Cici Tiko ga ena Vosota

“Meda qai ciciva tiko ga ena vosota na cere e tu e matada.”—IPER. 12:1.

1, 2. E vakatauvatana ena cava na yapositolo o Paula na bula vaKarisito?

E VEIYABAKI e dau vakayacori na veitaucici balavu ena levu na vanua. E dua ga na nodra inaki o ira na dauveitaucici vinaka—mera qaqa. Ia eso tale na daucici era vinakata ga mera vakacavara vinaka na veitaucici.

² Na iVolatabu e dau vakatauvatana na bula vaKarisito ena veitaucici. A cavuta na mataqali veitaucici va qori na yapositolo o Paula ena imatai ni nona ivola vei ira na lotu vaKarisito e Korinica makawa. E vola: “Oni sa lecava ni levu era cici ena veitaucici, ia e dua ga e vakaicovi? Moni cici ena kena ivakarau moni rawata kina na icovi.”—1 Kor. 9:24.

3. Na cava e tukuna kina o Paula ni dua ga ena vakaicovitaki ena veitaucici?

³ Vakacava, e tukuna tiko e keri o Paula ni na dua ga ena rawata na icovi ni bula, qai sega ni yaga na nodra cici na kena vo? Sega! O ira kece na daucici era na tereni vakaukaua ra qai sasaga vagumatua mera qaqa. E vinakata tale ga o Paula me va qori na nodra sasaga na tacina lotu vaKarisito nira saga tiko na bula tawamudu. Nira cakava qori, e rawa nira nuitaka kina na icovi ni bula. Io, ena veitaucici vaKarisito, era na vakaicovitaki kece o ira na vakacavara vinaka na veitaucici.

4. Na cava meda nanuma tiko me baleta na veitaucici ni bula?

⁴ E veivakauqeti dina na vosa oya, e bibi tale ga vei keda kece eda vakaitavi tiko nikua ena veitaucici ni bula. Na vuna? Baleta na icovi ni bula e lomalagi se ena vuravura Parataisi, e sega ni katumi rawa. E balavu dina na veitaucici qo qai sega ni rawarawa, ni levu kina na ka e rawa ni vakalatilati, veivakawelei, e rerevaki tale ga. (Maciu 7:13, 14) E rarawataki dina ni so era malumalumu se ra muduka sara ga na nodra qaravi Jiova. Na cava na icori kei na ka rerevaki eda na sotava ena veitaucici ni bula? O na levea vakacava? Na cava o rawa ni cakava mo vakacavara vinaka kina na veitaucici, mo qaqa tale ga?

Bibi na Vosota me Rawa na Qaqa

5. Na cava e tukuna tiko o Paula ena Iperiu 12:1?

⁵ Ena nona ivola vei ira na lotu vaKarisito Iperiu e Jerusalemi kei Jutia, e cavuta tale kina o Paula eso na ka e baleta na veitaucici. (Wilika Iperiu 12:1.) E sega ni tukuna wale ga o Paula na vuna eda vakaitavi kina ena veitaucici, e dusia tale ga na ka meda cakava meda rawata kina na qaqa. Ni bera nida dikeva na ka eda rawa ni vulica ena ivakasala veiuqeti i Paula vei ira na lotu vaKarisito Iperiu, meda raica mada se cava e uqeti Paula me vola na ivola qori kei na cava e uqeti ira tiko kina na wiliwili mera cakava.

6. Na cava era cakava na iliuliu ni lotu vei ira na lotu vaKarisito?

⁶ O ira na lotu vaKarisito ena imatai ni senitiuri, vakabibi vei ira na tiko e Jerusalemi kei Jutia, era sotava e levu na ituvaki dredre kei na veivakatovolei. Era tusaqati vei ira na iliuliu ni lotu vakaJiu, o ira qo na dau vakacolasau vei ira na lewenivanua. Ena dua na gauna e liu a yaco na nodra inaki na iliuliu qori ena nodra beitaki Jisu Karisito ni dau vorata na veiliutaki, e mani vakamatei kina me vaka e dua na daubasulawa. Era vakadeitaka tale ga nira na tusaqati ira tiko ga na nona imuri. Eda wilika ena Cakacaka na nodra dau veivakarerei kei na nodra tusaqati ira na lotu vaKarisito, a rairai tekivu qo ni oti ga na ka veivakurabuitaki a yaco ena Penitiko 33 S.K. Qo e vakadredretaka sara ga na nodra bula na lotu vaKarisito yalodina.—Caka. 4:1-3; 5:17, 18; 6:8-12; 7:59; 8:1, 3.

