O na Vakaraitaka Vakacava ni o Vakavinavinakataka na iVoli?

1-2. Me uqeti keda vakacava na isoro ni veivoli i Jisu? Na vuna? (2 Korinica 5:​14, 15) (Raica tale ga na iyaloyalo.)

KE DUA e vukei iko ena nomu tao tu ena irusarusa ni vale, e macala ga ni o dinau tu vua. Ke ra vakabulai tale ga eso tale, de dua o na vinakata tiko ga mo vakavinavinakataki koya ni o sega ni guilecava na ka e cakava.

² Me vaka eda vulica ena ulutaga sa oti, e sega ni rawa nida vakabulai keda ga mai na ivalavala ca eda sucu kaya mai. Ia e sereki keda na isoro ni veivoli i Jisu (1) me vosoti noda cala, (2) me rawati kina noda inuinui meda sereki vakadua mai na noda ivalavala ca, kei na (3) meda veiyaloni kei na Kalou. Qori na vuna eda rawa kina ni bula tawamudu ena vuravura vou e vakarautaka o Jiova. E laurai ena ivoli na nona lomana na kawatamata o Jisu, se lomani keda makawa tu mai ni bera ni mai bula e vuravura. (Vkai. 8:​30, 31) E vola na yapositolo o Paula ni “uqeti keitou na loloma i Karisito.” (Wilika 2 Korinica 5:​14, 15.) Kena ibalebale qori ni bibi meda vakaraitaka noda vakavinavinakataka na loloma i Jisu, meda kua tale ga ni guilecava na ka e cakava ena vukuda.

3. Na cava e duidui kina noda rai me baleta na ivoli?

³ Na cava o na cakava mo vakaraitaka kina ni uqeti iko na ivoli? Ena duidui na ka eda tukuna. Na vuna? Meda vakatauvatana mada. Kaya mada ni ratou vakarau lako tiko e le tolu ina dua vata ga na vanua. Na nodratou isausau me ratou yaco i kea. Ia e duidui na vanua ratou biubiu mai kina kei na gaunisala ratou na muria. E noda “isausau” tale ga meda vakavinavinakataka na ivoli. Ia e duidui na sala eda vakaraitaka kina ni vakatau ena noda veiwekani kei Jiova ena gauna qo. Eda na veivosakitaka gona ena ulutaga qo e tolu na iwasewase: (1) o ira na vuli iVolatabu, (2) o ira na papitaiso, (3) o ira na sipi lako sese.

O IRA NA VULI IVOLATABU

4. Na cava e raica o Jiova vei ira na vuli iVolatabu?

⁴ Ke o vulica tiko na iVolatabu, vakasamataka qo: Nomu rogoca na itukutuku vinaka, e vakaraitaka ni vagolei iko mai o Jiova mo nona itokani. (Joni 6:44; Caka. 13:48) “O Jiova e dikeva na lomada.” Kena ibalebale ni raica vinaka nomu sasaga mo vulica na veika me baleti koya, e marautaka tale ga nomu toso ni o cakava na veiveisau mo muria nona ivakatagedegede. (Vkai. 17:3; 27:11) E rawa wale ga ni drau veitokani kei Jiova ena vuku ni ivoli. (Roma 5:​10, 11) Kua vakadua ni guilecava qori!

5. Era na muria vakacava na vuli iVolatabu na ivakasala e na Filipai 3:16?

⁵ Ni o vuli iVolatabu tiko, o na vakaraitaka vakacava ni o vakavinavinakataka na ivoli? Dua, mo muria nona ivakasala na yapositolo o Paula vei ira e Filipai: “Se mani toso cava eda sa cakava, meda toso tiko ga i liu ena ivakarau vata ga qori.” (Fpai. 3:16) E kaya va qo e dua tale na vakadewa ni iVolatabu: “Meda muria tiko ga na vanua eda sa lako tiko kina qo.” Me kua sara ni dua na ka me tarova nomu itosotoso ena gaunisala ni bula tawamudu.​—Maciu 7:14; Luke 9:62.

