Nukplɔnkplɔn 5

Etɛwɛ Nyí Linlin Mawu Tɔn nú Ayikungban Ɔ?

Etɛwu wɛ Jehovah blo ayikungban ɔ? (1, 2)

Etɛwu wɛ ayikungban ma ko nyí paladisi egbé ǎ? (3)

Etɛwɛ na jɔ do gbɛtɔ nyanya lɛ wu? (4)

Ðo nukɔn mɛ ɔ, etɛwɛ Jezu na wà nú azinzɔnnɔ lɛ? mɛkpikpo lɛ? cyɔ lɛ? (5, 6)

Bona mɔ ɖagbenu e ja ɖo nukɔn lɛ ɔ, etɛwɛ a ɖo na wà? (7)

1. Jehovah blo ayikungban elɔ nú gbɛtɔ lɛ ni ɖugbɛ vivi ɖo e ji kaka sɔyi. É jló ɖɔ̀ ayikungban ni gɔ nú gbɛtɔ ɖagbe lɛ ee na ɖo awajijɛ mɛ tɛgbɛ. (Psaumes 115:16; Isaïe 45:18) Ayikungban na nyí viva gbeɖe ǎ; e na tin kaka sɔyi.—Psaumes 104:5; Ecclésiaste 1:4.

2. Cobonu Mawu na blo gbɛtɔ ɔ, É kan akpá ayikungban ɔ tɔn kpɛɛvi ɖe bo dó blo paladisi e nyɔ́ ɖɛkpe é ɖe. É ylɔ ɛ ɖɔ̀ jikpa Edɛnu tɔn. Fi enɛ ɔ wɛ é sɔ sunnu kpó nyɔnu nukɔn tɔn ɔ kpán do, mɛ enɛ lɛ ɔ wɛ nyí Adamu kpó Ɛva kpán. Mawu jló ɖɔ̀ yé ni ji vǐ bo gɔ́ ayikungban ɔ bǐ jí. Kpɛɛɖe kpɛɛɖe ɔ yé na hɛn ayikungban bǐ zun paladisi ɖe.—Genèse 1:28; 2:8, 15.

3. Adamu kpó Ɛva kpó huhwɛ gbɔn jlo yiyi do gbà sɛ́n Mawu tɔn gbla mɛ. Enɛ wu wɛ zɔ́n bɔ Jehovah nya yě sín jikpa Edɛnu tɔn mɛ. Paladisi nyí hinhɛn bú. (Genèse 3:1-6, 23) Amɔ̌ Jehovah wɔn linlin tɔn dó ayikungban elɔ wu ǎ. É dó akpa ɖɔ̀ émi na hɛn ɛ huzu paladisi fí e gbɛtɔ lɛ na nɔgbɛ kaka sɔyi é. Nɛ é ka na blo enɛ ɔ gbɛn?—Psaumes 37:29.

4. Cobonu ayikungban na huzu paladisi de ɔ, mɛ nyanya lɛ ɖo na nyí ɖiɖe sín. (Psaumes 37:38) Enɛ ɔ na jɔ̀ ɖò Amageɖɔ́ɔ́n hwenu, e wɛ nyí ahwan ɖaxo Mawu tɔn nú vivɔnu nunyanya lɛ tɔn. Enɛgudo ɔ, Sataan na nyí zizeɖò gankpa mɛ nú xwè 1 000. Enɛ ɔ ɖe xlɛ ɖɔ̀ mɛ nyanya ɖebu sɔ na tín bo na hɛn ayikungban elɔ gble ǎ. Mɛ Mawu tɔn lɛ kɛ́ɖɛ́ wɛ na gán.—Nǔɖexlɛ́mɛ 16:14, 16; 20:1-3.

5. Enɛgudo ɔ, Jezu Klisu na ɖugan Axɔsu ɖɔhun ɖò ayikungban elɔ ji nú xwè 1 000. (Nǔɖexlɛ́mɛ 20:6) Kpɛɛɖe kpɛɛɖe ɔ, é na ɖè nunyanya sín ayixa kpó agbaza mítɔn kpó mɛ. Mí na huzu gbɛtɔ mímɛ́ ɖi lee Adamu kpó Ɛva kpó ɖe ɖ’ayi cobo huhwɛ é. Hwenɛnu ɔ azɔnjijɛ, nyɔɖaxokpikpo, kpó kú kpó sɔ na tin ǎ. Azɔ̀n ná gbɔ̀ nú azinzɔnnɔ lɛ, lobɔ nyɔɖaxo lɛ na huzu dɔ́nkpɛvu.—Job 33:25; Isaïe 33:24; Nǔɖexlɛ́mɛ 21:3, 4.

6. Ðò ganɖuɖu Xwè Afatɔ́ɔ́n Jezu Klisu tɔn hwenu ɔ, gbɛtɔ nugbonɔ lɛ na w’azɔ bo na hɛn ayikungban ji bǐ huzu paladisi. (Luka 23:43) Humɔ̌, livi gbɛtɔ e ko ku lɛ na fɔn do gbɛ̀ ɖò ayikungban jí. (Mɛsɛ́dó 24:15) Enyí yé blo nǔ e Mawu byɔ ɖò yé sí ɔ, yé na gbɛ̀ kpò ɖo gbɛnɔ wɛ ɖò ayikungban jí kaka sɔyi. É ma nyí mɔ ǎ ɔ, yé na vɔ̀ kún yetɔn bǐ kaka sɔyi.—Jaan 5:28, 29; Nǔɖexlɛ́mɛ 20:11-15.

7. Hwenɛnu ɔ linlin dohwenu Mawu tɔn nú ayikungban elɔ na ɖì. A jlo na mɔ ɖagbenu sɔguɖo tɔn e jawe enɛ lɛ à? Enyí mɔ̌ ɔ, a ɖo na ɖò nukplɔn do Jehovah wu we tɛgbɛ bo na sètónu nú nubyɔɖomɛsi tɔn lɛ. Kpiple xa Kunnuɖetɔ Jehovah tɔn lɛ ɖò Kpletɛnxɔ Axɔsuɖuta tɔn yetɔn mɛ na gɔalɔ nú wè bɔ a na wàmɔ.—Isaïe 11:9; Eble lɛ 10:24, 25.

[Tinmɛ E Nɔ Nɔ Ðiɖe Glɔ É, Wexwɛ 10]

Paladisi e bu é

[Tinmɛ E Nɔ Nɔ Ðiɖe Glɔ É, Wexwɛ 11]

Ðo Amageɖɔ́ɔ́n gudo ɔ, ayikungban ji bǐ na huzu paladisi ɖe