Kato Ni Taro
◼ Me vakacava na noda isulusulu nida sikova na vale e vakayagataki me qaravi kina o Jiova?
Na Kingdom Hall, Assembly Hall, Peceli, kei na valenitabana, e qaravi vakatabakidua kina o Jiova. Ni rakorako, savasava qai tuvalaki vakamatau, e vakaraitaka na kena dokai. E duidui sara vakalevu mai na ka eda raica wasoma ena ituvaki ni veika nei Setani. Me laurai tale ga vei ira na lai sikova na vale e vakayagataki me qaravi kina o Jiova nira nona dauveiqaravi, era cakava tiko na lomana.
Nida lotu vaKarisito, eda na ‘vakadinadinataka nida italatala ni Kalou’ ena veigauna kece, wili kina na noda isulu rakorako kei na noda sasauni. (2 Kor. 6:3, 4) E namaki tale ga me kilikili na noda itovo. Ena veigauna kece me laurai ena noda isulusulu kei na sasauni nida dauveiqaravi ni Kalou o Jiova. E dina taucoko na tikina qo nida sikova na valenivolavola liu mai Niu Yoka vaka kina na valenivolavola ni tabana e veiyasa i vuravura.
Na bibi ni keda irairai kei na noda isulusulu, e kaya na ivola iSoqosoqo e Cakava na Loma i Jiova na kena gadrevi meda savasava vakayago, isulusulu, kei na maqosa ni keda irairai nida gole ina cakacaka vakavunau se nida lako ena soqoni vaKarisito. Ena tabana e 139, parakaravu 1, e kaya: “Kua ni guilecava ni yaca, Peceli, e kena ibalebale ‘Vale ni Kalou.’ O koya gona, na noda isulusulu, sasauni, kei na noda itovo nida sikova na Peceli e dodonu me salavata kei na ka e gadrevi vei keda nida tiko ena soqoni ena Kingdom Hall.” E dodonu mera na muria na ivakatagedegede cecere qo o ira na dautukutuku ni Matanitu ni Kalou era mai sikova na Peceli era vakaitikotiko voleka ga se o ira na lako mai vakayawa. Ena sala qo ena vakaraitaka kina o koya e veisiko mai na veidokai e ganiti Peceli.—Same 29:2.
Me kilai mai na noda isulusulu nida tamata “lotu.” (1 Tim. 2:10) Ena uqeti ira tale e so na noda isulu rakorako mera mai sokalou dina vei Jiova. Ia, e laurai ni so na mataveitacini era sega ni dau qarauna na isulu era tokara nira lai sikova na vale e vakayagataki me qaravi kina o Jiova. E sega ni kilikili na mataqali isulusulu vaka qo vei keda na lotu vaKarisito ena gauna kece ga. Ena tikina qo kei na basoga ni noda bula kece vaKarisito, meda muria tiko ga na ivakatagedegede cecere e vakaduiduitaki keda na dauveiqaravi ni Kalou mai na vuravura, me vakarokorokotaki ga kina na Kalou.—Roma 12:2; 1 Kor. 10:31.
Ni o tuvanaka mo lai sikova e dua na valenivolavola ni tabana se ena gauna ni nomu gade, mo tarogi iko mada: ‘E ganita beka na noqu isulusulu kei na sasauni na savasava kei na rakorako ni vanua au na lai sikova? E rogo vinaka beka kina na Kalou au sokaloutaka tiko? Au na vakatarabetaki ira beka na raici au?’ Me laurai mada ga mai na isulu eda tokara kei na keda irairai nida “vakarogovinakataka nai vakavuvuli ni Kalou na nodai Vakabula e na ka kecega”!—Taito 2:10.