Na Cava na Watch Tower Bible and Tract Society?
Ena 1884 e tauyavu kina na Watch Tower Bible and Tract Society of Pennsylvania, ni muri na lawa ni Commonwealth e Pennsylvania, mai Merika. Na isoqosoqo qori e tokoni keimami na iVakadinadina i Jiova ena neimami cakacaka e vuravura raraba, okati kina na kena tabaki na iVolatabu kei na ivola vakaivolatabu.
Na inaki ni isoqosoqo qori me tokona na veika me baleta na neimami “lotu, na veivakavulici kei na cakacaka e sega ni rawa tubu.” Vakabibi na kena “vunautaki kei na veivakavulici ni Matanitu ni Kalou ena veiliutaki i Jisu Karisito.” O ira ga na sureti era lewena na isoqosoqo qo, e sega ni vakatau ena nodra cau. O ira na lewe ni isoqosoqo kei ira na dairekita era tokona na iLawalawa Dauvakatulewa ni iVakadinadina i Jiova.
Veitokoni ena Tabana Vakalawa
Me vaka na Watch Tower Bible and Tract Society of Pennsylvania, e vakayagataka na iVakadinadina i Jiova e vica vata na tabana vakalawa ena levu na vanua. E okati tale ga ena yaca ni isoqosoqo qori na “Watch Tower,” “Watchtower,” se e vakadewataki.
Qo eso na ka sa cakava na tabana vakalawa me tekivu mai na gauna e tauyavu kina:
Vola qai tabaka na ivola. Keimami sa tabaka oti e rauta ni 253 na milioni na iVolatabu. E vakadewataki na neimami ivola ena sivia e 1,050 na vosa. Era rawa ni wilika wale na lewenivanua ena website na jw.org na iVolatabu ena sivia na 300 na vosa. E rawa tale ga nira raica kina na isaunitaro vakaivolatabu me vaka, “Na Cava na Matanitu ni Kalou?”
Veivakavulici. Keimami vakarautaka e vica na koronivuli e vakavulici kina na iVolatabu. Kena ivakaraitaki, tekivu ena 1943 sa yaga vei ira e rauta ni 10,000 na iVakadinadina i Jiova na veivakavulici ena Koronivuli o Kiliati. E veimacawa tale ga era vakavulici ena soqoni vakaivavakoso e vica vata na milioni, wili kina o ira na sega ni iVakadinadina i Jiova. Keimami veivakavulici tale ga ena wilivola kei na volavola, qai vakadewataki na kena ivola ena 136 na vosa.
Cakacaka e sega ni rawa tubu. Keimami veivuke tale ga ni yaco na leqa tubukoso se na ivalu. Kena ivakaraitaki, na labakawa a yaco e Rwanda ena 1994, kei na uneune me vaka e yaco e Haiti ena 2010.
Dina e levu na cakacaka sa qarava na neimami isoqosoqo vakalawa, ia e neimami itavi yadua na lotu vaKarisito me keimami vunautaka, qai vakavulica na itukutuku vinaka me vaka e lesi keimami kina na Kalou. (Maciu 24:14; 28:19, 20) Keimami vakadeitaka ni tokona tiko na Kalou na neimami cakacaka, ena ‘vakatubura’ tale ga.—1 Korinica 3:6, 7