E Dua e Bula Tiko e Kea​—O Cei

E curu i valenilotu e dua na kena marama mai Urope, e qumia toka e dua na rosario, qai tekiduru ena vakarokoroko ena ivakatakarakara kei Meri. E dua na vuvale mai Aferica erau sova na yaqona ni valagi na gin ena yasa ni nona ibulubulu na wekadrau dokai. E nuitaka e dua na cauravou mai Saucamerika ni rawa ni veitaratara kei na nona agilosi vakatawa ke lolo qai vakasama vakatitobu. E vakama na pepa duiroka e dua na bete mai Esia me isoro vei ira na vu.

NA CAVA era tautauvata kina? Era vakabauta ni rawa nida veitaratara kei na veikabula vuku vakayalo era tiko mai lomalagi, e tu tale ga vei ira na kaukaua me vakamua na bula ni kawatamata. Koya gona na vakabauta oya e sega ni ka vou se me kurabuitaki. Ia e drukataki ga na levu ni ivakavuvuli veisaqasaqa se o cei e bula tiko mai lomalagi.

O ira na Musilimi era sokaloutaka e dua na Kalou​—o Allah.a O ira na lotu ni Veivanua vaKarisito era vakabauta na Letoluvakalou, e Kalou na Tamana, Luvena, kei na Yalo Tabu. Era vakabauta na lotu Idu ni sivia e duanaudolu na kalou tagane kei na kalou yalewa. Eso era kaya ni kalou e tiko tale ga ena so na manumanu, vunikau, vatu, kei na uciwai. Ia eso tale era vakabauta e levu na italanoa e tabaki ena ivola me baleti ira na agilosi, timoni, kalou tagane kei na kalou yalewa, vaka kina na kena e vakaraitaki ena iyaloyalo se porokaramu ena tivi.

Ni levu tu na ivakavuvuli veisaqasaqa me baleta na kalou tagane kei na kalou yalewa, e veisaqasaqa tale ga na iwalewale ni veitaratara e vakavuvulitaki me baleti ira. E macala gona ni dua ga na iwalewale ni veitaratara ena donu. Vakasamataka mada qo: Ni bera ni o qirita e dua, o via kila mada o cei o qirita, o na vakadeitaka ni bula tiko, ena rogoca tale ga na nomu qiri. Ena tawayaga ke o saga mo veitaratara kei na dua e sega ni bula. Ia ena rerevaki sara ke da veitaratara kei na dua eda sega ni kila.

O cei gona e bula tiko mai lomalagi? E sega ni tukuna wale ga na iVolatabu na kena isau, ia e vakamacalataka tale ga meda veitaratara kei cei, kei na ka meda namaka. Wiliwili sara yani. De dua o na kurabuitaka na veika e vakatakila na iVolatabu.

[iVakamacala e ra]