ULUTAGA NI VULI 41
SERE 108 Na Dei ni Loloma ni Kalou
E Tawamudu na Loloma ni Kalou
“ Vakavinavinaka vei Jiova, ni vinaka o koya, e tawamudu na dei ni nona loloma.”—SAME 136:1.
KA E VAKABIBITAKI
Eda na vulica tiko ni loloma i Jiova e dua na ivakavuvuli rawarawa vakaivolatabu, nida nanuma dei qori, eda na valuta kina na yalolailai ni dredre na ituvaki.
1-2. Na cava era sotava tiko e levu na lotu vaKarisito?
RAITAYALOYALOTAKA mada e dua na waqa e donuya na cagi kaukaua. E veibiliyaka na waqa na ua lelevu. Ena mua na waqa ena vanua e kauta kina na ua, vakavo ke dua e balata na kena ikelekele. Na ikelekele qori ena vakavuna me dei tu na waqa, ena sega ni ciri ke kaukaua na cagi.
2 Ni o sotava e dua na ituvaki e vaka na cagi kaukaua, de dua o na vaka sara ga na waqa qori. Ena rawa ni veiveisau na ivakarau ni lomamu. Dua na siga o nuidei ni lomani iko o Jiova, e tokoni iko; dua tale na siga o na taroga ke kila tiko na kemu ituvaki. (Same 10:1; 13:1) De dua e vakacegui iko na ka e tukuna nomu itokani, o marau sara ga. (Vkai. 17:17; 25:11) Ia oti ga qori, o sa vakatitiqa tale. De dua o na vaqaqa ke sa guilecavi iko o Jiova. O na rawa vakacava ni tudei me vaka na ikelekele ni o sotava na veika dredre? Se o na vakadeitaka vakacava, mo vakadeitaka tiko ga ni lomani iko o Jiova?
3. Na cava na ibalebale ni ‘dei ni loloma’ ena Same 31:7 kei na 136:1? Cava eda kaya kina ni o Jiova e ivakaraitaki uasivi ni dei ni loloma? (Raica tale ga na iyaloyalo.)
3 Dua na sala o na tudei kina ena gauna dredre, ya ni o vakasamataka na dei ni loloma i Jiova. (Wilika Same 31:7; 136:1.) Na vosa ‘dei ni loloma,’ e tiko kina na vakasama ni nodrau veivolekati e le rua, e dei tale ga. O Jiova e ivakaraitaki uasivi ni dei ni loloma. E tukuna na iVolatabu me baleti koya ni “vuabale ena loloma e dei.” (Lako 34:6, 7) E tukuna tale ga: “E vuabale na dei ni nomuni loloma vei ira kece na kaci yani vei kemuni.” (Same 86:5) Vakasamataka mada na kena ibalebale: O Jiova e sega vakadua ni biuti ira na qaravi koya ena yalodina! Nomu nanuma dei tiko ni yalodina o Jiova, o na nuidei kina ena gauna dredre.—Same 23:4
Me vaka na ikelekele e vakavuna me dei tu na waqa ni kaukaua na cagi, eda na dei tale ga ena ituvaki dredre nida vakabauta ni lomani keda o Jiova (Raica na parakaravu 3)
NANUMA NI LOLOMA I JIOVA E IVAKAVUVULI RAWARAWA
4. Tukuna eso na ivakavuvuli rawarawa vakaivolatabu. Vakamacalataka na vuna eda sega kina ni vakacalai vakarawarawa.
4 Dua tale na sala mo tudei kina ena gauna dredre, ya mo kua ni guilecava ni loloma i Jiova e dua na ivakavuvuli rawarawa vakaivolatabu. Na cava na ibalebale ni “ivakavuvuli rawarawa vakaivolatabu” vei iko? De dua o na vakasamataka eso na ivakavuvuli dina o vulica ena Vosa ni Kalou. Kena ivakaraitaki, o vulica ni yaca ni Kalou o Jiova, o Jisu na Luvena duabau, era sega sara ga ni kila e dua na ka na mate, eda na bula tawamudu tale ga ena parataisi e vuravura. (Same 83:18; Dauv. 9:5; Joni 3:16; Vkta. 21:3, 4) Na gauna o vakabauta kina na ivakavuvuli qori, o sega tale ni vakacalai. Na vuna? Ni o kila ni yavutaki ena ka dina. Eda na dikeva tiko ni loloma tale ga i Jiova e dua na ivakavuvuli rawarawa vakaivolatabu. O na valuta kina na vakatitiqa ni o Jiova e sega ni kauaitaka se kila na kemu ituvaki.
