Ni o dei ena ka o kilai tani kina, o na sega ni bale ni laba na cagi
VEI IRA NA ITABAGONE
9 Ka o Kilai Kina
CAVA E OKATI KINA?
E sega wale ga ni okati ena ka o kilai tani kina na yacamu kei na kemu irairai. E okati tale ga kina na nomu itovo, ka o vakabauta, kei na nomu ivakarau. Io, na ka kece sara ga me baleti iko, nomu itovo, kei na ivakarau ni lomamu e rawa ni tukuni ni ka o kilai tani kina.
VUNA MO KAUAI KINA
Ni o kauaitaka na ka o kilai tani kina, ena dei nomu vakabauta, era na sega tale ga ni lewai iko na nomu itokani.
“E levu era vaka na matakau era vakaraitaki tu ena sitoa. Era sega ni digia na isulu era dara, e dua tale e cakava qori.”—Adrian.
“Au saga meu cakava na ka e dodonu ke dredre mada ga ena so na gauna. Na ka era cakava noqu itokani kei na ka au cakava ni keimami dau veimaliwai, au rawa ni kila kina se o cei e noqu itokani dina.” —Courtney.
IVAKAVUVULI VAKAIVOLATABU: “Kua ni muria na ivakarau ni veika vakavuravura qo, me veisautaki na nomuni itovo ni vakavoui na nomuni vakasama.”—Roma 12:2.
KA O RAWA NI CAKAVA
Dikeva na ka o vinaka kina, nomu malumalumu, kei na ka o vakabauta. Qori ena vukei iko mo kila se o tamata vakacava, kei na ka o vinakata mo kilai tani kina. Ena rairai vinaka mo vakasamataka e vica na taro qo.
Ka au rawa ni cakava: Na taledi kei na kila cava e tu vei au? Na cava eso na ka au kenadau kina? (Kena ivakaraitaki: Au dau cakava na ka ena kena gauna? lewai au vinaka? mamakutu? lomasoli?) Na ka vinaka cava au dau cakava?
VAKATUTU: Ke dredre mo vakasamataka e dua na ka vinaka o cakava se tukuna, tarogi rau nomu itubutubu se dua nomu itokani nuitaki ena ka ratou taleitaka me baleti iko kei na vuna ratou taleitaka kina.
IVAKAVUVULI VAKAIVOLATABU: “Me dikeva na tamata yadua na nona cakacaka, ena qai marau ga kina vakalevu, ena sega ni vakatauvatani koya kei na dua tale.”—Kalatia 6:4.
Nomu malumalumu: Na cava eso na itovo meu vakavinakataka? Gauna cava au rawa ni temaki meu cakava kina na ka ca ? Na ituvaki cava e bibi meu lewai au vinaka kina?
IVAKAVUVULI VAKAIVOLATABU: “Ke da kaya: ‘E sega noda ivalavala ca,’ eda sa vakacalai keda tiko ga.”—1 Joni 1:8.
Ka o vakabauta: Na ivakatagedegede cava au muria? Cava au muria kina? Au vakabauta na Kalou? Au vakadeitaka vakacava ni bula tiko na Kalou? Na ivakarau cava au okata me tawadodonu? Cava au okata kina me tawadodonu? Na cava au vakabauta ni na yaco ena gauna se bera mai?
IVAKAVUVULI VAKAIVOLATABU: “Ena qai taqomaki iko na raiyawa, ena viribaiti iko na yalomatua.”—Vosa Vakaibalebale 2:11.