Watchtower LAIBRI ENA INTERNET
Watchtower
LAIBRI ENA INTERNET
vakaViti
  • IVOLATABU
  • IVOLA
  • SOQONI
  • w25 Okosita t. 8-13
  • Mo Vakabauta ni Lomani Iko o Jiova

Sega na kena vidio.

Vosota, sega ni laurai rawa na vidio.

  • Mo Vakabauta ni Lomani Iko o Jiova
  • Na Vale ni Vakatawa Kacivaka na Matanitu i Jiova (Vulici)—2025
  • Ulutaga Lailai
  • iKuri ni Ulutaga
  • VUNA MEDA VAKABAUTA KINA NI LOMANI KEDA O JIOVA
  • CAVA MEDA CAKAVA MEDA VAKABAUTA KINA NA LOLOMA I JIOVA?
  • VUKEI KEDA O JISU MEDA VAKABAUTA NI LOMANI KEDA O JIOVA
  • VAKADEITAKA TIKO GA NI LOMANI IKO O JIOVA
  • E Lomani Iko Vakalevu o Jiova
    Na Vale ni Vakatawa Kacivaka na Matanitu i Jiova (Vulici)—2024
  • E Tawamudu na Loloma ni Kalou
    Na Vale ni Vakatawa Kacivaka na Matanitu i Jiova (Vulici)—2025
  • Na Cava Eda Vulica ena iVoli?
    Na Vale ni Vakatawa Kacivaka na Matanitu i Jiova (Vulici)—2025
  • Mo Yalomalumalumu ni o Sega ni Kila Eso na Ka
    Na Vale ni Vakatawa Kacivaka na Matanitu i Jiova (Vulici)—2025
Raica Tale Eso
Na Vale ni Vakatawa Kacivaka na Matanitu i Jiova (Vulici)—2025
w25 Okosita t. 8-13

ULUTAGA NI VULI 33

SERE 4 “Noqu iVakatawa o Jiova”

Mo Vakabauta ni Lomani Iko o Jiova

“Au tuberi iko mai . . . vei au ena dei ni loloma.”​—JERE. 31:3.

KA E VAKABIBITAKI

Eda na vulica na vuna e bibi kina meda vakabauta ni lomani keda o Jiova, kei na ka meda cakava meda vakadeitaka kina ni lomani keda.

1. Na cava o yalataki iko kina vei Jiova? (Raica tale ga na iyaloyalo.)

O SE vakasamataka na gauna o yalataki iko kina vei Jiova? O cakava na vakatulewa qori ni o sa kilai koya, o lomani koya tale ga. O yalataka vua ni o na vakaliuca na lomana, o na lomani koya tiko ga ena lomamu taucoko, nomu vinaka taucoko, nomu vakasama taucoko, kei na nomu kaukaua taucoko. (Mari. 12:30) Tekivu mai na gauna qori, o sa qai lomani koya tiko ga vakalevu. Vakacava ke dua e taroga vei iko, “O lomani Jiova dina?” O na tukuna sara ga vua, “Au lomani koya vakalevu, lailai tale noqu lomani iko se dua tale na ka!”

iYaloyalo: E vakasamataka tiko vakatitobu e dua na tacida yalewa na nona yalayala kei na nona papitaiso. 2. E papitaiso ena uciwai.

O se vakasamataka na loloma o vakila ena gauna o yalataki iko kina vei Jiova, oti qai papitaiso? (Raica na parakaravu 1)


2-3. Na cava e vinakata o Jiova meda vakabauta? Cava eda na veivosakitaka ena ulutaga qo? (Jeremaia 31:3)

2 Ia na cava o na tukuna ke dua e tarogi iko, “O vakabauta dina ni lomani iko o Jiova? Vakacava ena dredre mo sauma ni o vakasamataka tiko ni sega ni ganiti iko na loloma i Jiova? E kaya e dua na tacida yalewa e dredre nona isususu: “Au kila niu lomani Jiova. Au vakabauta qori. Ia na ka ga au dau vakatitiqataka, ke lomani au dina o Jiova se sega?” Ia na cava mada na rai nei Jiova me baleti iko?

