Ra iTabaqase—Oni Yaga Vakalevu ena iVavakoso

De dua o sa malumalumu tale ga mai ena vuku ni bula vaqase. Sa vicasagavulu na yabaki nomu qaravi Jiova tu ena yalodina, ia o rawa ni yalolailai ni sega ni levu na ka o rawata ena gauna qo. Kena ivakaraitaki, o na rairai vakatauvatana na ka o cakava nikua kei na ka o dau cakava ena gauna sa oti. Ke dina qori, cava mo cakava me donu nomu rai?

KA E VINAKATA VEI IKO O JIOVA

Mo taroga: ‘Cava e vinakata vei au o Jiova?’ Ena vakacegui iko na ka e tukuni ena Vakarua 6:5, e kaya: “Mo lomani Jiova na nomu Kalou ena lomamu taucoko, ena nomu vinaka taucoko, kei na nomu kaukaua taucoko.”

E tukuni ena tikinivolatabu qori, ni vinakata o Jiova mo qaravi koya ena lomamu taucoko, ena nomu vinaka taucoko, kei na nomu kaukaua taucoko. Ni o cakava qori o na sega ni vakatauvatani iko kei ira eso tale, se vakatauvatana na ka o cakava tiko ena gauna qo kei na gauna sa oti.

Vakasamataka mada qo: Ni o se gone, na cava o a solia vei Jiova? Era na kaya e levu na dauveiqaravi i Jiova nira solia vua na nodra vinaka taucoko. Vei iko, ya na ka vinaka o solia vei Jiova ena gauna ya. Cava o rawa ni solia vei Jiova ena gauna qo? Kena irairai ni o solia nomu vinaka taucoko ena gauna qo ni vakatau ena kemu ituvaki, na ka o rawa ni cakava ena gauna qo. Ke va qori nomu rai, o rawa ni tukuna ni tautauvata na ka o solia tiko vei Jiova ena gauna sa oti kei na gauna qo. O solia vei Jiova nomu vinaka ena gauna ya, o solia tale tiko ga na nomu vinaka ena gauna qo.

O NA VUKEA E LEVU TALE

Qo e dua tale na ka mo vakasamataka: Kua ni kauaitaka ga na ka o sega ni cakava rawa, mo vakasamataka na ka o rawa ni cakava. Ni o sa itabaqase, eso na ka o rawa ni cakava ena gauna qo o sega ni rawa ni cakava ni o se gone. Qo eso na kena ivakaraitaki:

Wasea na ka o kila. Vakasamataka na ka e tukuni ena vica na tikinivolatabu qo:

Tui Tevita: “Au a gone, qo au sa qase, ia au sega ni raica e dua na yalododonu me biu wale tu, se ra vaqara madrai na luvena.”—Same 37:25.

Josua: “Raica! Au sa vakarau mate, oni kila vinaka ena lomamuni taucoko kei na nomuni bula taucoko ni sega ni daro na vosa ni yalayala vinaka kece e tukuna vei kemuni o Jiova na nomuni Kalou. Era yaco kece vei kemuni. E sega ni dua e daro.”—Josua 23:14.

De dua o tukuna tale ga e dua na ka va qori. Rau kila vinaka sara ga o Tevita kei Josua na ka rau tukuna tiko. Rau tukuna na turaga yalodina qo na ka rau raica se rogoca ena nodrau bula me vica vata na yabaki, ya na vuna e vakaibalebale kina.

Ke sa dede nomu qaravi Jiova tiko, o rawa tale ga ni tukuna na ka o raica ni cakava o Jiova ena vukumu. O se nanuma tiko na gauna o raica kina nona vakalougatataki ira nona tamata o Jiova? Mo talanoataka gona! O na rawa ni vakayaloqaqataki ira, me vaka ga nomu a vakayaloqaqataki. Nira rogoca eso tale na italanoa ni nomu qaravi Jiova, o na vu ni veivakayaloqaqataki vei ira.—Roma 1:11, 12.

