TÀN 42
Sɔkɛtɛkɛtɛ Ðé Ðɔ Xó
A KA sè sɔkɛtɛkɛtɛ ɖɔ xó kpɔ́n à? A sixu ɖɔ: ‘Gbeɖé, kanlin lɛ nɔ ɖɔ xó ǎ.’ Amɔ̌, sɔkɛtɛkɛtɛ ɖé ɖɔ xó bɔ Biblu ɖɔ. Mi nú mǐ ni kpɔ́n lee nǔ nyí mɔ̌ gbɔn é.
Izlayɛli-ví lɛ ko ɖibla yì ayikúngban Kanaa tɔn jí. Axɔsu Mɔwabu tɔn Balaki ɖi xɛsi dó ye wu. Enɛ wu ɔ, é dó wɛn sɛ́dó nya nùnywɛtɔ́ e è nɔ ylɔ ɖɔ Balamu é, bonu é na dónu Izlayɛli-ví lɛ. Balaki dó akpá akwɛ gègě tɔn nú Balamu. Enɛ wu ɔ, Balamu xá sɔkɛtɛkɛtɛ tɔn jí, bo ɖido Balaki gɔ́n.
Jehovah jló ɖɔ Balamu ni dónu togun Emitɔn ǎ. Enɛ wu ɔ, é sɛ́ wɛnsagun ɖé dó, bɔ é hɛn hwǐ gaga ɖé, bo gbò ali nú Balamu. Balamu mɔ wɛnsagun ɔ ǎ, loɔ sɔkɛtɛkɛtɛ tɔn ka mɔ ɛ. Enɛ wu ɔ, sɔkɛtɛkɛtɛ ɔ nɔ hɔn nú wɛnsagun ɔ bo nɔ zɛ ali. Gudo mɛ ɔ, sɔkɛtɛkɛtɛ ɔ gbɔ bo mlɔ́ ali ɔ jí. Balamu sìn xomɛ ɖesu, bo xò sɔkɛtɛkɛtɛ ɔ ɖó kpò wu.
Jehovah hun nu nú sɔkɛtɛkɛtɛ Balamu tɔn, bɔ é jɛ xó ɖɔ n’i jí. Sɔkɛtɛkɛtɛ ɔ kanbyɔ ɛ ɖɔ: ‘Etɛ un ka wà nú we, bɔ a ɖò xixo mì wɛ?’
Balamu yí gbè n’i ɖɔ: ‘A sɔ́ mì ylɔ xlonɔ. Enyi un hɛn hwǐ wɛ ɔ, na ko hu we!’
Sɔkɛtɛkɛtɛ ɔ kanbyɔ ɛ ɖɔ: ‘Un ka ko bló mɔ̌ xá we kpɔ́n gbeɖé à?’
Balamu yí gbè ɖɔ: ‘Eǒ.’
Enɛ gudo ɔ, Jehovah hun nukún nú Balamu, bɔ é mɔ wɛnsagun ɔ hɛn hwǐ, bo ɖò te ɖò ali ɔ jí. Wɛnsagun ɔ ɖɔ n’i ɖɔ: ‘Etɛwu a ka ɖò sɔkɛtɛkɛtɛ towe xó wɛ? Un wá, bo na gbò ali nú we, ɖó a ɖó na yì dónu Izlayɛli-ví lɛ ǎ. Enyi sɔkɛtɛkɛtɛ towe ma ko hɔn nú mì ǎ ɔ, na ko hu we, bo jó éyɛ dó nyì gbɛ̀.’
Balamu ɖɔ: ‘Un hu hwɛ. Un tuùn ɖɔ a ɖò te ɖò ali ɔ jí ǎ.’ Wɛnsagun ɔ jó Balamu dó, bɔ é yì mɔ Balaki. É tɛnkpɔn bo na dónu Izlayɛli-ví lɛ. Amɔ̌, Jehovah gbɔn jǐ tɔn bo xoɖɛ ɖagbe nú ye azɔn atɔn.
Nombres 21:21-35; 22:1-40; 23:1-30; 24:1-25.