3 E vinakata o Jiova mo vakabauta ni lomani iko. (Wilika Jeremaia 31:3.) O koya sara ga e tuberi iko mai vua. Na gauna tale ga o yalayala kina, oti o qai papitaiso, e solia vei iko e dua na iloloma talei, na dei ni nona loloma. Kena ibalebale ni lomani iko vakalevu, ena sega vakadua ni biuti iko. Na loloma qori e uqeti koya me raici ira na qaravi koya ena yalodina, wili kina o iko, mera nona “ivotavota vakamareqeti.” (Mala. 3:​17, vmr.) E vakadeitaka na yapositolo o Paula ni lomani koya o Jiova, e vinakata tale ga o Jiova mo vakadeitaka ni lomani iko. E nuidei o Paula me vola: “E dei tu na lomaqu ni na sega ni rawata na mate, na bula, na agilosi, na veimatanitu, na veika era tu nikua se veika ena yaco mai, na kaukaua cava ga, se dua na ka mai cake se ka e ra, se dua tale na kabuli, me tawasei keda mai na loloma ni Kalou.” (Roma 8:​38, 39) Eda na veivosakitaka ena ulutaga qo na vuna meda vakadeitaka kina ni lomani keda o Jiova, kei na ka meda cakava me rawa nida vakadeitaka kina na loloma qori.

VUNA MEDA VAKABAUTA KINA NI LOMANI KEDA O JIOVA

4. Eda na vorata vakacava e dua na ivadi qaseqase nei Setani?

4 Nida vakabauta ni lomani keda o Jiova, eda na vorata e dua “na ivadi qaseqase” nei Setani. (Efeso 6:11) Ena saga ena nona igu o Setani meda kua ni yalodina vei Jiova. Dua nona ivadi qaseqase, ya meda vakabauta na lasu ni sega ni lomani keda o Jiova. Kua ni guilecava ni dau qara o Setani na gauna veiganiti me temaki keda kina. E cakava qori ena gauna eda malumalumu sara tu ga kina, de dua ni vakayalolailaitaki keda na ka sa yaco oti, na ituvaki dredre ena gauna qo, se da leqataka na noda veisiga nimataka. (Vkai. 24:10) O Setani e vaka na laione e vaqara tiko na manumanu sa malumalumu tu. Koya gona ena saga me rawai keda nida yalolailai sara tu ga meda rawa ni soro. Ia ke da vakadeitaka tiko ga ni lomani keda o Jiova, eda sa vakarau tu meda “vorati” Setani kei na nona ilawaki qaseqase.​—1 Pita 5:​8, 9; Jeme. 4:7.

5. Na cava e bibi kina meda vakila ni lomani keda o Jiova, e mareqeti keda tale ga?

5 Nida vakabauta ni lomani keda o Jiova, eda na toro voleka vua. Dikeva na vuna eda tukuna kina qori. E buli keda o Jiova meda vakaraitaka na loloma, meda lomani tale ga. Eda na lomana e dua baleta ni lomani keda. Koya gona, nida vakila ni lomani keda vakalevu o Jiova, e mareqeti keda tale ga, eda na lomani koya vakalevu. (1 Joni 4:19) Nida lomani Jiova vakalevu, ena lomani keda tale ga vakalevu o koya. E tukuna vakamatata na iVolatabu: “Toro voleka vua na Kalou ena qai toro voleka mai vei kemuni o koya.” (Jeme. 4:8) Eda na vakadeitaka gona vakacava ni lomani keda o Jiova?

CAVA MEDA CAKAVA MEDA VAKABAUTA KINA NA LOLOMA I JIOVA?

6. Mo vakabauta ni lomani iko o Jiova, cava mo masulaka?

6 Mo masu vakawasoma qai vakamatatataka. (Luke 18:1; Roma 12:12) Mo masuti Jiova vakavica ena dua na siga me vukei iko mo kila nona rai me baleti iko. Eso na gauna ena beitaki iko vakasivia na lomamu, o vakatitiqataka kina na loloma i Jiova. Ia mo nanuma tiko ni uasivia na lomamu o Jiova. (1 Joni 3:​19, 20) E kilai iko vinaka ni vakatauvatani kei na nomu kilai iko, e raica mada ga na nomu itovo vinaka o sega tu ni kila. (1 Sam. 16:7; 2 Vei. 6:30) Mo kua gona ni tu suka mo “sova yani” na lomamu vua, kerea me vukei iko mo vakabauta ni lomani iko. (Same 62:8) Oti qai cakava sara na ka o masulaka ni o muria e vica na vakatutu qo.

7-8. E vakadeitaka vakacava na ivola na Same ni lomani keda o Jiova?

