Marautaka Nomu Bula Vaqase

CAVA o dau vakasamataka me baleta na bula vaqase? Levu era lomaleqa, nuiqawaqawa, so tale ra sega sara ga ni rai vakanamata kina. Qori ena vuku ni rai cala me baleta na bula vaqase, ni sa dau salulu mai qai malumu na yago, yaco na guiguileca kei na tautauvimate.

E dau duidui na ka e vakilai me baleta na bula vaqase. So era sa qase era se bulabula tu ga vakayago, ra kaukaua qai tu vinaka nodra vakasama. Na wainimate tale ga era sa tu nikua e qaravi rawa kina na tauvimate bibi. Qori na vuna era bula balavu ra qai bulabula kina e levu ena veivanua eso.

Ia e levu era dau diva mera marautaka na bula vaqase, se ra mani vakila kina na leqa se sega. Rawati vakacava qori? De dua ena vakatau ena itovo ni rai, yalorawarawa kei na kena sagai me vakamatauni na bula vaqase. Dikeva mada qo eso na ivakavuvuli vakaivolatabu yaga.

YALOMALUMALUMU: “Era vuku na yalomalumalumu.” (Vosa Vakaibalebale 11:2) Ena ikotokoto qo, o ira na “yalomalumalumu” e rawa ni vakaibalebaletaki vei ira na itabaqase era kila ni sa vakaiyalayala ga na ka era rawa ni cakava, ra qai vakamatauni ira ena bula vaqase. Kaya kina o Charles, e yabaki 93 mai Brazil: “Ke o bula balavu, macala ga ni o na qase mai. O na sega ni gone tale.”

Na yalomalumalumu tale ga ena sega kina ni va qo nomu rai “au sa qase, sa sega tale na ka au rawa ni cakava.” Na rai cala qori e rawa ga ni veivakayalolailaitaki. E kaya na Vosa Vakaibalebale 24:10: “Ke o yalolailai ena siga ni rarawa, ena lailai na nomu kaukaua.” Ia o koya e yalomalumalumu ena yalomatua, ena solia nona vinaka kece ena ituvaki e sotava.

E kaya o Corrado, e dua na turaga dau rai vakayalomatua, e yabaki 77 mai Itali: “E vaka ga nomu draiva cake tiko ena baba o qai veisau qia mo kua ni suka i muri.” Io e vinakati na veisau ni dua e sa itabaqase. Rau tuvanaka vinaka o Corrado kei watina me veiraurau na ka rau cakava e vale, me rau kua ni ogaoga vakalevu de rau oca tale ni sa cava e dua na siga. Kila tale ga o Marian, e yabaki 81, mai Brazil, na iyalayala ni ka e rawa ni cakava, e kaya. “Au saga meu wasea na ka au cakava. Ke vinakati meu cegu, au na cegu. Au na dabe se davo meu wilivola se vakarogo sere tu ga. Au kila na iyalayala ni ka au rawa ni cakava.”

VEIRAURAU NA KA O CAKAVA: “Mera dara na yalewa na isulu veiganiti, e rakorako, me laurai kina na yalomatua.” (1 Timoci 2:9) Na matavosa “isulu veiganiti” e kena ibalebale me veiraurau, me isulusulu vinaka. Kaya o Barbara, e yabaki 74 mai Kenada: “Au dau saga me savasava na kequ irairai, me rakorako tale ga. Au sega ni vinakata meu rairai qase, vaka me tiko vei au na rai ‘niu sa qase, cava meu kauaitaka kina na kequ irairai.’” E kaya o Fern, e yabaki 91, mai Brazil: “Tu tu yadua au qai volia eso na isulu vou, meu bau marau tu kina.” Ia vakacava o ira na itabaqase tagane? Kaya o Antônio, e yabaki 73 mai Brazil. “Au dau saga me rakorako na kequ irairai, me savasava na noqu isulu qai vou.” Me baleta na bula savasava, e tomana: “Au sili e veisiga, au toro tale ga.”

Mo kua ni kauaitaka tale vakalevu na kemu irairai mo sa lai sega kina ni vakatulewa ‘vakayalomatua.’ E kauaitaka na nona isulusulu o Bok-im, e dua na marama yabaki 69, mai na Ceva kei Korea, e kaya: “Au kila ni sega ni veiganiti eso na isulu au dau dara niu se gone.”

ME DONU NOMU RAI: “E ca na nona siga kece o koya e vakaloloma tu, ia o koya e marau na lomana e kana magiti tiko ga.” (Vosa Vakaibalebale 15:15) Gauna o sa qase tiko kina, rawa ni vakayalolailaitaki iko ni o nanuma lesu na gauna vakaitabagone kei na levu ni ka o rawa ni cakava. Ena yaco ga qori, ia saga me kua ni rawai iko. Nomu dau vakasamataka na veigauna sa sivi ena vakavuna nomu yalolailai, o sega kina ni via vakaitavi ena ka o se cakava rawa tiko. E donu na rai i Joseph, e yabaki 79 mai Kenada: “Au saga meu marautaka na ka au se rawa ni cakava, au sega ni nanuma lesu tale tiko na ka au dau cakava tu, ia sa dredre na gauna qo.”