7. Ni volavola o Paula vei ira na lotu vaKarisito, na gauna dredre cava era donuya tu?

⁷ Era bula donuya o ira na lotu vaKarisito qori na gauna e voleka ni cava kina na ivakarau vakaJiu. Sa tukuna tu vei ira o Jisu ni na vakarusai na matanitu Jiu tawayalodina. A tukuna tale ga vei ira na nona imuri na ka ena yaco ni bera na gauna qori, a vakasalataki ira ena ka mera cakava me rawa nira vakabulai. (Wilika Luke 21:20-22.) Na cava gona mera cakava? A veivakasalataki kina o Jisu: “Dou qarauni kemudou de bibi na lomamudou ena kana vakasivia kei na gunu vakasivia kei na lomaocaocataki ni bula, ena qai yaco vakidacala vei kemudou na siga ya.”—Luke 21:34.

8. Na cava eso na ka e vakamalumalumutaki ira vakayalo na lotu vaKarisito?

⁸ A volavola o Paula vei ira na Iperiu ni sa oti e rauta ni 30 na yabaki na gauna e cavuta kina o Jisu na vosa qori. Na cava era sotava na lotu vaKarisito ena loma ni 30 na yabaki qori? Eso era rawai nira lomaocaocataka vakasivia na nodra bula ni veisiga ra qai muduka na nodra vulica na veika e baleti Jiova, e sega tale ga ni vinaka na nodra veiwekani kei koya. (Iper. 5:11-14) Eso era nanuma ni na rawarawa na bula ke ra muria na ka era cakava tu e levu na Jiu. O ira na Jiu qori, era vakabauta na Kalou; era se muria tiko ga e levu na Lawa a soli vei Mosese. Eso tale na lotu vaKarisito era rawai se vakarerei vei ira na lewe ni ivavakoso mera muria na Lawa qori kei na ivakavuvuli vakaJiu. Na cava ena tukuna o Paula me uqeti ira kina na lotu vaKarisito mera yadra tiko ga vakayalo ra qai cici tiko ga ena vosota?

9, 10. (a) Ena icavacava ni wase 10 ni Iperiu, na cava e veivakauqeti kina o Paula? (b) Na cava e vola kina o Paula na nodra ivakaraitaki ni vakabauta na ivakadinadina ena gauna makawa?

⁹ E vakasakiti dina na nona uqeti vaKalou o Paula me vakayaloqaqataki ira na lotu vaKarisito Iperiu. Ena wase 10 ni nona ivola, e tukuna o Paula ni Lawa e “iyaloyalo ga ni ka vinaka ena yaco mai” qai vakaraitaka vakamatata na yaga ni isoro ni veivoli i Karisito. A uqeti ira na dauwiliwili o Paula ena icavacava ni wase qo: “E bibi na vosota ena nomuni cakava na loma ni Kalou, ena qai nomuni na ka e yalataki. Ena ‘dua na gauna lekaleka,’ ‘ena qai yaco mai o koya e lako tiko mai, ena sega ni berabera sara.’”—Iper. 10:1, 36, 37.

¹⁰ Ena Iperiu wase 11, e vakamacalataka kina vakamatata o Paula na ibalebale ni noda vakabauta dina na Kalou. A cakava qori ena nona cavuta na nodra ivakaraitaki makawa eso na tagane kei na yalewa era vakabauta. Na cava e vakamacalataka kina na vakabauta ni bera ni vakamacalataka na vosota? A vinakata mera kila na lotu vaKarisito qori, ni bibi na vosota kei na yaloqaqa me rawa nira vakabauti Jiova dina. Na nodra ivakaraitaki vinaka na dauveiqaravi i Jiova ena gauna makawa ena uqeti ira na Iperiu mera vosota na veivakatovolei kei na ituvaki dredre era sotava. Koya gona, ni oti na nona vakamacalataka o Paula na nodra vakabauta o ira na dauveiqaravi ena gauna makawa, e rawa ni tukuna kina: “Nira vakavolivoliti keda e levu sara na ivakadinadina era vaka na o, meda biuta laivi na ka bibi kece kei na ivalavala ca eda dau tacori rawarawa kina, meda qai ciciva tiko ga ena vosota na cere e tu e matada.”—Iper. 12:1.

