Kato ni Taro

◼ Ni tiko na kabani vakalawa e vakayagataka na isoqosoqo, e dodonu beka ina dua na ivavakoso se dua vei keda me vakayagataka na kena ivakatakilakila (logo)?

Na logo e dua na yaca, ivakatakilakila, se droini e vakarawarawataka nona kilai e dua. Na droini ni Vale ni Vakatawa e ivakatakilakila ni Watch Tower Bible and Tract Society of Pennsylvania kei na so tale na kabani vakalawa (legal corporation) e vakayagataka na isoqosoqo. Na iVavakoso vaKarisito ni iVakadinadina i Jiova e vakayagataka na ivakatakilakila ni dua na iVolatabu e tadola tu. Eso tale na kabani vakalawa e vakayagataka na isoqosoqo e duidui na ivakatakilakila era taurivaka.

Na ivakatakilakila kei na yaca ni kabani vakalawa ni isoqosoqo e sega ni dodonu me vakayagataka na ivavakoso se o keda yadua. Me kua ni vakayagataki ena Kingdom Hall, ivola eda vola, veika eda taukena, kei na so tale. Na noda vakayagataka na ivakatakilakila ni isoqosoqo e rawa ni vakavu veilecayaki vei ira na vakailesilesi vakamatanitu, dautabaivola, kei na so tale. Era na sega ni kila se semati vakacava na noda ivavakoso ina kabani vakalawa e vakayagataka na isoqosoqo. Na ivola tale ga e volai e rawa ni nanumi cala ni vakadonui se vakau mai na itikotiko liu mai Niu Yoka se valenivolavola ni tabana e ke.

Me kua ni vakayagataki na ivakatakilakila ni isoqosoqo ena Kingdom Hall era na qai tara, veitalia ke taukena na vale ni soqoni na isoqosoqo. Ke vakayagataka tiko na ivavakoso na ivakatakilakila ni isoqosoqo ena Kingdom Hall, e sega ni tukuni me veisautaki sara ga qo. Ni na rairai vinakati kina me caka e levu na ka, vakayagataki tale ga kina e levu na gauna kei na ilavo. Ia e rawa ni vakasamataki me caka na veisau ke sega ni levu na ka me caka. Ke sega, e rawa ni qai veisau ena gauna e tuvanaki me vakavinakataki kina na Kingdom Hall se veisau na papa e dau volai kina na gauna ni soqoni.