TÀN 71
Mawu Dó Palaɖisi Ðé Sín Akpá
PALAÐISI e Mawu na ko xlɛ́ gbeyiɖɔ tɔn Ezayi é sín ɖiɖe ɖíe. Jonasi kú bɔ é bló hwenu kpɛɖé gudo é wɛ Ezayi nɔ gbɛ̀.
Tinmɛ xókwin palaɖisi ɔ tɔn wɛ nyí “jikpá” alǒ fí ɖɛkpɛɖɛkpɛ ɖé. É ka flín nùɖé we, bɔ mǐ ko kplɔ́n wá yì à? Palaɖisi ɔ cí jikpá ɖɛkpɛɖɛkpɛ e Jehovah bló nú Adamu kpo Ɛva kpo é ɖɔhun, kabǐ? Ayikúngban ɔ bǐ ka na nyí palaɖisi gbè ɖokpo à?
Jehovah ɖɔ nú gbeyiɖɔ tɔn Ezayi ɖɔ é ni wlan lee palaɖisi sɔ e ja é tɔn na cí é ɖ’ayǐ. É ɖɔ: ‘Hla kpo lɛngbɔ̌ kpo na nɔ kpɔ́ ɖò fífá mɛ. Nyibuví kpo kinikiniví kpo na nɔ ɖu nǔ ɖó kpɔ́, bɔ yɔkpɔvu na nɔ nyì ye. Enyi vǐ kpɛví na bo tlɛ d’ayihun ɖò dan aɖivɛnɔ kpá ɔ, é na xú aɖǔ i ǎ.’
Mɛ gègě wɛ nɔ ɖɔ: ‘Nǔ mɔhun sixu jɛ kpɔ́n gbeɖé ǎ. Wuvɛ̌ kɛɖɛ wɛ ɖò ayikúngban jí, mɔ̌ jɛn é ka na nɔ kaka sɔyi.’ Amɔ̌, lin tamɛ kpɔ́n: Xwé alɔkpa tɛ gbè Mawu ka sɔ́ Adamu kpo Ɛva kpo ɖó?
Palaɖisi mɛ wɛ Mawu sɔ́ ye ɖó. Tó e ye tlí n’i é wɛ ka zɔ́n bɔ ye sɔ́ ɖó acɛ bo na nɔ xwé ɖɛkpɛɖɛkpɛ enɛ gbè ǎ. Ye wá kpò bo kú. Amɔ̌, Mawu d’akpá ɖɔ emi na na nǔ ɖagbe e Adamu kpo Ɛva kpo hɛn bú lɛ é mɛ e yí wǎn nú emi lɛ é.
Ðò palaɖisi e ja é mɛ ɔ, nǔ ɖebǔ sɔ́ na doya nú mɛ ǎ. Fífá e wu nǔ bǐ vɔ ɖè é wɛ na tíìn. Mɛ bǐ na ɖó hunsin ɖagbe, bo na ɖò awǎjijɛ mɛ. Nǔ na lɛ́ wá nɔ lee Mawu ba ɖɔ é ni nɔ ɖò bǐbɛ̌mɛ é pɛ́ɛ́. Amɔ̌, mǐ na wá kplɔ́n nǔ dó lee Mawu na wà enɛ gbɔn é wu.
Isaïe 11:6-9; Nǔɖexlɛ́mɛ 21:3, 4.