6. Na cava mera cakava na vuli iVolatabu ke dredre mera veisau? (Vakarua 30:​11-14) (Raica tale ga na iyaloyalo.)

⁶ Vakacava ke dredre mo vakabauta e dua na ivakavuvuli vakaivolatabu o se qai vulica ga? Mo vakelia tale na ivakavuvuli qori qai masu vei Jiova me vukei iko mo kila vinaka. (Same 86:11) Ke dredre tiko ga, kua ni lomaleqataka, vulica tiko ga na iVolatabu. Vakacava ke dredre mo biuta e dua na itovo e cata o Jiova? Nanuma tiko ni kila o Jiova nida rawa ni cakava na ka e kerea. O rawa ni muria nona ivakatagedegede. (Wilika Vakarua 30:​11-14.) E yalataka tale ga me vukei iko. (Aisea 41:​10, 13; 1 Kor. 10:13) Kua gona ni viritaka na itauwelu. Kua ni vakasamataka tiko ga na ka e dredre mo cakava, ia mo vakasamataka na ka vinaka e cakava vei iko o Jiova, wili kina na ivoli. Ni o lomani Jiova vakalevu, ena “sega ni icolacola bibi [vei iko] na nona ivunau.”​—1 Joni 5:3.a

7. Na cava mera nanuma tiko na gone era susu ena dina?

⁷ Vakacava o kemuni na gone oni susu ena dina? Oni vuli iVolatabu tale ga. Oni nodra vuli iVolatabu mareqeti na nomuni itubutubu. E kaya na iVolatabu: “Toro voleka vua na Kalou ena qai toro voleka mai vei kemuni o koya.” (Jeme. 4:8; 1 Vei. 28:9) Ni o sasaga mo veivolekati kei Jiova, ena qai volekati iko o koya. E sega ni vagolei iko mai o Jiova baleta ni rau iVakadinadina i Jiova nomu itubutubu. Ia e vagolei ira yadudua mai na susu ena dina, okati kina o iko. Na cava e cakava o Jiova mo rawa ni nona itokani voleka? E vakarautaka na ivoli, mo kua ni guilecava ya. (Roma 5:​1, 2) Ni o vakavakarau tiko ena iVakananumi, mo vakasamataka vakatitobu na ka rau cakava ena vukumu o Jiova kei Jisu. Me uqeti iko qori mo sasagataka nomu isausau tarava, me ivakaraitaki ni nomu vakavinavinakataka na ivoli e vakarautaka o Jiova.b

O IRA NA PAPITAISO

8. Era vakaraitaka vakacava na papitaiso nira vakabauta na ivoli?

⁸ Ke o sa papitaiso, o sa vakaraitaka ena levu na sala nomu vakabauta na ivoli. Kena ivakaraitaki, o sa cakava na veiveisau mo veivolekati kei Jiova, o muria tale ga nona ivakatagedegede. O muria na ivakaro i Jisu mo veivakatisaipelitaki. O yalataka nomu bula vei Jiova qai papitaiso. Vakacava o tusaqati ni o tutaka na sokalou dina? (2 Tim. 3:12) Nomu vosota ena yalodina, e vakaraitaka nomu lomani Jiova kei na nomu vakavinavinakataka na ivoli.​—Iper. 12:​2, 3.

9. Na cava mera qarauna na lotu vaKarisito papitaiso?

⁹ Nida sa papitaiso, e bibi meda qaqarauni. Ni toso na gauna e rawa nida guilecava na ivoli. E rawa vakacava? Dikeva nodra ivakaraitaki na lotu vaKarisito e Efeso ena imatai ni senitiuri. Ni sa vakaturi o Jisu, e vakavinavinakataka nodra vosota. Ia e tukuna vei ira: “Qo na ka au sega ni taleitaka vei iko, ni sa sega vei iko na loloma me vaka e liu.” (Vkta. 2:​3, 4) E kilai ena ka e tukuna o Jisu ni rawa ni luluqa nona sokalou na lotu vaKarisito ni toso na gauna. E rawa ni masu tiko, lai soqoni, lai vunau, ia sa caka tu ga me rawa. Sa sega ni uqeti koya nona lomani Jiova. Cava mo cakava ke o kila ni o sa sega ni lomani Jiova vakalevu me vaka e liu?

