Ra Taroga na iTabagone
Na Cava na Ka au Kilai Tani Kina?
A raica o Tevita ni gole tiko mai o Mala, e lomaleqataka na ka ena cakava. E tukuna sara o Mala: “Te, tovolea mada qo!” Qori sara ga na ka a nanuma tiko o Tevita, e taura tu o Mala e dua na itibi mariwana. A sega ni via taura o Tevita na itibi, e sega tale ga ni vinakata me nanumi ni tamata rerere. Mani tukuna vakamalua: “Qai dua tale na gauna.”
A raica o Rosi ni gole tiko mai o Mala, a vakasamataka rawa na ka me tukuna me baleta na ka ena vakarau yaco. E tukuna o Mala: “Rosi, tovolea mada qo!” E donu sara ga na ka a nanuma o Rosi, e taura tu o Mala na itibi mariwana. E tukuna yani vakadodonu o Rosi. “Sega! Au sega ni vinakata meu tauvimate. Mala, au nanuma ga ni o vuku mo kila na ca ni kana mariwana!”
ENA ituvaki ruarua qori, a rawa vakacava me doudou o Rosi me vorata na veitemaki? Qori na ka e kilai tani kina. Nanuma tiko, qo e sega ni ivakatakilakila eda dau tokara, e dau laurai kina na keda itaba se yacada. Qo na ka eda vakabauta kei na ka eda tutaka. Ke tu vei iko qori, o na doudou ni vorata na veitemaki, era na sega ni lewai iko kina eso tale. Ia o na doudou vakacava? Ni bera qori, meda sauma mada eso na taro qo.
1 NA CAVA ESO NA KA AU RAWA NI CAKAVA?
Vuna mo kila kina: O na doudou ke o kila ni tiko eso na ka vinaka o rawa ni cakava, kei na nomu kila tale ga ni tiko eso na nomu itovo vinaka.
Nanuma: E tiko kece na noda taledi. Kena ivakaraitaki, eso era kenadau ena droini se ivakatagi, eso tale era dauqito. E dua na yalewa, o Rusila e kenadau ena ripeataki ni motoka.a E tukuna: “Niu se yabaki 15, au vinakata meu mekeniki.”
iVakaraitaki vakaivolatabu: E vola na yapositolo o Paula: “Keu sega mada ga ni madila ena vosa, ia e duatani sara na ka au kila, oni na raica qo ena ka kece keitou cakava.” (2 Korinica 11:6) A doudou tiko ga o Paula nira tusaqati koya eso tale, baleta ni kila vinaka na iVolatabu. A sega tale ga ni vakayalolailaitaki koya na ka era tukuna.—2 Korinica 10:10; 11:5.
Dikeva na kemu ituvaki. Vola e ra e dua na ka vinaka se taledi e tu vei iko.
․․․․․
Vola e dua na itovo vinaka e tu vei iko. (Kena ivakaraitaki, vakacava o dau veinanumi? yalololoma? nuitaki? cakava na ka ena kena gauna, o sega ni dau bera?)
․․․․․
“Au dau kauaitaki ira eso tale. Ke via raici au e dua, dina niu osooso au na biuta na ka au cakava tiko meu rogoci koya.”—Brianne.
Ke o sega ni raica e dua na itovo o vinaka kina, vakasamataka e dua na ka o sa rawa ni cakava ni laurai vata kei na gauna o se gone kina, mo vola qori e ra.—Kena ivakaraitaki, raica na kato “Na ka era Tukuna na Nomu iCaba.”
․․․․․
2 NA CAVA NA NOQU MALUMALUMU?
Vuna mo kila kina: Ke lewai iko na nomu malumalumu, ena vakaleqa sara ga na ka o kilai tani kina.
Nanuma: Eda ivalavala ca kece. (Roma 3:23) E tiko kece vei keda eso na itovo eda via veisautaka. A taroga e dua na goneyalewa o Seija: “Na cava meu rarawataka kina eso wale ga na ka lalai? Au sega ni dau lewai au sara ga vakavinaka ni yaco na ituvaki qori!”
iVakaraitaki vakaivolatabu: A kila vinaka o Paula ni tiko na nona malumalumu. E vola: “E vu dina mai lomaqu noqu marautaka na lawa ni Kalou, au qai raica ni dua tale na lawa e tiko ena veitikiniyagoqu e veivala tiko kei na lawa ni noqu vakasama qai vakabobulataki au ina lawa ni ivalavala ca e tiko ena veitikiniyagoqu.”—Roma 7:22, 23.
Dikevi na kemu ituvaki. Na malumalumu cava o na via vakavinakataka?
․․․․․
“Au dau raica ni gauna kece au sarava oti kina e dua na iyaloyalo ni veidomoni, au dau galili sara ga qai vinakata meu qara e dua na kequ isa. Au sa qarauna sara ga meu kua ni sarava na iyaloyalo va oya.”—Bridget.
3 NA CAVA NOQU ISAUSAU?
Vuna mo kila kina: Ni tiko na nomu isausau, ena vakainaki na nomu bula. O na sega ni veimaliwai kei ira eso tale, se sotava na ituvaki ena vakadredretaka mo sauva kina na ka o vinakata.
