Taqomaka na Veika Eda Kilai Tani Kina na Lotu Vakarisito

“Sa kaya ko Jiova, Sai kemudou na noqu dauvakadinadina.”​—AISEA 43:10.

1. Na tamata vakacava e vakayarayarataki ira vua o Jiova?

NI O tiko ena Kingdom Hall, veiraiyaki mada. O cei o raica ena vanua ni sokalou oqo? O na rairai raici ira beka na itabagone lomadina era vakarogoca matua tiko na ivakamacala mai na iVolatabu mera vuku kina. (Same 148:​12, 13) O na raici ira tale ga na ulunivuvale era saga tiko mera vakamarautaka na Kalou ena vuravura oqo e sega ni doka na bula vakavuvale. De o raici ira tale ga na wekada lomani era yalodina tiko ga ina nodra yalayala vei Jiova dina ga nira tautauvimate ra sa qase tale ga. (Vosa Vakaibalebale 16:31) O ira kece oqori era lomani Jiova dina. E vakayarayarataki ira mai mera veiwekani kei koya. “E sega ni rawa ni lako mai vei au e dua na tamata,” e vakadeitaka na Luve ni Kalou, “kevaka e sega ni vakayarayarataki koya mai ko Tamaqu, ko koya ka a talai au mai.”​—Joni 6:​37, 44, 65, VV.

2, 3. Na cava e ka ni bolebole kina na noda yalodina tiko ena veika eda kilai tani kina na lotu Vakarisito?

² Eda sega li ni marautaka noda tomani ira na tamata e vakadonui ira qai vakalougatataki ira o Jiova? Ia e ka ni bolebole toka ena “gauna lewalewai dredre” oqo meda yalodina tiko ina veika eda kilai tani kina na lotu Vakarisito. (2 Timoci 3:​1, NW) Vakauasivi vei ira na gone era tuberi ena vuvale lotu Vakarisito. “Dina niu dau tiko ena veisoqoni vakarisito,” e kaya e dua na itabagone, “a sega na noqu isausau vakayalo, meu tukuna tale ga vakadodonu, a sega ni tiko vei au na gagadre ni qaravi Jiova.”

³ So era saga dina mera qaravi Jiova, ia e rawa nira vagolei ira tani na nodra icaba, se na idre ni vuravura, kei na ivalavala ca. Io e rawa nida vakayalia na veika eda kilai tani kina na lotu Vakarisito ke da saqati. Me kena ivakaraitaki, e levu era kaya ni sa madra na itovo uasivi e tukuni ena iVolatabu baleta ni sa sega ni ganita na noda gauna oqo. (1 Pita 4:4) So era kaya ni sega ni bibi na noda qarava na Kalou ena kena ivalavala e vakarota. (Joni 4:​24) E tukuna ena nona ivola vei ira mai Efeso o Paula ni vuravura oqo e tiko e dua na kena “yalo,” se na kena ivakarau. (Efeso 2:2) Na yalo oqo e dau moici keda meda vakadonuya na nodra itovo ni rai na tamata era sega ni kilai Jiova.

4. E vakabibitaka vakacava o Jisu na kena vinakati meda taqomaka na veika eda kilai tani kina na lotu Vakarisito?

⁴ Ia eda kila na sa yalataki keda vei Jiova ni ka vakaloloma me dua vei keda, se da qase se gone, meda vakayalia na veika eda kilai tani kina na lotu Vakarisito. Na veika eda kilai tani kina na lotu Vakarisito e yavutaki ga ena nona ivakatagedegede o Jiova kei na veika e namaka vei keda. Nida buli ga meda ucui koya. (Vakatekivu 1:​26; Maika 6:8) Na iVolatabu e vakatauvatana na veika eda kilai tani kina na lotu Vakarisito kei na isulu e tokari e tuba e laurai levu. Ni vakasalataki keda me baleta noda gauna, e kaya o Jisu: “Raica, au sa lako yani me vaka na daubutako! Sa kalougata ko koya sa yadra tiko, ka maroroya tiko na nona i sulu, me kakua kina ni veilakoyaki luvawale voli ka vakamaduataki e na matana levu.”a (Vakatakila 16:​15, VV) Eda sega ni vinakata meda luvata na noda itovo kei na noda ivakatagedegede vakarisito me rawa kina ni moici keda na vuravura i Setani. Ke yaco oqori, ena vaka ga eda sa luvata na ‘noda isulu.’ Eda na madua kina da qai veivutunitaka tale ga.