Na vuli kei na wilivola e rawa ni vukei iko me donu tiko ga nomu rai, levu tale na ka o na kila. Ke o rawa ni wilivola se vulica eso na ka, vakayagataka vinaka na gauna qori. Dau lako o Ernesto, e yabaki 74 mai na Yatu Filipaini ena vale ni wili vola me wilika kina eso na ivola vou. E kaya, “Au se taleitaka tiko ga meu kila e levu na ka ena noqu dau wilivola, niu rawa ni marautaka kina na ka era vakila tale ga o ira na gade tu e veivanua.” Dua na cakacaka levu e saga me cakava o Lennart, e yabaki 75, mai Suwiteni, oya me vulica e dua tale na vosa vou.

DAU LOMASAVU: “Moni dau soli ka, ena qai soli vei kemuni.” (Luke 6:38) Saga mo dau vakayagataka nomu gauna vei ira eso, wasea tale ga na ka e tu vei iko. O na lomavakacegu, o marau kina. Dau saga e dua na marama o Hosa, sa yabaki 85 mai Brazil, me vukei ira eso tale, ia e vakaiyalayala na ka e rawa ni cakava. E kaya: “Au dau qiriti ira na noqu itokani era tauvimate se yalolailai, au volavola tale ga vei ira. So na gauna au dau vakau iloloma ga. Au dau vakasaqa tale ga se caka ivakalomavinaka vei ira na tauvimate.”

E rawa ni uqeti ira tale eso na noda lomasavu. E kaya o Jan, e yabaki 66 mai Suwiteni: “Ni o dau loloma, o na lomani tale ga.” Ena taleitaki vakalevu o koya e dau lomasavu.

DAU VEIKAUAITAKI “Na tamata e tawasei koya e qara ga na ka e baleti koya, e saqata na vuku kece.” (Vosa Vakaibalebale 18:1) So na gauna o na dau via tiko taudua ga, ia mo kua ni tawasei iko vakadua mai vei ira na kena vo. Dau taleitaka nona veimaliwai e dua na turaga o Innocent, e yabaki 72 mai Nigeria, e kaya. “Au taleitaka na veimaliwai kei ira na duidui na yabaki ni nodra bula.” Kaya e dua na turaga o Börje, e yabaki 85, mai Suwiteni: “Au dau saga meu maliwai ira na itabagone. E vakayaloqaqataki au niu raica nodra bulabula kei na nodra kaukaua, e vaka ga meu gone tale.” De dua o rawa ni sureti ira nomu itokani ena so na gauna. Kaya e dua na turaga ni Ceva kei Korea o Han-sik, e yabaki 72: “Keirau dau saga vakaveiwatini me keirau sureti ira na duidui nodra yabaki ni bula—ira na itabaqase kei na itabagone—me keimami veilasamaki se vakayakavi vata.”

E rawarawa na veivosaki kei ira na dau veikauaitaki. Era na sega ni vosa tu ga, era na dau vakarorogo tale ga. Saga mo dau kauaitaka nodra rai eso tale. Kaya e dua na marama mai Mozambique o Helena, e yabaki 71: “Au dau veikauaitaki, au veidokai tale ga. Au dau vakarogoca na ka era kaya meu kila kina na nodra rai kei na ka era vinakata.” Kaya e dua na turaga mai Brazil o José, e yabaki 73: “Dau taleitaki na veimaliwai kei ira era dau vakarorogo, era veikauaitaki, era yalololoma, se ra veivakacaucautaki ena gauna veiganiti, ra dau veiwali tale ga.”

Ni o vakaraitaka na lomamu, qarauna me ‘vakamasima na nomu vosa.’ (Kolosa 4:6) Dau veinanumi qai veiuqeti.

DAU VAKAVINAVINAKA: “Dau vakavinavinaka.” (Kolosa 3:15) Dau vakavinavinaka ni o vukei. Ena vinaka na ivakarau ni nomu veimaliwai ke o dau vakavinavinaka. E kaya e dua na marama mai Kenada o Marie-Paule, e yabaki 74: “Keirau se qai toki wale tiko ga qo vakaveiwatini mai na dua na vale levu ina dua e rauti keirau ga. Levu sara neirau itokani era mai veivuke. Sega na vosa e vakamacalataki rawa kina na levu ni neirau vakavinavinaka. Keirau vakau ivola ni vakavinavinaka vei ira, ra sureti tale ga eso mera mai kana.” Vakavinavinakataka tale ga e dua na marama ni Ceva kei Korea o Jae-won, e yabaki 76, nona dau talaci ena Vale ni Soqoni. E kaya: “Au dau vakavinavinaka vakalevu ena noqu dau nanumi va qori, au vinakata sara ga meu solia e dua na sede lailai me veivuke ena isau ni waiwai. So na gauna au dau vakarautaka eso na iloloma lalai kei na ivola ni vakavinavinaka.”

Bibi sara nomu vakavinavinakataka nomu bula. E kaya na tui vuku o Solomoni meda nanuma tiko qo: “Ni vinaka sara na koli bula mai na laione mate.” (Dauvunau 9:4) Macala gona ke o dau yalorawarawa, o saga tale ga mo vakamatauni iko ena bula vaqase, o na rawa ni marautaka nomu bula.