“Nona Dodonu na Gone me Tuberi Vakayalo”

ENA ika9 Tiseba, 2008, a vakayacori kina e dua na vuli ena dua na koronivuli ni vuli torocake mai Suwiteni ena kena valataki na nodra dodonu na gone, e vakatokai na Swedish Academy for the Rights of the Child e kena usutu “Nona Dodonu na Gone me Tuberi Vakayalo.” E levu sara na nanuma era vakaraitaka na mata mai na lotu ni Suwiteni (Church of Sweden), so tale na matalotu ni veivanua vaKarisito, na lotu Musilimi, kei na ilawalawa e valataka na dodonu ni lewenivanua se na humanist movement.

A vosa ena bose e dua na italatala: “Sega ni dua e vakamacalataka rawa na bibi ni itukutuku ena iVolatabu ena nodra tubu vakayalo na gone.” Ena rawati vakacava na veika era gadreva vakayalo na gone ena vakayagataki ni so na tikinivolatabu?

“Na tikinivolatabu kei na itukutuku e volai kina e dusimaki ira na gone mera dikevi ira ra qai vakananuma vakatitobu,” e kaya na italatala. E qai vakamacalataka eso “na italanoa me baleti Atama kei Ivi, o Keni kei Epeli, Tevita kei Koliaci, nona sucu o Jisu, o Sakiusa na daukumuni vakacavacava, na vosa vakatautauvata i koya na gone cidroi kei na kai Samaria dauloloma.” Qo “eso ga na ivakaraitaki me dusimaka na nona vakasama [e dua na gone] ina veika bibi e vauca na bula ni kawatamata, vaka na veivakaisini, na veivosoti, veisorosorovi, veicati, na itovo toro sobu, veiyaloni, na veilomani vakaveitacini kei na loloma dina.” E tomana: “Na veitikina kece qo e kotora e dua na ivakarau e rawa ni veisautaka nona bula e dua, me cakacakataki, qai yaga.”

Dua na ka vinaka na kena uqeti na wili iVolatabu. Ia vakacava, e rawa vei gone me “dikevi koya tiko qai vakananuma vakatitobu” na veika e wilika ena iVolatabu qai donu vinaka na ka e vulica kina?

E vinakati mada ga vei ira na qase cake me vakamatatataki vei ira eso na tikinivolatabu. Me kena ivakaraitaki, e tukuna vei keda na iVolatabu me baleta e dua na turaga, a sega ni matata vua na ka dina vakayalo ena nona “dikevi koya tiko qai vakananuma vakatitobu” e dua na tikina ena iVolatabu. Qori na matanivanua ni Iciopea. A wilika tiko na parofisai i Aisea, ia a sega ni kila na kena ibalebale. Ni via kila vakamatata na nona itukutuku na parofita, a marautaka na nona vakamacala vua na tisaipeli o Filipi. (Caka. 8:​26-40) E sega ni o koya ga na turaga ni Iciopea ya a vinakata me vakamatatataki vua na tikinivolatabu. O keda kece eda gadreva me vakamatatataki vei keda na tikinivolatabu​—vakauasivi o ira na gone.

E vakaroti keda na iVolatabu: “A ka lialia sa vauci e lomana na gone.” (Vkai. 22:15) Era gadreva na gone mera tuberi ra qai dusimaki, e nodra itavi na nodra itubutubu mera vakavulici ira vakayago, vakayalo qai yavutaki qori ena iVolatabu kei na ivakavuvuli ena loma ni ivavakoso vaKarisito. E dodonu mera vakavulici va qo na gone. Nira se lalai, era gadreva mera vukei me rawa nira dei ena yavu ni ivakavuvuli vakaivolatabu ena nodra tubu vakayalo mera yaco kina mera “matua . . . [mera] vakayagataka nodra vakasama . . . me vakaduiduitaka na ka e donu mai na ka e cala.”​—Iper. 5:14.