Bula Vakacegu me Duanaudolu na Yabaki—Qai Tawamudu!
“Me rawa ni ka kece ga na Kalou vei ira na tamata kece ga.”—1 KOR. 15:28.
O RAWA NI VAKAMACALATAKA?
Ena tarai iko vakacava na kena vakayacori na veitikinivolatabu qo?
1. Na veika totoka cava era na marautaka na “isoqosoqo levu”?
RAITAYALOYALOTAKA mada na veika vinaka era na vakila ena duanaudolu na yabaki o ira na vakarurugi ena veiliutaki ni dua na matanitu kaukaua, e lewadodonu qai yalololoma na kena iliuliu. Qori na veika totoka era na marautaka na “isoqosoqo levu” e sega ni yalani na kedra iwiliwili. O ira qori era na bula sivia na “veivakararawataki levu” ni sa muduki na ituvaki ca qo.—Vkta. 7:9, 14.
2. Na cava era vakila na kawatamata ena loma ni 6,000 na yabaki sa oti?
2 Sa rauta qo ni 6,000 na yabaki na nodra saga voli mai na tamata mera veiliutaki. Era vakila ga kina na kawatamata e levu na rarawa kei na leqa. Sa tukuna makawa tu mai na iVolatabu: “Sa lewa kina na tamata vua na tamata tani ka sa mani ca kina.” (Dauv. 8:9) Na cava eda raica tu nikua? E sega ni yaco ga na ivalu kei na vakaduduile, e tatara tale ga vakalevu na bula dravudravua, matedewa, vakacacani ni iyau bula, veisau ni draki kei na levu tale. Era sa veivakasalataki tiko na vakailesilesi vakamatanitu ni na yaco na leqa lelevu ke da sega ni cakava na veisau e gadrevi, da qai vakacacana tiko ga na vuravura.
3. Na cava ena yaco ena Duanaudolu na Yabaki ni Veiliutaki i Karisito?
3 Ena nona veiliutaki na Tui vakaMesaia o Jisu Karisito kei ira na 144,000 era veiliutaki vata kei koya, na Matanitu ni Kalou ena cakava vakalalai na veika e gadrevi me vakaoti kina na veika ca e vakayacori vua na kawatamata kei na vuravura. Ena Duanaudolu na Yabaki ni Veiliutaki i Karisito, ena vakayacori kina na ka sa yalataka tu o Jiova: “Raica, ka’u sa bulia na lomalagi vou kei na vuravura vou; ia ena sega ni nanumi na ka eliu, ena sega ni curu tale ki na lomamudou.” (Aisea 65:17) Na veika totoka cava e se sega ni rairai eda vakanamata kina? Nida raica na parofisai vakaivolatabu, eda rawa ni kila toka kina na veika totoka “e sega ni rairai.”—2 Kor. 4:18.
‘ERA NA TARA VALE RA QAI TEA NA WERENIVAINI’
4. E vakacava tu na ituvaki ni veivakavaletaki nikua?
4 Eda vinakata kece me dua na noda vale, meda tiko welewelei kina vakavuvale, meda kua tale ga ni bula rerere. Ia e vakilai vakalevu nikua na leqa ni veivakavaletaki. E levu era vakaitikotiko ena siti sa levu tu mada ga kina na tamata. E levu era vakaitikotiko ena taudaku ni korolelevu ena vale e tara ga me rawa, se vica vata na vuvale era tiko ena dua ga na vale. Era tadra wale tu ga me dua na nodra vale.
5, 6. (a) Ena vakayacori vakacava na ka e tukuni ena Aisea 65:21 kei na Maika 4:4? (b) Na cava meda cakava meda marautaka kina na veika totoka qori?
5 Ena yaco na nodra tatadra na lewenivanua me dua na nodra vale ena veiliutaki ni Matanitu ni Kalou. A parofisaitaka qori o Aisea: “A ra na tara vale, ka tiko kina; era na tea eso na were-ni-vaini, ka kania na vuana.” (Aisea 65:21) Era na sega ni vakanamata wale ga me dua na nodra vale, baleta ni so mada ga nikua e tiko na nodra vale, eso tale era vakavale lelevu. Ia era dau leqataka ni rawa nira vagalala mai na vale qori ni sotavi na leqa vakailavo se nira basuvale na daubutako. Sa na veisau kece qori ni sa veiliutaki na Matanitu ni Kalou! A vola na parofita o Maika: “A ra na dui tiko ga na tamata yadua e na ruku ni nona vaini, kei na ruku ni nona lolo; ka sega e dua me na vakarerei ira.”—Maika 4:4.