7 Mo vakabauta na ka e tukuna. E uqeti ira na dauvola iVolatabu o Jiova mera vakamacalataki koya vinaka sara ga. Dikeva mada na sala e vakamacalataka kina o Tevita na levu ni nona lomani iko o Jiova. “E voleka o Jiova vei ira sa ramusu na lomadra, e vakabulai ira na yalolailai.” (Same 34:​18, vmr.) Ni o yalolailai, o na rairai nanuma ni sega ni dua ena vukei iko rawa. Ia e yalataka o Jiova ni voleka sara tu ga vei iko ena gauna qori, ni kila ni o vinakata nona veivuke. E vola o Tevita ena dua tale na same: “Ni tawana na wainimataqu ena nomuni tavaya kulinimanumanu.” (Same 56:8) E raica o Jiova na gauna o rarawa tu kina. E kauaitaki iko vakalevu kei na ka o sotava tiko. Me vaka ga nona tawana qai mareqeta na wai ena kulinimanumanu e dua e lako ina vanua dravuisiga, e tawana qai mareqeta tale ga o Jiova na wainimatamu ena gauna o rarawa kina. Eda wilika ena Same 139:3 me baleti Jiova: “Oni kila vinaka na noqu ivalavala kece.” Io, e raica o Jiova na nomu ivalavala kece, ia e kauaitaka ga na ka vinaka o cakava. (Iper. 6:10) Na vuna? Ni mareqeta nomu sasaga kece mo vakamarautaki koya.a

8 E vakayagataka o Jiova na tikinivolatabu veivakacegui qori me tukuna vei iko: “Mo kila tiko niu lomani iko vakalevu, au kauaitaki iko.” Ia eda sa vulica mai ni vinakata o Setani mo vakabauta na lasu ni sega ni lomani iko o Jiova. Ke o vakatitiqataka ena so na gauna ni lomani iko o Jiova, e bibi mo taroga, ‘O cei meu vakabauta, na “tama ni lasu” se “na Kalou daudina”?’​—Joni 8:44; Same 31:5.

9. Na cava e yalataka o Jiova vei ira na lomani koya? (Lako Yani 20:​5, 6)

9 Vakasamataka na rai nei Jiova me baleti ira na lomani koya. Dikeva na ka e tukuna o Jiova vei Mosese, kei ira na Isireli. (Wilika Lako Yani 20:​5, 6.) E yalataka o Jiova ni na vakaraitaka tiko ga na dei ni nona loloma vei ira na lomani koya. Ni yalodina na noda Kalou, eda vakadeitaka ena nona yalayala qori ni na lomani ira tu ga na lomani koya. (Niem. 1:5) Koya gona, ke o vakatitiqataka ena so na gauna ni lomani iko o Jiova, mo taroga, ‘Au lomani Jiova?’ Oti qai vakasamataka qo: Ke o lomani koya qai sasaga tiko mo vakamarautaki koya, mo nuidei ni lomani iko vakalevu. (Tani. 9:4; 1 Kor. 8:3) Se eda rawa ni kaya, ke o vakadeitaka ni o lomani Jiova, mo vakadeitaka tale ga ni lomani iko. Mo nuidei ni na lomani iko tu ga qai sega ni biuti iko.

10-11. Na cava e vinakata o Jiova mo nanuma me baleta na ivoli? (Kalatia 2:20)

10 Vakasamataka vakatitobu na ivoli. Na isoro ni veivoli i Jisu Karisito e nona iloloma levu duadua o Jiova vua na kawatamata. (Joni 3:16) Vakacava e nona iloloma tale ga vei iko? Io! Dikeva mada nona ivakaraitaki na yapositolo o Paula. Eda kila ni a cakava eso na ivalavala ca bibi ni bera ni lotu vaKarisito, e vinakati tale ga me valuta nona malumalumu. (Roma 7:​24, 25; 1 Tim. 1:​12-14) Ia e qai raica na ivoli me nona iloloma o Jiova vua. (Wilika Kalatia 2:20.) Nanuma tiko ni uqeti Paula o Jiova me vola na vosa qori. Na ka kece tale ga e volai ena iVolatabu meda vakavulici kina. (Roma 15:4) Eda kila ena ka e vola o Paula ni vinakata o Jiova mo raica na ivoli me nona iloloma vei iko. Ni va qori nomu rai me baleta na ivoli, o na vakadeitaka ni lomani iko o Jiova.

11 Eda vakavinavinakataki Jiova ni talai Jisu mai vuravura me mate ena vukuda. Ia e dua tale na vuna e lako mai kina e vuravura o Jisu, me tukuna na ka dina me baleta na Kalou. (Joni 18:37) Qori e okati kina na rai nei Jiova me baleti ira na luvena.

