jisu: “Dou cakava oqo mo dou vakananumi au kina.” (Luke 22:19) Noda vakavinavinakataka na ivoli na nona isolisoli talei na Kalou, e uqeti keda beka meda sa tekivu vakarautaki keda yani ena vakananumi ni iloloma uasivi oqo?—Joni 3:16.
2. Eda na vakarautaka vakacava na lomada ni se bera na iVakananumi?
2 Meda Vakarautaka na Lomada: Noda vakasamataka na veika a yaco ena iotioti ni vica na siga i Jisu e vuravura, eda na rawa ni vakarautaka kina na lomada ni se bera na iVakananumi. (Esera 7:10) E tiko ena Dikeva na iVolatabu e Veisiga—2007 kei na ivolanivula na 2007 Calendar, na ituvatuva ni wili iVolatabu ena yaga meda vakarautaka kina na lomada. Na ituvatuva ni wili iVolatabu oqo e vakamuria sara ga na siga e yaco tiko kina vei Jisu na veika e so ni se bera ni vakamatei. Na siga kei na tikinisiga e tiko ena iVolatabu e yavutaki ena nodra ivolanivula na Jiu, e tekivu ena gauna e dromu kina na siga ena dua na siga me yacova na kena dromu ena siga e tarava. Dina ga ni duidui na noda ivolanivula, ia na ituvatuva ni wili iVolatabu ni iVakananumi e lako vata sara ga kei na nodra ivolanivula na Jiu. Noda railesuva na veika a yaco, da masulaka, da qai vakasamataka vakatitobu na loloma ni Kalou, ena yaga vei keda na noda na qai lai tiko ena iVakananumi.
3. Eda na vukei ira vakacava na tataleitaki kei ira era sa mate tu vakayalo me yaga vei ira na iVakananumi?
3 Veisureti: Na itoma ni Noda Cakacaka Vakaitalatala ni vula o Feperueri e vakamacalataki kina na cakacaka lavotaki ni veisureti ena iVakananumi. O sa tuvana oti beka nomu ituvatuva mo vakaitavi vakalevu ena cakacaka lavotaki oqo? Meda nanuma tiko ni siga ni iVakananumi na Moniti, 2 Epereli—e siga ni olodei e Viti. Ia vakacava, eda sa vola beka na yacadra o ira eda na sureta, eda sa veitaratara tale ga kei ira? Tuvanaka rawa mo yaco totolo yani ena vanua ena caka kina na iVakananumi mo rawa ni tavaki ira o sureta kei ira na tataleitaki. Rawa ni o dabe vata kei ira, mo raica me tiko na nodra iVolatabu kei na ivolanisere. Vakaveikilaitaki ira vei ira na lewe ni ivavakoso. Ni sa oti na iVakananumi, tu vakarau mo sauma nodra vakatataro. Sureti ira tale ena ivunau lavotaki ena vakayacori tiko ena 15 Epereli. Mera raica na qase me dua na nodra ivola ni veisureti ni iVakananumi o ira era sa mate tu vakayalo era a dau soqoni tu ena ivavakoso, mera sureti tale ga ena vunau lavotaki.
4. Eda na vukei ira vakacava na tataleitaki mera toso vakayalo ni oti na iVakananumi?
4 Vukei ira na Ka Vou kei Ira na Mate tu Vakayalo Mera Toso: Ena vakamacalataka vakalekaleka o koya e vunau ena iVakananumi na noda ituvatuva ni vuli iVolatabu, ena uqeti ira tale ga na ka vou mera tomana tiko ga nodra vulica na veika e baleti Jiova. Rawa gona nida vakayagataka na nona ivakamacala meda yavutaka kina noda vukei ira eda sureta. Ke ra se sega ni vuli iVolatabu, meda sikovi ira ni oti ga na iVakananumi da qai vakaraitaka vei ira na icakacaka ni vuli iVolatabu e sega ni saumi. Ia me qai rawa nira toso vakayalo e dodonu mera tiko ena soqoni. (Iper. 10:24, 25) Me rawa nira mai tomani keda, e dodonu sara ga meda uqeti ira mera dau mai soqoni. O ira na qase era na sikovi ira na sa mate tu vakayalo era a tiko ena iVakananumi, mera vakayagataka na tikina e veivosakitaki ena iVakananumi me yavu ni nodra veivosaki kei ira era sa malumu tu. De na uqeti ira oqo mera mai tosoya tale nodra veiqaravi ena ivavakoso.
5. Ena cakayaco vakacava vei keda na noda tiko ena iVakananumi?
5 Na iVakananumi e dua na gauna vinaka meda vakasamataka kina vakabibi na ka erau sa cakava vei keda o Jiova kei Jisu Karisito. Oqo ena vakatitobutaka noda lomani rau, ena cakayaco tale ga ina noda itovo. (2 Kor. 5:14, 15; 1 Joni 4:11) Oqo sara ga na gauna meda sa tekivu vakarautaki keda kina kei ira na tataleitaki ina soqo bibi eda na ‘vakatakila tiko kina na nona mate na Turaga.’—1 Kor. 11:26.