TÀN 2
Jikpá Ðɛkpɛɖɛkpɛ Ðé
KPƆ́N lee ayikúngban ɔ ɖè ɖò fí é! Nǔ e ɖ’eji lɛ é nyɔ́ ɖɛkpɛ mɛ! Kpɔ́n gbehan lɛ, atín lɛ, folowa lɛ kpo kanlin lɛ kpo. Xlɛ́ fí e ajinakú kpo kinikini lɛ kpo ɖè é.
Mɛ̌ ka bló jikpá ɖɛkpɛɖɛkpɛ elɔ? Mawu wɛ. Mǐ ni kpɔ́n lee Mawu sɔnǔ nú ayikúngban ɔ nú mǐ gbɔn é.
Jɛ nukɔn hwɛ̌ ɔ, Mawu bló gbehan lɛ bɔ ye cyɔn ayikúngban ɔ nukún mɛ. É lɛ́ bló atín kpɛví lɛ, zunkàn lɛ kpo atín ɖaxó lɛ kpo. Nǔ enɛ lɛ zɔ́n bɔ ayikúngban ɔ nyɔ́ ɖɛkpɛ, ɖé lɛ ɖ’emɛ bo nɔ lɛ́ na mǐ nùɖuɖu víví lɛ.
Enɛ ɔ gudo ɔ, Mawu bló hweví bɔ é na nɔ tɔxwé bo bló xɛ bonu é na zɔn gbɔn jɔhɔn mɛ. É bló kanlin kpɛví lɛ kpo ɖaxó lɛ kpo ɖi awǐi, cuku, sɔ́. Kanlin tɛ lɛ a ka tuùn? Nǔ ɖó na víví nú mǐ, ɖó Mawu bló nǔ enɛ lɛ bǐ nú mǐ.
Bo na dó fó ɔ, Mawu kán akpáxwé ayikúngban ɔ tɔn ɖé, bo dó bló jikpá bunɔ ɖé, bo ylɔ ɖɔ jikpá Edɛnu tɔn. Jikpá ɔ ɖó blɔ̌ ɖebǔ ǎ. Nǔ e ɖ’emɛ lɛ é bǐ wɛ nyɔ́ ɖɛkpɛ. Jlǒ Mawu tɔn wɛ nyí ɖɔ ayikúngban ɔ bǐ ni huzu lee é bló jikpá elɔ ɖó é.
Lɛ́ kpɔ́n ɖiɖe jikpá ɔ tɔn. A ka tuùn nǔ e Mawu mɔ ɖɔ é hwe ɖò fí é à? Mǐ ni kpɔ́n.
Genèse 1:11-25; 2:8, 9.