Maqosa Tiko ga ena Cakacaka Vakaitalatala—Mo Dauveivuke

Vuna e Bibi Kina: E kila vinaka o Jisu na yaga ni noda gole yarua ena cakacaka vakavunau. Ni talai ira na le 70 mera liu ena nodra lai vunau, e tuvanaka mera lako yarua. (Luke 10:1) Na noda itokani ni cakacaka vakavunau ena vukei keda ni basika e dua na ituvaki se ni dredre noda sauma na nodra taro na itaukeinivale. (Dauv. 4:9, 10) Ena wasea tale ga na ka e kila, so na gauna ena vakatututaka na ka meda cakava me rawa nida maqosa cake ena cakacaka vakaitalatala. (Vkai. 27:17) E rawa tale ga ni veivakayaloqaqataki na itokani ni cakacaka ni rau biubiu mai na dua na vale, qori ena nona veivosakitaka na veika yaga e dau veiuqeti.—Fpai. 4:8.

Kena iWalewale:

Vakarorogo vinaka ni vunau tiko o nomu itokani. (Jeme. 1:19) Ni wiliki na tikinivolatabu, vakamuria tiko ena nomu iVolatabu. Ke o cakava qori, ena rawarawa mo veivuke ni basika e dua na ituvaki.
Bibi vua na itokani ni cakacaka me lewa vinaka na gauna me vosa kina. (Vkai. 25:11) Ni o salavata kei na dua tale na dautukutuku ena nona vuli iVolatabu, ena marautaki ke vica toka na nomu ivakamacala. Ia ena vunau e veivale, de dua ena vinakata na nomu itokani mo solia vua na gauna me vakamacala, vakabibi ke nona vale ya. Ena yasana adua, ena rairai vinakati nomu veivuke ke dautukutuku vou, se dredre me sauma na taro, se sega ni tataleitaki o itaukeinivale. Mo kua ga ni vosa takoso, kua ni liutaka na veivosaki, se kauta cake tale mai e dua na ulutaga ni o salavata tiko kei na dua na dautukutuku ena vunau e veivale, veisikovi lesu se vuli iVolatabu.
Wasea na ka o kila. Kua ni tusuka ke o raica ena so na gauna ni vinakati me vukei na nomu itokani me rawa ni maqosa vakalevu ena cakacaka vakaitalatala. (Vkai. 3:27) Ena so na gauna veiganiti, o rawa ni kaya: “Vakacava na nodaru vale ya?” se “Dua na ka au via tukuna” se “Qo na ka au dau cakava.” Nanuma tiko, eso na tacida era dau marautaka nida vukei ira ena so na gauna, ia e rawa nira yalolailai tale ke da vakadodonutaki ira ena nodra cala kece.

Tovolea Qori ena Loma ni Vula Qo:

Ni oti nomudrau cakacaka vata kei na dua na dautukutuku, kaya vua ni yaga vakalevu vei iko na ka e tukuna kei na ka e cakava.