Nanuma: Ni o vodo ena taxi, vakacava o na tukuna vei draiva me wavokita tiko ga e dua na vanua me yacova ni sa maca na waiwai? E ka vakalialia dina qori—qai vakalusi ilavo! Ke tiko na nomu isausau ena vakainaki na nomu bula, ena sega ni vakaveitalia na nomu bula. O na kila na vanua o gole tiko kina kei na ka mo cakava mo rawata kina.
iVakaraitaki vakaivolatabu: E vola o Paula: “Ena noqu ivakarau ni cici, au sega ni cici tu vakaveitalia.” (1 Korinica 9:26) A sega ni vakalaiva o Paula me veilecayaki na nona bula, ia e navuca na nona isausau qai saga me tadolovi ira.—Filipai 3:12-14.
Dikeva na kemu ituvaki. Vola e tolu na isausau o na via sauva ena yabaki mai qo.
1 ․․․․․
2 ․․․․․
3 ․․․․․
Mai na isausau o vola e cake, digia e dua e bibi duadua vei iko, mo vola tale ga na ka mo cakava mo rawata kina.
․․․․․
“Ena veilecayaki tu na noqu bula, ke sega niu vakaogai au. E vinaka me tiko na noqu isausau, au qai saga meu sauva.”—José.
4 NA CAVA NA KA AU DAU TUTAKA?
Vuna mo kila kina: Ke sega ni o tutaka na ka o vakabauta, ena sega ni dei na nomu vakatulewa. Qarauna mo kua ni vaka na moko na chameleon e dau veiveisau na kena roka, me kua tale ga ni veiveisau na nomu ivakarau me ganiti ira na nomu icaba—e vakaraitaka qori ni sega ni tiko na ka o kilai tani kina.
Nanuma: Na iVolatabu e uqeti ira na lotu vaKarisito mera ‘vakadinata ni vinaka na inaki ni Kalou, e totoka, qai uasivi.’ (Roma 12:2) Ke laurai ena ka o cakava ni o dei ena nomu vakabauta, o sa tutaka sara tiko ga na ka o vakabauta, veitalia na ka era tukuna vei iko eso tale.
iVakaraitaki vakaivolatabu: Ni se itabagone na parofita o Taniela, a “lewa oti e lomana” me muria na Lawa ni Kalou, dina ni yawa na nona vuvale kei ira na dauveiqaravi i Jiova. (Taniela 1:8) Ena nona cakava qori, e dei ena ka e vakabauta. Io, e tutaka o Taniela na nona vakabauta.
Dikeva na kemu ituvaki. Na cava eso na ka o tutaka? Kena ivakaraitaki:
● O vakabauta ni bula dina tiko na Kalou? Ke vaka kina, na cava na vuna? Na ivakadinadina cava e vakavuna mo vakabauta ni bula dina tiko na Kalou?
● O vakabauta ni yaga vei iko na ivakatagedegede savasava ni Kalou? Ke vaka kina, na cava na vuna? Kena ivakaraitaki, na cava o vakabauta kina ni nomu muria na lawa i Jiova me baleta na veiyacovi ena vakamarautaki iko vakalevu mai na nomu muria na nodra “ivakarau” na nomu icaba?
Qori e sega ni taro me saumi totolo. Mo vakasamataka tale ga vakavinaka na vuna e va kina qori na nomu isaunitaro. Ena nomu cakava qori, o na rawa ni tutaka vinaka kina na ka o vakabauta.—Vosa Vakaibalebale 14:15; 1 Pita 3:15.
“E koronivuli era na vakalialiai iko na gone ke o sega ni dei ena ka o vakabauta, au sega ni vinakata meu lomalomaruataka na noqu vakabauta. Qo na ka au dau cakava, au sega ni tukuna ‘au sega ni cakava qori baleta ni vakatabuya na noqu lotu.’ Au tukuna ga ‘au nanuma ni sega ni dodonu me caka qori.’ Qori sara ga na noqu vakabauta.” —Danielle.
Vakacava o na vinakata mo vaka e dua na draunikau e cagina e veigauna ni liwava na cagi, se dua na vunikau kaukaua e dei ni laba na cagi? Mo saga me dei na ka o kilai tani kina, o na qai vaka na vunikau oya. Qori ena vukei iko mo sauma na taro, Na cava na ka au kilai tani kina?
E levu na ulutaga mai na “Ra Taroga na iTabagone” e kune ena Web site www.watchtower.org/ype
[iVakamacala e ra]
a Eso na yaca ena ulutaga qo sa veisau.
[Kato/iYaloyalo ena tabana e 27]
NA KA ERA TUKUNA NA NOMU ICABA
“Niu sa qase cake, au vulica meu dau raica kece na yasana niu vakatulewataka eso na ka, se mani levu se lalai. Au saga tale ga meu kua ni cakava na ka ena vakacudrui Jiova.”
“Niu se gone, au nanuma nira tamata veicalati o ira e sega ni tautauvata na neimami rai. Ia au sa qai kila qo ni duidui ga na noda rai, au dau marautaka kina meu kila na nodra nanuma eso tale.”
[iYaloyalo]
Jeremiah
Jennifer
[Kato ena tabana e 28]
TAROGI RAU NA NOMU ITUBUTUBU
Na cava eso na taledi drau raica vei au? Na cava eso na itovo drau nanuma meu vakavinakataka? Na cava drau cakava me dei kina na nomudrau vakabauta na ivakatagedegede i Jiova?
[Droini ena tabana e 26]
(Raica tale na ivola)
NA KA AU RAWA NI CAKAVA
MALUMALUMU
ISAUSAU
TUTAKA NA KA O VAKABAUTA
[iYaloyalo ena tabana 28]
Ni o dei ena ka o kilai tani kina, o na vaka na vunikau kaukaua e dei ni laba na cagi