6 Me rawa nida marautaka na veika totoka qori, na cava meda cakava? E macala ga nida vinakata kece me dua na noda vale vinaka. Ia meda kua ni saga meda rawata sara na vale eda tatadrataka tu nikua da qai dinau levu tu. E ka vakayalomatua meda vakasamataka tiko ga na yalayala i Jiova. Nanuma na ka e tukuna o Jisu me baleti koya: “Era vaqara na fokisi, era vakasova na manumanuvuka, ia na Luve ni tamata e sega na vanua me kotora kina na uluna.” (Luke 9:58) A rawa ni tara se volia o Jisu na vale vinaka duadua ena gauna oya. Na cava ga a sega ni cakava kina? A sega ni vinakata o Jisu e dua na ka me vakawelei koya se me vakataotaka na nona vakaliuca na Matanitu ni Kalou. Vakacava, eda rawa ni muria na nona ivakaraitaki me rawarawa tale ga na matada meda kua kina ni coriti ena domodomoiyau kei na nuiqawaqawa?—Maciu 6:33, 34.
‘NA WOLIFA KEI NA LAMI ERAU NA KANA VATA’
7. Na cava na inaki i Jiova me baleti keda kei na manumanu?
7 Ena gauna e bulibuli kina o Jiova, na iotioti ni nona ibulibuli na tamata. A tukuna o Jiova na nona inaki vua na nona Matai Daucakacaka, na Luvena ulumatua: ‘Me daru bulia na tamata me itovo vata kei kedaru, me ucui kedaru; mera lewa na ika na veiwasawasa, kei na manumanu vuka, kei na manumanu e yavai va, kei vuravura taucoko, kei na ka kece ga sa qasi voli e dela i vuravura.’ (Vkte. 1:26) E vakarota gona na Kalou vei Atama kei Ivi me rau lewai ira na manumanu, ni toso na gauna mera cakava tale ga qori na kawatamata kece.
8. Na cava e dikevi me baleta na nodra ivakarau na manumanu nikua?
8 Vakacava e rawa nida lewai ira na manumanu, meda veiyaloni tale ga kei ira? E levu era dau veivolekati kei na nodra manumanu ni vale, me vaka na koli kei na pusi. Ia vakacava na manumanu kila? E tukuni ena dua na ivolatukutuku: “Nira gole na saenitisi mera lai vakadidike ena vanua era tu kina na manumanu kila, era raica nira dau marau ra qai veinanumi na manumanu kece e vakasucuna.” Eda kila nira dau taqaya qai cudru na manumanu ena gauna era vakasagai kina, ia vakacava e rawa nira dauloloma? E tomana na ivolatukutuku ya: “Nira susugi ira voli na luvedra, era vakaraitaka sara ga nira dauloloma.”
9. Ena veisau vakacava na nodra ivakarau na manumanu ena veigauna se bera mai?
9 Meda kua ni kurabuitaka na kena tukuni ena iVolatabu nida na veiyaloni kei ira na manumanu. (Wilika Aisea 11:6-9; 65:25.) Na cava na vuna? Nanuma tiko na ka e tukuna o Jiova vei Noa kei na nona vuvale ena nodratou bula mai na Waluvu: “Na rerevaki kemudou, kei na domobula e na vukumudou, ena kani ira na manumanu kecega ni vanua.” Nikua e levu na manumanu era dro nira raici keda me rawa nira bula. (Vkte. 9:2, 3) Ia o Jiova e rawa ni kauta tani vakalalai na nodra rere me rawa nida veiyaloni kei ira, me vaka a nakita taumada ena ivakatekivu. (Osea 2:18) Sa na dua dina na gauna marautaki qori vei ira kece era bula e vuravura!
‘ENA QUSIA NA WAINIMATA KECE’
10. Na cava eda dau tagi kina?
10 Ena gauna e raica kina o Solomoni “na veivakasaurarataki kece sa caka e ruku ni mata-ni-siga,” e yasovaka: “Raica, sa vakawai na matadra era sa vakasaurarataki, ka sa sega e vakacegui ira.” (Dauv. 4:1) E via tautauvata qori nikua, se sa qai ca sara. O cei vei keda nikua e sega ni bau tagi? E macala ga ni so na gauna eda tagi nida marau. Ia levu ga na gauna eda tagi nida rarawa vakalevu.
11. Na italanoa vakaivolatabu cava e tarai iko?
11 Vakasamataka mada na levu ni italanoa vakaciriloloma eda wilika ena iVolatabu. Ena gauna e takali kina o Sera ni sa yabaki 127, e “lako mai ko Eparaama me yasovaki Sera, ka tagicaki koya.” (Vkte. 23:1, 2) Ni vakamoce o Neomai vei rau na vugona yalewa erau yada, “a ratou sa tagi vakadomoilevu cake,” oti ni vosa tale vei rau o Neomai eratou ‘veitagicaki tale vakadomoilevu.’ (Ruci 1:9, 14) A tauvimate o Tui Esekaia qai voleka sara ni mate, e masuta na Kalou qai “tagi vakalevu,” a tarai Jiova sara ga qori. (2 Tui 20:1-5) E vakatubu luluvu tale ga na italanoa ni nona cakitaki Jisu o Pita. Ni rogoca o Pita na tagi ni toa, a “curu i tuba qai tabalaka na tagi.”—Maciu 26:75.