5, 6. Na cava e bibi kina meda kaukaua tiko vakayalo?

⁵ E dodonu me lewa na ivakarau ni noda bula na veika eda kilai tani kina na lotu Vakarisito. Baleta? Ke sega ni dei ina veika e kilai tani kina e dua e qaravi Jiova, ena rawa ni vakamuai cala, qai rawa ni buawa tale vua na nona isausau. E veivakaroti na iVolatabu me baleta na ivakarau yamekemeke vaka oya. “Ko koya sa vakatitiqa,” e kaya na tisaipeli o Jemesa, “sa vaka na ua ni waitui, sa cagina e na cagi ka veitubuyaki. Ia me kakua ni nanuma na tamata ko ya ni na rawata e dua na ka mai vua na Turaga [o Jiova]: a tamata lomalomarua, sa yamekemeke e na nonai valavala kecega.”​—Jemesa 1:​6-8; Efeso 4:​14; Iperiu 13:9.

⁶ Eda na taqomaka vakacava na veika eda kilai tani kina na lotu Vakarisito? Na cava ena vukea meda raica vakabibi tiko ga na lagilagi ni noda sokalou vua sa Cecere Sara? Yalovinaka mo vakasamataka mada e vica na sala oqo.

Vakadeitaka Vinaka na Veika o Kilai Tani Kina Mo Lotu Vakarisito

7. Na cava e yaga kina noda kerei Jiova me dikevi keda?

⁷ Vakadeitaka tiko ga na nomu veiwekani kei Jiova. Na iyau uasivi duadua e rawa ni taukena na lotu Vakarisito oya na nona veiwekani kei na Kalou. (Same 25:14; Vosa Vakaibalebale 3:​32) Ke da sa tekivu vakatitiqataka na veika eda kilai tani kina meda lotu Vakarisito, sa kena gauna oqori meda dikeva vinaka kina na ivakatagedegede kei na titobu ni veiwekani oqo. A kerea na daunisame: “Mo ni vakadikevi au, Jiova, ka vakatovolei au; vakatovolea na noqu ivi kei na yaloqu.” (Same 26:2) Na cava e bibi kina meda vakatovolei keda tiko? Baleta ni sega ni rawa meda dikeva vinaka na ka dina e tu e lomada kei na noda gagadre. O Jiova duadua ga e rawa ni dikeva na veika eda nakita, vakasamataka, kei na noda gagadre.​—Jeremaia 17:​9, 10.

8. (a) E yaga vakacava na nona vakatovolei keda o Jiova? (b) Ni o lotu Vakarisito, o sa bau vukei vakacava?

⁸ Nida kerei Jiova me dikevi keda eda sa sureti koya tiko me vakatovolei keda. E rawa ni vakatara gona me yaco e so na ka e vakaraitaka na ka dina eda gadreva voli kei na ka e tu dina e lomada. (Iperiu 4:​12, 13; Jemesa 1:​22-​25) Meda marautaka na veivakatovolei vaka oya baleta e laurai kina na titobu ni noda yalodina vei Jiova. Ena vakaraitaka tale ga se e ‘taucoko sara na noda vinaka, se vakatikina ga.’ (Jemesa 1:​2-4, VV) E rawa nida kaukaua cake vakayalo nida vakatovolei tiko.​—Efeso 4:​22-​24.

9. E vakatau beka ga vei keda na noda vakadeitaka se sega na ka dina mai na iVolatabu? Vakamacalataka.

⁹ Vakadeitaka vakataki iko na veika dina ena iVolatabu. E rawa ni luluqa na veika eda kilai tani kina na tamata i Jiova kevaka e sega ni yavutaki vinaka ena noda kila na lewe ni iVolatabu. (Filipai 1:​9, 10) E dodonu vei keda kece na lotu Vakarisito gone kei na qase meda vakadeitaka ni ka eda vakabauta e yavutaki ena iVolatabu. A uqeti ira na vakabauta vata o Paula: “Vakatovolea na ka kecega; taura matua na ka e vinaka.” (1 Cesalonaika 5:​21) Mera kila na gone era lewe ni vuvale e rerevaka na Kalou nira sega ni rawa ni vakararavi ina nodrau vakabauta na nodra itubutubu. O Tevita mada ga e uqeti Solomoni na luvena me “kila na Kalou i tamamu, ka qaravi koya e na yalo dina.” (1 Veigauna 28:​9, neitou na matanivola kala.) A sega ni vinakati ga me sarava toka na gone o Solomoni na nona vakaukauataka tiko na nona vakabauti Jiova o tamana. A vinakati me kilai Jiova sara ga vakataki koya. E qai vakayacora vaka kina. E kerea na Kalou: “Ni solia mai kivei au na vuku kei na yalomatua, me’u curu yani ka curu tale mai e matadra na tamata oqo.”​—2 Veigauna 1:​10.