10. Na cava mo cakava mo “vakasamataka [kina] vakabibi” na nomu sokalou me “tara sara na lomamu”? (1 Timoci 4:​13, 15)

¹⁰ E tukuna na yapositolo o Paula vei Timoci me “vakasamataka vakabibi” na nona sokalou, me “tara sara na [lomana].” (Wilika 1 Timoci 4:​13, 15.) Mo vakasamataka tale ga na sala mo vakavinakataka kina nomu sokalou, mo rawa ni ‘uqeti [tiko] ga ena yalo tabu.’ (Roma 12:11; raica na study note ni “Be aglow with the spirit.”) Kena ivakaraitaki, de dua mo vakavakarau vinaka ena soqoni mo rawa ni vakarorogo vinaka. Se rawa ni yaga vakalevu nomu vuli vakataki iko, ni o lako ena dua na vanua vakanomodi mo rawa ni vakasamataka kina vakatitobu na ka o vulica. Me vaka ga nomu utura tiko na buka me caudre tiko ga, nomu muria tale ga eso na vakatutu qori ena uqeti iko mo vakavinavinakataka na ka e vakarautaka o Jiova, okati kina na ivoli. Ni vo tale ga e vica na macawa me caka na iVakananumi, e vinaka mo vakasamataka na ka o marautaka ni o iVakadinadina i Jiova. Ni o cakava qori, o na vakavinavinakataka vakalevu na ivoli, na yavu ni nomu veitokani voleka kei Jiova.

11-12. Ke o sa sega ni gumatua, kena ibalebale qori ni sa sega vei iko na yalo tabu? Vakamacalataka. (Raica tale ga na iyaloyalo.)

¹¹ Ke o vakila ena so na gauna ni o sa sega ni gumatuataka na sokalou dina me vaka e liu, kua ni yalolailai se nanuma ni sa sega vei iko na yalo tabu. Nanuma na ka e vola na yapositolo o Paula vei ira e Korinica me baleta nona cakacaka vakaitalatala: “Keu cakava ena voraki, au se vakayacora tiko ga na itavi e nuitaki vei au.” (1 Kor. 9:17) Cava eda vulica vua?

¹² Eso na gauna e voraki o Paula me lai vunau. Ia e sasaga tiko ga me vunau ni sega mada ga ni vu mai lomana. Mo cakava tale ga qori. Mo gumatua ni cakava na ka dodonu ke sega mada ga ni vu mai lomamu. Mo masulaka gona ‘mo kua ni vinakata wale ga, ia me tiko tale ga vei iko na kaukaua mo cakava sara ga.’ (Fpai. 2:13) Mo cakava tiko ga nomu ituvatuva vakayalo. Mo nuidei ni ka o cakava tiko qori ena uqeti iko mo lomani Jiova tale vakalevu.

13. Eda na dikevi keda tiko ga vakacava ke da “tudei tiko ena vakabauta”?

¹³ Eso na gauna e vinaka meda dikevi keda, ke da sa muria tiko na ivakasala ena 2 Korinica 13:5: “Ni dikevi kemuni tiko ga se oni tudei tiko ena vakabauta se sega, ni dau vakadeitaka se o cei dina o kemuni.” Kena ivakaraitaki, meda taroga: ‘E laurai ena noqu bula niu vakaliuca tiko na ka e vauca na Matanitu ni Kalou?’ (Maciu 6:33) ‘E laurai ena ka ni veivakamarautaki au digia niu cata na ka ca?’ (Same 97:10) ‘Au dau uqeta na veiyaloni kei na duavata ena ivavakoso?’ (Efeso 4:​2, 3) Na iVakananumi e gauna vinaka meda vakasamataka kina vakatitobu na iloloma i Jiova na ivoli, meda dikevi keda, meda vakadeitaka tale ga nida bula tiko ena vuku i Karisito, sega ni vukuda ga.c