12. Era na vakila vakacava na vakacegu dina na lewenivanua ena Duanaudolu na Yabaki ni Veiliutaki i Karisito?
12 Nida sotava e levu na ka rarawa, eda gadreva dina na veivuke kei na veivakacegui. Qori sara ga na ka era na vakila o ira na bula ena Duanaudolu na Yabaki ni Veiliutaki i Karisito: “[Na Kalou] ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi.” (Vkta. 21:4) Sa bau totoka dina ni sa na sega na lolosi, tagiyaso kei na mosi, ia e okati tale ga ena yalayala ni Kalou me na kau laivi na iotioti ni keda meca—o mate. Ena yaco vakacava qori?
‘O IRA KECE NA TU ENA IBULUBULU ERA NA TUCAKE MAI’
13. E vakaleqa vakacava o mate na bula ni kawatamata me tekivu mai na nona valavala ca o Atama?
13 Ena gauna a valavala ca kina o Atama, a tekivu sara ga e kea me lewai keda o mate me vaka e dua na tui. E sega ni tarova rawa qori e dua, e sega tale ga ni dua na tamata ivalavala ca me dro bula mai kina, qai vakavuna ga vakalevu na lomabibi kei na lolosi. (Roma 5:12, 14) E vica vata gona na milioni era sa ‘rerevaka na mate,’ qori e ‘vakabobulataki ira ena nodra bula taucoko.’—Iper. 2:15.
14. Na cava ena yaco ni sa vakamalumalumutaki o mate?
14 Na iVolatabu e tukuna na gauna sa na ‘vakamalumalumutaki kina na iotioti ni meca, o mate.’ (1 Kor. 15:26) Era na vakila na kena yaga e rua na ilawalawa. O ira na “isoqosoqo levu” ni tamata i Jiova era bula tiko ena gauna qo, era na rawa ni bula sara yani ena vuravura vou me tawamudu. Era rawa tale ga ni vakila na kena yaga o ira na lewe bilioni era sa takali nira na rawa ni vakaturi. Vakasamataka mada na nodra marau kei na nodra nanamaki na isoqosoqo levu mera kidavaki ira na vakaturi mai ena gauna qori. Nida dikeva na italanoa vakaivolatabu me baleti ira na vakaturi, eda na kila toka kina na ka ena yaco ena gauna se bera mai.—Wilika Marika 5:38-42; Luke 7:11-17.
15.Ena tarai iko vakacava na nomu raica na nodra vakaturi na wekamu lomani?
15 Vakasamataka mada na rua na matavosa qo, “dua na ka nodratou marau” kei na “era vakacaucautaka na Kalou.” Ke o donuya na veivakaturi ena gauna oya, de dua o na cakava tale ga qori. Io, eda na marau dina nida raica na nodra vakaturi na wekada lomani. A tukuna o Jisu: “Sa voleka na gauna mera rogoca na domona o ira kece na tu ena ibulubulu mera tucake mai.” (Joni 5:28, 29) E sega ni dua e se bau raica e dua na ka va ya, ena dua dina vei ira na ka vakasakiti duadua “e sega ni rairai” eda vakanamata tu kina.
NA KALOU ENA “KA KECE GA VEI IRA NA TAMATA KECE GA”
16. (a) Na cava meda talaucaka kina mai vu ni lomada na veika totoka eda vakanamata tu kina? (b) Na cava e tukuna o Paula me vakayaloqaqataki ira kina na lotu vaKarisito e Korinica?
16 Io, dua dina na ituvaki totoka era na marautaka o ira era yalodina tiko ga vei Jiova ena gauna dredre qo! E se bera ni yaco na veika totoka e yalataki, na noda vakasamataka tiko na veika qori ena vukei keda meda kauaitaka ga na veika e bibi, eda na sega ni vakawelei ena veika vakavuravura ena sega ni tudei. (Luke 21:34; 1 Tim. 6:17-19) Ena noda sokalou vakavuvale, nida veitalanoa kei ira na mataveitacini, nida veitalanoa kei ira na vuli iVolatabu kei na tataleitaki, meda talaucaka mada ga mai vu ni lomada na veika totoka eda vakanamata tu kina. Qori ena coba dei kina ena noda vakasama kei na lomada na noda inuinui. Oya sara ga na ka e dau cakava na yapositolo o Paula me vakayaloqaqataki ira kina na tacina vakayalo. Na ka e tukuna e vukei ira na lotu vaKarisito mera vakasamataka na ka ena yaco ena icavacava ni Duanaudolu na Yabaki ni veiliutaki i Karisito. Tovolea mo vakasamataka na ibalebale ni vosa i Paula ena 1 Korinica 15:24, 25, 28.—Wilika.