“iVakadinadina Era Vaka na O”

11. Ena uqeti keda vakacava na noda vakananuma matua na nodra ivakaraitaki na ‘ivakadinadina levu vaka na o’?

¹¹ O ira na ‘ivakadinadina levu vaka na o,’ era sega ni lai sarasara wale tu ga ena nodra lai raica me qaqa o ira na daucici era taleitaka se na nodra timi. Ia era vakaitavi sara tiko ga, me vakataki ira na dau veitaucici. O ira qo era vakacavara vinaka sara na veitaucici. E dina nira sa takali, na nodra ivakaraitaki e rawa ni uqeti ira era se qai ka vou ena veitaucici. Vakasamataka mada na nona kila e dua na daucici nira tu wavoliti koya se saravi koya tu eso sa vakacavara na veitaucici. E macala ga ni na uqeti koya qori me qaqa, se vakaevei? O ira na ivakadinadina makawa qo era vakadinadinataka ni rawa na qaqa ena veitaucici vakaivakatakarakara, se mani vakacava na kena dredre. Koya gona, nira vakananuma matua na lotu vaKarisito Iperiu ena imatai ni senitiuri na nodra ivakaraitaki o ira na “ivakadinadina era vaka na o,” e rawa nira vakayaloqaqataki kina ra qai ‘cici tiko ga ena vosota.’ Eda rawa tale ga ni cakava qori nikua.

12. E yaga vakacava vei keda na nodra ivakaraitaki o ira e cavuta o Paula?

¹² E levu vei ira na yalodina e cavuta o Paula era sotava e levu na leqa e tautauvata kei na kena eda sotava. Kena ivakaraitaki o Noa, a bula ena gauna e voleka ni vakarusai kina na vuravura ena waluvu. O keda tale ga eda sa bula tu qo ena icavacava ni veika vakavuravura. A tukuni vei Eparama kei Sera me rau biuta na nodrau vanua me rau lai tokona na sokalou dina, me rau waraka tale ga na kena vakayacori na yalayala i Jiova. Eda uqeti meda kua ni kauaitaka ga na ka e baleti keda, meda saga na nona veivakadonui o Jiova kei na veivakalougatataki e vakarautaka tu vei keda. E lakova o Mosese e dua na vanualiwa e vakarerevaki, me rawa ni yacova na Vanua Yalataki. O keda tale ga eda bula donuya tu qo na icavacava ni veika vakavuravura, eda vakanamata tale ga ina vuravura vou sa yalataki tu. Io, ena yaga dina ke da vakananuma matua na veika era sotava na dauveiqaravi qori, na ka era rawata kei na ka era lekata, na ka era vinaka kina kei na nodra malumalumu.—Roma 15:4; 1 Kor. 10:11.

Era Rawata Vakacava?

13. Na itavi dredre cava me cakava o Noa, e rawata vakacava qori?

¹³ A rawa vakacava vei ira na dauveiqaravi i Jiova mera vosota ra qai vakacavara vinaka na veitaucici? Dikeva na ka e vola o Paula me baleti Noa. (Wilika Iperiu 11:7.) ‘E se sega ni bau raica’ o Noa na kena ‘luvuci na vuravura me vakawabokotaki kina na ka kece.’ (Vkte. 6:17) E se sega tale ga ni bau yaco e liu, ia e sega ni vakatitiqataka o Noa ni na yaco dina. Na vuna? A vakabauta ni na yaco na ka kece e tukuna o Jiova. E sega ni bau raica o Noa ni dredre na ka e lesi vua me cakava. Ia e “cakava vakakina.” (Vkte. 6:22) Vakasamataka mada na ka kece me cakava o Noa—ta na waqa, kumuni na manumanu, vakarautaka na kakana me ratou kania e waqa kei na kedra na manumanu, na nodra vakasalataki na lewenivanua, e saga tale ga me ratou kaukaua tiko ga vakayalo na nona vuvale—e sega sara ga ni rawarawa na itavi me “cakava.” Ia na nona vakabauta o Noa kei na nona vosota e vakalougatataki kina qai vakabulai kei ratou na lewe ni nona vuvale.

14. Na ituvaki dredre cava erau vosota o Eparama kei Sera, na cava eda vulica kina?

¹⁴ O Paula a cavuti rau tarava o Eparama kei Sera, ni rau dua vei ira na ‘ivakadinadina e vaka na o era vakavolivoliti keda.’ E rau biuta na ka kece e rau dau cakava e Uri, rau qai sega ni kila na ka ena yacovi rau ena gauna se bera mai. E rau ivakaraitaki vinaka dina ena dei ni nodrau vakabauta, rau qai talairawarawa ena ituvaki dredre erau sotava. Ena vuku ni nona vakuai koya o Eparama ena ka kece, e veiganiti kina me vakatokai me “tamadra kece na vakabauta.” (Roma 4:11) O Paula e cavuta ga eso na ivakaraitaki ni nona vakabauta o Eparama, baleta era sa kila tu e levu ena gauna oya na kena itukutuku. Ia e veiuqeti na ka eda vulica mai na ka e vola o Paula: “Ena vakabauta, era yalodina o ira kece qo [wili kina o Eparama kei na nona vuvale] me yacova na mate, e dina ni se sega ni vakayacori vei ira na vosa ni yalayala, ia era raica vakayawa tu ga, era marautaka, era qai tukuna raraba nira vulagi, ni na lekaleka wale nodra tiko ena vanua.” (Iper. 11:13) E macala ga ni nodrau vakabauta kei na nodrau veiwekani voleka kei na Kalou e uqeti rau me rau cici tiko ga ena vosota.

