Na Cava e Kaya na iVolatabu me Baleta na iYaloyalo Vakasisila? E Cala na Vakauitukutuku Veivagarogaroi ena Internet?

Kena isau vakaivolatabu

E sega ni cavuti vakadodonu ena iVolatabu na iyaloyalo vakasisila, vakau itaba kei na itukutuku veivagarogaroi ena internet kei na so tale. Ia e vakamatatataka na iVolatabu na rai ni Kalou me baleta na ivalavala e uqeta na veiyacovi ena taudaku ni vakawati se na rai cala me baleta na veiyacovi. Dikeva mada eso na tikinivolatabu qo:

• “Moni vakamatea gona na gagadre ni veitikiniyagomuni vakavuravura, na veiyacovi tawadodonu, na ivalavala dukadukali, na garogaro vakasisila.” (Kolosa 3:5) Na iyaloyalo vakasisila ena sega ni vakamatea na gagadre ca, sa na qai vakabulabulataka ga. Ena vakavuna na nona tawasavasava se dukadukali e dua ena mata ni Kalou.

• “O koya e vakaraica tiko ga na yalewa ena nona garosa, e sa veibutakoci oti kei na yalewa ya e lomana.” (Maciu 5:​28) Na itaba se iyaloyalo e vakaraitaki kina na ivalavala tawasavasava ni veiyacovi, ena vakavurea na vakanananu ca, lai tini sara ena ivalavala dukadukali.

• “Me kua mada ga ni cavuti ena kemuni maliwa na veiyacovi tawadodonu, na ka dukadukali kece se kocokoco.” (Efeso 5:3) Meda kua ni dau veiwalitaka na veiyacovi tawadodonu, meda kua ni sarava na kena iyaloyalo se wilika na kena ivola.

• “Na vua ni itovo vakayago, na veiyacovi tawadodonu, ivalavala dukadukali, . . . kei na veika va ya. Au vakasalataki kemuni ena ka kece qo, me vaka au sa vakasalataki kemuni oti kina, ni o ira na cakava na ka kece qo era na sega ni rawata na Matanitu ni Kalou.” (Kalatia 5:​19-​21) Ena rai nei Jiova, era tawasavasava qai dukadukali o ira era sara iyaloyalo ca, veivosakitaka ena talevoni na veika veivagarogaroi, vakau itaba se itukutuku veivagarogaroi ena internet kei na mobail. Ke da sega ni muduka na veika va qori, e rawa ni tagutuvi vakadua na noda veiwekani kei na Kalou.