17, 18. (a) A vakayacori vakacava ena ivakatekivu na matavosa “ka kece ga na Kalou vei ira na tamata kece ga”? (b) Na cava ena cakava o Jisu me vakalesuya mai na duavata kei na veiyaloni?
17 Na matavosa “rawa ni ka kece ga na Kalou vei ira na tamata kece ga” e vakamacalataka vinaka sara ga na ka ena yaco ena icavacava ni Duanaudolu na Yabaki ni Veiliutaki i Karisito. Na cava na kena ibalebale qori? Vakasamataka tale mada na were o Iteni nirau se lewena o Atama kei Ivi na vuvale i Jiova e vakilai kina na veiyaloni kei na duavata. O Jiova na Turaga Cecere ni lomalagi kei vuravura e liutaki ira sara ga na nona ibulibuli kece, agilosi kei na tamata. A rawa nira veivosaki kei Jiova, sokalou vua, ra vakalougatataki tale ga. Qori na sala e ‘ka kece ga kina na Kalou vei ira na tamata kece ga.’
18 A vakaleqai na veiwekani talei qori ni saqata na veiliutaki cecere i Jiova na tamata ena veivakamuai i Setani. Ia me tekivu mai na 1914, sa cakava tiko na Matanitu vakaMesaia na veika ena vakalesuya mai na duavata kei na veiyaloni qori. (Efeso 1:9, 10) Ena vakayacori ena Duanaudolu na Yabaki ni Veiliutaki i Karisito na veika totoka kece “e sega ni rairai.” Oti sa na yaco na “icavacava,” qori na icavacava ni Veiliutaki i Karisito ena Duanaudolu na Yabaki. Na cava ena yaco tarava? E macala ni sa ‘soli vei Jisu na lewa kece mai lomalagi kei vuravura,’ ia e sega ni vaqara rogo o Jisu. E sega ni via suguta na itutu i Jiova. E yalomalumalumu o Jisu me “solia lesu na veiliutaki ni matanitu vua na nona Kalou na Tamana.” Io, e dau vakayagataka o Jisu na nona itutu dokai kei na nona lewa me “vakalagilagia kina na Kalou.”—Maciu 28:18; Fpai. 2:9-11.
19, 20. (a) Era na vakaraitaka vakacava o ira na vakarurugi ena veiliutaki ni Matanitu ni Kalou nira ciqoma na veiliutaki cecere i Jiova? (b) Na veika totoka cava eda na marautaka ena veigauna se bera mai?
19 Ena loma ni gauna qori, era sa na uasivi na lewe i vuravura era vakarurugi ena veiliutaki ni Matanitu ni Kalou. Era na muria na ivakaraitaki i Jisu nira yalomalumalumu ra qai tu vakarau ni tokona na veiliutaki cecere i Jiova. Ke ra vakaraitaka nira vinakata me nodra iliuliu o Jiova, era na vakabulai ena iotioti ni veivakatovolei. (Vkta. 20:7-10) Ni oti qori, o ira kece na talaidredre, se ra mani tamata se ka bula vakayalo, era na vakarusai vakadua. Sa na dua dina na gauna marautaki qori! Era na duavata ena marau na vuvale kece i Jiova e lomalagi kei vuravura, ni na ‘ka kece ga o koya vei ira na tamata kece ga.’—Wilika Same 99:1-3.
20 Ni o vakasamataka tiko na veika totoka ena vakayacora na Matanitu ni Kalou, vakacava ena uqeti iko qori mo kauaitaka qai saga mo cakava na loma ni Kalou? O na vakadeitaka me kua ni vakawelei iko na inuinui kei na veivakacegui lasu e dulaka tu na vuravura i Setani? O vakadeitaka sara ga mo tokona qai vakacerecerea na veiliutaki i Jiova? Me laurai mada ga ena ka o cakava ni o vinakata dina mo cakava qori me tawamudu. O na qai marautaka na vakacegu kei na bula sautu, sega wale ga ni duanaudolu na yabaki, ia me tawamudu!
[iYaloyalo ena tabana e 11]
Ni sa vakacavara o Jisu na nona ilesilesi vakatui, ena yalomalumalumu me solia lesu vei Tamana na lewa ni Matanitu ni Kalou