VUKEI KEDA O JISU MEDA VAKABAUTA NI LOMANI KEDA O JIOVA

12. Na cava meda vakabauta kina na ka e tukuna o Jisu me baleti Jiova?

12 Ni se bula e vuravura o Jisu, e marautaka me tukuna na veika me baleti Jiova vei ira na lewenivanua. (Luke 10:22) E tiko na vuna meda vakabauta kina na ka e tukuna o Jisu me baleti Jiova. Kena ikuri, o koya duadua ga a bula tu mai lomalagi kei Jiova me dua na gauna balavu. (Kolo. 1:15) E kila o Jisu na levu ni nona lomani koya o Tamana, e raica tale ga na levu ni nona lomani ira na luvena yalodina. E vukei ira vakacava eso tale o Jisu mera vakabauta ni lomani ira na Kalou?

13. Na cava e vinakata o Jisu meda kila me baleti Jiova?

13 E vinakata o Jisu me tiko vei keda nona rai me baleti Jiova. Ena Kosipeli, e sivia ni 120 na gauna e cavuta kina o Jisu vei Jiova “Tamaqu.” Ni vosa tale ga vei ira na nona imuri, e vakayagataka na vosa “Tamamuni” se “Tamamudou vakalomalagi.” (Maciu 5:16; 6:26) Ni bera ni lako mai vuravura o Jisu, era dau vakatokai Jiova na nona tamata yalodina me ‘Koya e Kaukaua Duadua,’ ‘Koya e Cecere Duadua,’ kei na ‘Dauveibuli Cecere’ kei na so tale na icavuti va qori. Ia o Jisu e dau kacivi Jiova me ‘Tamada.’ Na vosa qori e dusia ni vinakata o Jiova mera volekati koya nona dauveiqaravi me vaka ga nona volekati tamana dauloloma e dua na gone. E macala gona ni vinakata o Jisu me tiko vei keda nona rai me baleti Jiova me Tamada dauloloma, e mareqeti ira na luvena. Meda dikeva mada e rua na vanua e cavuta kina o Jisu na vosa “Tamaqu” se “Tamamudou.”

14. E vakaraitaka vakacava o Jisu ni mareqeti keda yadudua na Tamada vakalomalagi? (Maciu 10:​29-31) (Raica tale ga na iyaloyalo.)

14 Kena imatai, meda dikeva mada na ka e tukuna o Jisu ena Maciu 10:​29-31. (Wilika.) Era manumanuvuka lalai na siparo, era sega ni lomani Jiova se qaravi koya. Ia ke dua mada ga e lutu ena qele, e kauaitaki koya tiko ga o Jiova. Sa qai wacava sara na levu ni nona kauaitaki ira nona tamata yalodina qai mareqeti ira, nira qaravi koya tiko, era lomani koya! E kaya tale ga o Jisu ni kila vinaka o Tamada na iwiliwili ni drauniuluda. Ke sa kila vinaka o Jiova na ka lalai va qori me baleti keda, eda vakadeitaka ni kauaitaki keda vakalevu. E vinakata sara ga o Jisu meda vakabauta ni mareqeti keda yadudua na Tamada vakalomalagi.

E dusia tiko o Jisu na siparo e sa vakarau ro ena qele. Eratou vakarorogo vinaka na nona tisaipeli.

Ke sa mareqeta o Jiova e dua na siparo e lutu ena qele, ena mareqeti iko sara vakalevu ni o qaravi koya ena yalodina, o lomani koya tale ga! (Raica na parakaravu 14)


15. Na cava o vulica ena ka e tukuna o Jisu ena Joni 6:44 me baleta na Tamada vakalomalagi?

15 Raica na ikarua ni ivakaraitaki ni nona vakayagataka o Jisu na vosa “Tamaqu.” (Wilika Joni 6:44.) Na Tamamu vakalomalagi e vagolei iko mai ina ka dina. Na cava e cakava kina qori? E raica e dua na ka vinaka vei iko, e raica ni o yalomalumalumu. (Caka. 13:48) Ni cavuta o Jisu na Joni 6:​44, e rairai vakaibalebaletaka tiko na ka e tukuna o Jiova ena Jeremaia 31:3. E tukuna o Jiova vei ira nona tamata: “Au tuberi iko mai . . . vei au ena dei ni loloma.” (Jere. 31:3; vakatauvatana Osea 11:4.) Vakasamataka na kena ibalebale. Ena raica tu ga vei iko na Tamada vakalomalagi na ka vinaka o sega mada ga ni raica rawa.