5. Vakamacalataka na sala e talaraki kina na ivakavuvuli lasu.
5 Ni o tekivu vulica na iVolatabu, cava o cakava mo cata kina na ivakavuvuli lasu? De dua o vukei mo vakatauvatana na ka o vulica ena nomu lotu kei na ka e vakavulica na iVolatabu. Qo e dua na ivakaraitaki: De dua o vakabauta tu ni Kalou Kaukaua Duadua o Jisu. Ia ni o vulica na iVolatabu, o taroga, ‘E dina na ivakavuvuli qo?’ Ni o dikeva na ivakadinadina vakaivolatabu, o qai kila ni cala sara tu ga na ka o vakabauta. Oti, o sa sosomitaka na ivakavuvuli lasu ena ka dina vakaivolatabu qo: O Jisu “na ulumatua ni kabuli kece,” e “Luve ni Kalou, e duabau ga e bulia.” (Kolo. 1:15; Joni 3:18) E macala ga ni dredre me talaraki na ivakavuvuli lasu e “sa vakawakana tu.” (2 Kor. 10:4, 5) Ia ni o sa talaraka rawa ga, o na sega ni lesuva tale.—Fpai. 3:13.
6. Na cava o nuidei kina ni ‘tawamudu na dei ni loloma’ i Jiova?
6 Mo cakava tale ga qori mo kila na ka e vakavulica na iVolatabu me baleta na loloma i Jiova. Ke o vakatitiqataka na loloma i Jiova ni o sotava na ituvaki dredre, mo taroga: ‘E donu noqu rai?’ Mo vakatauvatana nomu vakatitiqataka na loloma i Jiova kei na ka e tukuni ena Same 136:1, e yavutaki kina na vuli qo. Cava e tukuna kina o Jiova ni nona loloma e “dei”? Cava tale ga e cavuti kina vaka26 ena same qo ni “tawamudu na dei ni nona loloma”? Me vaka eda veivosakitaka mai, na dei ni loloma i Jiova vei ira nona tamata e dua na ivakavuvuli rawarawa vakaivolatabu, e tautauvata ga kei na so tale na ivakavuvuli o vakabauta ena Vosa ni Kalou. E lasu na rai ni o Jiova e raici iko mo tawayaga se sega ni lomani iko. Mo cata sara na rai qori, me vaka ga nomu cata na vo ni ivakavuvuli lasu!
7. Tukuna eso na tikinivolatabu e vakadeitaka ni lomani iko o Jiova.
7 E tu ena iVolatabu e levu tale na ivakadinadina ni lomani iko o Jiova. Kena ivakaraitaki, e tukuna o Jisu vei ratou nona imuri: “Dou talei sara vei ira na siparo.” (Maciu 10:31) E tukuna sara ga o Jiova vei ira nona tamata: “Au na vakaukauataki iko, io, au na vukei iko, au na tokoni iko ena ligaqu imatau daudina.” (Aisea 41:10) Dikeva na matata ni tikinivolatabu qori. E sega ni kaya o Jisu: ‘De dua dou talei sara,’ se me tukuna o Jiova: ‘De dua au na vukei iko.’ Ia rau kaya ga: “Dou talei sara,” “Au na vukei iko.” Ke o vakatitiqataka na loloma i Jiova ena gauna dredre, na tikinivolatabu va qori o na sega wale ga ni nanuma kina ni lomani iko o Jiova, ia o na kila sara ga. Era yavutaki ena ka dina. Ni o masulaka qai vakasamataka vakatitobu, o na rawa sara ga ni tukuna na 1 Joni 4:16: “Keitou sa mai kila, keitou vakabauta tale ga na nona lomani keitou na Kalou.”a
8. Na cava mo cakava ke o vakatitiqataka ena so na gauna ni lomani iko o Jiova?
8 Vakacava ke o se vakatitiqataka tiko ga ena so na gauna ni lomani iko o Jiova? Mo vakatauvatana na ka o nanuma kei na ka o kila. Na noda nanuma e sega ni yavutaki ena ka dina, e sega kina ni nuitaki. Ia na loloma i Jiova e tukuni ena iVolatabu, e yavutaki ena ka dina. Ke da sega ni vakabauta ni lomani keda o Jiova, eda sa vakawalena tiko na nona itovo bibi duadua, na loloma.—1 Joni 4:8.