10. Na cava e sega kina ni cala meda taroga na taro e donu na kena inaki?

¹⁰ E dau yavutaki na vakabauta e kaukaua ena kila ka. “Sa rawa na vakabauta e na vakarorogo,” e tukuna o Paula. (Roma 10:17) Na cava e ibalebale ni nona vosa oya? E kena ibalebale ni rawa nida vakaukauataka na noda vakabauta da qai nuitaki Jiova, nona vosa ni yalayala, kei na nona isoqosoqo, kevaka ga eda dau rogoca na Vosa ni Kalou. Nida taroga ena lomadina e so na taro, ena sauma vei keda na iVolatabu. E vakasalataki keda tale ga o Paula ena Roma 12:2: ‘Mo kila na loma ni Kalou, e yaga, vinaka, qai dodonu sara.’ Eda na rawata vakacava? Ena noda rawata “nai vakavuvuli dina.” (Taito 1:1) Ena vukei keda na yalo i Jiova meda kila na veivakavuvuli se ulutaga dredre. (1 Korinica 2:​11, 12) E dodonu gona meda masuta na Kalou ke dredre na noda kila e so na ka. (Same 119:​10, 11, 27) E vinakata o Jiova meda kila vinaka na nona Vosa, da vakabauta, da qai muria. E sureti keda o koya meda taroga na taro e donu na kena inaki.

Vakadeitaka Mo Vakamarautaka na Kalou

11. (a) Na cava eda dau vinakata ia e rawa ni coriti keda? (b) Ena rawa vakacava meda valuta na idre ni veimurimuri?

¹¹ Vakamarautaka na Kalou, sega ni tamata. Sa macala tu ga nida na dau via vakadeitaki keda ina ilawalawa eda lewena. Eda vinakata kece meda vakaitokani, eda marautaka tale ga na noda okati ina dua na ilawalawa. Ena gauna eda veisau tiko kina meda tamata uabula kei na gauna ni uabula, e dau kaukaua sara kina na noda veimurimuri meda vakataki ira se vakamarautaki ira e so. Ia o ira na itokani kei ira eda via vakamuri ira oqo era na sega ni dau nanumi keda ena veigauna. So na gauna era vinakata ga meda lai tomani ira ena cakava na veika e sega ni dodonu. (Vosa Vakaibalebale 1:​11-​19) Ni rawai e dua na lotu Vakarisito ina veimurimuri cala, e dau vakalevu me vunitaka na veika e kilai tani kina. (Same 26:4) E kaya o Paula: “Ni kakua ni vakaitovotaki kemuni e na veimataqali i tovo ni vuravura oqo.” (Roma 12:​2, VV) E dau solia vei keda o Jiova na kaukaua meda valuta kina na idre ni veimurimuri.​—Iperiu 13:6.

12. Na ivakavuvuli kei na ivakaraitaki cava e rawa ni vakaukauataki keda meda tudei ena noda vakararavi vei Jiova?

¹² Nida vakila ni voleka ni vakaleqa na veika eda kilai tani kina na lotu Vakarisito na idre mai tuba, meda nanuma dei ni bibi cake na noda yalodina vei Jiova mai na ka era nanuma na tamata se na veika era cakava e lewe vuqa. E ivakavuvuli vinaka na vosa ena Lako Yani 23:2: “Mo dou kakua ni muri ira na lewe vuqa me caka ca.” Nira vakatitiqataka e levu na nona itokani Isireli nona rawa ni vakayacora o Jiova na veika e yalataka, e sega sara ga ni muri ira na ilawalawa levu oqori o Kelepi. E qai vakalougatataki baleta ni vakabauta na veika e yalataka na Kalou. (Tiko Voli mai na Lekutu 13:30; Josua 14:​6-​11) E rawa beka mo vorata na ka era nanuma na lewe levu mo rawa kina ni taqomaka na nomu veiwekani kei na Kalou?

