Taro na Dauwiliwili . . .

Na Cava e Vinakata Kina na Kalou Vei Ira Nona Dauveiqaravi Mera Vakawati ga kei Ira era Vakabauta Vata?

▪ Na Lawa ni Kalou vei ira na Isireli e okati kina na ivakaro me baleti ira na lewe ni veimatanitu voleka: “Mo ni kakua talega ni veiwatini kei ira; mo ni kakua ni musuka na luvemuni yalewa vua na luvena tagane, se kauta na luvena yalewa me nona na luvemuni tagane.” (Vakarua 7:3, 4) Na cava e biu kina na vakatatabu qori?

E kila o Jiova ni vinakata o Setani me vakadukadukalitaki ira vakailawalawa na Isireli, qori ena nona saga me vakamuai ira ina qaravi kalou lasu. E vakasalataki ira gona na Kalou ni o ira era sega ni vakabauta ‘era na vagolea tani na luvedra mera kua ni muri koya, era na qarava tale ga eso na kalou tani.’ Ke ra sega ni qaqarauni, e rawa ni yaco kina na leqa. Ke ra rawai na Isireli mera qarava eso tale na kalou, ena sega ni vakadonui ira na Kalou, ena sega ni taqomaki ira, ena rawarawa tale ga ni vakaleqai ira na meca. Koya gona, ena qai basika vakacava na Mesaia yalataki ena matanitu o Isireli? E macala ga ni tiko na vuna vinaka e via vakamuai ira kina na Isireli o Setani mera vakawati kei ira era sega ni vakabauta vata.

Ia nanuma tiko ni kauaitaki ira yadua nona tamata na Kalou. E kila nira na vakila yadua na marau kei na tiko vinaka ke ra veiwekani voleka kei na nodra Kalou. Vakacava e tiko na vuna vinaka e kauaitaka kina o Jiova na rerevaki ni vakawati kei na dua e sega ni vakabauta? Dikeva mada na ivakaraitaki i Tui Solomoni. E kila vinaka na ivakasala i Jiova me baleta na vakawati kei ira na sega ni vakabauta vata: “Ni ra na vukica vakaidina na lomamudou me muri ira na nodra kalou.” De dua a nanuma o Solomoni ni sega ni gadrevi me muria na ivakasala ni Kalou, e sega tale ga ni ganiti koya baleta ni levu nona vuku. A qai vakalecalecava na ivakasala. Na cava a qai yaco? “A ra sa vukica vakatani na lomana ko ira na watina . . . me muri ira na kalou tani.” Dua dina na ka vakaloloma! E sega ni vakadonui Solomoni o Jiova, era tawase tale ga na nona tamata ena vuku ni nona tawayalodina.—1 Tui 11:2-4, 9-13.

Eso era na vakaiulubaletaka na ivakaro qori. Kena ivakaraitaki o Maloni na Isireli, a vakawatitaki Ruci na yalewa ni Moapi, a qai yaco me vakasakiti na nona vakabauta. Ia na vakawati kei na yalewa ni Moapi e dua na vakatulewa rerevaki. E sega ni gadrevi gona me vakacaucautaki o Maloni ena nona vakawatitaki Ruci na yalewa ni Moapi, dina ni a qai mai qaravi Jiova ena gauna sa mate kina o Maloni. Na taci Maloni o Kilioni e vakawatitaki Oripa, e dua tale ga na yalewa ni Moapi e taleitaka me qarava “nona kalou.” Ia sa oti e vica vata na yabaki nona qaravi Jiova voli o Ruci qai vakawatitaki koya o Poasa. Era vakatokai koya e muri na Jiu me “ivakairataki vinaka ni dua e tavuki ena lotu vakaJiu.” Na nodrau vakawati o Poasa kei Ruci erau vakalougatataki kina.—Ruci 1:4, 5, 15-17; 4:13-17.

Vakacava e ka vakayalomatua meda nanuma ni ivakaraitaki i Maloni kei Ruci e rawa nida vakaiulubaletaka kina na ivakasala i Jiova meda vakawati kei na dua eda vakabauta vata? Ia ke va qori noda nanuma, eda na vaka ga e dua na dauveimauilavo e winitaka e dua na uma ilavo levu, qai tukuna ni veimauilavo e rawa ni sala vinaka meda rawata kina noda bula.

Na iVolatabu e uqeti ira na lotu Vakarisito nikua mera vakawati “ga ena Turaga.” E veivakasalataki tale ga ena rerevaki ni noda “vauci vata kei na dua e sega ni vakabauta.” Na ivakasala qo e baleti ira sara ga na lotu Vakarisito dina era vaqara tiko ena gauna qo me dua na kedra isa. Ia vei ira era sa vakawati kei na dua e sega ni tautauvata nodra vakabauta, na iVolatabu e vakarautaka na ivakasala yaga ena gauna e basika kina na ituvaki dredre. (1 Korinica 7:12-16, 39; 2 Korinica 6:14) Na ivakasala kece qori e dusia ni vinakata o Jiova, na Kalou e tauyavutaka na vakawati, mera marau o ira na qaravi koya—ke ra sa vakawati se sega.