iTuvatuva Vou ni Soqoni Vakaivavakoso
1, 2. Na veisau cava me baleta na soqoni ena tekivu ena Janueri 2009?
1 A kacivaki ena macawa ni 21-27 Epereli, 2008 e dua na itukutuku marautaki vei keda na mataveitacini e veiyasa i vuravura. “Me tekivu ena 1 Janueri, 2009, na Vulivola Vakaivavakoso sa na caka vata kei na Koronivuli ni Vuli Vunau kei na Soqoni ni Cakacaka. Sa na veisau tale ga na yaca ni vuli, mai na Vulivola Vakaivavakoso ina Vuli iVolatabu ni iVavakoso.”
2 iTuvatuva ni Soqoni e Veimacawa: Na balavu ni soqoni kece oka kina na sere kei na masu e 1 na aua, 45 na miniti. Ena tekivu na soqoni ena sere kei na masu (5 min.), tarava na Vuli iVolatabu ni iVavakoso (25 min.), salamuria sara na Koronivuli ni Vuli Vunau (30 min.). Ena laga e dua na sere (5 min.) me tekivutaki kina na Soqoni ni Cakacaka (35 min.). Ena tini tale na soqoni ena sere kei na masu (5 min.). Moni rawa ni vakavakarau vinaka ena soqoni, ena tabaki e veivula ena Noda Cakacaka Vakaitalatala na ituvatuva ni Vuli iVolatabu ni iVavakoso, Koronivuli ni Vuli Vunau, kei na Soqoni ni Cakacaka.
3. Ena vakayacori vakacava na Vuli iVolatabu ni iVavakoso?
3 Vuli iVolatabu ni iVavakoso: Ena muri na iwalewale ni vuli Vale ni Vakatawa. Sega ni gadrevi me railesuvi na tikina a vulici ena macawa eliu. Me dua ga na iucu lekaleka ni vuli me rawa ni levu na gauna era vakamacala kina o ira kece na tiko ena soqoni. Ena veidusimaki na ivakatawa daulewa ena nodra lesi na qase ni ivavakoso yadua mera liutaka na vuli e veimacawa.
4. E veisau vakacava na Soqoni ni Cakacaka?
4 Soqoni ni Cakacaka: E sega ni veisau na Soqoni ni Cakacaka, e vakalekalekataki ga. Ena lima na miniti na veika me kacivaki, e veiganiti qori ke gadrevi me kacivaki e so tale na ka se wiliki na ivola mai na valenivolavola ni tabana. E sega ni gadrevi me kacivaki mai na buturara na veika e vinakati me kilai me baleta na ituvatuva e so, me vaka na cakacaka vakavunau, sasamaki, ripote ni akaude, kei na ivola mai na valenivolavola ni tabana e vauca na ituvatuva qori, ena kabi ga ena vava ni itukutuku mera wilika na mataveitacini. E dodonu mera vakavakarau vinaka na vakaitavi ena soqoni, ra muria vinaka tale ga na gauna e yalataki kei na ivakasala e vauca nodra itavi.
5. Na cava na ituvatuva ni soqoni vakaivavakoso ena macawa ni nona veisiko na ivakatawa ni tabacakacaka?
5 Veisiko ni iVakatawa ni Tabacakacaka: Na ituvatuva ni veisiko ni ivakatawa ni tabacakacaka e veimacawa ena sega ni veisau. Ena caka ena bogi ni Tusiti na Koronivuli ni Vuli Vunau kei na Soqoni ni Cakacaka, qai salamuria e dua na sere. Sa na qai vunau na ivakatawa ni tabacakacaka me 30 na miniti. Me vaka ga e vakayacori tiko ena gauna qo, ena tuvanaki e dua tale na bogi me caka kina na Vuli iVolatabu ni iVavakoso, salamuria na sere kei na nona ivunau na ivakatawa ni tabacakacaka. Ena tini na soqoni ena sere kei na masu.
6. Na cava e nodra itavi na ivakatawa ni iwasewase lailai?
6 Soqoni ni Cakacaka Vakavunau: Na ilawalawa qase ena lesi ira na ivakatawa ni iwasewase lailai mera liutaka na cakacaka vakavunau ena dua na iwasewase lailai, mera vakatawani ira tale ga na lewena. Na dauveiqaravi ni ivavakoso e lesi ena itavi qo ena vakatokai me “dauveiqaravi ni iwasewase lailai.”
7. Ena yaga vakacava na ituvatuva vou ni noda soqoni vakaivavakoso?
7 E totoka na ituvatuva vou ni soqoni vakaivavakoso, nida na vulica kina e levu na ka yaga qai veivakayaloqaqataki me dei noda veiwekani kei Jiova. Eda na maqosa ena vunau kei na veivakavulici, vuavuaivinaka tale ga noda cakacaka vakaitalatala.—Efeso 4:13, 14; 2 Tim. 3:17.
8. Ena yaga vakacava vei keda vaka kina vei ira e so tale noda vakavakarau?
8 Ena matata vei keda na veitikina ena vakabibitaki ena soqoni yadua ke da vakavakarau vinaka. Eda na rawa tale ga ni veivakayaloqaqataki kece ena noda ivakamacala. (Roma 1:11, 12; Iper. 10:24) Noda isausau me ‘raici noda tubu cake’ nida “wasea vakadodonu nai vakavuvuli dina.”—1 Tim. 4:15, VV; 2 Tim. 2:15.
9. Na cava me noda inakinaki, cava na vuna?
9 Eda marautaka na veisau me baleta na soqoni vakaivavakoso. Meda muria vinaka mada ga na veidusimaki ni “dauveiqaravi yalo dina ka vuku,” da kabiti koya voleka tale ga na noda iVakatawa Levu, ni vakarautaki keda ina ‘rarawa’ levu sa voleka sara qo.—Maciu 24:21, 45, VV; Iper. 13:20, 21; Vkta. 7:14.