VAKASAMATAKA VAKATITOBU NONA ‘LOMANI IKO’ O JIOVA
9-10. Na cava na ibalebale ni vosa i Jisu “[E] lomani kemudou o Tamaqu [vakataki koya]” ena Joni 16:26, 27? (Raica tale ga na iyaloyalo.)
9 Eda na vulica e levu na ka me baleta na loloma i Jiova nida vakasamataka na ka e tukuna o Jisu vei ratou nona imuri: “[E] lomani kemudou o Tamaqu [vakataki koya].” (Wilika Joni 16:26, 27.) A sega ni tukuna qori o Jisu me ratou marau kina nona tisaipeli. Ia e kilai ena tikina wavolita ni sega ni tukuna tiko na ivakarau ni lomadratou ena gauna qori. E tukuna tiko e duatani na ka, na masu.
10 A se qai tukuna ga vei ratou me ratou masu ena vukuna, sega ni masu vua. (Joni 16:23, 24) E bibi me ratou kila qori. Ni sa vakaturi o Jisu, de dua ratou na vinakata me ratou masu vua, vakabibi ni ratou kila ni nodratou itokani. Rawa ni ratou kaya ni na rogoca o Jisu nodratou masu qai kerei Tamana me vukei ratou, ni lomani ratou vakalevu. Ia e tukuna o Jisu me kua ni va ya nodratou rai. Na vuna? E tukuna vei ratou: “[E] lomani kemudou o Tamaqu [vakataki koya].” Qori e dua vei ira na ivakavuvuli rawarawa vakaivolatabu me baleta na masu. Vakasamataka na kena ibalebale vei iko: Nomu vulica na iVolatabu o mai kilai Jisu kina, o lomani koya tale ga. (Joni 14:21) Ia me vakataki ratou na tisaipeli ena imatai ni senitiuri, mo doudou tale ga ni masu vua na Kalou ni o kila ni ‘o koya vakataki koya e lomani iko.’ O na vakaraitaka nomu vakabauta na vosa qori ena gauna kece o masu kina vei Jiova.—1 Joni 5:14.
Mo doudou ni masu vei Jiova ni o kila ni ‘o koya vakataki koya e lomani iko’ (Raica na parakaravu 9-10)b
KILA NA VU NI VAKATITIQA
11. Na cava ena marau kina o Setani nida vakatitiqataka na loloma i Jiova?
11 O cei e vakavuna noda vakatitiqataka ni sega ni lomani keda o Jiova? De o na kaya ni vakavuna o Setani, ia e rawa ni dina qori. Na Tevoro e ‘vakasaqara tiko me tilomi’ keda, ena marau tale ga ke da vakatitiqataka ni lomani keda o Jiova. (1 Pita 5:8) E vinakata tale ga o Setani meda nanuma ni sega ni ganiti keda na ivoli, a vakarautaka o Jiova ena levu ni nona lomani keda. (Iper. 2:9) Ia o cei ena marau nida vakatitiqataka na loloma i Jiova? O Setani. O cei tale ena rawa na lomana ke da soro ni dredre na ituvaki? Io, o Setani. E vinakata meda nanuma ni sega ni lomani keda o Jiova, ia e lasu qori. O koya ga e sega ni lomani koya o Jiova. E dua nona “ivadi qaseqase,” nona saga meda nanuma ni sega ni lomani keda o Jiova qai sega ni vakadonui keda. (Efeso 6:11) Nida kila na sasaga ni meca qo, eda na gumatua tiko ga meda “vorata na Tevoro.”—Jeme. 4:7.