Dua tale na sala o na vakayaloqaqataki ira kina na tacida ya ena nomu tiko sara ga ena soqoni, ke rawa. Ni o tiko e kea, ena yaga vei ira na tacimu, ena yaga tale ga vei iko. E kaya o Connie, sa tukuni oti mai: “Noqu tiko ena soqoni au sega kina ni yalolailai. Nira vakaraitaka vei au na mataveitacini nira lomani au, au sega kina ni rarawa. Au saga meu vakavinavinakataki ira niu solia vei ira eso na iloloma lalai. Au saga tale ga meu vakaitavi ena veika vakayalo kei ira na mataveitacini.”

E MAREQETA O JIOVA NOMU YALODINA

E levu tu ena iVolatabu na nodra ivakaraitaki o ira e vakaiyalayala na ka era rawata, ia e lomani ira o Jiova. Dua na kena ivakaraitaki o Simioni, e dua na itabaqase e Isireli a bula ena gauna e sucu kina o Jisu. Ni lako o Simioni ina valenisoro, e rairai raici ira na cauravou era qarava tiko eso na itavi bibi. Ia cava nona rai o Simioni me baleti koya? A rawa ni nanuma ni sega na kena yaga vei Jiova ena vuku ni nona yabaki. Ia e duatani na rai nei Jiova. E raici Simioni me “turaga yalododonu qai yalodina,” mani vakalougatataki koya me raica na gonedramidrami o Jisu. E vakayagataki Simioni mada ga o Jiova me parofisaitaka e dua na ka me baleta na Mesaia! (Luke 2:25-35) Kena ibalebale, e sega ni raica o Jiova na kena ituvaki vakaitabaqase o Simioni, ia e raici koya ga me dua na turaga e kaukaua nona vakabauta, e “sobuti koya tale ga na yalo tabu.”

Mo nuidei tale ga ni mareqeta o Jiova na nomu veiqaravi ena yalodina ke vakaiyalayala mada ga na ka o rawata. Ena rai i Jiova, e “namaki vua e dua me solia ga na ka e tu vua, e sega ni namaki me solia na ka e sega vua.”—2 Kor. 8:12.

Ni o vakasamataka tiko qori, mo kauaitaka ga na ka o rawa ni cakava. Kena ivakaraitaki, na iwalewale ni vunau cava o rawa ni vakaitavi kina, ke lekaleka mada ga? Vakacava o rawa ni vakayaloqaqataki ira na mataveitacini ni o qiriti ira se volavola vei ira? Na ka lalai va qori ena yaga vakalevu vei ira, vakabibi nira cakava o ira sa dede nodra qaravi Jiova tu mai.

Eso e lailai ga na ka e rawa nira cakava. Wilika e dua na italanoa mai na Tokalau kei Aferika e tiko ena kato “E Vakabulai Koya.”

Mo nanuma tiko ni nomu vakabauta kei na yalodina ena uqeti ira eso tale. O ivakaraitaki vinaka ni vosota, mo vakadeitaka tale ga ni “sega ni tawayalododonu na Kalou me guilecava na nomuni cakacaka kei na loloma oni vakaraitaka ena vuku ni yacana, ena nomuni qaravi ira na yalosavasava, qai sega ni cegu na nomuni veiqaravi.”—Iper. 6:10.

OGAOGA TIKO GA

E laurai ena vakadidike nira dau bulabula vinaka na itabaqase era dau veivuke, e dei tu ga na nodra vakasama, era bula balavu tale ga.

Na nodra caka vinaka ena sega ni vakaotia na revurevu ni bula vaqase. Ena cakava duadua ga qori na Matanitu ni Kalou, ni na vakaotia na ivalavala ca na ka e vakavuna na bula vaqase kei na mate.—Roma 5:12.

Ia na nomu qaravi Jiova tiko ena gauna qo, okati kina nomu vukea eso tale mera mai kilai koya ena vakadeitaka na nomu inuinui, o na bulabula vinaka tale ga. Kemuni na itabaqase, moni kila tiko ni mareqeta o Jiova na nomuni veiqaravi, e mareqeta tale ga na ivavakoso na nomuni ivakaraitaki ni vakabauta.