O IRA NA SIPI ERA LAKO SESE

14. Na cava e rairai vakavuna nodra lako sese eso na lotu vaKarisito?

¹⁴ Eso na tacida era sa sega ni lako mai na soqoni ni oti e vica na vula se vica vata na yabaki nodra veiqaravi tu ena yalodina. Na vuna? Eso e bikai ira na “lomaocaocataki ni bula.” (Luke 21:34) Eso tale era tarabe ena ka era tukuna se cakava na tacida. (Jeme. 3:2) Eso tale era cakava na cala bibi ra qai madua ni kere veivuke. Na cava mo cakava ke o sa lako sese tu? Me uqeti iko vakacava na iloloma i Jiova na ivoli?

15. E vakaraitaka vakacava o Jiova ni kauaitaki ira na sipi era lako sese tu? (Isikeli 34:​11, 12, 16)

¹⁵ Vakasamataka mada na rai nei Jiova me baleti ira na lako sese tu. E sega ni cati ira. Ia e vaqarai ira na sipi era sa yali tu. E vakani ira, e vukei ira tale ga mera lesu vua. (Wilika Isikeli 34:​11, 12, 16.) Vakacava e rawa ni cakava tale ga qori o Jiova vei iko? Io! Nomu wilika na ulutaga qo e vakaraitaka ni o sasaga tiko mo cakava na ka dodonu. E raica o Jiova na lomamu qai vagolei iko mai na dina, de dua e kena gauna tale ga qo me vagolei iko lesu mai.

16. Era na vukei vakacava na sipi era yali tu mera lesu vei Jiova? (Raica tale ga na iyaloyalo.)

¹⁶ Rogoca mada na vosa ni veivakayaloqaqataki e tukuni ena brochure Mo Lesu Vei Jiova: “Mo kila tiko ni na tokoni iko o Jiova ni o lesu vua. Ena vukei iko mo vosota nomu nuiqawaqawa, me oti nomu yalolailai, me vakacegu nomu vakasama kei na lomamu ni savasava nomu lewaeloma. O na rawa ni uqeti tale mo qaravi Jiova kei ira na tacimu.” Mo nanuma tale ga nira vinakata tu na qase ni ivavakoso mera vukei iko. Era “vaka na ivunivuni mai na cagi, na ivakaruru mai na uca bi.” (Aisea 32:2) Ke o vakavinavinakataka na ivoli, mo taroga, ‘Cava meu cakava ena gauna qo meu “veivosaki vakadodonu” kei Jiova?’ (Aisea 1:18; 1 Pita 2:25) Kena ivakaraitaki, o rawa ni lai soqoni ena Vale ni Soqoni? O rawa ni raica e dua na qase ni ivavakoso mo vukei vakayalo, de dua mo vulica tale na iVolatabu? Mo nuidei ni na vakalougatataka o Jiova nomu sasaga mo vakavinavinakataka na ivoli i Luvena.

CAVA O NA CAKAVA?

17-18. Eda na vakayagataka vinaka vakacava noda gauna ni bera na iVakananumi ena yabaki qo?

¹⁷ E tukuna o Jisu ni vakarautaki na ivoli “mera kua ni rusa kina o ira kece na vakaraitaka nodra vakabauti koya, mera rawata ga na bula tawamudu.” (Joni 3:16) E vakarautaka o Jiova na ivoli me sereki keda mai na ivalavala ca kei na mate. Meda kua sara ni guilecava qori. (Roma 3:​23, 24; 2 Kor. 6:1) Ni vo e vica na siga me caka na iVakananumi, mo vakasamataka vakatitobu na nodrau loloma o Jiova kei Jisu, me uqeti keda tale ga na loloma qori meda vakavinavinakataka na ka rau cakava ena vukuda.

¹⁸ O na vakaraitaka vakacava nomu vakavinavinakataka na ivoli? Ena duidui na ka eda tukuna. Ia mo nuidei ni na vakalougatataka o Jiova nomu sasaga kei na vica vata na milioni na tacida era ‘sega ni bula ena vukudra ga, ia era bula ga ena vuku i koya e mate ena vukudra.’​—2 Kor. 5:15.