TÀN 8
Mɛ Jiganjigan lɛ Ðò Ayikúngban ɔ Jí
ENYI a ɖò yìyì wɛ bo mɔ mɛɖé ja kpíkpé we gbé, bɔ é ɖi gà yì mɛtlu atɔn jɛji mɔ̌ bo lɛ́ hwǎn ɔ, ado na hu we à cé? A na mɔ ɖɔ mɛ jiganjigan ɖokpo ɖíe. Gbɛtɔ́ mɔhun lɛ ko nɔ ayikúngban jí kpɔ́n. Biblu ɖɔ wɛnsagun ɖé lɛ wɛ nyí tɔ́ yetɔn. Nɛ nǔ ka nyí mɔ̌ gbɔn?
A ka flín ɖɔ wɛnsagun nyanya e nyí Sataan é nɔ ɖò gǎn dó wɛ bo na dɔn mɛ bǐ dó nǔ nyanya mɛ à? É ko tɛnkpɔn bo na dɔn wɛnsagun Mawu tɔn ɖé lɛ dó nǔ nyanya mɛ. Nugbǒ ɔ ye mɛ ɖé lɛ ɖótó é. Ye jó azɔ̌ e Mawu zɔ́n ye ɖò jixwé é dó, bo zé agbaza gbɛtɔ́ tɔn dó bo wá ayikúngban jí. A ka tuùn nǔ e zɔ́n é à?
Biblu ɖɔ jí wɛnsagun enɛ lɛ mɔ ɖɔ nyɔnu e ɖò ayikúngban jí lɛ é nyɔ́ ɖɛkpɛ bɔ ye jló na nɔ kpɔ́ xá ye. Enɛ wu ɔ, ye wá ayikúngban jí bo da nyɔnu enɛ lɛ. Biblu ɖɔ nǔ nyanya wɛ ye wà, ɖó jixwé wɛ wɛnsagun lɛ ɖó na nɔ.
Vǐ e wɛnsagun enɛ lɛ sín asì mɔ xò bo jì lɛ é gbɔn vo. Enyi vǐ enɛ lɛ ɖò kpɛví ɔ, è nɔ yawu ɖ’ayi wu tlolo ɖɔ ye gbɔn vo ǎ. Amɔ̌, enyi ye jɛ susu jí ɔ, ye nɔ huzu mɛ jiganjigan.
Mɛ jiganjigan enɛ lɛ baɖa ɖesu. Ye nɔ xò daka mɛ lɛ wu, ɖó ye hwǎn bo ɖó hlɔnhlɔn. Ye nɔ tɛnkpɔn bo na dɔn mɛ lɛ kpo hlɔnhlɔn kpo dó nǔ nyanya mɛ.
Enɔki kú; amɔ̌ nya ɖagbe ɖevo lɛ́ nɔ ayikúngban ɔ jí. Nɔwee wɛ. É nɔ wà jlǒ Mawu tɔn hwebǐnu.
Mawu ɖɔ nú Nɔwee gbè ɖokpo ɖɔ hwe ɔ nu sù nú emi, bɔ emi na sú kún dó nú mɛ nyanya lɛ. Amɔ̌, Mawu na hwlɛn Nɔwee, xwédo tɔn kpo kanlin gègě kpo gán. Mǐ ni kpɔ́n lee é wà mɔ̌ gbɔn é.
Genèse 6:1-8; Judi 6.