16. (a) Na cava e via tukuna tiko vei keda o Jisu? Cava meda vakabauti koya kina? (b) O na vakadeitaka vakacava ni o Jiova na Tamamu vinaka duadua? (Raica na kato “Na Tamada Vinaka Duadua.”)

16 Ni vakamacalataki Jiova o Jisu me Tamada, e vaka ga me tukuna tiko: “E sega ni Tamaqu ga o Jiova; e Tamamu tale ga. Au vakadeitaka ni lomani iko, e kauaitaki iko tale ga vakalevu.” Ke o dau vakatitiqataka gona ena so na gauna ni lomani iko o Jiova, mo vakasamataka qo, ‘Na cava meu kua ni vakabauta kina na ka e tukuna o Jisu? Ni o koya duadua ga e kilai Tamana vinaka, e dau tukuna tale ga na ka dina.’​—1 Pita 2:22.

“Na Tamada Vinaka Duadua”

E laurai na vosa qori ena ikau ni ivola Toro Voleka Vei Jiova. E tukuna me baleta na inaki ni ivola: “Eda na raica ni o Jiova e . . . Tamada vinaka duadua. E Kalou kaukaua, lewadodonu, vuku, dauloloma, qai sega vakadua ni biuti ira na luvena yalodina.”

Qo na ka e tukuna e dua na dauwiliwili me baleta na sala e yaga kina vua na ivola qo ni dau vakalolomataki koya o tamana: “Au vulica meu kua ni rerevaka na vosa ‘tamaqu.’ Au sa qai kila qo na ibalebale ni dua na tama vinaka. Au kila ni ciqomi au o Jiova, au ciqoma tale ga ni Tamaqu o koya.” Qo na ka e kaya e dua tale me baleta na ivola qori: “O Jiova ga na Tamada vinaka duadua!”

Mo rawa ni vakadeitaka ni Tamamu vinaka duadua o Jiova, e vinakati mo vulica na ivola qo, se wilika wasoma.

VAKADEITAKA TIKO GA NI LOMANI IKO O JIOVA

17. Na cava meda vakadeitaka tiko ga kina ni lomani keda o Jiova?

17 E bibi meda vakadeitaka tiko ga ni lomani keda dina o Jiova. Me vaka eda sa vulica mai, ena saga na keda meca qaseqase o Setani meda kua ni qaravi Jiova. Me rawata qori, e vinakata meda vakabauta ni sega ni lomani keda na Kalou. Meda kua sara ni vakabauta na lasu qori!​—Jope 27:5.

18. Na cava mo cakava mo vakadeitaka kina ni lomani iko o Jiova?

18 Na cava mo cakava mo vakadeitaka kina ni lomani iko o Jiova? Mo masu tiko ga vei Jiova me vukei iko mo kila nona rai me baleti iko. Vakasamataka vakatitobu na sala era vakamacalataka kina na loloma i Jiova o ira na dauvola iVolatabu. Vakasamataka na rai i Jiova me baleti ira na lomani koya, ni na lomani ira tu ga na lomani koya. Mo vakasamataka vakatitobu na vuna mo raica kina na ivoli me iloloma i Jiova vei iko. Mo vakabauta tale ga na ka e tukuna o Jisu ni o Jiova e Tamamu vakalomalagi. Ke tarogi iko gona e dua, “O vakadeitaka ni lomani iko dina o Jiova?” o na kaya ena nuidei, “Io, e lomani au dina! Au na saga ena veisiga meu vakaraitaka noqu lomani koya!”

O NA SAUMA VAKACAVA?

  • Na cava meda vakabauta kina ni lomani keda o Jiova?

  • Na cava meda cakava meda vakabauta kina ni lomani keda o Jiova?

  • E vukei keda vakacava o Jisu meda vakabauta ni lomani keda o Jiova?

SERE 154 Na Loloma e Sega ni Seavu

a Mo kila eso tale na tikinivolatabu veivakacegui mo vakadeitaka ni lomani iko o Jiova, raica na ulutaga “Vakatitiqa” ena ivola iDusidusi ena Noda Bula vaKarisito.

    iVola vakaViti (1982-2026)
    Sogota
    Dolava
    • vakaViti
    • Vakauta
    • Digia
    • Copyright © 2025 Watch Tower Bible and Tract Society of Pennsylvania
    • iVakavakayagataki
    • Kemu iTukutuku
    • Privacy Settings
    • JW.ORG
    • Dolava
    Vakauta