13. Na cava e ka vakavuku kina na noda vakatakilai keda nida lotu Vakarisito?

¹³ Vakatakila ni o lotu Vakarisito. E dau kainaki ni iyaragi vinaka duadua na isasabai vinaka. E vakilai oqori nida dei tiko ga ina veika eda kilai tani kina na lotu Vakarisito. Nira saqati ena nodra saga mera cakava na loma i Jiova ena gauna i Esera, era kaya na Isireli yalodina: “Oi keimami na nona tamata na Kalou ni lomalagi kei vuravura.” (Esera 5:​11) Kevaka e rawai keda na nodra vosavakacaca na dauveitusaqati, eda na rawa ni rere. Kevaka eda dau via vakamarautaki ira kece ga na tamata, ena leqa na veika eda cakava. Mo kua gona ni laiva mo vakarerei. E vinaka mo dau vakaraitaka vakadodonu ni o iVakadinadina i Jiova. Vakaraitaka vakamatata ena veidokai na veika o vakaliuca, nomu vakabauta, nomu lotu Vakarisito tale ga. Vakaraitaka ni o na dau muria tiko ga na ivakatagedegede cecere i Jiova me baleta na itovo savasava. Vakamatatataka ni na sega ni veisau nomu yalodina me vaka e dua na lotu Vakarisito. Vakaraitaka ni o sakitaka na ivakatagedegede ni bula savasava o bulataka tiko. (Same 64:10) Ena vakaukauataki iko ni o kilai tani mo lotu Vakarisito, ena rawa tale ga ni uqeti ira e so mera via kilai Jiova kei ira na nona tamata.

14. E dodonu beka me vakayalolailaitaki keda na veivakasewasewani kei na veitusaqati? Vakamacalataka.

¹⁴ Io, e so era na vakasewasewani iko ra qai saqati iko. (Juta 18) Kua ni yalolailai ke so era sega ni taleitaka na nomu vakamacalataka na veika o vakaliuca ena nomu bula. (Isikeli 3:​7, 8) Se mani vakacava na nomu sasaga, o na sega ni rawa ni rawati ira na sega ni via veisau. Nanumi Fero. E sega ni dua vei ira na kuita, na cakamana, se na nona mate mada ga na luvena ulumatua, me veisautaki Fero me vakabauta ni a vosa tiko ena vuku i Jiova o Mosese. Me kua gona ni vakamalumalumutaki iko na rerevaki ira na tamata. Ena vakaseavutaka na rere na vakararavi kei na vakabauta na Kalou.​—Vosa Vakaibalebale 3:​5, 6; 29:25.

Vuli ena Veika sa Yaco, Tadolova na Veika e se Bera Mai

15, 16. (a) Na cava na noda ivotavota vakayalo? (b) Ena yaga vakacava na noda vakadikeva vata kei na Vosa ni Kalou na noda ivotavota vakayalo?

¹⁵ Vakamareqeta nomu ivotavota vakayalo. Nira vakayagataka na Vosa ni Kalou, ena yaga vei ira na lotu Vakarisito mera dau vakasamataka na nodra ivotavota vakayalo. Na ivotavota oqo e okati kina na veika dina ena Vosa i Jiova, na inuinui ni bula tawamudu, kei na itavi dokai ni noda matataka na Kalou nida kacivaka na itukutuku vinaka. O rawa beka ni raica na nomu itavi ni o maliwai ira tiko na nona iVakadinadina, na ilawalawa kilai tani era lesi ina cakacaka ni veivakabulai ena kena vunautaki na Matanitu ni Kalou? Nanuma ni a kaya sara ga o Jiova: ‘Sai kemudou na noqu ivakadinadina.’​—Aisea 43:10.

¹⁶ Tarogi iko mada ena veitaro oqo: ‘E vakacava na levu ni noqu vakamareqeta na ivotavota vakayalo? Au vakamareqeta dina li me rawa kina niu vakaliuca ena noqu bula na noqu cakava na loma ni Kalou? E kaukaua beka na noqu marautaka me rawa kina ni vakaukauataki au meu vorata na veitemaki e rawa ni vakavuna na noqu vakayalia na ivotavota?’ Na noda ivotavota vakayalo tale ga e rawa ni taqomaki keda vakayalo, na veitaqomaki e kunei ga ena isoqosoqo i Jiova. (Same 91:​1, 2) Ni railesuvi na itukutuku veivakurabuitaki ni isoqosoqo i Jiova ena gauna oqo e vakaraitaka ni na sega ni dua na tamata se dua na ka e rawa ni vakawabokotaki ira na tamata i Jiova mai vuravura.​—Aisea 54:17; Jeremaia 1:​19.