15. Na cava e uqeti Mosese me vakanadakuya na tiko vinaka kei na rogo?

¹⁵ O Mosese e dua tale na dauveiqaravi ivakaraitaki vinaka e wili tiko ena “ivakadinadina era vaka na o.” E vakanadakuya o Mosese na tiko vinaka kei na rogo, “e digia ga me vakacacani vata kei ira na tamata ni Kalou.” Na cava a uqeti koya me cakava kina qori? E tukuna o Paula: “Ni vakanamata tu ena soli ni nona icovi. . . . Ni dei tu ga, e vaka ga e raici koya tiko e tawarairai.” (Wilika Iperiu 11:24-27.) E sega ni temaki o Mosese me “marautaka na ivalavala ca e lekaleka wale na kena kamica.” Na nona vakabauta dina na Kalou kei na nona yalayala e rawa kina me yaloqaqa qai vosota tiko ga. E rawa tale ga vua me liutaki ira na Isireli mera biuti Ijipita mera gole ina Vanua Yalataki.

16. Eda kila vakacava ni sega ni cudruvaka o Mosese na nona sega ni vakatarai me curu ina Vanua Yalataki?

¹⁶ E rau sega ni raica o Mosese kei Eparama na vakayacori ni yalayala ni Kalou. Nira vakarau curuma na Isireli na Vanua Yalataki, e tukuni vei Mosese: “Ko na raica ga na vanua; ia ko na sega ni lako yani kina, ki na vanua ka’u sa solia vei ira na Isireli.” Na vuna a tukuni kina qori, baleta ena dua na gauna e liu e rau a rarawataka kei Eroni na nodra talaidredre na Isireli, e rau mani “talaidredre [vua na Kalou] e na kedra maliwa na Isireli mai na wai ni Meripa.” (Vkru. 32:51, 52) Vakacava, a cudruvaka o Mosese na nona sega ni vakatarai me curu ina Vanua Yalataki? Sega, e vosa vakalougatataki ira ga na yavusa kece qai tinia ena veivosa qo: “O ni sa kalougata, na Isireli: O cei sa tautauvata kei kemuni, a matanitu sa vakabula ko Jiova, o koya nai sasabai me vukei kemuni, kei nai seleiwau ko ni sa vakaiukuuku kina!”—Vkru. 33:29.

Na ka Eda Vulica

17, 18. (a) Ena noda veitaucici ni bula, na cava eda vulica vei ira na “ivakadinadina era vaka na o”? (b) Na cava ena veivosakitaki ena ulutaga e tarava?

¹⁷ E macala mai na noda dikeva na nodra ivakaraitaki eso era wili ena ‘ivakadinadina era vaka na o era vakavolivoliti keda,’ ni bibi me dei na noda vakabauta na Kalou kei na nona yalayala, me rawa nida vakacavara vinaka kina na veitaucici. (Iper. 11:6) Me kua ni vakaraitaki ga ena so na gauna na vakabauta, ia me laurai sara ga ena ivakarau ni noda bula kece. Eda sega ni vakataki ira e sega na nodra vakabauta, nida kila na ka ena yaco ena veigauna se bera mai. Eda rawa ni raici “koya tiko e tawarairai” da qai rawa ni cici tiko ga ena vosota.—2 Kor. 5:7.

¹⁸ E sega ni rawarawa na veitaucici vaKarisito. Ia e rawa nida vakacavara vinaka na veitaucici. Eda na veivosakitaka ena ulutaga e tarava eso tale na ivukevuke yaga.

O Rawa ni Vakamacalataka?

• Na cava a vola kina o Paula e levu na ka me baleti ira na dauveiqaravi makawa ivakadinadina?

• Ena uqeti keda vakacava na noda vakananuma na nodra ivakaraitaki na ‘ivakadinadina era vaka na o era vakavolivoliti keda’ meda cici tiko ga ena vosota?

• Na cava o vulica ena nodratou ivakaraitaki na ivakadinadina yalodina o Noa, Eparama, Sera, kei Mosese?

[iYaloyalo ena tabana e 19]

E rau yalorawarawa o Eparama kei Sera me rau biuta na vanua vinaka o Uri