Vukei Koya Drau Cakacaka Vakavunau Vata
1. Nida salavata kei na dua ena cakacaka vakaitalatala, eda na vakatotomuria vakacava na ivakarau ni nona rai na yapositolo o Paula?
1 Na yapositolo o Paula e raica na gauna e vakayagataka kei ira na tacina vakayalo me gauna ni “veivakayaloqaqataki.” (Roma 1:12) Ni o salavata kei na dua na dautukutuku ena cakacaka vakaitalatala, vakacava o dau vakayagataka na gauna qori mo veivakayaloqaqataki kina, mo veivuke tale ga? Mo kua ni galu tu ga, wasea vua na ka sara ga e vukei iko mo dua kina na dautukutuku maqosa.
2. Na cava meda cakava me rawa ni doudou o koya eda cakacaka vakavunau vata, cava e bibi kina qo?
2 Uqeti Koya me Doudou: Eso na dautukutuku era dau taqaya, ena laurai qori ena irairai ni matadra kei na irorogo ni domodra. Eda rawa ni vukei ira mera doudou ena noda vakacaucautaki ira mai vu ni lomada. Na cava eso tale na ka eda rawa ni cakava mera doudou kina o ira eda cakacaka vakavunau vata? E dau tukuna e dua na ivakatawa dauveilakoyaki vei koya erau cakacaka vakavunau vata na ka e dau rerevaka kei na nona dau masuta wasoma na veivuke me valuta kina na ituvaki va ya. E tukuna e dua tale na tacida tagane na ka e dau vukei koya me doudou: “Au dau tekivu sara ga ena matadredredre. So na gauna ena vinakati meu masu me rawa niu cakava kina qori.” Ia vakacava o iko, cava mada e vukei iko mo doudou vakalevu ena cakacaka vakaitalatala? Tukuna sara qori vei koya drau cakacaka vakavunau vata.
3. Na cava eso na ka eda rawa ni wasea vei koya eda cakacaka vata me laulau kina vakalevu nona cakacaka vakavunau?
3 Wasea na iWalewale o Vakayagataka: Vakacava e tiko eso na iwalewale o raica ni tekivu vinaka kina na veivosaki, dua beka na yatuvosa lekaleka se taro, se dua na irogo? De dua e tiko e dua na vakatutu o dau muria, ia o qai veisautaka ga vakalailai me rawa ni laulau. Vakacava mo tukuna qori vei koya drau cakacaka vakavunau vata? (Vkai. 27:17) Ni drau lako ena veisikovi lesu, o rawa ni vakamacalataka vua na inaki ni nomudrau veisiko kei na ka me caka me rawati kina qori. Ni oti na nomudrau caka vuli iVolatabu, o rawa ni vakamacalataka vua na vuna o kauta cake mai kina e dua na tikina, dua na tikinivolatabu se na iwalewale ni veivakavulici me ganiti gonevuli.
4. Na cava meda saga kina meda vukei ira noda itokani dauvunau?
4 O ira na dauvunau ena imatai ni senitiuri era sega ni dau vukei ira ga vakayalo na sega ni tiko ena dina. Era kila tale ga ni bibi mera dau veiuqeti ra qai veivakayaloqaqataki vakamataveitacini. (Caka. 11:23; 15:32) Na yapositolo o Paula a vakavulici Timoci, oti sa qai uqeti koya me dau wasea vei ira na tacina vakayalo na ka e vulica. (2 Tim. 2:2) Nida caka vinaka vei ira na tacida vaKarisito ena cakacaka vakaitalatala, ena sega wale ga nira marau vakalevu se laulau nodra veivakavulici, ia ena marau tale ga kina na Tamada vakalomalagi.—Iper. 13:15, 16.