17. Na cava tale e vinakati me ikuri ni noda vakararavi ga ina noda ivotavota vakayalo?

¹⁷ Ia e sega ni rawa meda vakararavi vakatabakidua ina noda ivotavota vakayalo. E dodonu vei keda yadudua meda veivolekati sara kei na Kalou. Ni oti nona cakacaka vakaukaua o Paula me vakaukauataka na nodra vakabauta na lotu Vakarisito mai Filipai, e vola vei ira: “Ia koi kemudou, ka’u sa daulomana, me vaka na nomudou talairawarawa e na veigauna sa oti, dou sa sega ni ia walega ni’u sa tiko vei kemudou, dou sa uasivi cake kina ni’u sa takali, dou kitaka vakakina na cakacaka dou sa bula sara kina e na rere kei na sautaninini.” (Filipai 2:​12) E sega ni rawa meda vakararavitaka na noda bula vua e dua tale.

18. E vakaitavi vakacava na veicakacaka vakarisito eda cakava ena noda kilai tani na lotu Vakarisito?

¹⁸ Vakaogai iko ena veicakacaka vakarisito. E kainaki ni “vakaitavi vakalevu na cakacaka ina ka eda kilai tani kina.” Era sa lesi na lotu Vakarisito nikua mera cakava na cakacaka bibi ni kena vunautaki na itukutuku vinaka ni Matanitu ni Kalou sa tauyavutaki oti. E kaya o Paula: “Ni’u sa nodrai apositolo na veimatanitu tani, au sa doka na cakacaka ka’u sa lesi kina.” (Roma 11:13) E vakaduiduitaki keda mai na vuravura na noda cakacaka vakavunau, na noda cakava na cakacaka oqo e vakaukauataka na veika eda kilai tani kina na lotu Vakarisito. Nida vakaogai keda ena veicakacaka vakarisito tale e so, me vaka na soqoni vakarisito, na tara vale ni soqoni, noda vukei ira na gadreva na veivuke, kei na veicakacaka vaka oya, oqo ena vaqaqacotaka na veika eda kilai tani kina na lotu Vakarisito.​—Kalatia 6:​9, 10; Iperiu 10:​23, 24.

E Yaga Vakaidina na Noda Kilai Tani

19, 20. (a) Ni o lotu Vakarisito, na veika yaga cava so o sa vakila? (b) E yavutaki vakacava na veika eda kilai tani kina?

¹⁹ Vakasamataka mada na veika yaga eda vakila baleta nida lotu Vakarisito dina. E kilai keda yadudua sara ga o Jiova. E kaya na parofita o Malakai: “Sa ra qai dauveivosaki vakataki ira ko ira era sa rerevaki Jiova: a sa vakarorogo ko Jiova, ka rogoca, a sa volai e dua nai vola ni veivakananumi e matana e na vukudra era rerevaki Jiova, ka vakananuma na yacana.” (Malakai 3:​16) E raici keda na Kalou me vaka e nona i tokani. (Jemesa 2:​23, VV) E torocake na ivakarau ni noda bula baleta ni sa qai vakainaki, vakaibalebale, da qai rawa ni navuca tale ga e so na isausau yaga. E soli tale ga vei keda na inuinui ni bula tawamudu.​—Same 37:9.

²⁰ Nanuma ni ka o kilai tani dina kina kei na kemu yaga e vakatau ena ivakatagedegede ni Kalou, e sega ni vakatau ena ka era nanuma na tamata me baleti iko, nira rawa ni lewai iko ena ivakatagedegede ni tamata e sega ni veiganiti. Ia e vakilai ga na noda yaga ena nona lomani keda na Kalou kei na nona kauaitaki keda sara ga, baleta ni taukeni keda. (Maciu 10:​29-​31) Na noda lomana tale ga na Kalou e rawa ni vakatakilai keda vinaka qai dusimaka vinaka tale ga na noda bula. “Kevaka e dua sa lomana na Kalou, sa kilai vua ko koya.”​—1 Korinica 8:3.

[iVakamacala e ra]

O se Nanuma Tiko?

• Na cava e bibi kina vei ira na lotu Vakarisito mera taqomaka na veika era kilai tani kina?

• Eda vakadeitaka vakacava na veika eda kilai tani kina na lotu Vakarisito?

• Ni vinakati mo vakatulewataka se o cei mo vakamarautaka, na cava ena vukei iko mo vakatulewa dodonu?

• E vakatau vakacava na veika eda kilai tani kina na lotu Vakarisito ina veika eda na qai sotava ena gauna mai muri?

[iYaloyalo ena tabana e 21]

Nida vakaogai keda ena veicakacaka vakarisito ena qaqaco na veika eda kilai tani kina