TÀN 115
Palaɖisi Yɔyɔ̌ Ɔ
KPƆ́N atín, folowa ɖɛkpɛɖɛkpɛ kpo só ɖaxó ɖaxó enɛ lɛ kpo. Finɛ nyɔ́ ɖɛkpɛ à cé? Kpɔ́n lee agbanlín ɔ ɖò nǔ ɖu wɛ ɖò alɔ vǐ kpɛví enɛ tɔn mɛ gbɔn é. Lɛ̌ kpɔ́n kinikini lɛ kpo sɔ́ e ɖò gbehan wɛ́lɛ́ wɛ́lɛ́ mɛ dɔ̌n lɛ é kpo. É ka nɔ jló we ɖɔ xwé towe ni nɔ fí mɔhunkɔtɔn à cé?
Mawu jló ɖɔ a ni nɔ gbɛ̀ kaka sɔyi ɖò palaɖisi mɛ ɖò ayikúngban jí. É jló ɖɔ a ni mɔ wuvɛ̌ alɔkpa alɔkpa e mǐ nɔ mɔ ɖò égbé lɛ é ɖebǔ ǎ. Nǔ e Biblu d’akpá tɔn nú mɛ e na nɔ palaɖisi yɔyɔ̌ ɔ mɛ lɛ é ɖíe: ‘Mawu na nɔ xá ye. Kú, avǐ alǒ wuvɛ̌ mimɔ sɔ́ na tíìn ǎ. Nǔ xóxó lɛ ko bú.’
Jezu wɛ na kpé nukún dó azɔ̌ ɖagbe enɛ lɛ wu. A ka tuùn hwe ɔ nu à? Hwenu e é na ɖè nǔnyanyawiwa kpo nǔnyanyawatɔ́ lɛ kpo sín ayikúngban ɔ jí gudo é wɛ. A ka flín ɖɔ hwenu e Jezu ɖò ayikúngban jí é ɔ, é gbɔ azɔn alɔkpa alɔkpa lɛ bǐ nú mɛ lɛ, bo tlɛ lɛ́ fɔ́n mɛ sín kú à? Jezu bló nǔ enɛ lɛ bo dó xlɛ́ nǔ e é na bló ɖò ayikúngban ɔ bǐ jí ɖò axɔsuɖuɖu tɔn hwenu é.
Lin tamɛ kpɛɖé dó lee ayikúngban ɔ jí na nyɔ́ nɔ ɖò palaɖisi yɔyɔ̌ ɔ mɛ sɔ́ é jí! Jezu kpo mɛ e è cyan lɛ é kpo wɛ na ɖò acɛ kpa wɛ ɖò jixwé hwenɛnu. Acɛkpatɔ́ enɛ lɛ na kpé nukún dó mɛ e ɖò ayikúngban ɔ jí lɛ é wu, bo na bló bɔ ye na nɔ awǎjijɛ mɛ. Mi nú mǐ ni kpɔ́n nǔ e mǐ ɖó na wà, bɔ Mawu na na mǐ gbɛ̀ mavɔmavɔ ɖò palaɖisi yɔyɔ̌ ɔ mɛ é.
Nǔɖexlɛ́mɛ 21:3, 4; 5:9, 10; 14:1-3.