12-13. E rawa vakacava nida vakatitiqataka na loloma i Jiova noda sucu ivalavala ca?
12 E tiko e dua tale na ka e vakavuna meda vakatitiqataka kina ni lomani keda o Jiova. Cava ya? Na ivalavala ca eda sucu kaya mai. (Same 51:5; Roma 5:12) Na ivalavala ca e vakayawaki keda vua na Dauveibuli. E vakaleqa tale ga na noda vakasama, lomada, kei na yagoda.
13 Na ivalavala ca e vakaleqa na ivakarau ni lomada, e vakavuna na kena ora, meda nuiqawaqawa, meda rere, kei na madua. Eda dau vakila qori nida cakava e dua na cala. Ena rawa tale ga ni basika qori nida kauaitaka tiko ga na keda ituvaki ivalavala ca, e veibasai sara ga kei na inaki e buli keda kina na Kalou. (Roma 8:20, 21) Me vaka ga na motoka e sega ni cici vinaka ni sa loru na kena taya, ena sega tale ga ni taucoko sara na ka eda cakava ena vuku ni keda ituvaki ivalavala ca me vaka na inaki eda buli kina. Qori na vuna eda na vakatitiqataka kina ena so na gauna ni lomani keda o Jiova. Ke yaco qori, meda nanuma tiko ni o Jiova e “Kalou cecere qai vakatubuqoroqoro, . . . e dei tale ga [nona] loloma vei ira era lomani [koya] ra qai muria tiko na [nona] ivakaro.”—Niem. 1:5.
14. Ena rawa vakacava nida valuta na vakatitiqa nida vakasamataka vakatitobu na ivoli? (Roma 5:8) (Raica tale ga na kato “Qarauna na ‘Kaukaua ni iValavala ca e Veibacani.’”)
14 Eso na gauna eda nanuma ni sega ni ganiti keda na loloma i Jiova. Io, e sega dina ga ni ganiti keda na nona loloma, qori na vuna e vakasakiti kina. E sega ni vakatau nona lomani keda o Jiova ena ka eda cakava. Ia e bokoci noda ivalavala ca ena vuku ni ivoli, e vakarautaka qori o Jiova ni lomani keda. (1 Joni 4:10) Meda nanuma tale ga ni lako mai o Jisu me vakabulai ira na ivalavala ca, sega ni o ira na uasivi. (Wilika Roma 58.) E sega ni dua vei keda e uasivi na ka e cakava, e sega tale ga ni namaka qori o Jiova. Nida kila ni vakavuna noda vakatitiqataka na loloma i Jiova na noda ivalavala ca, eda na gumatua ni valuta na rai qori.—Roma 7:24, 25.
VAKATULEWATAKA MO YALODINA TIKO GA
15-16. Nida yalodina tiko ga vei Jiova, na cava eda vakadeitaka? Na vuna? (2 Samuela 22:26)
15 E vinakata o Jiova meda vakatulewa vinaka nida ‘kabiti koya tiko ga.’ (Vkru. 30:19, 20) Ke da cakava qori, eda nuidei ni na yalodina tiko ga vei keda. (Wilika 2 Samuela 22:26.) Nida yalodina tiko ga vei Jiova, eda vakadeitaka ni na vukei keda ena ituvaki dredre kece eda sotava.
16 Me vaka eda vulica mai, e levu na vuna meda tudei kina ni dredre na ituvaki. Eda kila ni lomani keda o Jiova, ena tokoni keda tale ga. Qori na ka e vakavulica na iVolatabu. Ke da vakatitiqataka na nona loloma, meda vakasamataka vakatitobu ni dina na ka eda kila, sega ni ka eda nanuma. Meda vakabauta tiko ga na ka dina vakaivolatabu, ni tawamudu na dei ni loloma i Jiova.
SERE 159 Vakalagilagi Jiova
a Qo e vica tale na tikinivolatabu: Vakarua 31:8, Same 94:14, kei na Aisea 49:15.
b IVAKAMACALA NI IYALOYALO: E masu na tacida tagane qo me soli vua na kaukaua me qaravi watina e tauvimate, me vakayagataka vakavuku nona ilavo, me vakavulici luvena tale ga me lomani Jiova.