Ulutaga Vou me Tekivutaki Kina na Vuli iVolatabu
1. Na ulutaga vou cava ena tekivu tabaki ena Vale ni Vakatawa me baleti ira na lewenivanua, ia na cava na kena inaki?
1 Ena vula mai qo ena tekivu tabaki ena Vale ni Vakatawa me baleti ira na lewenivanua e dua na ulutaga vou me tekivutaki kina na vuli iVolatabu. Na kena ulutaga “Me Sauma na iVolatabu.” De ra na taleitaka eso ena yalava na wilika na ulutaga qo, ia e kena inaki meda veivosakitaka kei taukeinivale.
2. Na cava e lewe ni ulutaga qo?
2 Lewena: E volai vaka na taro na ulutaga levu kei na ulutaga lalai me tarogi kina o itaukeinivale ni drau veivosaki. Era sega ni lavetaki eso na tikinivolatabu me rawa nira wilika sara ga ena Vosa ni Kalou. E lekaleka ga na parakaravu me rawa ni drau veivosakitaka ena imatai ni gauna o sikovi koya kina. Na ulutaga qo ena dusimaki ira ina ivola Kaya na iVolatabu, ke veiganiti me dewa sara kina na vuli.
3. Nida vunau e veivale, eda na vakayagataka vakacava na ulutaga qo me tekivutaki kina na vuli iVolatabu?
3 Sala mo Vakayagataka Kina: Ni o solia na mekesini, o rawa ni taroga na taro vakavure vakasama ena ka e vakabauti raraba tu me baleta na ulutaga qo. Me kena ivakaraitaki, na ilavelave ni 1 Janueri e vakamacalataka na yaga ni iVolatabu. O rawa ni taroga: “Oni vakabauta na iVolatabu e Vosa ni Kalou se dua ga na ivola vinaka? [Waraka me sauma.] Au via vakaraitaka vei kemuni na vakasama veiuqeti e tiko ena ulutaga qo.” Vakaraitaka sara vua na imatai ni taro, wilika na imatai ni parakaravu, drau qai raica vata na tikinivolatabu e sega ni lavetaki. Wilika tale na taro, qai kerea me vakamacala kina o itaukeinivale. Ia na levu ni ka drau na veivosakitaka ena vakatau ena ituvaki, drau qai vakayagataka na taro e nabataki tu. Ni bera ni o biubiu, taroga na taro e tarava qai tuvanaka na siga kei na gauna mo drau veivosakitaka kina. Saga mo tomana tiko ga e veimacawa na nomudrau veivosakitaka na ulutaga qo me yacova ni o kauta yani na ilavelave tarava. Dua tale na kena iwalewale na nomu sureti taukeinivale sara ga vakadodonu me vulica na iVolatabu. O na vakayagataka gona na ulutaga “Me Sauma na iVolatabu” mo vakaraitaka kina na kena icakacaka.
4. Eda na vakayagataka vakacava na ulutaga qo nida veisikovi lesu?
4 E yaga tale ga na ulutaga vou qo vei ira era dau taura na mekesini vovou (magazine route) kei ira eso tale na veisikovi lesu. O rawa ni kaya: “E tiko e dua na ulutaga vou ena Vale ni Vakatawa. Meu vakamacalataka mada na kena inaki.” Keimami masulaka ni na vukei ira e levu na ulutaga vou qo “mera kila tale ga na ka dina.”—1 Tim. 2:4.